د طالبانو د ټولګټو وزارت وايي، چې تېره اونۍ د کب میاشتې له ۱۵مې څخه تر ۲۱مې نېټې پورې د رېل پټلۍ له لارې ۱۷۸ زره مټریک ټنه انتقالات شوي. په دغو انتقالاتو کې ۱۰۹۰ ټنه صادرات دي، چې لويه برخه یې وچه مېوه او دانارو جوس دي.
کندهار کې د طالبانو امنیه قوماندانۍ مسولین وایي، چې د راتلونکي اختر د ورځو او شپو د امنیت د ټینګښت لپاره یې په دې ولایت کې یوه ځانګړې ۱۵۰۰ کسیزه امنیتي قطعه جوړه کړې ده. طالبانو ویلي چې دا قطعه د ښار او شاوخوا سیمو د امنیت خوندې کولو او شکمنو خلکو د څار لپاره ده.
اسلام اباد د چین هڅې رد کړې چې د افغانستان د طالبانو حکومت سره اړیکې ښې کړي او ویلي یې دي چې تر هغه پورې به خپلې اوسني پالیسۍ ته دوام ورکړي، څو طالبان د پاکستان پر ضد د وسله والو ډلو د فعالیتونو په اړه عملي ګامونه پورته نه کړي.
په هلمند کې طالب مسوولین وايي، د کوچني اختر د رارسېدو په مناسبت د هبتالله اخوندزاده د ځانګړي حکم پر بنسټ د دغه ولایت له زندان څخه ۵۹۶ بندیان ازاد او د ۱۶۲ نورو د بند موده راکمه شوه. طالبانو له خوشي شویو بندیانو غوښتي چې په راتلونکې کې له جرمونو ډډه وکړې.
د بښنې نړیوال سازمان د جنوبي اسیا دفتر خبرداری ورکړی چې د افغانستان ښځې او نجونې د طالبانو د نوې جنايي مقررې له امله له عدالت، مساوات او خپلواکۍ څخه د لاسرسي له محدودیتونو سره مخ کېږي، او د بشري حقونو د دغو سرغړونو په وړاندې بېړنی اقدام اړین دی.
د طالبانو مشر ملا هبتالله اخندزاده د کوچني اختر په مناسبت په خپل پیغام کې د طالبانو او پاکستان ترمنځ وروستیو هوايي بریدونو، پر ډيورنډ کرښه جګړو او د ملکي وګړو مرګژوبلې په اړه هیڅ یادونه نده کړې.
د طالبانو مرستیال ویاند حمدالله فطرت وایي چې په تېرو ۲۴ ساعتونو کې په خوست، نورستان، کونړ او پکتیکا ولایتونو کې د پاکستان په بریدونو کې ۴ ملکي کسان وژل شوي او ۹ نور ټپيان دي. نوموړي ویلي چې په بریدونو کې د ملکي کسانو کورونه په نښه شوي.
د کندز د طالبانو امنیه قومندانۍ ویاند جمعه الدین خاکسار وایي چې یوه ښځینه ډاکټره له خپل درملتون څخه د کور پر لور روانه وه چې نامعلومو کسانو د چاقو برید پرې کړی او وژل شوې ده. خاکسار ویلي چې د پېښي په اړه پلټنې کوي.
د ملګرو ملتونو د هستوګنې اداره (UN-Habitat) وایي د کډوالۍ نړیوال سازمان (IOM) سره په ګډه یې پروژه پیل کړې چې له مخې به یې په افغانستان کې د داخلي بېځایه شوو او له نورو هېوادونو راستنېدونکو لپاره د کور، ځمکې او ملکیت حقونه خوندي کړي.
د طالبانو امربالمعروف وزارت ویلي چې په زابل، غزني او تخار کې یې «د ښځو د شرعي حقونو د ساتنې» په موخه ۱۱ ښځې له کورني تاوتریخوالي ژغورلي دي. طالبانو ویلي چې د همدې ښځو قضيې یې د «دیني عالمانو او قومي مشرانو» سره په ګډه څېړلي دي.
د طالبانو د کډوالو او راستنېدونکو چارو وزارت ویلي چې یوه پلاوي په ننګرهار کې د پاکستان سره د وروستۍ جګړې له کبله د بې ځایه شویو ۱۴۰ کورنیو سره نغدي او جامو مرستې کړې. طالبانو ویلي چې پر یادو کورنیو ۴۷۵ زره افغانۍ او لس جوړې ښځينه جامې یې وېشلي دي.
