د خېبرپښتونخوا اعلی وزير سهيل اپریدي د سوات په مېنګوره کې د پاکستان تحریک انصاف غونډې او لاریون ته په وینا کې وویل، که پاکستانی پوځ په تیراه کې په ۲ یا ۳ ورځو کې عملیات بند نهکړي، نو په خېبر کې به د پښتنو لویه جرګه راوبولي او نوې ستراتیژي به جوړه کړي.
د طالبانو د دفاع وزارت ویلي، چې د بادغیس په جوند، د پروان په جبل السراج او سالنګونو او د فاریاب په لولاش ولسوالیو کې یې لسګونه هغه کسان د چورلکو په وسیله ژغورلي، چې د درنو واورو له امله په لارو کې بند پاتې وو.
د افغانستان لپاره د ناروې کمېټې عمومي رييس د طالبانو له پېښو سره د مبارزې چمتووالي ادارې رييس سره په کتنه کې وویل، روان کال د افغانستان لپاره د ناروې کمېټې د ۴ کلنې ستراتېژۍ وروستی کال دی. د طالبانو دغه چارواکي هم وویل، په هېواد کې د موسساتو لپاره د هر ډول فعالیت زمینه برابره ده.
د طالبانو د ریاستالوزرا مرستیال مولوي عبدالسلام حنفي ویلي، چې ګاونډیو هېوادونو افغان کډوال د خدای لپاره نه، بلکې د خپلو سیاسي او اقتصادي ګټو لپاره منلي وو. هغه زیاته کړې، چې که ګاونډیانو د خدای د رضا لپاره دا کار کړی و، نو اوس به یې له کډوالو سره داسې ناوړه چلند نه کاوه.
د امریکا په ګڼو ایالتونو کې د سخت ژمي، واورې او توپان له امله له ۶۷۰ زرو ډېر خلک له برېښنا بېبرخې شوي او نږدې ۱۰ زره الوتنې لغوه شوې دي. دغه توپان، چې درنه واوره، کنګل او سخته یخني ورسره مل ده، د دغه هېواد ختیځې سیمې له فلج کېدو سره مخ کړې دي.
ځایي سرچینو افغانستان انټرنشنل- پښتو ته ویلي چې د سلواغې پر ۴ نېټه د ننګرهار ولایت د غني خېلو ولسوالۍ اړوند «۲۵ ویالې» سیمه کې یو طالب وسله وال د خپل ورور له خوا په ډزو وژل شوی دی.
د پښتون ژغورنې غورځنګ مشر منظور پشتین ویلي، چې د تیراه د پښتنو د جبري بېځایه کولو په تړاو د فدرالي حکومت او پوځ وروستۍ څرګندونې، چې دوی خلک نه دي بېځایه کړي، له حقیقت سره سمون نه لري. هغه ټینګار کړی، چې د دریځونو بدلول اوس ګټه نه لري.
د طالبانو د کورنیو چارو وزارت وایي، د نشهيي توکو پر وړاندې د مبارزې پولیسو یې د هېواد په ۱۳ ولایتونو کې د عملیاتو پر مهال۶۲ تنه د نشهيي توکو د قاچاق او پلور په تړاو نیولي دي.
پخواني جهادي مشر عبدالرب رسول سیاف په خپلو تازه څرګندونو کې پر طالبانو غږ کړی، چې « له خدایه ووېریږئ او ددین لارښوونې سرچپه مه ښیئ». سیاف وايي، چې که «په اسلام کې کوم امتیاز موجود وي، هغه د بېوزلو او بېوسه خلکو لپاره دی، نه د شتمنو، پانګوالو او خانانو لپاره».
د ملګرو ملتونو د بشري مرستو د همغږۍ دفتر (اوچا) وایي، په کونړ ولایت کې د وروستۍ زلزلې له امله د زیانمنو شویو کورنیو خیمې د درنې واورې ورېدو له کبله ویجاړې شوې دي. اوچا زیاتوي، چې ساړه ژمي او سختو واورو زلزله ځپلې کورنۍ له شدیدو ستونزو او نوي ناورین سره مخ کړې دي.
د طالبانو د کلیو د بیارغونې او پراختیا وزیر ملا عبداللطیف منصور په کابل کې د ملګرو ملتونو د پراختیايي پروګرام (یو این ډی پي) له مشر ستيفن رودریکس سره لیدلي. په دې ناسته کې په افغانستان کې د بنسټیزو او پراختیایي پروژو پر پلي کولو خبرې اترې شوې دي.
