په تخار کې د طالبانو امنیې قوماندانۍ خبر ورکړی، چې په دغه ولایت کې یې د نشهيي توکو پر ضد د مبارزې پولیسو په مرکز تالقان ښار کې پر ۹۰ جریبه ځمکه کرل شوي کوکنار لهمنځه وړي دي. د یادې قوماندانۍ د خبرپاڼې له مخې؛ دغه کوکنار د تالقان اړوند په «غریببچه» کلي کې لهمنځه وړل شوي دي.
د طالبانو د کورنیو چارو وزیر سراجالدین حقاني د چین له سفیر ژاو شېنګ سره په لیدنه کې د دواړو هېوادونو ترمنځ د اړیکو پر پراختیا او همکاریو خبرې کړې دي. د طالبانو د کورنیو چارو وزارت د خبرپاڼې له مخې؛ په دغه لیدنه کې د سیمې پر حالاتو هم بحث او خبرې شوې دي.
د طالبانو د ارشاد، حج او اوقافو وزارت خبر ورکړی، چې په تېره یوه اونۍ کې د «اریانا افغان او کامایر» شرکتونو په الوتکو کې د ۳۱ الوتنو له لارې ۹زره او ۶۸۳ افغان حاجیان سعودي عربستان ته لېږدول شوي.
د شمالي کوریا رسمي خبري اژانس راپور ورکړی، چې د دغه هېواد مشر کېم جونګ اون د روسیې له دفاع وزیر سره په لیدنه کې د پیونګ یانګ لهخوا د مسکو د ملاتړ پر دوام ټینګار وکړ.
ټاکل شوې چې د ازادو سیالیو (MMA) افغان لوبغاړی اسدالله عاصم به د جرمني په فرانکفورت ښار کې د دغه هېواد لوبغاړي حارث منصوري پر وړاندې ولوبېږي. دغه لوبه به د «We Love MMA» سازمان د ۸۸م پړاو سیالیو په لړ کې د ۱۴۰۵کال (د غبرګولې ۲مه) نېټه ترسره شي.
د طالبانو له پېښو سره د مبارزې چمتووالي اداره وايي، د کابل په سروبي ولسوالۍ کې د وروستیو بارانونو له امله پر ۶۴۵ زیانمنو کورنیو ته یوه اندازه خوراکي او غیرخوراکي توکي وېشل شوي.
د امریکا ولسمشر ډونالډ ټرمپ ویلي، چې نړۍ له ناارامو او غیرعادي حالاتو سره مخ ده او «موږ په یوې لېونۍ نړۍ کې ژوند کوو».
د شمالي کوریا مشر کېمجونګاون د روسیې له دفاع وزیر سره په کتنه کې ویلي، هېواد به یې د روسیې له سیاستونو ملاتړ ته دوام ورکړي.
د اروپايي احصایې ادارې «یورواسټاټ» تازه شمېرې ښيي، چې سره له دې چې په اروپا کې د پناه غوښتنې د منلو کچه په څرګند ډول کمه شوې، خو افغان پناه غوښتونکي لا هم د اروپايي ټولنې په غړو هېوادونو کې د ملاتړ تر ټولو لویه برخه جوړوي.
د افغانستان رسنیو ملاتړ سازمان یا امسو جنیوا کې د ملګرو ملتونو د «شکنجې پر خلاف کمېټې» په ناسته کې پاکستان کې د افغان کډوالو د وضعیت په اړه د یاد سازمان موندنې او اندېښنې شریکې کړې. دې غونډه کې د پاکستان د قانون او عدالت وزیر عقیل ملک او په جېنوا کې د پاکستان سفیر هم حضور درلود.
د افغان ایواک په نوم د افغان کډوالو د ملاتړ بنسټ، کانګو جمهوریت ته د افغان وګړو د لېږد د احتمالي طرحې په اړه خبرداری ورکړی او ویلي یې دي، چې دا اقدام نه یوازې حل لاره نه ده، بلکې ښايي د هغوی د جبري بېرته ستنېدو زمینه هم برابره کړي.
