په کندهار کې د طالبانو اړوند سرچینو افغانستان انټرنشنل ته وویل، چې د طالبانو مالیې او اقتصاد وزارتونو او د افغانستان بانک د نوري فایبر انټرنیټ قطع کېدو په تړاو د دې ډلې د مشر له پرېکړې سره مخالفت کړی دی. ملا هبت الله ددغو وزارتونو او ادارو پلاوي ته ویلي، چې بدیلې لارې ولټوي.
په کندوز ولایت کې د طالبانو پولیسو قوماندانۍ ويلي، چې دوه کسان يې د خاناباد ولسوالۍ د فيروزکوه په سيمه کې د «منفي تبليغاتو» په تور نيولي دي. د یادې قوماندانۍ ویاند جمعه الدين خاکسار ویلي، چې دغه کسان یې د امر بالمعروف مامورينو په همغږۍ نيولي دي.
د طالبانو د عامې روغتیا وزارت وایي (ICRC) نړیوالې موسسې د خوست ولایت له ملکي او تخصصي روغتون سره د ۱۰۶ زره ډالرو په ارزښت د اړینو طبي تجهیزاتو مرسته کړې ده.
د جرمني محکمې هغه افغان په عمري بند محکوم کړ، چې تېر کال یې د افراطي انګېزې له مخې یو پولیس په چړو وهلی او وژلی و. نوموړي د دغه پولیس ترڅنګ پنځه نور کسان هم ټپيان کړي وو.
د افغانستان لپاره د پاکستان ځانګړي استازي صادق خان ویلي، چې د افغانستان لپاره د ډنمارک له ځانګړې استازې انډریاس ارنفلدت او مل پلاوي سره یې لیدلي دي. نوموړي ویلي، چې په دغه لیدنه کې په افغانستان کې د ترهګرو د حضور، سیمهییزو تحولاتو او بشري مرستو په اړه خبرې شوې دي.
د تېرې اګسټ میاشتې په وروستیو کې د ډونالډ ټرمپ له لوري پر هند لګېدلو لوړو امریکایي تعرفو د دغه هېواد د ټوکر صنعت ته سخته ضربه رسولې ده. د هند په هغه ایالتونو کې چې د ټوکر د تولید مهم مرکزونه بلل کېږي، د ټوکر په اړه نوي فرمایشونه په ټپه درېدلي دي.
د ایران د خراسان رضوي ولایت عمومي څارنوال د دوشنبې په ورځ وویل، چې په مشهد کې یې درې کسان نیولي دي. محمد اسماعیل خان ته نږدې سرچینې افغانستان انټرنشنل ته ویلي، چې دغه کسان د معروف غلامي د وژنې په تړاو نیول شوي دي. معروف غلامي د اسماعیل خان نږدې جهادي قوماندان و.
د ملګرو ملتونو څېړونکې ډلې تازه اعلان کړی، چې اسراییلي ځواکونو په غزه کې نسل وژنه کړې ده. دغې ډلې ویلي، چې اسراییلي ځواکونو د ۲۰۲۳کال له اکټوبر میاشتې راهیسې په غزه کې دغه ډول جرمونه ترسره کړي دي.
د طالبانو له لوري د کډوالو ستونزو ته د رسېدنې کمېسیون وایي، له پاکستان نه د افغانانو د اېستلو بهیر په لړ کې تېره ورځ دوشنبه ۵۵۸۱ کسان افغانستان ته ستانه شوي دي. د دغه کمېسیون د معلوماتو له مخې؛ پرون ۲۴۸۳ کسان بیا له ایران نه افغانستان ته ستانه شوي دي.
ټاکل شوې، چې د ملګرو ملتونو امنیت شورا به سبا چهارشنبه (د وږي ۲۶مه) د افغانستان په اړه خپله درې میاشتنۍ غونډه وکړي. د ملګرو ملتونو امنیت شورا ویلي، چې دغه غونډې ته به د افغانستان لپاره د ملګرو ملتونو د سرمنشي ځانګړې استازې روزا اوتنبایوا درې میاشتنی راپور هم وړاندې کړي.