د طالبانو د استخباراتو ریاست مرستیال ملا تاجمیر جواد ددې ډلې د رسنیو او فرهنګي چارو د فعالانو په نمانځغونډه کې ویلي، چې دوی « د خلکو د ارادې په مدیریت»، د طالبانو د جګړې په مشروعیت او د بریدونو په برجسته کولو کې ټاکونکی رول لوبولی دی.
د طالبانو د کانونو او پټرولیم وزارت وايي، د دغه وزارت وزیر ملا هدایت الله بدري د ترکمنستان له سفیر سره په کتنه کې پر دې ټینګار کړی، چې د روان میلادي کال تر پایه، تر هرات ولایت پورې د ټاپي پروژې چارې بشپړې شي.
ایران انټرنشنل د ایډیټوریل بورډ په یوه اعلامیه کې د نویو اسنادو او روایتونو په استناد اعلان کړی چې د ایران د لاریونونو پر مهال ایراني ځواکونو تر لومړنیو اټکلونو ډېر پراخ او له ۳۶زره او ۵۰۰ څخه زیات کسان وژلي دي.
د خیبر پښتونخوا ایالت د سویلي وزیرستان ولسوالۍ په برمل علاقدارۍ کې د پښتون ژغورنې غورځنګ د سیمه ییز مسوول شاه حسین پشتین پر کور له ډرون څرخکې نه بم غورځول شوی، خو چاته پکې زیان نه دی اوښتی.
د پاکستان د علماوو شورا د طالبانو پر نوې «جزایي اصولنامې» اندېښنه ښودلې او ویلي یې دي چې د اسلامي شریعت تر نامه لاندې د ټولنې وېش په «غلام او ازاد» بڼه د منلو وړ نه دی. دوی زیاته کړې چې «طالبان د اسلام تر نامه لاندې د جهالت د دورې قوانین پر افغانانو پلي کوي».
د اسټرالیا لومړی وزیر انتوني البانېز وايي، د ډونالډ ټرمپ څرګندونې، چې په افغانستان کې یې د غیر امریکایي سرتېرو هڅې لږې وښودې، «بیخي د نه منلو وړ» دي. البانیز وویل چې د اسټرالیايي سرتېرو زړورتیا، چې په افغانستان کې یې د ډیموکراسۍ او ازادۍ لپاره جګړه وکړه، د ستاینې وړ ده.
د پاکستان مرکزي بانک اعلان کړی چې د ۲۰۲۶مالي کال په لومړۍ نیمايي کې افغانستان ته د دغه هېواد صادرات شاوخوا ۵۶ سلنه راټیټ شوي دي. بانک وايي، له ۹ ګاونډیو هېوادونو سره سوداګریز کسر د ۲۰۲۶مالي کال په لومړۍ نیمايي کې ۴۴سلنه زیات شوی او ۷میلیارده او ۶۸۳میلیونه ډالرو ته رسېدلی.
د طالبانو د هواپوهنې ریاست د سلواغې تر ۶مې نېټې په سالنګ، نورستان، کونړ، بغلان، پروان، لوګر، پکتیا، پکتیکا، میدان وردګ، بامیان، غزني، زابل، ارزګان، دایکندي، غور، کندهار، هلمند، نیمروز، فراه، هرات، بادغیس او فاریاب ولایتونو کې د واورو او ورښتونو اټکل کړی.
اتریش نن د یکشنبې په ورځ، د جنورۍ پر۲۵مه سهار وختي یو افغان، چې په جرایمو کې ښکیل ګڼل شوی و، کابل ته لېږلی دی. د اتریش د کورنیو چارو وزارت په یوه اعلامیه کې وویل، چې دغه افغان د استانبول له لارې کابل ته استول شوی.
په کابل کې د ایران سفارت وایي چې د ملګرو ملتونو د سرمنشي سیاسي مرستیالې رزماري ډيکارلو له سفیر علي رضا بیکدلي سره لیدلي او په افغانستان کې د ملګرو ملتونو د سیاسي مرستندویه دفتر (یوناما) د فعالیتونو او له دې ادارې سره د ایران د همکاریو په اړه یې خبرې اترې کړې دي.