آرشیف

د سوریې موقتي ولسمشر احمدالشرع د دوحې په ۲۳مه ناسته کې ویلي، چې د افغانستان او عراق جګړو کې بې‌ګناه ملکي وګړي وژل شوي او د ده په وینا، ریښتینی ترهګر هغه څوک دی چې ملکي خلک په نښه کوي.

د ایران د بهرنیو چارو وزیر عباس عراقچي ویلي، که واشنګټن خپله تګلاره او دریځ بدل کړي، تهران د اټومي او سیاسي مذاکراتو د بیا پیل لپاره چمتو دی.

د تېر جمهوري نظام پر مهال د ملي دفاع وزارت سرپرست شاه محمود میاخېل وايي، پاکستان د خپلو ستراتیژیکو موخو لپاره د سیمې هر هېواد ته جلا جلا افراطي ډلې جوړې کړي او د هر هېواد پر ضد ترې استفاده کوي.

د عوامي نشنل ګوند مشر اېمل ولي خان د پاکستاني پوځ او طالبانو ترمنځ وروستۍ نښتو ته په اشارې سره ویلي، چې دا د «بادارانو او د هغوی د خپلو نوکرانو» ترمنځ جګړه ده.

د طالبانو د سرحدونو، قومونو او قبایلو چارو وزیر وايي، د «مدرسې او لېسې او د پوهنتون او حجرې» بېلول غربي فکر دی. نورالله نوري ټینګار کوي: «اشغالګر د یوې دسیسې له مخې هڅه کوي په دې برخه کې ګډوډي رامنځته کړي.»

د هلمند په موسی کلا ولسوالۍ کې د یوه کور د خونې د نړېدو له امله د یوې کورنۍ د یوې ښځې په ګډون ۳ کسان مړه او ۳ نور ټپیان شوي دي. دغه پېښه د شنبې په ورځ (د لیندۍ ۱۵مه) د یادې ولسوالۍ په چېل سیمه کې رامنځته شوې ده.

په کندهار کې د واک او نفوذ د معادلې تر شا یو نوم په تکرار سره یادېږي «ملاشیرین»؛ هغه کس چې د طالبانو د مشر له تر ټولو نږدې او باوري ملګرو ګڼل کېږي او له همدې اړیکو په استفادې په کندهار کې داسې موازي ځواک جوړوي، چې ان د طالبانو امنیتي او استخباراتي ادارې هم ورسره موافق نه دي.

د طالبانو د بهرنیو چارو وزارت لوړپوړی چارواکی ذاکر جلالي وايي، چې د دوحې فورم د سیمه ييز نښلون په چوکاټ کې د افغانستان پر رول له بحث څخه څرګندیږي، چې د افغانستان په اړه پخوانی امنیتي او د کړکېچ لید په تدریجي ډول د نښلون، او اقتصادي ودې پر نوي روایت بدلېږي.

په مسکو کې د طالبانو سفارت وايي چې طالب سفیر ګل حسن حسن د پانګونې او اقتصادي «دوم تاوریچسکي» فورم کې کډون کړی. دوی زیاتوی، چې د فورم په ترڅ کې د خرسون والي ولادمیر سلدو ویلي، چې دغه سیمه چمتو ده، چې افغانستان ته زراعتي محصولات، په ځانګړي ډول غنم صادر کړي.

د ایران د پارلمان او د بودیجې د کمېسیون غړي محسن زنګنه ویلي، چې په تېرو دوو کلونو کې څه باندې زر تنه افغان پانګوال او متشبثین د اسعارو د ستونزو له امله له ایران څخه وتلي او خپل فعالیتونه یې په افغانستان کې پیل کړي دي.

د طالبانو د ننګرهار امنیه قومندانۍ ویاند وايي، چې نن ددې ولایت په کامې ولسوالۍ کې د یوې ناچاودې مرمۍ د چاودنې پېښه رامنځته شوې ده. سید طیب حماد زیاتوي چې د چاودنې په پایله کې درې کسانو خپل ژوند له لاسه ورکړی دی.

