د ایران د بهرنیو چارو په وزارت کې د جنوبي اسیا څانګې پخواني مشر، سید رسول موسوي، د جنرال اکرامالدین سریع د ترور پېښې د څېړلو لپاره د یوه «مسلکي څېړنیز ټیم» د جوړېدو غوښتنه کړې ده.
د طالبانو د کندهار ولایت د اطلاعاتو او کلتور رییس انعام الله سمنګاني ویلي، په نړۍ کې د اسلامي نظام د راتګ لپاره زیاتي مبارزې ترسره شوي او قربانۍ ورکړل شوي دي، خو دا هڅې په افغانستان کې د الله په پیرزوینه بریالۍ شوي دي.
د ننګرهار څلورمې ناحیې انګور باغ اړوند مجبوراباد سیمې اوسېدونکو افغانستان انټرنشنل - پښتو ته ویلي، چې شرعي قبالې په لاس کې لري خو د طالبانو د سرې میاشتې ټولنې د رییس شهاب الدین دلاور اړوند کسان یې په زوره له خپلو کورونو وباسي. دوی زیاتوی،ځیني کسان یې وهلي او زنداني کړی هم دي.
د ترکیې د کډوالو ادارې وایي، چې په تېر یو کال کې په دغه هېواد کې د قانوني اسنادو نه لرلو له امله ۱۵۲زره کډوال نیول شوي، چې تر ۴۲ زرو ډېر یې افغان وګړي دي.
د روسیې د صنعت سرچینو د جمعې په ورځ رویټرز خبري اژانس ته ویلي، چې روسیې د جنوري له میاشتې تر د نوامبر پورې په موده کې افغانستان او د پخواني شوروي اتحاد د مرکزي اسیا جمهوریتونو ته د مایع پټرولیم ګاز صادرات نږدې دوه چنده کړي دي، چې اندازه یې ۱.۰۱۶ میلیون میټریک ټنو ته رسیدلي دي.
د ازبکستان د احصایي ملي ادارې خبر ورکړی، چې د روان ۲۰۲۵کال په تېرو ۱۱ میاشتو کې دغه هېواد افغانستان ته د ۱.۳ مېلیارډ ډالرو په ارزښت توکي صادر کړي دي. د راپور له مخې؛ افغانستان له روسیې او چین وروسته د ازبکستان درېیم لوی صادراتي شریک دی.
د متحده عربي اماراتو ولسمشر شيخ محمد بن زايد النهيان د یوه لوړپوړي پلاوي په مشرۍ د پاکستان د لومړي وزیر شهباز شريف په رسمي بلنه د دغه هېواد پلازمېنې اسلاماباد ته رسېدلی دی.
د افغانستان د پخواني ولسمشر لومړي مرستیال امرالله صالح په تهران کې د جنرال اکرامالدین سریع وژنه غندلې ده. ښاغلي صالح د ایران له حکومته غوښتي، چې د خپلو امنیتي ظرفیتونو په کارولو سره دې د نوموړي د وژنې قضیه په هر اړخیزه توګه وڅېړي.
د ایران روغتیا وزارت راپور ورکړی، چې په دغه هېواد کې د سوځېدو پېښو کچه د نړۍ د منځنۍ کچې پرتله اته برابره لوړه ده او هر کال ۱۵۰زره د سوځېدو پېښې پهکې ثبتېږي. دغه وزارت ویلي، هرکال په ځانګړو مرکزونو کې د نږدې ۲۵ تر ۲۸زره کسانو درملنه کېږي او شاوخوا ۳زره کسان د سوځېدو له امله مري.
د اسټرالیا لومړي وزیر انتوني البانېزي ویلي، چې حکومت یې غواړي د ملي زړورتیا یو ځانګړی نښان جوړ کړي؛ څو د هغه عامو وګړو او د بېړنیو مرستو کارکوونکو ستاینه وشي، چې د سېډني ښار د بونډای ساحل په «ترهګریز» برید کې یې زړورتیا وښوده.