د ایران د کډوالو او بهرنیو وګړو د چارو مشر جعفر سيد ابادي ویلي، چې تر دې وروسته بېاسناده افغان کډوال په خپل سر د دوغارون له لارې افغانستان ته نهشي تلای؛ بلکې دوی به د حسناباد او سفید سنګ پنډغالو ته ځي او هلته به قانوني پړاوونه بشپړوي.
تازه د اسراییل پوځ په غزه کې د حماس ډلې د لهمنځه وړلو په موخه د پوځي عملیاتو له پراخېدو خبر ورکړی دی. د اسراییل دفاع وزیر ویلي، دغه عملیات به تر هغې دوام وکړي چې د اسراییل پوځ خپلې موخې نه وي ترلاسه کړې.
د پاکستان لومړي وزیر شهباز شریف د عرب او اسلامي هېوادونو د مشرانو غونډې په څنډه کې د قطر له امیر سره کتلي دي. د شهباز شریف او د قطر د امیر شیخ تمیم بن حمد ال ثاني له دفترونو په خپرو شویو خبرپاڼو کې راغلي، چې دواړه مشرانو پر دوحې د اسراییل برید په کلکو ټکو غندلی دی.
د امریکا استازو جرګې داسې لایحه چمتو کړې، چې په تصویبېدو سره به یې پر هغو پاکستاني چارواکو چې له بشري حقونو یې سرغړونې کړې دي؛ بندویزونه ولګول شي. د ازادۍ او حساب ورکونې په نامه د دغه لایحې په ترتیب کې د دواړو ګوندونو جمهوریت غوښتونکو او ډیموکراټانو استازو برخه اخیستې ده.
د تېر جمهوري نظام د چارو ادارې مشر فضل محمود فضلي د فاروق اعظم د نیولو په اړه ویلي، چې واکمنه ډله د عامه ذهنیت بدلولو لپاره خپل وفادار ملګري زنداني کوي او په دې ډول په رسنیو کې لنډمهاله غوغا جوړوي؛ خو د هغوی د شاتګ پالنې اصلي ستونزه په ټولو برخو کې بیا هم پر خپل ځای پاتې ده.
طالبانو د ملکیتونو، ودانیو او نمرو د وېش، پلور او اجارې په اړه نوی قانون توشیح کړ. د طالبانو د ریاست الوزراء له اقتصادي معاونیت څخه په خپور شوي بیان کې راغلي، چې د دغه قانون په عملي کولو به د ملکیتونو د وېش، خرڅلاو او اجارو بهیر منظم شي.
په بلخ ولایت کې د طالبانو د والي ویاند حاجي زید د افغانستان انټرنشنل هغه راپور تایید کړی، چې د هبتالله اخندزاده په فرمان په دغه ولایت کې د نوري فایبر انټرنېټ پر کارونې بندیز لګول شوی.
د طالبانو د کرنې، اوبو لګولو او مالدارۍ وزارت وايي، چې له هندي چارواکو سره یې هند ته د افغانستان د کرنیزو محصولاتو د صادراتو او بازار موندنې په اړه خبرې کړې دي.
د امریکا ولسمشر ډونالډ ټرمپ وایي، چې افغانستان د څو نورو هېوادونو ترڅنګ اوس هم د نشهيي توکو د تولید او قاچاقو مرکز دی. ټرمپ کانګرس ته په خپله کلنۍ بیانیه کې ویلي، چې د طالبانو ځینې غړي اوس هم د نشهيي توکو په کاروبار کې لاس لري او له دې لارې ګټه ترلاسه کوي.
د ډونالډ ټرمپ ادارې تازه اعلان کړی، چې په راتلونکي مالي کال کې یې په دغه هېواد کې د تور پوستو او قبایلي ښوونیزو مرکزونو او پوهنتونونو لپاره ۵۰۰ مېلیونه ډالره اضافي بودجه ځانګړې کړې ده.
د ۲۰۲۵کال د اسیا جام په شل اوریزو سیالیو کې افغانستان خپله دویمه لوبه نن له بنګله دېش سره کوي. دغه لوبه به نن سېشنبه د افغانستان په وخت د ماښام په ۷:۳۰ بجو په ابوظبي کې پیل شي.