د ایران د سپاه پاسداران له خبرداري وروسته د بریتانیا حکومت ویلي، د دغه هېواد وسلهوال ځواکونه د هر ډول احتمالي برید پر وړاندې د غبرګون ښودلو او د هېواد د دفاع لپاره بشپړ چمتووالی لري.
د ملګرو ملتونو د سرمنشي ویاند سټیفان دوجاریک اعلان وکړ چې د افغانستان په مرکزي، ختیځو او سویل ختیځو ولایتونو کې د وروستیو سختو بارانونو او سېلابونو له امله زیانمنو شویو خلکو ته د بشري مرستو رسولو لړۍ پیل شوې ده.
د پروان ولایت لپاره د طالبانو د رسنیو دفتر مسوولین وايي، په دغه ولایت کې د نننیو (جمعه د زمري لومړۍ) بارانونو او سېلابونو له امله ۲ کسان مړه شوي او ۲۰ کورونه ویجاړ شوي دي. د دوی په وینا، د همدې سېلابونو له امله د پروان- بامیان لویه لاره هم د ټرافیک پر مخ بنده شوې ده.
د روغتیا نړیوال سازمان (ډبلیو ایچ او) د ختیځې مدیترانې سیمهییزې مشرې حنان بلخي، ویلي چې په افغانستان کې وروستیو مرګونو سېلابونو یو ځل بیا وښوده چې هېواد پیاوړي او مقاوم روغتیايي نظام ته جدي اړتیا لري، څو خلک د طبیعي پېښو پر مهال هم ژوند ژغورونکو روغتیايي خدمتونو ته لاسرسی ولري.
سرچینو افغانستان انټرنشنل – پښتو ته ویلي چې د طالبانو مشر ملا هبت الله د هرات د اطلاعاتو او کلتور رییس احمد الله متقي له دندې ګوښه کړی. نوموړی د طالبانو د بهرنیو چارو د وزیر امیرخان متقي ورور دی او له څو کلونو راهیسې په دغه دنده کې و.
د بادغیس د برېښنا ریاست د یوې خبرتیا په خپرولو سره ویلي، د ترکمنستان- بادغیس د ۱۱۰ کیلوولټ برېښنا به سبا (جمعه د زمري ۲مه) د ۷ ساعتونو لپاره د ترکمنستان له لوري پرې شي. دغه ریاست د برېښنا د قطع کېدو لامل تخنیکي ستونزې یادې کړې دي.
له بدخشان څخه یو شمېر سمه ییزو سرچینو افغانستان انټرنشنل – پښتو ته ویلي، چې څو ساعته وړاندې د طالبانو او د دې ډلې د مخالفو ځواکونو تر منځ د بدخشان د زیباک ولسوالۍ اړوند د «توپخانې» په سیمه کې جګړه شوې ده. د طالبانو د کورنیو چارو وزارت یوې سرچینې جګړه تایید کړې ده.
د طالبانو د لوړو زده کړو وزیر نداء محمد ندیم په خوست کې د شیخ زاید پوهنتون د ۹۲۵ محصلینو په فراغتغونډه کې د خپل مشر د فرمانونو پر پلي کولو ټینګار وکړ. هغه له مسوولینو وغوښتل چې د بېاطاعتۍ پر ځای خپلې دندې د عبادت په نیت ترسره کړي.
د طالبانو د کورنیو چارو وزارت ویلي چې ډیورنډ کرښې ته څېرمه د کونړ د سرکاڼو ولسوالۍ په شونګړۍ دره کې یې ۵۶ ځای پر ځای شوي فشاري ماینونه او ۱۲ د هاوان مرمۍ کشف او شنډ کړي دي. طالبانو دا نه دي ویلي، چې دغه ماینونه څنګه او چا اېښي دي.
د امریکا ولسي جرګې د ډونالډ ټرمپ له خوا د ایران پر ضد د پوځي عملیاتو د درولو په موخه یوه طرحه تصویب کړې ده، خو دا پرېکړه رسنیو سمبولیکه بللې، ځکه په وینا یې د جګړې پر درولو عملي اغېز نه لري.
