له پاکستان څخه د افغان کډوالو د ستنېدو په لړ کې په پېښور کې مېشت افغان زدهکوونکي وايي، چې په نوي تعلیمي کال کې داخله نهورکول کیږي. دغه زده کوونکي وايي، چې تعلیمي کال یې پر خلاصېدو دی او افغانستان ته په ستنېدو د خپلو زدهکړو دوام ته اندېښمن دي.
د سعودي عربستان بهرنیو چارو وزارت د سوریې په حُمص ښار کې د امام علي بن ابيطالب په جومات کې د جمعې د لمانځه پر مهال شوې چاودنه په کلکه غندلې ده. ریاض د مذهبي ځایونو په نښه کول او د ولسي وګړو وژل مردود بللي دي.
په روسیه کې یوې محکمې یوه افغان ته د اومسک ښار په مرکزي برخه کې د ښځو په ځورولو او پر یو کس د چړې د برید په تور درې کاله بند او شاوخوا ۸۹۰۰ډالره جریمې پر ورکړه محکوم کړ.
د طالبانو د صنعت او سوداګرۍ وزارت وايي، چې د یاد وزارت وزیر کندهار ته د خپل سفر پرمهال په دغه ولایت کې د نویو جوړېدونکو دوو صنعتي پارکونو له ځمکو څخه لیدنه کړې ده. دوی زیاتوي، چې یو صنعتي پارک د کندهار هوايي ډکر ته څېرمه او بل د ژېړۍ په ولسوالۍ کې جوړیږي.
په فاریاب کې سیمه ییزو سرچینو افغانستان انټرنشنل ته ویلي، چې یو پخوانی سرتېری د ایران څخه له راستنېدو وروسته د فاریاب په بلچراغ ولسوالۍ کې په ډزو ووژل شو. سرچینو ویلي چې دا سړی د کولیان په کلي کې د طالبانو د قوماندان طیب صداقت د کسانو لخوا وژل شوی دی.
یو شمېر بهر مېشتو افغانانو د ایران له چارواکو څخه په یوه سرخلاصي لیک کې غوښتنه کړې، چې د تخار د پخواني امنیه قوماندان جنرال اکرام الدین سریع د ترور په اړه دې شفافي پلټنې وکړي.
په تاجکستان کې د روسیې سفیر سمن ګریګوریف وایي، په افغانستان کې بې ثباته امنیتي وضعیت، په ځانګړي ډول د تاجکستان پولې ته نږدې سیمو کې، د روسیې او تاجکستان ترمنځ پوځي او امنیتي همکارۍ دوه برابره مهمې کړې دي.
د طالبانو د چارو ادارې رییس نورالحق انور وايي، چې یادې ډلې خپلې داخلي او بهرنۍ پالیسۍ خپلو ګټو او لومړیتوبو ته په کتو جوړې کړي دي او د بل چا په فرمایشونو او مداخله کوونکو نظرونو غوږ نه ګوروي.
د بې پولې ډاکټرانو سازمان وایي، چې افغانستان یو بل د بحرانونو څخه ډک سخت کال هم تیر کړ، خو د دې سازمان روغتیایي ټیمونو په خورا سختو شرایطو کې عامه خلکو ته خدمات وړاندې کړي او لا هم دوام لري.
د طالبانو د لوړو زده کړو وزارت وايي، چې ددې ډلې د مشر ملاهبت الله د حکم پر اساس دې ټول مدارس یوازې د پوهنې او لوړو زده کړو وزارتونو په عمومي ازموینه بسنه وکړي. دوی زیاتوي که د مدرسې لخوا سند ورکول کيږي نو د یادو وزارتونو د ازموینې نومرې په کې ولیکل شي.
د هندي چارواکو ویلي، چې د ال قاعده شبکې د یو شکمن غړی د ډیجیټلي وسایلو له پلټنې وروسته یې داسې معلومات ترلاسه کړي چې د شکمن کس د انټرنیټ ای اپي ادرسونه له افغانستان سره تړاو لري. د هند د پونه ایالت څارنوالۍ ویلي، چې یاده قضیه دې د هند د ترهګرۍ ضد څانګه په بشپړ ډول وڅېړي.
