آرشیف

د افغانستان د کرېکټ ملي لوبډلې چټک توپ اچوونکی نوین الحق د اوږې ټپ له کبله د اسیا جام له روانو سیالیو بهر شوی او پر ځای یې عبدالله احمدزی په لوبډله کې اخېستل شوی.

د پاکستان د علماوو شورا رییس طاهر اشرفي افغان طالبانو ته په خطاب کې ویلی، چې «تاسې زمونږ شاګردان یاست، نه موږ او تاسې له موږه زده کړه کړې نه موږ له تاسې». اشرفي په خپلو څرګندونو کې زیاتوي، « تاسې چې کومې جګړې ګټلې، دا مو زموږ د قربانیو له امله ګټلې دي».

د پاکستان پوځ وايي، د خېبر پښتونخوا په لکي مروت او بنو ولسوالیو کې یې د استخباراتي معلوماتو پر اساس په دوو بېلو عملیاتو کې ۳۱ جنګیالي وژلي دي. دغه عملیات داسې مهال کیږي، چې تېره اونۍ په سویلي وزیرستان کې د جنګیالیو په بریدونو کې ۱۹ پوځیان وژل شوي وو.

په پاکستان کې افغان کډوال وایي چې د جبري ایستنې له امله نه یوازې د هغوی کاروبارونه زیانمن شوي، بلکې د کورنیو د انتقال لپاره د موټرو کرایې څو برابره لوړې شوې دي، چې د ډېرو کورنیو له وس نه پورته دي.

د طالبانو د اوبو او برېښنا وزارت سرچینو افغانستان انټرنشنل ته وویل چې د یاد وزارت سلاکار فاروق اعظم د طالبانو د مشر په امر نیول شوی دی. فاروق اعظم د کونړ زلزلې پرمهال ویلي و، چې ښځینه روغتیاپالانې دې کونړ ته لاړې شي څو هغو طالبانو ته یو درس شي، چې د مېرمنو تعلیم ګټور نه بولي.

روسي اتنوګرافر سویاتوسلاو کاویرین په خپله تازه مرکه کې ویلي، چې طالبانو هغه د وسله والو مخالفانو د روزنې، قاچاق او زړو انځورونو په تور نیولی و. هغه وايي، چې ماته یې ویل، «د توقیف پر مهال به دې حتا یوه ستنه هم ضایع نه شي، خو د سمارټ فون د خلاصولو ستن مې هم ورکه شوې ده».

فایننشل ټایمز ورځپاڼې په یوه تازه خپور شوي راپور کې ویلي، چې د افغانستان پر ځای اوس په پاکستان کې ډېر کوکنار کرل کېږي. پاکستان غواړي، چې دغه کښتونه ویجاړ کړي؛ خو له یوې خوا د دغه کښت ویجاړول ډېر لګښت غواړي او له بلې خوا په نا امنه سیمو کې د یاد کښت ویجاړول ګران کار دی.

د خېبر پښتونخوا ایالت د خېبر ولسوالۍ اړوند تیراه دره کې د اپریدو قومي مخورو د یوې پرېکړې له مخې؛ د هغه دوه ځوانانو کورونه سوځولي، چې څه موده وړاندې یې د ځايي نجونو ویډیوګانې تر ثبت وروسته په خواله رسنیو خپرې کړې وې.

د بلوچستان د کېچ ولسوالۍ د دشت او مند علاقداریو ترمنځ د پاکستان پر امنیتي ځواکونو د سرک غاړې ماین چاودنه شوې ده. په دې چاودنه کې لږترلږه د پنځو پوځیانو د وژل کېدو خبر ور کړل شوی.

د پاکستان د بهرنیو چارو وزیر اسحاق ډار ویلي، د نړۍ د ۲مېلیارده مسلمانانو سترګې په قطر کې د عربي او اسلامي هېوادونو روانې سرمشریزې ته دي او که د اسراییل پر ضد روښانه تګلاره وړاندې نه‌شي؛ نو دا به د افسوس وړ وي.

د افغانستان ازادۍ جبهې ادعا کړې ده، چې د دوی جنګیالیو تېر ماښام د تخار ولایت د خواجه بهاءالدین ولسوالۍ کې د طالبانو د استخباراتو پر ادارې راکټي برید کړی چې دوه طالبان په کې ټپيان شوي دي.