د رویټرز د راپور له مخې، ایران په جولای میاشت کې یمن ته د سپاه پاسداران قوماندانان، پوځي سلاکاران، د توغندیو او بېپیلوټه الوتکو اړوند تجهیزات او د یاغیانو د تمویل لپاره سره زر لېږلي دي.
د پلازمینې کابل په ګډون د هېواد په شپږو ولایتونو کې سختو بارانونو او سېلابونو خلکو ته مالي زیانونه اړولي دي. دغه سېلابونه تېره شپه او نن ورځ په کابل، خوست، میدان وردګ، پکتیکا، لوګر، پروان او پنجشیر ولایتونو کې راوتلي وو.
په پروان ولایت کې د طالبانو د پولیسو مسوولان وايي، د دغه ولایت د مرکز چاریکار ښار په مربوطاتو کې د یوه موټر او بایسکل د ټکر له امله یو بایسکلچلوونکی مړشوی او درې نور کسان ټپیان شوي دي.
د یوه څېړنیز بنسټ د راپور لهمخې، په ۲۰۲۵ کال کې په اروپايي هېوادونو کې د کډوالو د کارموندنې کچه تر بل هر وخت لوړې کچې ته رسېدلې او د کډوالو او په همغو هېوادونو کې د زېږیدلو کسانو ترمنځ واټن کم شوی دی.
د میدان وردګو ولایت د سیداباد ولسوالۍ د ټوپ دښتې یو شمېر اوسېدونکو افغانستان انټرنشنل پښتو ته په پیغامونو کې ادعا کړې چې د ټوپ دښتې بازار او پوهنتون ته مخامخ ځمکه د ۵۲ کسانو شخصي ملکیت دی، خو په وروستیو ورځو کې طالب ځواکونه هڅه کوي دغه ځمکه تر خپل واک لاندې راولي.
د طالبانو د کانونو او پټرولیم وزارت چارواکو له ازبکستاني پانګهوالو سره د افغانستان د کانونو په برخه کې د فرصتونو په تړاو خبرې کړې دي. طالبانو ویلي چې د ازبکستان پانګوالو د سرب او جستو د کانونو په برخه کې پانګونې ته لېوالتیا ښودلې ده.
۵۶ کلن بزګر عبدالحمید له ۱۸ کلونو راهیسې په مرکزي بغلان کې خپله څلور جریبه ځمکه کري. هغه وايي، « «بارانونه په ناسم وخت کې وشول. لومړی یې د غنمو فصل خراب کړ، بیا یې رومیان، خټکي او هندواڼې زیانمنې کړې».
د ازبکستان د احصايي ادارې د شمېرو لهمخې، د روان کال په لومړیو شپږو میاشتو کې د نورو هېوادونو د وګړو په پرتله افغانانو دغه هېواد ته ډېر سوداګریز سفرونه کړي دي. د شمېرو لهمخې، یوازې په تېرو شپږو میاشتو کې له ۲۰۵ زره ډېرو افغانانو ازبکستان ته سوداګریز سفرونه کړي دي.
په ۲۰۲۶ کال کې قرغیزستان د لومړي ځل لپاره افغانستان ته هم د جوارو صادرات پیل کړي دي. د معلوماتو له مخې، افغانستان ته ۱۱ سوه زره ټنه جوار صادر شوي، چې ارزښت یې ۱۴،۷میلیونه قرغزي سوم (شاوخوا ۱۷۰ زره ډالره) کیږي.
د ازبکستان د سردریا ولایت په مرکز ګلستان ښار کې د «سردریا – افغانستان» تر نامه لاندې د پانګونې سوداګریز فورم کې د افغانستان او ازبکستان د صنعت، کرنې، ودانیزو توکو، لېږد رالېږد، صادراتو او وارداتو په برخو کې د همکاریو پر امکاناتو خبرې وشوې.
د خوست میخانیکي انسټیټیوټ یو شمېر فارغان ادعا کوي چې د فراغت له څه باندې یوه کال تېرېدو سره سره، د خوست ښاروالۍ لا هم د دوی د عملي (پرکټیک) دورې اسناد نه دي ورکړي او په بېلابېلو پلمو یې ځنډوي.