د ترکیې د بهرنیو چارو وزیر هاکان فیدان ویلي، چې د غزې په تړون کې د حماس له بې وسلې کولو وړاندې دې د فلسطني پولیسو د باور وړ او روزل شوې اداره رامنځته شي.

طالبانو پر وړاندې د سیمه ییز او نړیوال فشار له زیاتوالي سره سم ایران د طالبانو له ادارې سره د جوړجاړي او هوکړې ته د رسیدو لپاره ددې ډلې له سیاسي مخالفینو سره اړیکې زیاتې کړي دي. سرچینې وايي، تهران په دې وروستیو کې ځینو سیاسي شخصیتونو او مخالفو مشرانو د استازو کوربه توب کړی دی.

په سپین بولدک کې د طالبانو او پاکستاني سرحدي ساتونکو ترمنځ له نښتې سره هم مهاله د پاکستان پوځ د خیبر پښتونخوا په ټانک او لکی مروت سیمو کې د نهو وسله والو د وژلو اعلان کړی. د پاکستان پوځ ویلي چې د وسله والو ځینې وسلې او مهمات هم لاسته ورغلي دی.

د طالبانو د اطلاعاتو او کلتور وزارت کلتوري اتشې حمیدالله تکین د ترکیې پارلماني چارو کمېسیون له رییس سلیمان سویلو سره لیدلي او دواړو هېوادونو ترمنځ د فرهنګي او علمي اړیکو د پراختیا په اړه یې خبرې کړي دي.

د طالبانو د خوست والي عبدالله مختار وايي، چې په دې وروستیو کې د طالبانو سره د پاکستان له‌خوا په اړيکو کې رامنځته شوې ترینګلتیا د پاکستان د ولسونو او سياسيونو دريځ نه دی. نوموړی زیاتوي، دا ستونزه د یوې کوچنۍ او شریرې پوځي کړۍ د نامسووله کړنو پایله ده، چې عامه ملاتړ نه لري.

د کندهار سپین بولدک ولسوالۍ اوسېدونکي د طالبانو او پاکستان ترمنځ د جګړي په غبرګون کې وايي، چې پاکستان غواړي د عامو خلکو سوداګري او ژوند زیانمنه کړي. د دوی په خبره په تېرو دوو میاشتو کې د دواړو لوریو ترمنځ د جګړو په پایله کې د ځاني‌ زیان ترڅنګ مالي زیانونه هم ور اوښتي‌ دي.

د طالبانو د امربالمعروف وزارت ویاند د اسټرالیا بهرنیو چارو وزارت له لوري پر طالب وزیرانو بندیزونو ته په غبرګون کې ویلي، دا کومه نوې خبره نه ده. ‏سیف الاسلام خیبر وايي، په تېرو څلورو کلونو کې هم ورته بندیزونه لګېدلي، دا ددې ښکارندویي کوي چې دوی خپله د بشر حقونو ته ژمنتیا نه لري.

د طالبانو د ۲۰۷ قول اردو ویاند مجیب الله انصار ویلي، چې په تېره اوونۍ کې یې ۵۲۷ کسان چې غوښتل یې په ناقانونه توګه ایران او ترکمنستان ته ولاړ شي، نیولی دي.

د طالبانو د لوړو زده کړو وزیر ندا ​​محمد ندیم په رسمي بلنه ایران ته سفر کړی. خپره شوې خبرپاڼه کې راغلي، یاد پلاوی د علمي اړیکو د پراختیا او له ایران سره د تجربو د تبادلې په موخه تللی دی. طالب وزیر ندا محمد ندیم په ۱۴۰۱ کال کې د افغان نجونو پر مخ د پوهنتونونو دروازې وتړلې.

د طالبانو تر واک لاندې د احصايي او معلوماتو ادارې ویلي، چې د روان کال په لړم میاشت کې د خوراکي توکو په بیو کې ۲،۳ سلنه لوړوالی راغلی دی، خو د لامل په اړه یې څه نه دي ویلي.