د طالبانو تر ادارې لاندې د افغانستان ملي راډیو ټلوېزیون راپور ورکړی چې په بغلان کې یوې نجلۍ په پنځه میاشتو کې د قران کریم ټولې دېرش سیپارې په لاس لیکلي دي. د دغه نجلۍ ورور فیصل له طالبانو غواړي چې د هغې د خطاطۍ هنر او وړتیاوو د پراخېدو لپاره باید ورسره همکاري وکړي.
اسلاماباد وايي د افغانستان پر وړاندې د ډيورنډ پر کرښه د سوداګریزو لارو تړل د سیاست ستونزه نه ده، بلکې هغه اقتصادي او امنیتي فشار دی چې له قاچاقي دهلېزونو جوړ شوی و. وايي، په دې پرېکړه کې افغانستان یوازې په یوه میاشت کې له ۲۰۰ مېلیونه ډالرو ډېر زیان لیدلی دی.
په پاکستان کې پخوانی افغان سفیر نجیبالله عليخېل وايي چې د څو لسیزو شخړو اصلي درس دا دی چې افغانان باید د خپل راتلونکي د ټاکلو لپاره « بینالافغاني هوکړه» رامنځته کړي. هغه وایي، له باثباته افغانستان پرته، نه سیمه اقتصادي پرمختګ کولای شي او نه هم نړۍ د اندېښنو د کمېدو هیله لري.
د امريکا د مرکزي استخباراتو ادارې (سيایاې) پخوانۍ ماموره سارا اډمز وايي چې د ازادۍ جبهې مشر جنرال ياسين ضياء د افغانستان د راتلونکي نظام او دولت د جوړېدو لپاره تر ټولو وړ او مخکښ مبارز دی.
د کندوز ولایت لپاره د طالبانو د امنیه قومندانۍ مسوولین وايي، یو کس په کندوز ښار کې د انسان تښتوونکو له منګلو ژغورل شوی او په تړاو یې ۵ کسان هم نیول شوي دي.
د امرالله صالح په مشرۍ زرغون بهیر د طالبانو پر ضد له اقدام پرته د «رژیم» د بدلون په اړه د پاکستان ادعاوې مشکوکې بللې دي.
متحده عربي اماراتو د شنبې په ورځ اعلان وکړ، چې د یو میلیارد ډالرو په ارزښت به پانګونه وکړي، څو په ټوله افریقا کې د مصنوعي ځیرکتیا زېربناوې او د AI پر بنسټ خدمات پراخ کړي. موخه یې دا ده، چې له افریقایي هېوادونو سره د ملي پرمختیایي اهدافو په ترلاسه کولو کې مرسته وکړي.
څلورو امریکایي چارواکو رویټرز خبري اژانس ته ویلي، چې متحده ایالات په راتلونکو ورځو کې په ونزویلا کې د عملیاتو د نوي پړاو د پیل لپاره چمتووالی نیسي. دوو نورو چارواکو بیا ټینګار کړی، چې د ارزونې له مخې د نیکولاس مادورو د حکومت د ړنګولو هڅه هم شامله ده.
پخواني ولسمشر محمد اشرف غني د تېرې پنجشنبې په ورځ (د لړم ۲۸مه) په یوه پیغام کې ویلي، که اړتیا او د خلکو غوښتنه وي، چمتو دی چې د روان ناورین په حل کې خپله ونډه ترسره کړي، خو محمد حلیم فدايي وايي، طالبان به هېڅکله د غېر طالب افغان وړاندیزونه ونهمني.
پاکستاني رسنیو راپور ورکړی، چې دغه هېواد د ډیجیټلي نړۍ سره د لا پراخو اړیکو په برخه کې مهم پرمختګ کړی او د نړۍ په کچه یو مهم سمندري کېبل «سبمیرین کېبل» کراچۍ ته رسېدلی دی. د نړۍ په کچه دا سمندري کېبل «CMV-6» د کراچۍ په هاکس بې ساحل کې خپل ځمکنی مرکز ته رسول شوی دی.