ازادۍ جبهې د طالبانو تر واک لاندې افغانستان کې د شیعه اسماعیليه وګړو اوسنی وضعیت له بشري حقونو ښکاره سرغړونه بللې او خبرداری یې ورکړی، چې دغه وضعیت نه یوازې د اسماعیلیه ټولنې بقا؛ بلکې په افغانستان کې د سولهییز ګډ ژوند او مذهبي تنوع بنسټونه له جدي ګواښ سره مخ کوي.
په کندهار کې د طالبانو د کور او ښار جوړولو رییس عبدالمتین سعید خبر ورکړی، چې د دغه ولایت ژړۍ ولسوالۍ کې د بېرته راستنېدونکو کډوالو لپاره د ځمکو د وېش لړۍ پیل شوې ده. د هغه په وینا؛ دغه ښارګوټی ۳زره جریبه ځمکه لري، چې په ۴زره کورنیو به ووېشل شي.
د امریکا د کالیفورنیا ایالت په لانکاسټر ښار کې د کرسمس په ورځ د ډزو په پېښه کې یو ۱۶ کلن ځوان وژل شوی او څلور نور ټپیان دي. د معلوماتو له مخې؛ دغه پېښه د پنجشنبې په ورځ (د مرغومي ۴مه) د ای انجېلا کورټ په سیمه کې شوې ده.
په توکیو کې د افغانستان سفارت اعلان کړی، چې روان وضعیت ته په پام او د جاپان د بهرنیو چارو وزارت له مشورو وروسته د ۲۰۲۶کال د جنورۍ له ۳۱مې نېټې وروسته خپل ټول فعالیتونه دروي.
د سویلي کوریا ځانګړي څارنوال د دغه هېواد پخواني ولسمشر یون سوک یول لپاره د ۱۰ کلن بند سزا غوښتنه کړې. نوموړی تېرکال د ډسمبر په درېیمه نېټه د پوځي حکومت د اعلانولو له امله د خلکو له پراخو غبرګونونو سره مخ شو.
د طالبانو تر واک لاندې د فرعي ګمرکاتو ریاست خبر ورکړی، چې د دغه ولایت د مرکز لښکرګاه ښار په رېګستان سیمه کې ۲۸ټنه او ۹۰۹ کیلو ګرامه بېکیفیته او تاریختېر درمل لهمنځه وړل شوي دي.
د طالبانو تر واک لاندې د کډوالو ستونزو ته د رسېدنې عالي کمېسیون جمعه (د مرغومي ۵مه) خبر ورکړی، چې تېره ورځ له ایران او پاکستان نه ۶۳۲ کورنۍ چې ټولټال ۳۴۰۱ کسان کېږي؛ افغانستان ته ستنې شوې دي. د دغه کمېسیون په راپور کې راغلي، چې له دغه کډوالو سره ۶۰۸زره افغانۍ مرسته هم شوې ده.
د پاکستان فلمي ستورې او د کډوالو په چارو کې د ملګرو ملتونو د عالي کمېشنرۍ د نېکنیت سفیرې ماهره خان له پاکستان نه د افغان کډوالو پر جبري اېستلو خواشیني څرګنده کړې. د هغې په وینا؛ دغه وضعیت د افغان کډوالو او په ځانګړي ډول د ښځو او ماشومانو لپاره د وېرې لامل شوی.
په داسې حال کې چې په ۲۰۲۵کال کې له یو مېلیون ډېر افغان کډوال افغانستان ته ستانه شوي؛ تازه د کډوالو په چارو کې د ملګو ملتونو عالي کمېشنرۍ خبر ورکړی، چې شاوخوا دوه مېلیونه افغانان لاهم په پاکستان کې مېشت دي.
د شمالي کوریا دولتي خبري اژانس راپور ورکړی، چې د دغه هېواد مشر کېم جونګ اون په پیونګ یانګ کې د وسلو د صنعت له لویو شرکتونو لیدنه کړې ده. راپور زیاته کړه، چې هغه د وسلو د صنعت د لویو شرکتونو د عصري کولو اړوند مسودې هم لاسلیک کړې.
په ننګرهار کې د طالبانو د عامې روغتیا رییس امین الله شریف ویلي، چې په دغه ولایت کې د «پياېماېس» جاپانۍ موسسې لهخوا د ختیځ زون په کچه د جذام (لېپروسي) ناروغۍ د درملنې ځانګړی مرکز پرانیستل شو.