د ایران د تهران ښار پولیسو هغه درې غله نیولي چې له افغان کډوالو یې غلاوې کولې. د یاد ښار د ۵مې حوزې مشر رضا حاتمي وایي، نیولشويو غلو ځانونه د پولیسو په ډول جوړ کړي وو او په دې نوم یې له خلکو پیسې شکولې.
د سوېلي کوريا ولسمشر لي جې ميونګ به راتلونکې اوونۍ د امريکا له ولسمشر ډونالډ ټرمپ سره وويني. په دې لیدنه کې به تر ډېره بریده پر امنيتي او د چين پر موضوعاتو خبرېاترې وشي.
نړۍوالې رسنۍ وايي چې نن (شنبه، اګسټ ۲۳مه) له سهار راهیسې د اسراييلي پوځ په بمباریو او ځمکنیو ډزو کې لږ تر لږه ۱۹ فلسطینیان وژل شوي او لسګونه نور ټپیان دي.
د طالبانو د اطلاعاتو او کلتور وزارت وايي چې په ترکیه کې د دغې ډلې کلتوري اتشه قاري حمیدالله تمکین او ترکیې بلو ولایت دولتي پوهنتون پروفیسر دوکتور مصطفی علي شارلي سره لیدلي دي. شارلي په ترکیه کې د افغان محصلانو استعداد ستایلی دی.
د افغانستان د بدن ښکلا درېیو لوبغاړو د اسیا په ۵۷م پړاو سیالیو کې د برونزو مډالونه د افغانستان په نوم کړل.
د پښتون ژغورنې غورځنګ (پيټياېم) مخګښ غړی حنیف پښتین وايي چې د پاکستان پوځ د خپلو شخصو ګټو لپاره په پښتونخوا کې جګړه ګرمه ساتلې ده.
د طالبانو سترې محکمې خبر ورکړی چې یادې ډلې په غزني ولایت کې د یوې ښځې په ګډون دوو کسانو ته د «اخلاقي فساد» په تور د دُرو وهلو او بند سزا ورکړې ده.
پاکستاني چارواکو د خېبرپښتونخوا د باجور د ناامنه سیمو اوسېدونکو ته د بېرته ورتګ اجازه ورکړې ده. هغوی ادعا کوي چې یاده سیمه نور له ترهګرو څخه پاکه شوې ده.
د ننګرهار لپاره د طالبانو د امربالمعروف ځايي چارواکي وايي، د دغه ولایت په شېرازدو ولسوالۍ کې یوې مېرمن چې غوښتل یې د کورني تاوتریخوالي له کبله ځانوژنه وکړي، ژغورلې ده.
نړۍوالې رسنۍ وايي چې سوریه به نوي بانک نوټونه چاپ او د ارزښت لوړولو لپاره به دوه صفرونه ځنې لېرې کړي. د سوریې چارواکي هیلهمن دي چې دا بدلون به د سوریې د پولي واحد ارزښت لوړ او راکړه ورکړه اسانه کړي.
پاکستانۍ ډان ورځپاڼې لیکلي، په امریکا کې تر ۷ سوو زرو ډېر پاکستانیان مېشت دي چې ډېری یې محصلان دي. د یادې ورځپاڼې د راپور لهمخې، وړه تېروتنه، نیمګړي اسناد او سياسي فعالیتونه هم کولای شي چې هلته د هغوی استوګنه له خطر سره مخ کړي.
ننګرهار کې باوري سرچینو افغانستان انټرنشنل-پښتو ته خبر ورکړی چې د طالبانو امنیتي مسوولان په دغه ولایت کې د یوه پخواني سرتېري د کورنیو د غړو د وژنې په تړاو له خبریالانو سره د معلوماتو له شریکولو ډډه کوي. د سرچینو په وینا، یادې ډلې نن په دې تړاو تنظیمشوی خبري کنفرانس هم لغوه کړ.
په اسلاماباد کې د طالبانو سفیر وايي چې افغان کډوال په پاکستان کې لویې شتمنۍ، پانګونې او ملکیتونه لري او له دغه هېواده یې غوښتي چې باید هغوی ته د راټولولو یا هم د پلورلو لپاره ورته وخت ورکړل شي. هغه اندېښنه ښوولې چې پاکستان د افغانانو اېستلو په تړاو یو اړخیزه پرېکړه کړې.
اېکسپرېس ټرېبیون ورځپاڼې د پاکستان او چین د سوداګرۍ او صنعت ګډې خونې (PCJCCI) سرپرست مشر ظفر اقبال په حواله لیکلي چې د چین او پاکستان اقتصادي دهلېز (CPEC) به د افغانستان د ټولنیز اواقتصادي پرمختګ په برخه کې له سیمې سره ونښلي او له دې لارې به ډېر فرصتونه ورته برابر شي.
ملګري ملتونه وايي د سوډان د چټک ملاتړ ځواکونو (RSF) د اګسټ له ۱۱مې تر ۲۰مې پورې لږ تر لږه ۸۹ ملکيان وژلي دي. د یاد نړۍوال بنسټ په خبره، دا وېره شته چې رېښتینی شمېر تر دې هم لوړ وي.
د طالبانو تر کنټرول لاندې د افغانستان برېښنا شرکت وايي چې له ازبکستاني شرکتونو سره د نويو تړونونو پر بنسټ به د ځینو ولایتونو برېښنا له باوري سرچینو تأمین شي.
د طالبانو د بهرنیو چارو وزارت درېیم سیاسي مرستیال عبدالحی قانت وایي، د دغې ډلې بهرنی سیاست اوسمهال د عکسالعمل پر ځای په سیمه او نړۍ کې د دوی د ګټو پر بنسټ ولاړ دی. هغه زیاتوي چې د سیاست اصول یې «افغانیت او اسلامیت» دی.
په ترهګرۍ ضد چارو کې د ولسمشر ډونالډ ټرمپ سلاکار سباسټین ګورکا وايي: «کېدای شي دا خبره عجیبه ښکاره شي، خو طالبان تر یوه حده د ترهګرۍ ضد جګړه کې زموږ ښه ملګري پاته شوي دي.» هغه ویلي، په افغانستان کې ځینې افراطي ډلې شته چې طالبانو ته هم ګواښ دی.
د هالنډ د بهرنيو چارو وزير کاسپر فېلډکیمپ د اسراييل پر وړاندې د نورو بنديزونو عملي کولو په اړه د خپلې کابینې له مخالفت سره مخ شو او استعفا یې وکړه.
د پاکستان د بهرنیو چارو وزیر اسحاق ډار ویلي چې اسلاماباد له هېڅ هېواد څخه له هند سره د خبرو د منځګړیتوب غوښتنه نهده کړې. نوموړي ټینګار کړی چې پاکستان چمتو دی له نوي ډیلي سره پراخې او هراړخیزې خبرې وکړي، خو هند بیا د دوی ضد تګلارې پراخې کړې دي.
د طالبانو د کډوالو ستونزو ته د رسېدو کمیسیون وايي، چې پرون (جمعه، زمري ۳۱مه) له ایران او پاکستان نه یو زرو او ۶۹۳ افغان کډوالې کورنۍ هېواد ته ستنې شوې دي. د دې کورنیو د غړو شمېر ۶ زره او ۲۰۲ ښودل شوی دی.