د طالبانو تر واک لاندې له پېښو سره د مبارزې اداره وایي، چې په تېرې (لړم) میاشت کې د بشري مرستو لپاره له بېلابېلو ملي او نړۍوالو موسسو سره د شاوخوا شپږ نیم میلیونه ډالرو په ارزښت لس ګډې هوکړې لاسلیک شوې دي.
د پاکستان د پوځ مطبوعاتي څانګې ویلي، چې ګډو امنیتي ادارو په بنو کې د استخباراتي معلوماتو پر بنسټ په عملیاتو کې ۸ وسلهوال وژلي دي. پوځ زیاته کړې، چې وژل شوي وسلهوال په هند پورې اړوند «خوارج» و.
د مقاومت جبهې مشر احمد مسعود وايي، افغانان د خپلې ازادۍ لپاره پهخپله جنګېږي، خو له «ډیموکراتیکو ارزښتونو» د دفاع لپاره د نړۍوالې ټولنې سیاسي ملاتړ ته اړتیا لري. نوموړي همداراز خبرداری ورکړ، د افغانستان اوسني وضعیت ته نهپاملرنه به تر لسو کلونو پورې بل ناورین وزېږوي.
د طالبانو او ایراني چارواکو ترمنځ د پخواني تفاهم له مخې هغه افغان بندیان چې په ایران کې یې د جرم موده پوره کړې، د شنبې په ورځ په څلورو بسونو کې د اسلامکلا له لارې افغانستان ته ولېږدول شول.
د امریکا ولسمشر ډونالډ ټرمپ اعلان وکړ، چې هغه د اوکراین د جګړې د پای ته رسولو لپاره د سولې طرحه چې وړاندې کړې، «وروستۍ» نه ده.
د کابل ښار د طالبانو د دویمې امنیتي حوزې امر وايي، د دغې حوزې په شاوخوا کې یې یو کس له خاورو ډک پاوربانکونو د پلور په تور نیولی دی. دغه کس له ۱۸۰۰ پاور بانکونو څخه ۶۰۰ یې تر اوسه خرڅ کړي دي.
د برازیل پخوانی ولسمشر ژایر بولسونارو د شنبې په ورځ د خپلو پلویانو د غونډې له پیل څخه مخکې چې د هغه د کور ترڅنګ پلان شوې وه، د پولیسو له خوا د کورني نظربند د ماتولو په تور ونیول شو.
په کانګو کې د ملګرو ملتونو د سوله ساتو ماموریت ویلي، چې د داعش اړوند وسلهوالو په ختیځ کانګو کې په څو بریدونو کې لږترلږه ۸۹ ملکي وګړي ووژل. ملګرو ملتونو په یوې خبرپاڼه کې ویلي، چې په قربانیانو کې لږترلږه ۲۰ ښځې او نامعلوم شمېر ماشومان شامل دي.
د طالبانو د کار او ټولنیزو چارو وزیر د شنبې په ورځ په کابل کې د ایران له سفیر علیرضا بېکدلي سره په لیدنه کې د افغانستان د فني او مسلکي روزنې د کیفیت د ښه والي، په ایران کې د افغان کډوالو حالت او د افغان کارګرانو د قانوني لېږد په اړه خبرې کړې دي.
د دوغارون د ګمرک رییس وايي، چې د طالبانو لهخوا د هرات اسلامکلا ګمرک کې شاوخوا ۲زره او ۵۰۰ د ایران باروړونکي موټرونه بند پاتې دي. ایران د دې ستونزې د حل لپاره د «یو په یو» طرحه وړاندې کړې، چې له مخې یې د ایران او افغانستان د باروړونکو موټرو تګ راتګ په متوازن ډول ترسره شي.
د ملګرو ملتونو د اقلیمي بدلون «کاپ ۳۰» کنفرانس په برازیل کې له دوو اوونیو خبرو اترو او د شنو خونو ګازونو د کمولو او د اقلیم د تمویل په اړه د اوږدې مودې بحث وروسته، یوې ابتدايي موافقې ته ورسېد؛ داسې موافقه چې د هېوادونو د استازو تر شپنیو خبرو اترو وروسته وروستۍ شوه.