په کونړ کې د نورګل ولسوالۍ لپاره د طالبانو ولسوال عبدالظاهر وايي، چې یوې موسسې د یادې ولسوالۍ په مزار دره کې یوشمېر زلزله ځپلو ته ۱۵ کورونه جوړ او ګټې اخیستنې ته وسپارل. د هغه په وینا؛ دغه کورونه د «قدم» په نوم یوې مرستندویه ادارې د ۱۰ مېلیونه افغانۍ په لګښت جوړ کړي دي.
په لوګر کې د طالبانو مرستیال والي محمدانور دینپرور خبر ورکړی، چې په دغه ولایت کې وروستیو سختو ورښتونو او سېلابونو شاوخوا ۳۰۰ کورونه او ۳زره جریبه کرنیزه ځمکه ویجاړه کړې ده.
په کندوز کې د طالبانو د روغتیا ریاست مشر محمدالله حکمت وایي، چې په دغه ولایت کې یې په طبي وسایلو سمبال د انتاني ناروغیو ۵۰ بستریز روغتون پرانیستی دی. نوموړي ویلي، چې یاد روغتون به د شمال زون په کچه په وړیا ډول روغتیايي خدمتونه وړاندې کړي.
د بلوچستان ایالت په کلات والسوالۍ کې د چهار شنبې په ورځ د ملي عوامي ګوند د کلات ځايي مشر میر سخي عبدالرحیم او یو ساتونکی یې هغه مهال د ناپېژاندو وسلهوالو لهخوا په ډزو ووژل شول، چې د خپلو کرنیزو ځمکو لېدنې ته ورغلی و. په دغه پېښه کې د نوموړي یو ساتونکی ټپي شوی هم دی.
د بلوچستان په بېلابېلو برخو کې د سختو ورښتونو له کبله د دوو ماشومانو په ګډون ۷کسان مړه او څلور نور ټپیان شوي دي. د بلوچستان د ناورينونو مدیریت ادارې ويلي، چې له دې ډلې په کیچ او لورلايي کې دوه، دوه، په کوهلو کې یو کس او په جعفر اباد او کچي والسوالیو کې بیا یو، یو ماشوم مړ شوی دی.
د افغانستان د فوټبال ملي لوبډلې د فیفا په تازه ډلبندۍ کې په نړۍ کې اووه درجې شاتګ کړی او ۱۶۹م مقام یې خپل کړی دی. د دغه ډلبندۍ پر بنسټ د افغانستان فوټبال په وروستیو کلونو کې د پرلهپسې بحرانونو او ماتو وروسته شاتګ کړی دی.
د امریکا د فلوریډا ایالت څخه څلورو امریکایي ستورمزلو د ناسا د «ارتېمز ۲» ماموریت لپاره فضا ته الوتنه وکړه، چې د سپوږمۍ په شاوخوا ۱۰ورځنی سفر هم په کې شامل دی.
د افغانستان پخوانی د ولسي جرګې غړی، بکتاش سیاوش د افغان مېرمنو د حقونو د ملاتړ په موخه د اروپایي پارلمان په وړاندې په بروکسل کې د اعتراض خیمه وهلې ده.
پاکستاني رسنیو خبر ورکړی، چې د دې هېواد د پنجاب ایالت د لاهور ښار په ډياېچاې سیمه کې د یو کور دننه د اور لګېدو په پېښه کې دوه ماشومان مړه شوي دي. د ژغورنې ادارې ځایي چارواکو ویلي چې دغه مړه شوي ماشومان پنځه او درې کاله عمرونه لري.
په سکاټلینډ کې د افغان کډوالو د ملاتړ یوې ټولنه او د تاجکستان سفارت په یوه ګډه غونډه کې د نوروز جشن ونمانځه.
د سوریې ولسمشر احمد الشرع د سې شنبې په ورځ په بکنګهم ماڼۍ کې د برېټانیا له پاچا چارلز درېیم سره وکتل. د سوریې د ولسمشرۍ دفتر اعلان کړی چې دواړو لورو د دوه اړخیزو همکاریو د پیاوړتیا او د دمشق او لندن ترمنځ د اړیکو د پراختیا پر لارو چارو خبرې وکړې.
ایرلنډي رسنیو راپور ورکړی چې په دغه هېواد کې دوه افغان وروڼه د کب نیولو پر مهال د دې هېواد په اوبو کې مړه شوي دي.
د بغلان ولایت په مرکز پلخمري ښار کې وروستیو سېلابونو لسګونه کورونه زیانمن کړي او خلکو ته یې درانه مالي او ځاني زیانونه اړولي دي.
د امریکا د خوړو او درملو ادارې (ایف ډي ای) د چهارشنبې په ورځ د وزن کمولو یو نوی درمل چې د ایلي لیلي شرکت پورې تړاو لري، د «اورفورګلیپرون» په نوم او د «فوندایو» په سوداګریز نوم تایید کړل.
اذربایجان کې د طالبانو د سفارت سرپرست محمد فیصل، د دغه هېواد د کډوالۍ ادارې د نړیوالو همکاریو له مشر الوي علییف سره کتلي دي. دواړو لورو په اذربایجان کې د مېشتو افغانانو پر ستونزو خبرې کړي.
د پاکستان د شخړو او امنیتي مطالعاتو انسټیټیوټ وایي، چې په دغه هېواد کې د ترهګریزو پېښو شمېر د مارچ په میاشت کې ۳۵ سلنه کم شوی دی. د دغه بنسټ په وینا، طالبانو سره د افغانستان په خاوره کې د عملیاتو سره هممهاله په پاکستان کې د ملکي وګړو تلفات هم ۷۰ سلنه راکم شوي دي.
د ملګرو ملتونو دخوړو نړیوال پروګرام ویلي چې په افغانستان کې وروستیو ناڅاپي سېلابونو د خلکو ورځنی ژوند سخت اغېزمن کړی او ګڼې کورنۍ یې له ستونزو سره مخ کړې دي.
د طالبانو د بلخ ولایت رسنیز دفتر ویلي، چې په دغه ولایت کې د افغان او ازبکستاني پانګوالو له لوري د ۶۰ میلیونه ډالرو په ارزښت د چرګانو د غوښې او هګیو د تولید د یوې لویې فاریکې د جوړولو چارې پیل شوې.
د طالبانو د کورنیو چارو وزیر سراجالدین حقاني ددې ډلې ټولو واليانو، امنیه قوماندانانو او ولسوالانو ته سپارښتنه کړې ده چې د ورښتونو او سیلابونو وضعیت ته په پام د خلکو امنیت ته جدي پاملرنه وکړي.
د طالبانو تر واک لاندې د افغاني سرې میاشتې مشر شهابالدین دلاور د افغانستان لپاره د بریټانیا له ځانګړي استازي سره په انلاین ناسته کې د وروستیو طبیعي پېښو په پایله کې د اوښتو مالي او ځاني زیانونو په اړه خبرې کړې دي.
د طالبانو ستره محکمه وايي، چې په ننګرهار، نیمروز او پکتیکا ولایتونو کې یې «د مور او پلار د وهلو، نامشروع اړیکو او لواطت» په تور ۲۵ کسان په عام محضر کې په دُرو وهلي دي.