آرشیف

د بیان د ازادۍ مرکز په خپل تازه راپور کې ویلي، چې پر کابل د طالبانو له واکمنېدو وروسته په افغانستان کې د ښځینه خبریالانو شمېر له ۲۰۰۰ تنو څخه ۱۹۰ ته راکم شوی دی.

په جینوا کې د افغانستان استازی، نصیر احمد اندېشه، وایي چې په داسې حال کې چې هېواد له بې‌ساري پوځي، اقتصادي او ټولنیز ملي بحران سره مخ دی، طالبان د دې بحرانونو د مهار پر ځای نورو موضوعاتو ته لومړیتوب ورکوي.

د افغان ایواک په نوم د افغانانو د بیا مېشتېدنې د همغږۍ سازمان، د ښځو نړیوالې ورځې په مناسبت ویلي چې په دې ورځ د نړۍ په بېلابېلو برخو کې د ښځو هڅې او قربانۍ ستایل کېږي خو په همدې لړ کې پر افغان مېرمنو دوامداره محدودیتونه د اندېښنې وړ دي.

تحریک طالبان پاکستان د یوې اعلامیې په خپرولو سره د خیبر په نامه خپل پسرلني کلني جګړه ییز عملیات اعلان کړل. یادې ډلې ویلي، چې تېر الخندق عملیات یې بریالي ول او دا ځل به د خیبر په نامه نویو عملیاتو کې د پاکستان د پوځ پر ضد خپلو بریدونو ته ادامه ورکوي.

د طالبانو د کندوز ولایت مقام رسنیز دفتر وايي، یوه افغان پانګوال لېوالتیا ښودلې چې د لومړي ځل لپاره په کندوز ولایت کې د درملو د تولید یوه معیاري فابریکه جوړه کړي. د طالبانو والي په کندوز کې د درملو د تولید فابریکې د جوړېدو هرکلی کړی او د لازمې همکارۍ ډاډ یې ور کړی دی.

ټاکل شوې ده چې د ملګرو ملتونو امنیت شورا به سبا (دوشنبه، د کب۱۸مه) په یوه غونډه کې د افغانستان پر وضعیت بحث او ارزونه وکړي.

د افغانستان لپاره د برېتانیا ځانګړي استازي ریچارډ لینډسي د ښځو د نړیوالې ورځې په مناسبت وویل چې هېواد یې د افغان نجونو او ښځو سره ولاړ دی. لینډسي د جنسیت پر بنسټ د تاوتریخوالي د له منځه وړلو لپاره د برېتانیا پر ژمنې ټینګار وکړ.

په کابل کې د ایران سفارت د یوې خبرپاڼې په خپرولو سره د دغه هېواد د ولسمشر د لومړي مرستیال له قوله ویلي، چې د افغانستان لپاره د اساسي توکو د تخصیص او انتقال لپاره نوی میکانیزم ثبت شوی دی.

د ترکیې د بهرنیو چارو وزیر هاکان فیدان د شنبې په ورځ ټینګار وکړ چې په افغانستان کې سوله د ټولې سیمې لپاره حیاتي ارزښت لري. نوموړي وویل، چې انقره د افغانستان د طالبانو او پاکستان ترمنځ کړکېچن وضعیت له نږدې څاري.

د طالبانو د زندانونو چارو د سمون ادارې اعلان کړی، چې د روژې میاشتې په مناسبت یې د هېواد له یو شمېر زندانونو څخه ۵۵۰ بندیان ازاد کړي او د ۶۵۵ نورو د بند موده کمه شوې ده.

د طالبانو ستره محکمه وایي، چې په کابل او غور ولایتونو کې یې د اخلاقي فساد او نشه یي توکو د قاچاق او خرڅلاو په تور د دریو ښځو په ګډون ۲۴ کسان د بند ترڅنګ په عام محضر کې په دُرو وهلي دي.

طالبانو د عقیدې په تړاو د خپل مشر ملا هبت الله اخوندزاده کتاب «د اهل السنة والجماعة عقیده» چاپ او خپور کړی دی.

د طالبانو د بهرنیو چارو وزارت وايي، ددې ‌ډلې د بهرنیو چارو وزیر امیرخان متقي او د افغانستان لپاره د چین ځانګړي استازي یوی شیایونگ د طالبانو او پاکستان ترمنځ د ستونزې پر ډيپلوماتیک اواري ټینګار کړی دی.

د طالبانو د کورنیو چارو وزارت خبر ورکړی، چې د کابل ولایت په بېلابېلو سیمو کې یې د یو لړ عملیاتو پرمهال د نشه‌يي توکو د قاچاق او پلور په تړاو ۸۲ کسان نیولي دي. د یاد وزارت په وینا؛ دغه کسان به تر لومړنیو څېړنو وروسته عدلي او قضايي ارګانونو ته وسپارل شي.

د خیبر پښتونخوا امنیتي چارواکو خبر ورکړی، چې د دغه ایالت په بېلابېلو برخو کې د بې‌اسناده افغان کډوالو پر وړاندې د عملیاتو په ترڅ کې تر ۲زره ډېر افغانان نیول شوي دي. د دوی په وینا؛ د دغه کډوالو پر وړاندې قضیې ثبت شوې او محکمې امر کړی، چې د قضیو ترڅېړنې دې دوی زندان ته انتقال شي.

د نارینه‌و ترڅنګ افغان مېرمنو هم د افغانستان په تاریخ کې په بېلابېلو سیاسي، ټولنیزو او فرهنګي برخو کې پراخه ونډه اخیستې ده. له ملكه زرينې نېولې تر معاصرې دورې د افغانستان مخکښو، الهام بښوونکو او حماسه جوړوونکو مېرمنو مېړانه د تاریخ په زرینو پاڼو کې ثبت شوې ده.

د اوکراین ولسمشر ولادیمیر زېلېنسکي وايي، چې روسیې په تېره یوه اوونۍ کې د بېلابېلو وسلو په کارولو سره پر اوکراین زرګونه بریدونه کړي دي. هغه ټینګار کړی، چې د ملکي تاسیساتو د ساتنې لپاره د هوايي دفاع سیسټمونو ته بېړنۍ اړتیا ده.

د افغانستان پخواني ولسمشر کرزي د ښځو نړۍوالې ورځې په مناسبت ټینګار کړی، چې د نجونو پر مخ د ښوونځیو او پوهنځیو دروازې باید ژر تر ژره پرانیستل شي او ښځو ته د کار او ټولنیز حضور زمینه برابره شي؛ څو د هېواد پرمختګ او ځان بسیا تضمین شي.

په افغانستان کې د کډوالو لپاره د ملګرو ملتونو اداره وايي، افغان مېرمنې سره له پراخو ستونزو لاهم د خپلو کورنیو او ټولنو په ملاتړ کې مهمه ونډه لري او د ټولنې د بیارغونې په هڅو کې اساسي رول لوبوي.

په افغانستان کې د ماشومانو لپاره د ملګرو ملتونو صندوق (یونسف)ویلي چې د دې ادارې ښځینه افغان کارکوونکې له شپږو میاشتو راهیسې خپلو دفترونو ته له تګ منع شوې دي او غوښتنه یې کړې چې دا بندیز باید سمدستي لرې شي.

په افغانستان کې د ملګرو ملتونو د بشري مرستو د همغږۍ اداره (اوچا) وايي، چې له پراخو محدودیتونو سره، سره افغان ښځې لاهم خپلو ټولنو ته خدمت کوي او د خلکو ترمنځ د هیلو څرک ژوندی ساتي.