په ملګرو ملتونو کې د افغانستان دایمي استازي نصیراحمد فایق ویلي، چې له تېرو پنځو کلونو راهیسې طالبانو د «انساني اصولو، اسلامي لارښوونو او شرعي احکامو خلاف» د افغان نجونو او ښځو پرمخ د ښوونځیو او پوهنځیو دروازې تړلې دي. د هغه په وینا؛ دغه اقدام «ملي خیانت او نه جبرانېدونکی عمل» دی.
په ختیځ کې د طالبانو د ۲۰۱ خالد بن وليد قولاردو وياند وحيدالله محمدي وايي، چې د «ردالظلم» عملیاتو په لړ کې یې د کونړ ولایت سرکاڼو ولسوالۍ اړوند پر ډیورنډ کرښه له پاکستاني ځواکونو نیول شوې پوسته په ماینونو الوځولې ده.
د خیبر پښتونخوا د بنو والسوالۍ په غورا کلي کې ناپېژاندو کسانو یو ښوونځي په بمونو الوځولی، چې له کبله یې د یاد ښوونځي ودانۍ په بشپړه توګه ویجاړه شوې ده. پوليس وایي، ښایي وسلهوال په دغه ښوونځي کې مېشت وو او د چاودېدونکو توکو د جوړولو پرمهال دغه توکي پرې چاودلي وي.
یوشمېر افغان او د دوی ملاتړو هسپانوي مېرمنو په بروکسل کې د اروپايي پارلمان مخې ته د یوه لاریون پرمهال «شرم پر اروپا» او «د افغان مېرمنو لپاره ازادي» په شعارونو سره یې په افغانستان کې د ښځو کړکېچن وضعیت په اړه د سملاسي اقدام غوښتنه وکړه.
د بلوچستان ايالت د پښین والسوالۍ په یارو سیمه کې په یوه کور کې د وسلهوالو کسانو لهخوا ډزې شوې، چې له امله یې د یوې ښځې په ګډون درې کسان وژل شوي دي. پولیس وايي، دغه پېښه د نجلۍ د نه ورکړې له کبله رامنځته شوې او د هلک د کورنۍ لهخوا د نجلۍ پر کورنۍ ډزې شوې.
د مالیزیا لومړي وزیر انور ابراهیم ویلي، چې هېواد یې د اسلامي همکاریو سازمان سره په همغږۍ د طالبانو د ادارې په رسمیت پېژندلو موضوع ارزوي. هغه ټینګار کړی، چې په دې برخه کې هر ډول پرېکړه به د عدالت، د ښځو او اقلیتونو د حقونو د رعایت او زدهکړو ته د لاسرسي تضمین پر بنسټ وي.
په بغلان کې د ۵۰ چاپندازانو ترمنځ د وزلوبې پسرلنۍ سیالۍ ترسره شوې. دغه سیالۍ په بغلان کې د طالبانو تر واک لاندې د بدني روزنې او ورزش امریت اړوند د وزلوبې، نیزهوهلو او دودیزو لوبو ملي فدراسیون له لوري ترسره شوې.
د بلخ ولایت په مرکز مزارشریف ښار کې د یوه خصوصي سکتور له لوري د یو مېلیون ډالرو په لګښت یوې نوې صنعتي کارخونې په فعالیت پیل کړی دی. د یادې کارخونې مرستیال جاوید محبي وایي، په دې کارخونه کې د اوبو، تېلو او ګازو لپاره تولیدي قالبونه او ټانکرونه جوړېږي.
د امریکا خزانې وزارت اعلان کړی، چې د دغه هېواد د ولسمشر ډونالډ ټرمپ لاسلیک به د لومړي ځل لپاره د امریکا پر کاغذي بانکنوټونو درج شي؛ دا اقدام د یوه برحاله ولسمشر په دوره کې یو بېساری بدلون بلل شوی دی.
د ډيپلوماټ مجلې د افغانستان او پاکستان تر منځ د روان کړکېچ په اړه ویلي، چې طالبان دوه انتخابه لري، یا به له پاکستان سره د ټيټيپي پر سر د ډیپلوماټیکو خبرو له لارې تاوتریخوالی راکموي او یا به پر یوه داسې ملت واکمي کوي، چې له قحطۍ او لوږې سره لاس او ګران وي.
