د مخکېني جمهوري نظام پر مهال لوړ پوړي پوځي جنرال سمېع سادات د هرات په انجیل ولسوالۍ کې پر ملکي وګړو د برید په غبرګون کې ویلي، چې طالبان له شیعهګانو او سلفیانو سره په ښکاره توګه روښانه، سیستماتیکه او دوامداره دوښمني لري.
د غزني ولایت لپاره د طالبانو د رسنیو دفتر وايي، د دغه ولایت په قرهباغ ولسوالۍ کې د یوه کور د چت نړېدو له امله دوه کسان مړه شوي دي. د سرچینې په وینا، دغه پېښه هغه مهال رامنځته شوه، چې یاد کسان د بام د ستنو پر ترمیم بوخت وو.
د طالبانو ستره محکمه وايي، د نیمروز د خاشرود ولسوالۍ لپاره د دوی د ابتداییه محکمې د پرېکړې لهمخې، ۹۱۵۵ کیلوګرامه قاچاقي انساني او حیواني درمل له منځه وړل شوي دي. طالبانو په دې اړه چې ایا د دغو توکو د لیږد په تړاو څوک نیول شوي او که څنګه، څه نهدي ویلي.
په هالنډ کې مېشتو یو شمېر افغانانو پر افغانستان د پاکستان د بریدونو خلاف لاریون کړی او د جرمونو له نړیوالې محکمې یې غوښتنه کړې، چې د یاد هېواد د پوځ او حکومت مشران باید محاکمې ته راکش کړي. دغو افغانانو ویلي، پاکستان په دغو بریدونو سره «بشري جنایت» ترسره کړی دی.
د عراق پارلمان د شنبې په ورځ نزار آمیدي، چې یو کُرد سیاستوال دی د یاد هېواد د نوي ولسمشر په توګه غوره کړ. هغه چې د «کردستان میهني اتحادیې» غړی دی، د سیالۍ په ترڅ کې یې د نورو نوماندانو تر څنګ اوسني بهرنیو چارو وزیر ته چې د «کُردستان ډیموکرات ګوند» لهخوا نومول شوی هم ماتې ورکړه.
په افغانستان کې د اروپايي ټولنې استازولي وايي، چې د ملکي وګړو پر وړاندې د هر ډول ترهګریزو کړنو غندنه کوي او دا ډول تاوتریخوالی هیڅکله نه شي توجیه کېدای. استازولۍ په هرات کې د جمعې د ورځې برید وحشیانه بللی او د قربانیانو له کورنیو سره یې خواخوږي ښودلې ده.
د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنټ په هرات کې پر ملکي وګړو ډزې وغندلې او دا پیښه یې "وحشیانه" وبلله. هغه د پیښې په تړاو د بې پرې پلټنو او عاملانو ته د سزا ورکولو غوښتنه کړې ده.
د اسلام اباد او ریاض ترمنځ د دفاعي تړون له مخې، پاکستان د سعودي عربستان د امنیت د پیاوړتیا لپاره دغه هېواد ته جنګي الوتکې او نور پوځي ځواکونه استولي دي. د سعودي عربستان دفاع وزارت ویلي چې پاکستانۍ جنګي الوتکې او ملاتړې هوایي الوتکې د ملک عبدالعزیز هوايي اډې ته رسېدلې دي.
د افغانستان د خلکو اسلامي وحدت ګوند مشر محمد محقق د ازادۍ جبهې د قوماندانانو په یادغونډه کې وویل، چې یوازې یو هیواد د طالبانو پر وړاندې د وسله والې مبارزې ملاتړ کوي. محقق زیاته کړه چې د طالبانو مخالفینو ته پاملرنه زیاته شوې ده.
د خيبر پښتونخوا اعلی وزیر سهيل اپریدی د لنډي کوتل کمپ ته تللی او هلته يې د افغان کډوالو د بېرته ستنېدو بهير او اسانتياوې ارزولې دي. اپریدي ددغه کمپ د لیدلو پرمهال وویل، «افغانان زموږ وروڼه دي او له هغوی سره هر ډول بېحرمتي به هېڅکله ونه زغمل شي».
د افغانستان د رسنیو ملاتړ سازمان د طالبانو په بندخونو کې د شکيب احمد نظري، بشير هاتف، حميد فرهادي او يو شمېر نورو خبريالانو د وضعيت په تړاو ژوره اندېښنه ښودلې ده. یاد سازمان وایي، چې د بشير هاتف او شکيب نظري روحي او رواني وضعيت ښه نه دی.
