د برېتانیا ګارډین ورځپاڼې راپور ورکړی، په امریکا کې مېشت تر ۱۵۰ ډېر هغه افغان کډوال چې افغانستان ته د اېستلو له ګواښ سره مخ دي؛ د ټرمپ ادارې لهخوا د کډوالو پرضد د سختو سیاستونو له امله له اندېښنې او ناروښانه برخلیک سره مخ شوي دي.
پاکستاني رسنیو راپور ورکړی چې پولیسو د بې اسنادو افغانانو پر ضد د روانو عملیاتو پر مهال په راولپنډۍ ښار کې ۱۳ تنه افغان وګړي نیولي دي. د راپور له مخې، نیول شویو کسانو کې اته ښځې هم شاملې دي.
د طالبانو د کور او ښار جوړولو وزیر د خوست او فاریاب د کډوالو ښارګوټو تفصیلي اصلاحي پلانونه منظور او لاسلیک کړي دي. د وزارت د معلوماتو له مخې، د خوست د کډوالو ښارګوټي پلان پر ۱۱۲۵ جریبه ځمکه او د فاریاب د دولتاباد ولسوالۍ د کډوالو ښارګوټي پلان پر ۲۱۱۷ جریبه ځمکه ترتیب شوی دی.
په اسلام اباد کې د سویس سفیر سټیفان ری وايي، د افغان کډوالو لپاره باثباته راتلونکی یوازې په بېړنیو بشري مرستو نه تضمینېږي او د خوندي او باعزته ادغام لپاره دې یې اړین شرایط چمتو شي.
د کډوالۍ نړیوال سازمان وايي، د ۲۰۲۶ کال له جنورۍ څخه تر اګست پورې د لوېدیځو بالکان هېوادونو چارواکو د ۳ زره او ۹۴۱ افغان وګړو ورتګ ثبت کړی دی. یادو کډوالو د ایران او ترکیې پر غیرقانوني لارو ځانونه تر لوېدیځ بالکان هېوادونو رسولې دي.
د پاکستان د بلوچستان چارواکو ویلي چې د دغه ایالت په کیچ او خاران ولسوالیو کې یې د غیرقانوني تګ راتګ په تور ۱۱۰ افغانان نیولي دي. ځايي چارواکو ویلي، په نیول شویو کسانو کې ښځې او ماشومان هم شامل دي.
د کډوالۍ نړیوال سازمان د تازه راپور له مخې، د ۲۰۲۶ کال د اکتوبر له ۲۵مې د نومبر تر اوومې پورې له پاکستان او ایران څخه ۴۳ زره او ۴۱۲ افغان کډوال بېرته افغانستان ته ستانه شوي دي.
د امریکا د استازو جرګې غړی ګېب اېمو وايي، امریکا باید هغه افغان متحدین یوازې پرېنږدي چې له امریکايي ځواکونو سره یې د طالبانو پر ضد جګړه کړې ده. نوموړي د دغو افغانانو لپاره د لنډمهاله خوندي وضعیت د مودې غځولو په موخه د کانګرس د رایې اخیستو لپاره د خپلو هڅو د دوام ډاډ ورکړی دی.
له پاکستان څخه خپل هېواد ته د افغان کډوالو د ستنېدو د لړۍ په یوه ویډیو کې د یوې افغانې ماشومې پر سینه د افغانستان ګنډل شوی ملي بیرغ ښکاري. دا ماشومه په داسې مهال له هېوادنۍ مینې او ملي بیرغ سره هېواد ته ستنه شوې، چې طالبانو پر ملي بیرغ بندیز لګولی دی.
په افغانستان کې د ملګرو ملتونو د کډوالو عالي کمېشنرۍ استازي عرفات جمال ویلي، چې له افغان کډوالو او افغانستان سره مرسته یوازې بشري اقدام نه دی، بلکې د یوې خوندي او باثباته نړۍ لپاره پانګونه ده.
د طالبانو د کډوالو او راستنېدونکو چارو وزارت وايي، په روانه اونۍ کې څه باندې ۷۰۰ افغان کډوال د پاکستان له بندخونو ازاد او هېواد ته راستانه شوي دي. دغه وزارت د یادو افغانانو د نیول کېدو د لامل په اړه څه نهدي ویلي، خو په پاکستان کې ډېری افغانان د ویزو د نهلرو له امله نیول کېږي.