د مقاومت جبهې په نوم د طالبانو مخالفې وسله والې ډلې د یوې خبرپاڼې په خپرولو سره ویلي، چې تېره ورځ یې د بغلان ولایت د نهرین ولسوالۍ په کاریز سیمه کې د طالبانو پر یو پوسته برېد کړی او درې وسله وال طالبان یې وژلي دي.
د سندونو له مخې د طالبانو تر واک لاندې د افغاني سرې میاشتې ټولنې عمومي مشر شهاب الدین دلاور د خپلې لور خسر «مولوي حفیظ الله» په سره میاشت ټولنه کې په لومړی بست کې د خپل مشاور په توګه ټاکلی دی. سرچینې وايي، چې مولوي حفیظ الله د سرې میاشتې د قراردادونو په فساد کې پراخ لاس لري.
د اوکراین ولسمشر ولادیمیر زیلینسکي ویلي، چې په نږدې راتلونکې کې به د امریکا له ولسمشر ډونالډ ترمپ سره وګوري.
د «حالوش» په نوم د بشري حقونو اژانس د راپور له مخې، د سیستان او بلوچستان په زراباد ولسوالۍ کې یو افغان د ایراني ځواکونو له خوا د تعقیب پرمهال په ډزو کې وژل شوی دی. د وژل شوي افغان نوم قدیر د علي وزیر زوی ښودل شوی دی.
د سوريې دولتي اژانس ویلي، چې د جمعې په ورځ د سوریې د حمص ښار په جومات کې د لمانځه پرمهال چاودنه شوې چې له امله یې پنځه کسان وژل شوي او ۲۱ تنه نور ټپیان شوي دي.
د طالبانو د پکتیکا والي وايي، د دنیا ټول انسانیت پر دې ډلې بندیرونه لګولي،خو بیا هم دا ډله له داخلي بودیجې څخه خدمات وړاندې کوي. عبدالخالق عابد دا څرګندونې ددې ولایت د ډیورنډ کرښې په اوږدو کې پرتو ولسوالیو کې د یوې مدرسې او ښوونځیو د ودانیو پرانیستغونډې ته د وینا پرمهال کړي دي.
سرچینو افغانستان انټرنشنل - پښتو ته ویلي، چې د طالبانو د لوړو زده کړو وزارت په کابل پوهنتون کې درې تنه بهرني استادان ګمارلي دي. د طالبانو یاد اقدام ته د پوهنتون ځینو استادانو غبرګون ښودلی او وايي، د طالبانو دغه ډول کړنې د افغانستان د پوهنتونونو او لوړو زده کړو بنست ته زیان اړوي.
د ایران د بهرنیو چارو په وزارت کې د جنوبي اسیا څانګې پخواني مشر، سید رسول موسوي، د جنرال اکرامالدین سریع د ترور پېښې د څېړلو لپاره د یوه «مسلکي څېړنیز ټیم» د جوړېدو غوښتنه کړې ده.
د طالبانو د کندهار ولایت د اطلاعاتو او کلتور رییس انعام الله سمنګاني ویلي، په نړۍ کې د اسلامي نظام د راتګ لپاره زیاتي مبارزې ترسره شوي او قربانۍ ورکړل شوي دي، خو دا هڅې په افغانستان کې د الله په پیرزوینه بریالۍ شوي دي.
د ننګرهار څلورمې ناحیې انګور باغ اړوند مجبوراباد سیمې اوسېدونکو افغانستان انټرنشنل - پښتو ته ویلي، چې شرعي قبالې په لاس کې لري خو د طالبانو د سرې میاشتې ټولنې د رییس شهاب الدین دلاور اړوند کسان یې په زوره له خپلو کورونو وباسي. دوی زیاتوی،ځیني کسان یې وهلي او زنداني کړی هم دي.