د طالبانو تر چتر لاندې د کډوالو ستونزو ته د رسېدنې کمېسیون د تازه معلوماتو له مخې، پرون د نیمروز، هرات او کندهار له لارې ۹۵ کورنۍ هېواد ته جبري راستنې شوې.
ډیموکراټ سناتور کریس کونز د امریکا د کډوالۍ ادارې په توقیف کې د مړ شوي افغان کډوال د دوسیې د څېړنې غوښتنه کړې. د امریکا د کډوالۍ ادارې ویلي ۴۱ افغان محمد نذیر پکتیاوال د دغې ادارې په بندخونه کې د یوې ورځې له تېرولو وروسته د ټېکزاس د دالاس ښار په پارکلنډ روغتون کې مړ شوی دی.
د امریکا د کډوالۍ او ګمرکونو اداره وايي، دغه ۴۱ افغان محمد نذیر پکتیاوال نومېده او د دغې ادارې په بندخونه کې د یوې ورځې له تېرولو وروسته د مارچ په ۱۴مه (شنبه) د ټېکزاس د دالاس ښار په پارکلنډ روغتون کې وفات شوی دی. دغې ادارې یاد افغان د جرمي مخینې لرونکی ناقانونه کډوال بللی دی.
د ملګرو ملتونو د امنیت شورا د بندیزنو کمیټې په دې وروستیو کې د طالبانو د هغو لوړپوړو غړو او چارواکو نوملړ خپور کړی، چې د دغې کمیټې لهخوا له بندیزونو سره مخ دي. په دې نوملړ کې د ملا محمد حسن اخوند، عبدالغني برادر او سراجالدین حقاني نومونه هم شامل دي.
د سعودي عربستان ولیعهد محمد بن سلمان او د متحده عربي امارات مشر محمد بن زاید النهیان په ټلیفوني خبرو کې ټینګار وکړ، چې د خلیج د همکاریو شورا پر غړو هېوادونو د ایران دوامداره بریدونه د کړکېچ زیاتوونکي او خطرناک دي او د سیمې امنیت او ثبات ګواښي.
د اسکار د جایزو ۹۸مه دوره د یکشنبې په ورځ (د کب ۲۴مه) په لسانجلس کې د امنیتي اندېښنو تر سیوري لاندې پر سرې غالۍ د مېلمنو په ورتګ سره پیل شوه. ټاکل شوې چې په دې مراسمو کې د سینما په بېلابېلو برخو کې لکه د غوره اداکارۍ، ډایرېکټرۍ او غوره فلم ګټونکي اعلان شي.
د اسراییل پوځ د دوشنبې په سهار اعلان وکړ، چې په لبنان کې یې د خپلو پوځي عملیاتو پر دوام په پلازمېنه بیروت کې د حزبالله ډلې پر مهمو زېربناوو او تاسیساتو پراخ بریدونه پیل کړي دي. دا بریدونه د بیروت پر سوېلي څنډو «ضاحیه» له یوې درنې بمبارۍ وروسته پیل شوي.
د پاکستان حکومت د اپوزیسیون مشر او دوو ګوندونو پر افغانستان د پاکستان په بریدونو کې ولسي وګړو ته د اوښتې مرګژوبلې په تړاو د اندېښنې څرګندولو سربېره د روانې شخړې د سمدستي پای ته رسېدو غوښتنه کړې ده. دوی ویلي، پاکستان باید په سیمه کې د سترو قدرتونو د تاوتریخوالي پروژې ختمې کړي.
فرانس پرېس اژانس د اسراییلي چارواکو له قوله راپور ورکړی، چې ټاکل شوې په راتلونکو ورځو کې د فرانسې په منځګړیتوب د لبنان او اسراییل ترمنځ د حزبالله د بېوسلې کولو او تلپاتې سولې په اړه جدي مذاکرات پیل شي.
د خوړو نړۍوال پروګرام ویلي، له هغو کورنیو سره یې د اړینو مرستو وېش پیل کړی چې د افغانستان او پاکستان ترمنځ د وروستیو نښتو له امله زیانمنې شوې دي. یاد سازمان زیاته کړې، سرحدي نښتو او په منځني ختیځ کې روانو جګړو افغانستان ته د دوی د مرستو رسولو لړۍ له خنډ سره مخ کړې ده.