د هند د ملي امنیت سلاکار اجېت دوال مسکو ته تللی او ټاکل شوې ده، هلته د روسیې له لوړپوړو چارواکو سره د افغانستان په تړاو خبرې اترې وکړي. د هندوستان ټایمز ورځپاڼې لیکلي، چې نوموړی به د مسکو لهخوا د طالبانو د حکومت د رسميت پېژندنې پرېکړې په اړه هم له روسي چارواکو سره بحث وکړي.
د طالبانو د امربالمعروف وزارت خبر ورکړی، چې د هېواد په بېلابېلو ولایتونو کې یې د ښځو د حقونو اړوند ۳۷ بېلابېلې قضیې حل کړې دي. دغه وزارت وایي، له دې ډلې ۱۶ د کورني تاوتریخوالي، ۸ د میراث، پنځه د جبري نکاحوو او پاتې ۸ نورې د طلاق تر څنګ د نفقې اړوند قضیې وې.
اسراییلي پوځ د غزې په تړانګه کې لږترلږه ۳۸ فلسطینیان په ډزو ووژل. دغه کسان د ملګرو ملتونو د مرستو ترلاسه کولو لپاره راغونډ شوي وو.
د اکسیوس خبري وېبپاڼې د راپور پر بنسټ؛ د امریکا متحدهایالاتونو ولسمشر ډونالډ ټرمپ د اسراییل لهخوا د غزې تړانګې له بشپړ نیولو سره هېڅ مخالفت نهلري.
له ایران څخه د افغانانو د اېستل کېدو په بهیر کې ښځې، ماشومان او پاخه عمر لرونکي کسان هم شامل دي چې افغانستان ته په رسېدو د سرپناوو، لومړنیو مرستو او د ژوند د اړینو امکاناتو له نشتوالي څخه کړېږي.
د امریکا ولسمشر ډونالډ ټرمپ وايي، هېواد به یې له هغو هېوادونو نه پر وارد شويو کمپیوټري چېپونو ۱۰۰ سلنه مالیه ولګوي چې په امریکا کې دننه نه تولیدېږي یا یې د تولید لپاره برنامه نشته.
امریکا او سوېلي کوریا اعلان کړی، چې دواړه هېوادونه به (د اګسټ له ۱۸مې نېټې) په لویه کچه ګډ پوځي تمرینات پیل کړي. «د ازادۍ اولچي ډال» په نوم دغه دفاعي تمرینونه به ۱۱ورځې دوام وکړي.
په افغانستان کې د طالبانو واکمنۍ تر سیوري لاندې د وسلهوالو پېښو پر دوام؛ د کونړ سیمهییزو سرچینو افغانستان انټرنشنل-پښتو ته ویلي، چې ناپېژانده وسلهوالو د دغه ولایت په پېج درې ولسوالۍ کې یو ځوان په ډزو وژلی دی. د سرچینو په وینا؛ دغه ځوان نجیبالله نومېده او هټۍوال و.
د افغانستان لپاره د ملګرو ملتونو د بشري حقونو خپلواک راپور ورکوونکي ریچارډ بېنېټ د ملګرو ملتونو عمومي غونډې ته په خپل تازه راپور کې ویلي، چې طالبانو عدلي او قضايي نظام په یوه «وسله» بدل کړی؛ څو ښځې او نجونې پرې وځپي. هغه دا کړنه د «بشر ضد جنایت» بللې.
د طالبانو له بیا واکمنېدو راهیسې مذهبي او قومي لږکۍ له ګڼو ننګوونو، محدودیتونو او بندیزونو سره مخ دي چې له امله یې په بېلابېلو برخو کې ترې حقونه اخیستل شوي دي. موندنو په ډاګه کړې چې د دوی هویت، امنیت او مذهبي ازادۍ سختې محدودې شوې دي.