د عوامي نشنل ګوند ایالتي مشر، میا افتخار حسین ويلي، په خیبر پښتونخوا کې د پاکستان تحریک انصاف ګوند د حکومت له خوا د ښاروالیو د ټاکنو نه اعلانول له جمهوري اصولو سرغړونه ده. هغه ټينګار کړی، چې د ښاروالیو منظم نظام رامنځته کول د وخت اړتیا ده.
د طالبانو سترې محکمې ادعا کړې، چې د روان کال په تېرو درېیو میاشتو کې یې د ښځو د حقونو اړوند ۴زره او ۲۱قضیو ته رسیدنه کړې ده. د طالبانو دا ادعا په داسې حال کې ده، چې دغه ډلې په افغانستان له بیا ځلې واکمنېدو وروسته د ښځو پر اساسي حقونو پراخ محدودیتونه لګولي دي.
د طالبانو د افغاني سرې میاشتې ټولنې مشر شهابالدین دلاور د ناروې د سره صلیب له مسوولینو سره په کتنه کې وویل: «افغاني سره میاشت یو ملي خپلواک بنسټ دی». هغه د ناروې له پلاوي وغوښتل، چې له افغان اړمنو کورنیو سره خپلې مرستې ډېرې کړي.
د طالبانو د کانونو او پټرولیم وزیر هدایتالله بدري په بادغیس کې د کانونو د لیدنې په ترڅ کې ویلي، له طبیعي زېرمو څخه باید په مسلکي ډول ګټه واخیستل شي، څو عواید زیات شي. د څارونکو په وینا، کانونه د طالبانو د عوایدو اصلي سرچینې ګڼل کېږي.
د خيبرپښتونخوا په خيبر او کوهاټ ولسواليو کې په دوو جلا پېښو کې دوه ديني عالمان د نامعلومه کسانو له لوري وژل شوي دي. پولیسو افغانستان انټرنشنل - پښتو ته ویلي، چې په وژل شویو دیني عالمانو کې یو په ډزو او بل د چړو په ګوزارونو وژل شوی.
د وحدت ګوند مشر محمد محقق د پاکستان د پوځ د مشر له ستاینې او د ډیورند کرښې د رسمیت پېژندنې په تړاو له جنجالي څرګندونو وروسته اوس ویلي، که طالبان ایران هم د ځان مخالف کړي نو «رڼا ورځ به پرې توره شپه» شي.
پاکستاني رسنیو راپور ورکړی، چې د پاکستان امنیتي ځواکونو د بلوچستان ايالت په نوشکي سیمه کې د پنځه وسله والو د وژلو ادعا کړې ده. امنیتي سرچینو رسنیو ته ویلي، چې د یادو عملیاتو په ترسره کولو سره یې د «بلوڅ بېلتون غوښتونکو» وسله والو د برید پلان شنډ کړی دی.
د طالبانو د ترانسپورت او هوايي چلند وزارت اړوند د هوا پوهنې ادارې د هېواد په ۲۳ولایتونو کې د شدیدو بارانونو، تالندې برېښنا، تېزو بادونو او ناڅاپي سېلابونو راوتلو د احتمال خبرداری ورکړی دی.
په بادغیس کې طالبانو د پستهلیق د طبیعي ځنګلونو سیمې مالدارانو ته ۱۴ ورځې وخت ورکړی، چې دغه ساحه تخلیه کړي. طالبانو یادو مالدارانو ته خبرداری ورکړی، که د غويي میاشتې تر ۲۰مې له یادې ساحې ونهوځي نو لږ تر لږه ۶ میاشتې به زنداني شي.
د ننګرهار ولایت ځایي طالب چارواکي وایي، چې د دغه ولایت په بټي کوټ ولسوالۍ کې اته کلن ماشوم د اوبو په یوه کانال کې د ډوبېدو له امله مړ شوی دی.