پخواني ولسمشر حامد کرزي د ایران او امریکا ترمنځ په اسلاماباد کې د اوربند ټینګښت او د خبرو د پیل هرکلی کړی او دا یې د دواړو هېوادونو، سیمې او نړۍ په ګټه بللي. کرزي ویلي چې د جګړې او شخړې پای ته رسېدل مثبت ګام دی او د اوربند د رامنځته کېدو او د مذاکراتو د پیل لپاره شوې هڅې ستايي.
د طالبانو مشر ملاهبت الله په کندهار کې یوې ولسي غونډې ته په لېږل شوي پېغام کې ویلي، «تېرخلافتونه چې له منځه ولاړل د خپلو رعیتونو د مخالفتونو او بې اطاعتیو له امله نسکور شول، د پردیو له امله نه وو.» نوموړی زیاتوی، چې مسلمانان هر وخت د خپلمنځي مسایلو له امله له ستونزو سره مخ شوي.
د طالبانو د نورستان والي دفتر وايي، ددغه ولایت برګمټال اوکامدېش ولسوالیو ته د نوې لارې د جوړېدو سروې بشپړه شوې او عملي کار به یې ژر پیل شي. افغانستان انټرنشنل خبر ور کړی و چې د کونړ له ناړۍ څخه د نورستان دوو ولسوالیو ته غځېدلې لار د پاکستاني ځواکونو د ډزو له امله تړل شوې.
د طالبانو د عامې روغتیا وزارت وايي، د شنبې په ورځ، د وري ۲۲مه، په هېواد کې د ماشومانو ګوزڼ یا پولیو پر ضد د واکسین درې ورځنۍ کمپاین پیل شو. د یاد کمپاین په ترڅ کې به شاوخوا ۱۲،۶ میلیونه هغه ماشومان چې عمرونه یې له پنځو کلونو کم دي، د پولیو پر ضد واکسین شي.
د پاکستان لومړي وزیر شهباز شریف د امریکا د ولسمشر مرستیال جېډي وېنس سره د اسلاماباد ناستې په څنډه کې لیدنه کړې ده. په دغه کتنه کې دواړو لورو د دوهاړخیزو اړیکو پر پیاوړتیا، سیمهییز امنیت او د سیمې پر روان وضعیت خبرې اترې کړي دي.
د طالبانو د پېښو پر وړاندې د مبارزې ادارې ویلي، چې په تېرو ۴۸ ساعتونو کې ۱۷ ولایتونو کې د بارانونو، سېلابونو او د کورونو د چت نړېدو په پایله کې ۲۲ کسان مړه شوي او ۹ نور ټپیان دي.
د طالبانو د امربالمعروف وزیر خالد حنفي خپلو ولایتي رییسانو ته لارښوونه کړې چې د خلکو ستونزو ته جدي پام وکړي او د مظلوم په دفاع کې د هېچا مراعات ونه کړي. نوموړي ټینګار کړی چې قانون باید پر ټولو یو شان تطبیق شي او دا یې د یاد وزارت اساسي مسوولیت بللی دی.
رویټرز خبري اژانس د ایران د یوه لوړپوړې چارواکي له قوله راپور ورکړی، چې امریکا په قطر او د نورو هېوادونو په بانکونو کې د ایران د کنګل شویو شتمنیو له ازادولو سره موافقه کړې ده. تهران دا ګام د سولې یوې تلپاتې هوکړې ته د رسېدو په لاره کې د «ښه نیت» ازموینه بولي.
د اندونیزیا د بهرنیو چارو وزارت ویلي، چې د یاد هېواد ولسمشر پرابوو سوبیانتو روسیې ته رسمي سفر کوي. سوبیانتو به د سفر په ترڅ کې له پوتین سره د تېلو پېرلو او انرژۍ په تړاو خبرې وکړي.
په نیمروز کې د طالبانو امنیه قوماندانۍ ویلي، چې په «سر دښت» او «مارګو دښت» سیمو کې یې له ایران څخه د درملو او نورو قاچاقي توکو د قاچاق مخه نیولې ده. طالبانو ویلي، چې د درملو د قاچاق په تور یې دوه کسان هم نیولي دي.