د امریکا یو شمېر پخوانیو پوځیانو او افغان متحدینو یې په واشنګټن کې د دغه هېواد د کانګرس ودانۍ ته څېرمه لاریون کړی او له امریکا یې غوښتي چې د زرګونو افغان کډوالو د جبري ایستلو مخه ونیسي.
په ایران کې طالب سفیر د دغه هېواد د علومو وزارت له مرستیال سره په کتنه کې په ایراني پوهنتونونو کې د افغان محصلینو د ستونزو په تړاو خبرې کړې دي. دغه سفارت په دې تړاو نور جزییات نهدي ورکړي، خو په دغه هېواد کې افغان محصلین د اقامې د غځولو پر مهال له ستونزو سره مخ دي.
د ملګرو ملتونو د کډوالو عالي کمېشنرۍ په خپل تازه میاشتني راپور کې ویلي، چې افغانستان ته د کډوالو د ستنېدو بهیر په بېساري ډول زیات شوی. د راپور له مخې، ډېری بېرته ستنېدونکي د کار، سرپناه، قانوني اسنادو، روغتیايي خدمتونو او زدهکړو ته د لاسرسي له جدي ستونزو سره مخ دي.
د طالبانو د کډوالو کمېسیون وايي، پاکستان او ایران یوازې پرون (۳شنبه د لړم ۱۹مه) له بېلابېلو لارو ۱۲۸ کډوالې کورنۍ چې شمېر ۵۷۵ کېږي او ۸۳۳ نور مسافر په جبري ډول افغانستان ته اړولي دي. د کمېسیون په وینا، په همدې ورځ ۸۰ کورنۍ خپلو سیمو ته لېږدول شوي او له ۸۴ کورنیو سره مرستې شوې دي.
د ترکیې د وان ښار د وکیلانو ټولنې د یوې خبرپاڼې په خپرولو د دغه هېواد د کورنیو چارو له وزارت غوښتي، چې د ترکیې او ایران پر پوله د لږترلږه اتو افغان کډوالو د وژل کېدو په اړه څېړنې پیل کړي.
د افغانانو د لېږد او بیا مېشتېدنې د ملاتړ ادارې «افغان اېواک» مشر شان وانډيور د نیویارک پوسټ د امریکایۍ کالملیکونکې میرندا ډیواین هغه مقاله ناسمه بللې، چې پهکې د افغانانو د ځانګړې کډوالۍ ویزو د پروګرام د امنیتي ارزونې په اړه اندېښنې مطرح شوې دي.
د امریکا د کانګرس جمهوريپاله غړې یاسمین انصاري وايي، د قطر په «السیلیه» پنډغالي کې مېشت افغان ښځې او ماشومان باید روغتیايي خدمتونو، زدهکړو او خوندي استوګنځایونو ته لاسرسی ولري.
د ترکیې او ایران ترمنځ په سرحدي سیمه کې د اتو افغان کډوالو د جسدونو تر موندلو وروسته، یوشمېر مخالفو سیاستوالو د پېښې د څېړلو غوښتنه کړې ده. د ترکیې پارلمان کې د خلکو د ډیموکراسۍ او برابرۍ ګوند استازې ګلجان کچماز سایغیت د قربانیانو د هویت او د مړینې لامل روښانه کېدو غوښتنه کړې.
د امریکا د استازو جرګې غړې دلیا رامیرېز د کډوالو او بېاسناده مېشتو کسانو لپاره د تابعیت د قانوني لارې او د کډوالۍ په نظام کې د بشري اصلاحاتو غوښتنه کړې او ویلي یې دي، چې کانګرس باید له څلوېښتو کلونو وروسته له رامنځته شوي فرصت ګټه واخلي.
د یونان ساحلي ګارد د کریټ ټاپو ته نږدې د کډوالو له یوې کښتۍ د ۱۲ کسانو مړي ترلاسه کړي او ۱۸ نور یې ژوندي ژغورلي دي. د پېښې د رامنځته کېدو او د کډوالو د مړینې لامل لا نه دی څرګند شوی.
د طالبانو د ریاستالوزرا اداري مرستیال، عبدالسلام حنفي، د ملګرو ملتونو د سرمنشي له نوې ځانګړې استازې رباب فاطمه سره د راستنېدونکو کډوالو پر ستونزو او د هغوی د ملاتړ په اړه خبرې کړې دي. رباب فاطمې ویلي، د راستنېدونکو کډوالو د ستونزو مدیریت د افغانستان لپاره لویه ننګونه ده.