د فرانسې سیمهییزو چارواکو د چهارشنبې په ورځ (د زمري ۱۵مه) وویل، چې د دغه هېواد په سوېل کې د یوې پراخې ځنګلي اورلګېدنې له امله یو کس مړ شوی او ۹ نور چې پکې څو اور وژونکي هم شامل دي، ټپیان شوي دي.
د ملګرو ملتونو د ماشومانو د ملاتړ ادارې (یونېسف) اعلان کړی، چې ایران ته یې د ماشومانو لپاره دوه حیاتي واکسیني محمولې لېږلي، چې د نږدې ۱.۵ میلیون ماشومانو روغتیا به خوندي کړي.
امریکا د ملګرو ملتونو امنیت شورا ته د پرېکړه لیک یوه مسوده سپارلې، چې موخه یې د نړۍوالو بندیزونو له نوملړ څخه د سوریې د لنډمهاله حکومت د مشر احمد الشرع نوم لرې کول دي.
د طالبانو د کورنیو چارو وزارت وایي، چې ځواکونو یې د بدخشان په راغستان ولسوالۍ کې هغه درې غله نیولي، چې د یو شمېر سوداګرو څخه یې ۲ سوه لکه افغانۍ غلا کړې وې. طالبانو ویلي، چې له نیول شویو کسانو پلټنې رواني، چې ژر به عدلي او قضايي ادارو ته وسپارل شي.
د افغان کډوالو د لادرکه کېدو په دوام د ادهم بهزاد تیموري کورنۍ د ایران په پلازمېنه تهران کې د هغه د لادرکه کېدو خبر ورکړی. دوی د چهارشنبې په ورځ افغانستان انټرنشنل ته وویل، چې تیموري له څه باندې ۵۰ ورځو راهیسې ورک دی او دوی د هغه هېڅ نښه نه ده موندلې.
د پاکستان د پوځ مشر مارشال عاصم منیر د امریکا مرکزي قومندانۍ سینټکام د قوماندې د بدلون په مراسمو کې د ګډون لپاره امریکا ته سفر کوي. دا له دوو میاشتو څخه په کم وخت کې امریکا ته د هغه دویم سفر دی.
د بلوچستان ایالت په مستونګ ولسوالۍ کې د پاکستان د امنیتي ځواکونو پر یوه موټر د ماین چاودنه شوې، چې له امله یې د پوځ یو لوړ رتبه افسر محمد رضوان طاهر او دوه نور سرتېري وژل شوي دي.
نیویارک ټایمز د دوو باوري سرچینو په حواله راپور ورکړی، چې ډونالډ ټرمپ غواړي راتلونکې اوونۍ له ولادیمیر پوتین سره مخامخ وګوري. د سرچینو په وینا، ټرمپ به له دې لیدنې وروسته له پوتین او ولادیمیر زېلېنسکي سره درې اړخیزه غونډه ترسره کړي.
په کندوز ولایت کې د طالبانو د عدلیې ریاست مسوولین وايي، په مرکز، دشت ارچي، قلعه زال، امام صاحب، علي اباد او خان اباد ولسواليو کې یې ۱۰ زره جریبه غصب شوې دولتي ځمکه راګرځولې ده. طالبانو ویلي، چې ۵ زره نوره ځمکه هم تشخیص شوې چې هغه به هم ژر را وګرځول شي.
د ایران په پلازمېنه تهران کې د ساوه په سیمه کې د لرګیو په یوه لوی ګودام کې د پراخې اورلګېدنې له امله دوه افغان کډوال کارګران وژل شوي دي.
د امریکا دفاع وزارت (پنټاګون) د افغانستان د جګړې نږدې ۱۴۰۰هغه انځورونه چې په ۲۰۲۱کال کې د افغان متحدینو د خوندیتوب لپاره له انلاین ارشیف څخه لرې کړي وو، په تېروتنې سره یو ځل بیا خپاره کړي، خو له خپرېدو وروسته یې ژر بېرته لرې کړي دي.