د عربي او اسلامي هېوادونو ګڼ شمېر مشران د قطر پلازمېنې دوحې ته رسېدلي دي؛ څو په هغه بېړنۍ سرمشریزه کې ګډون وکړي، چې پر قطر د اسراییل د وروستیو هوايي بریدونو، د فلسطین کړکېچ او په زوره د فلسطینیانو بې کوره کېدو په تړاو پرېکړې وکړي.

د طالبانو د ټولګټو چارو وزارت خبر ورکړی، چې په تېره یوه اوونۍ کې د دغه وزارت د اوسپنې پټلۍ له لارې ۹۱۳۷۳ مټریک ټنه انتقالات شوي دي. د دغه انتقالاتو یوه برخه وچه مېوه او د مسو صادرات جوړوي.

د پېښور د قول اردو قوماندان ویلي، چې له افغانستانه د ترهګرو راوښتلو د مخنيوي لپاره یې د ډیورنډ پر فرضي کرښه پرتو ولسوالیو او په تېره بیا خیبر او باجوړ کې د امنيتي ځواکونو له‌خوا د څار لړۍ پراخه کړې ده.

د طالبانو د بهرنیو چارو وزارت ویلي، چې په کابل کې د جاپان سفیر بدلېږي. د دغه وزارت له‌خوا په خپرې شوې خبرپاڼه کې راغلي، چې په کابل کې د جاپان سفیر تاکایوشي کورومایا له امیرخان متقي سره په کتنه کې ویلي چې دنده یې په کابل کې پای ته رسېدلې.

روسی څېړونکی سویاتوسلاو کاورین چې ۵۲ ورځې یې د طالبانو په زندان کې تېرې کړې دي وايي، چې طالبانو د روسيې لپاره د جاسوسۍ په تور زنداني کړی و. هغه وايي:« کله یې چې کابل ته یوړم، پر ما یې د روسيې لپاره د جاسوسۍ او د طالبانو د حکومت ضد تبليغاتو تور ولګاوه.»

د طالبانو د ریاست‌الوزرا اقتصادي معاونیت وایي، چې د بزګرانو د مالي زیانونو او د کرنیزو محصولاتو د خرابېدو مخنیوي لپاره هغو شرکتونو او کسانو ته چې د سړو خونو د جوړولو په برخه کې پانګونه کوي؛ پنځه‌ کلن مالیاتي معافیت ورکوي.

د طالبانو د صنعت او سوداګرۍ وزارت خبر ورکړی، چې یو لوړپوړی ایرانی پلاوی د کابل او تهران ترمنځ د سوداګرۍ د پراختیا، د ټرانزیټ په برخه کې د اسانتیاوو د رامنځته کېدو او د ګډو پانګونو د ودې په موخه د خبرو لپاره کابل ته رسېدلی دی.

د ایران د عامې روغتیا وزیر محمدرضا ظفرقندي په یوه لیک کې د طالبانو د روغتیا وزیر ته په افغانستان کې د وروستۍ زلزلې له امله خواخوږي څرګنده کړې او د زلزلې له قربانیانو سره د مرستې په برخه کې یې د همکارۍ لپاره چمتووالی ښودلی دی.

د سپټمبر ۱۵مه د ډیموکراسۍ «ولسواکۍ» له نړۍوالې ورځې سره سمون خوري. دغه ورځ هرکال په بېلابېلو هېوادونو کې د ولسواکۍ د بېلابېلو ارزښتونو د لا پیاوړتیا په موخه نمانځل کېږي؛ خو په افغانستان کې واک ته د طالبانو له رسېدو وروسته ډیموکراسي «ولسواکي» له بېلابېلو ننګونو سره مخامخ ده.

د بشري حقونو تر ۳۰ ډېرو بنسټونو او د افغانستان د معترضو ښځو غورځنګ په یوه ګډه بیان کې غوښتنه کړې، چې طالبان دې مدني فعال او د بشري حقونو مدافع احمد مجتبا محمدي خوشې کړي. ښاغلی محمدي تېره میاشت له ایرانه تر اېستلو وروسته د طالبانو استخباراتو په پروان ولایت کې ونیوه.