د امریکا حکومت پر شاوخوا ۱۰۰ هغو شرکتونو، کسانو او بېړیو چې له ایران نه د نفتو په پېرلو کې ښکېل وو؛ تازه بندیزونه لګولي دي. د امریکا خزانې وزارت ویلي، چې یادو شرکتونو له ایران نه مېلیونونه بېرله تېل پېرلي دي.
د امریکا د ټرانسپورټ وزارت چارواکو ویلي، د هوايي ټرافیک هغه کارکوونکي به له دندو ګوښه کړي چې د حکومتي ادارو بندېدو پرمهال کار ته نه حاضرېږي. په امریکا کې له څو ورځو راهیسې د هوايي ټرافیک کنټرول په برخه کې د کارکوونکو د کمښت له امله نږدې ۲۱زره الوتنې ځنډېدلې دي.
د افغانستان ازادۍ جبهې ادعا کړې، چې د چهارشنبې په شپه یې د کابل ښار په احمد بابا مېنه کې د طالبانو پر یوې امنیتي پوستې برید کړی. دوی وایي، په دغه برید کې دوه طالبان وژل شوي او یو بل ټپي دی.
د پاکستان دفاع وزیر خواجه اصف وايي، چې پاکستان له لسیزو راهیسې د افغان کډوالو کوربهتوب کړی؛ خو دغه مېلمه پالنه دوی ته د خپلو وینو په بیه تمامه شوې ده. نوموړي ویلي، اوس د دې وخت رارسېدلی چې ټول افغان کډوال بېرته خپل هېواد ته ستانه شي.
اروپايي پارلمان د افغانستان د روان بشري وضعیت په اړه په یوه نوې پرېکړهلیک کې د طالبانو له لوري د مېرمنو پر وړاندې محدودیتونه او د زلزلهځپلو ښځو سره د مرستو مخنیوی «د بشریت ضد جنایت» بللی دی.
د جرمني د بهرنیو چارو وزیر یوهان وادیفول ویلي، هېواد به یې د مصر په همکاري د غزې د بیارغونې لپاره یوه پراخه نړیواله غونډه جوړه کړي. نوموړي ویلي چې دا ناسته به د هغو هڅو یوه برخه وي چې موخه یې د غزې د جګړې له امله د ویجاړو شوو سیمو بیارغول او د بشري وضعیت ښه کول دي.
د لومړي وزیر نتنیاهو دفتر اعلان کړی، چې د اسراییل حکومت د غزې لپاره د ټرمپ پلان تصویب کړی دی. د ډونالډ ټرمپ زوم او استازی جیرډ کوشنر او سټیو ویټکاف هم په دې غونډه کې حاضر وو.
د روغتيا نړيوال سازمان «ډبلیو ایچ او»اعلان کړی،چې په افغانستان کې د سرخکان ناروغۍ پر ضد د واکسين عمومي کمپاين لومړۍ مرحله په برياليتوب سره پای ته رسېدلې او شاوخوا ۸.۹ میلیونه ماشومان واکسین شوي دي.
بېګاه شپه پر کابل پاکستانیو الوتکو بمبار وکړ، د تلفاتو او ټپیانو خبرونه ورکړل شوي دي.
بلوڅ بيلتون پال وسله والو په یوه خبرپاڼه کې ویلي، چې د اکتوبر پر ۷مه یې د پاکستاني پوځ پر یو کمپ په برید کې ۱۴ پوځيان وژلي او ۴ نور يې سخت ټپيان کړي دي. د دغه ډلې ویاند میجر ګروم بلوچ زياتوي، د پوځ څخه یې په زيات شمېر وسلې او مهمات نيولي او د دوی یو سرتيري هم په کې وژل شوی دی.
هندي رسنيو راپور ورکړی چې هند ته د طالبانو د بهرنيو چارو وزير اميرخان متقي سفر د دواړو هېوادونو ترمنځ د دوهاړخيزو همکاریو پياوړتيا او له پاکستان سره د امنيتي اندېښنو پر موضوع متمرکز دی. ټاکل شوې چې متقي به د جمعې په ورځ د هند د بهرنيو چارو له وزير «جېشنکر»سره وګوري.