په افغانستان کې د طالبانو تر واکمنۍ لاندې نوی تعلیمي کال پرلهپسې پنځم ځل لپاره بیا هم داسې پیل کېږي، چې نجونې له شپږم ټولګي پورته د ښوونځي او پوهنتوني زدهکړو اجازه نهلري. یو شمېر نجونې وایي، له زدهکړو بېبرخې پاتې کېدل ماشومتوب کې د ودونو، خپګان او ناهیلۍ د زیاتېدو لامل کېږي.
په هرات ولایت کې د طالبانو د رسنیو دفتر مسوولین وايي، د هرات ښار د پنځمې ناحیې په شاوخوا کې یې د درملو او روغتيايي محصولاتو ۲۸ عمده پلورنځي ارزولي او ۴ یې د تخلفاتو له امله تړلي دي.
د پاکستان د اېمکیواېم ګوند مشر الطاف حسین د پاکستان حکومت ته په خطاب کې وویل، چې انساني لاره دا ده، څو پر افغانستان د بمبارۍ پر ځای ورسره مذاکرات وشي. هغه زیاته کړې، چې اسلاماباد دې د ایران او امریکا ترمنځ د منځګړیتوب پر ځای له کابل سره خپل مسایل حل کړي.
د شمالي کوریا دولتي خبرې اژانس راپور ورکړی، چې د دغه هېواد مشر کیم جونګاون او د بېلاروس ولسمشر الکساندر لوکاشینکو د پنجشنبې په ورځ (د وري ۶مه) په پیونګ یانګ کې د یوې سرمشریزې پر مهال د ملګرتیا تړون لاسلیک کړ.
د نجونو د زدهکړو فعالې او د سولې نوبل جایزې ګټونکې ملالې یوسفزۍ ویلي، چې د افغان ښځو غږ باید پیاوړی شي او نړۍ باید افغان ښځې په خپله مبارزه کې یوازې پرېنږدي.
د پاکستان د جمعیت علمای اسلام ګوند مشر مولانا فضل الرحمن د پنجشنبې په ورځ (د وري ۶مه) په یوه خبري کنفرانس کې ویلي، چې د پاکستان هغه دریځ ناسم دی چې ګواکې د افغانستان حکومتونه دې د دوی تر لاس لاندې وي. هغه زیاته کړې، چې یو خپلواک او باثباته افغانستان د پاکستان په ګټه دی.
د عوامي نشنل ګوند ایالتي مشر میا افتحار حسین وايي، چې پاکستان دې له طالبانو سره کړکېچ د خبرو له لارې حل کړي او همداراز یې خبرداری ورکړی، که جګړه دوام ومومي، نو دواړه لوریو ته به سخت زیان واوړي.
د افغانستان د پخواني وژل شوي ولسمشر ډاکټر نجیبالله لور هیله نجیب وایي، د افغانستان په تړاو نړیوالو بحثونو او پلټفورمونو کې «فاسدې څېرې» د ګډون لپاره بلل کېږي. هغه وایي، د افغانستان په تړاو بحثونه پر «فساد ککړو سیاسي څېرو» انحصار کړې دي.
د نجونو له حضور پرته د نوي ښوونیز کال له پیل سره سم، یو شمېر افغان او اسپانوي ښځینه فعالانو د بلجیم په پلازمېنه بروکسېل کې د اروپا د پارلمان مخې ته لاریون کړی او وايي، نړۍواله ټولنه دې د جنسیتي تبعیض پر وړاندې عملي اقدام وکړي.
د افغانستان د فوټبال ملي لوبډلې د ۲۰۲۷ اسیا جام د غوراوي سیالیو درېیم پړاو ته د لار موندنې په یوې لوبه کې یو ځل بیا لکه د لومړۍ لوبې په شان، د ۲–۱ په پایلې سره د میانمار پر وړاندې ماتې وخوړه. دا لوبه د افغانستان په کوربتوب په میانمار کې ترسره شوه.
پاریس کې یوې محکمې د اکسفورډ پوهنتون د اسلامي مطالعاتو پخوانی استاد طارق رمضان او د اخوان المسلمین د بنسټګر حسن البنا لمسی، پر درېیو ښځو د جنسي تېري په تور په ۱۸ کاله بند محکوم کړ. هغه دوه کاله وړاندې په سویس کې هم د جنسي تېري په جرم محکوم شوی و.