آرشیف

د طالبانو تر واک لاندې باختر اژانس خبر ورکړی، چې تېره ورځ له پاکستان او ایران څخه ۱۰۶۶ کورنۍ افغانستان ته ستنې شوې دي.

ملګري ملتونه وايي چې د غزې په سوېل کې د بشري مرستو د وېش په یوه مرکز کې د ګډوډۍ له امله لږ تر لږه ۴۷ فلسطینیان ټپیان شوي دي. د الجزیرې د راپور له مخې، ډیری دغه کسان د پیښې ځای ته نږدې د ځای پر ځای شویو اسراییلي ځواکونو د ډزو له امله ټپیان شوي.

د روسیې د دفاع وزیر اندري بېلووسف وايي، چې په افغانستان کې ګڼ شمېر توندلارې ډلې لا هم د مرکزي اسیا په سیمه کې اصلي ګواښ جوړوي او د منځني ختیځ بې ثباتي پر دې سیمې منفي اغېز کوي.

د طالبانو عامې روغتیا وزیر نور جلال جلالي د افغانستان لپاره د روغتیا نړیوال سازمان له مشر اډوین سنیزا سلادویر سره په ليدنه کې غوښتنه کړې، چې د روغتیایي خدمتونو په برخه کې ورسره همکاري وکړي.

په خوست کې د اوبو یو بند چې تېره اوونۍ طالبانو پرانیستی و، د باران له امله ونړېده. په دې اړه د خلکو تر پراخو غبرګونونو وروسته طالبانو ویلي، چې په دې اړه یې هر اړخیزې څېړنې روانې دي.

د طالبانو د ریاست الوزرا اداري مرستیال عبدالسلام حنفي وایي، چې ګاونډي هېوادونه دې د افغانستان په کورنیو چارو کې لاسوهنه نه کوي. هغه ټینګار وکړ، چې طالبان له خپلو ګاونډیو سره ښې اړیکې غواړي او دغه ډله د ګاونډیو هیوادونو په کورنیو چارو کې لاسوهنه نه کوي.

د طالبانو د اقتصاد وزیر دین محمد حنیف وایي: «که څه هم په تېرو څلورو کلونو کې د صنعت او تولید په برخه کې د پام وړ پرمختګونه شوي؛ خو بیا هم افغانستان یو مصرف کوونکی هېواد دی، چې ان پګړۍ، جای نماز، تسبیح او ټول لومړني د اړتیا وړ توکي مو له بهره واردېږي.»

سیمه‌ییزو سرچینو افغانستان انټرنشنل ته ویلي، چې طالبانو په دایکنډي ولایت کې د لاسي فوټبال لوبه منعه کړې ده. د سرچینو په وینا؛ طالبانو ویلي چې د دغه مېز پر سر پلاستیکي لوبغاړي یا سړي «بتانو ته ورته دي او په اسلام کې له بتانو سره لوبې کول حرام دي.»

د ارغواني شنبو غورځنګ وایي، په افغانستان کې د «ماشومانو ودونو» او «ماشومو مېندو» کچه د اندېښنې وړ ودې په حال کې ده، چې د میلیونونو نجونو لپاره په یوې «تراژیدۍ» بدله شوې ده.

د سوډان د روغتیا وزارت وایي، چې په دغه هېواد کې د کولرا ناروغي (وبا) خپرېدو له امله په یوه اوونۍ کې ۱۷۲ تنه مړه شوي دي. د سوډان د روغتیا وزارت چارواکو الجزیرې تلویزیون ته ویلي، «یوازې تېره اوونۍ په دغه هېواد کې ۲۷۰۰ پېښې ثبت شوې دي.»

د طالبانو د کورنیو چارو وزارت د نشه‌يي توکو پر وړاندې د مبارزې مرستیال عبدالحق همکار له جرمونو او نشه‌يي توکو سره د ملګرو ملتونو د مبارزې ادارې له مشر پولیک اوک سره په لیدنه کې له هغه غوښتي، چې د پولیسو مسلکي روزنې او د کارکوونکو د ظرفیت لوړونې په برخه کې دې ورسره همکاري وکړي.

په اقینې بندر کې د طالبانو چارواکي وایي، چې له ترکمنستان څخه وارد شوي، اووه ټانکره بې کیفیته تېل یې بېرته دغه هېواد ته ورګرځولي دي. طالبانو ویلي، چې په یادو ټانکرونو کې وارد شوي تېل یې تر کتنو وروسته مسترد کړي دي.

د ډونالډ ټرمپ ادارې د سې شنبې په ورځ د امریکا له سترې محکمې وغوښتل چې د یوې فدرالي محکمې هغه پریکړه لغوه کړي، چې دریمو هیوادونو ته د کډوالو د چټک اخراج مخه نیسي.

د «مننې» سفر پر دوام؛ د پاکستان لومړي وزیر شهباز شریف او د دغه هېواد د پوځ مشر عاصم منیر د سې شنبې په ورځ د اذربایجان له ولسمشر الهام علي اف سره لیدلي دي.

د طالبانو د لوړو زده‌کړو وزارت خبر ورکړی، چې په کابل زون کې ۲۲۳۱ ملایانو ته د لېسانس او ماسټرۍ په کچه د سندونو د وېش بهیر پیل کوي. طالبانو تر دې مخکې هم د کابل په ګډون بېلابېلو ولایتونو کې خپلو همفکره ملایانو ته د لېسانس او ماسټرۍ سندونه وېشلي دي.

په واشنګټن کې د هند سفارت خبر ورکړی، چې د هند د بهرنیو چارو مرستیال وزیر وېکرم مسري د امریکا د بهرنیو چارو مرستیال وزیر جېفري کېسلر سره په لیدنه کې د مخ پر ودې ټکنالوژۍ پر دوه اړخیزو همکاریو خبرې کړې دي.

د سې شنبې په ورځ د پنجاب، پښتونخوا او د پاکستان تر ولکې لاندې د کشمیر په ځینو برخو کې د سخت باران او توپان له امله اووه کسان مړه او ګڼ نور ټپیان شوي دي.

د قزاقستان د بهرنیو چارو وزارت خبر ورکړی، چې د دغه وزارت مرستیال وزیر اکان رحمتولین، په کابل کې د یوناما له مشرې روزا اوتنبایوا او د سیمې لپاره د جرمونو او نشه‌یي توکو سره د مبارزې دفتر له مشر اولیور سټولپ سره د افغانستان د ټیکاو او دوامداره پرمختګ پر ملاتړ خبرې کړې دي.

د امریکا د بهرنیو چارو وزارت په ټوله نړۍ کې خپلو سفارتونو او کونسلګریو ته بیړنۍ لارښوونه کړې، چې په لنډمهاله توګه یې د دغه هیواد پوهنتونونو ته د ورتلوونکو نویو زده‌کوونکو د ویزو ورکړې بهیر ځنډولی دی.

د متحده عربي اماراتو د بهرنیو چارو وزارت خبر ورکړی، چې په دوبۍ کې یې د جنرال کونسل په توګه د طالب ډیپلوماټ عبدالرحمان فدا باورلیک منلی دی.

په دوحه کې د طالبانو سفیر محمد سهیل شاهین د قطر د سوداګرۍ او صنایعو خونې له عمومي مشر علي بوشرباک المنصوري سره په لیدنه کې د اقتصادي او سوداګريزو همکاریو په اړه خبرې کړې دي.