د مقاومت جبهې یوې سرچينې افغانستان انټرنشنل ته ویلي، چې د سیاسي چارو پر شنونکي سلیم پيګیر باندي برید د دوی پورې هيڅ تړاو نه لري. د طالبانو کورنیو چارو وزارت پر نوموړي برید شخصي انګیزه ياده کړې او زياته کړې یې ده، چې برید ګر نیول شوي دي.
مکروریانو درېیو اوسېدونکو افغانستان انټرنشنل - پښتو ته تایید کړه چې نن ماخوستن مهال عبدالحق څلورلاري ته څېرمه یو شمېر ناپېژانده الوتکو یو لنډکروزر موتر په نښه کړی دی. د ځايي اوسېدونکو په خبره، سیمه د طالبانو له خوا کلابنده شوې ده.
د پاکستان دفاع وزیر خواجه اصف د ملي شورا په غونډه کې ویلي، چې اسلاماباد له ترهګرۍ ستړی شوی او هغو ته به حساب ورکول کېږي چې د ترهګرو لپاره پټنځایونه برابروي. هغه زیاته کړه د افغانستان له خاورې ترهګریز فعالیتونه نور د زغم وړ نه دي.
د روسیې ولسمشر ولادیمیر پوتین ویلي، چې طالبان د ترهګرۍ او نشه يي توکو د مافیا خلاف د مبارزې په برخه کې د همکارۍ لپاره چمتو دي او مسکو د هغوی ددې هڅې ملاتړ کوي. پوتین وویل، چې ترهګرې ډلې د بنسټپالنې او ورانکاریو لپاره لاهم د افغانستان خاوره کاروي.
د ملګرو ملتونو د بشري حقونو عالي کمېشنر ولکر تورک د غزې د اوربند د پلان له اعلان وروسته وویل، له دې وروسته باید ټول اقدامات د اوربند بېړنیو موخو ته ژمن وي. نوموړي ټینګار وکړ چې لومړی دې په غزه کې وژنې، لوږه او ویجارۍ ژر پای ته ورسول شي.
د طالبانو مرستیال ویاند وایي چې د بېکیفیته تېلو د مخنیوي پلاوي د ټولګټو وزارت د تخنیکي معیین په ملتیاد سالنګ لویه لاره کتلې او پرېکړه یې کړې چې یو شمېر تېل وړونکو ټانکرونو ته د تګ اجازه ور کړي. طالب چارواکي تمه ښيي، چې په دې سره به د تېلو بیې ټیټې شي.
په خوست کې د طالبانو د والي ویاند مستغفر ګوربز وايي، تېر کال په خوست کې د ځڼغوزیو شاوخوا پنځه زره ټنه حاصلات ترلاسه شوي وو، خو سږکال یې حاصلات نږدې ۲۰ زره ټنو ته رسیږي او درې برابره ډېر شوي دي.
د اروپایي د پارلمان غړې هانا نیومن پر طالبانو نیوکې وکړې او ویې ویل، چې د یوه ملت نیمه برخه یې له عمومي ژونده اېستلې، خو دا نه کلتور دی او نه کورني مسایل، بلکې دا جنسیتي تبعیض دی. هغې وویل، درې کاله وړاندې ټولو ژمنه وکړه چې افغانستان به یوازې نه پرېږدي، خو نن دغه ژمنه ماتیږي.
اسراییل او د فلسطین وسله والې ډلې د اوربند او بندیانو د تبادلې تړون لاسلیک کړ. د اسراییل یوې حکومتې ویاندې ویلي، چې اوربند د کابینې له غونډې ۲۴ ساعته وروسته عملي کیږي او مخالفه ډله به یرغمل شوي اسراییلیان په ۷۲ ساعتونو کې خوشې کړي. د ملګرو ملتونو سرمنشي د اوربند هرکلی کړی.
د طالبانو د پکتیکا ولایت مقام په یوه خبرپاڼه کې ویلي چې د یاد ولایت په برمل ولسوالۍ کې د پولیو دوه مثبتې پېښې ثبت شوې دي.