د طالبانو د کورنیو چارو وزارت د مطبوعاتو رییس عبدالحکیم همت وایي، پاکستان د افغانستان له پرمختګ، ملي یووالي او په خپلو پښو له درېدو سره ستونزه لري. نوموړي پاکستان د افغانستان «منحوس دښمن» وباله او له خبریالانو یې وغوښتل چې د خلکو د افکارو د تنویر ترڅنګ «فکري جګړه» هم مخته یوسي.
د اسلامي همکاریو سازمان د ښځو د چارو وزیرانو د خپلې نهمې غونډې په رسمي اعلامیه کې په افغانستان کې د نجونو پر زدهکړو او د ښځو پر کار د طالبانو د بندیزونو د لرې کولو غوښتنه کړې ده. سازمان ویلي، چې د طالبانو بندیزونه د اسلام له ارزښتونو سره په ټکر کې دي.
د طالبانو د چاري ادارې رییس نور الحق انور ادعا کړې چې بهرنۍ رسنۍ د یادې ډلې د اطاعت او یووالي د کمزوري کولو هڅه کوي. نوموړي ټینګار کړی چې رسنۍ باید حقیقي معلومات تر خلکو ورسوي.
په امریکا کې یوه منصفه پلاوي هغه موټر چلوونکی تورن کړی، چې په جورجیا کې یې د ترافیکي پېښې پر مهال د یوه افغان خبریال په ګډون دوه کسان وژلي وو. د راپورونو له مخې، تورن کواډرامیل ویلیامز د پولیسو له تعقیب څخه د تېښتې پر مهال له بل موټر سره ټکر کړی و.
د جمهوري نظام پر مهال د چارو ادارې رییس فضل محمود فضلي د بلوچستان وروستیو ناامنیو په تړاو ویلي، چې «پاکستان هڅه کوي د اجیرو او مصنوعي ملیشو په جوړولو سره د پښتنو او بلوڅو تاریخي پیوستون کمزوری کړي» خو په وینا یې «دا یووالی ژورې تاریخي ریښې لري او په توطیو نه ماتېږي».
د پکتیکا ولایت لپاره د طالبانو امنیه قوماندانۍ خبر ور کړی، چې د ځنګلونو د ساتنې او څارنې قطعې د لرګیو د ناقانونه لېږد پر مهال یو ټانکر موټر نیولی دی. په دغه ټانکر کې په مهارت سره لرګي ځای پر ځای شوي وو.
د قزاقستان د صنایعو او ودانیزو چارو وزیر اعلان کړی، چې د خپلو اوسپنې فابریکو لپاره یې له افغانستان او قرغیزستان څخه د خامو موادو د واردولو په اړه نوي تړونونه لاسلیک کړي دي.
د طالبانو د اطلاعاتو او کلتور وزارت وايي، چې د پروان ولایت د سیاه ګرد ولسوالۍ په فرنجل سیمه کې له میلاده ۳۰۰ کاله وړاندې جوړه شوې کلا د لرغونې سیمې په نامه ثبت شوې ده. دغه سیمه چې د کافر کلا په نوم یادېږي، تاریخي مخینه یې له میلاد څخه شاوخوا ۳۰۰ کاله وړاندې زمانې ته رسېږي.
د افغانستان د سوداګرۍ او پانګونې خونې په کوربهتوب د افغانستان، روسیې او قزاقستان د سوداګرو ترمنځ د ۴۴۶،۶ میلیونه افغانیو په ارزښت سوداګریزې هوکړې لاسلیک شوې. دغه هوکړې ودانیز مواد، درمل، خوراکي توکي او کرنیز خدمتونه رانغاړي.
په پنجشېر کې د طالبانو د والي ویاند سیفالدین لټون ویلي، ۳زره او ۹۵ قیراطه زمرد چې د دغه ولایت له کانونو کېندل شوي؛ د ازادې داوطلبۍ له لارې پلورل شوي دي. د هغه په وینا؛ د پلورل شویو زمردو ارزښت ۲ مېلیونه او ۱۱۹ زره افغانیو ته رسېږي.
د برېتانیا لهخوا د افغانستان جګړې د څېړنې خپلواک کمېسیون ته دوو شاهدانو ویلي، چې برتانوي ځانګړو ځواکونو افغان بندیان د خپلې «تفریح» لپاره پر لیفټراک (د بار وړلو ماشین) پورته کول او بیا یې له هغه ځایه لاندې غورځول.
افغانستان ته ستنېدونکی یو کډوال فرمان افغان وایي، د مزدورۍ له لارې یې د خپلې کورنۍ اړتیاوې پوره کولې؛ خو څو ځلې د پولیسو له لوري ونیول شو. هغه وایي: «یو ځل درې ورځې په زندان کې وساتل شوم او د خوشې کېدو لپاره مې ۳۰زره کلدارې ورکړې. دویم ځل بیا ۳۵زره کلدارې راڅخه واخیستل شوې».
د شپږیزې کرېکټ لیګ په نننیو سیالیو کې سپینغر پړانګانو د بست ساتونکو لوبډلې ته د ۶ وېکټو په توپیر ماتې ورکړه. بست ساتونکو ۱۴۴ منډې هدف وټاکه او سپين غر پړانګانو لوبډلې په ۱۵م اور کې دغه هدف پوره کړ او بریا یې خپله کړه.
د ملګرو ملتونو د بشري چارو د همغږۍ دفتر (اوچا) په خپل تازه راپور کې ویلي، چې په افغانستان کې لاهم ښځې او نجونې د بشري ناورین تر ټولو ډېرې اغېزمنې دي. د راپور له مخې؛ په ۲۰۲۶کال کې له ۱۰.۷ مېلیونه زیاتې ښځې او نجونې بشري مرستو ته اړتیا لري.
د طالبانو عدلیې وزارت خبر ورکړی، چې د مرکزي زون غصب شویو ځمکو ته د رسېدنې ځانګړې محکمې د کابل ښار د ۱۷مې ناحیې اړوند د «غیبي بابا» ښارګوټي څه باندې یو زر او ۴۲ جریبه ځمکې اسناد ارزولي چې په پایله کې یې د دغه ښارګوټي ۵۳۲.۱۱ جریبه ځمکه دولتي ثابته شوې.
د خیبربښتونخوا د سوات او بر دېر ترمنځ په غرنیو سیمو کې د وسلهوالو د بیا راڅرګندېدو راپورونو له خپرېدو وروسته په ټوله دره کې د ناامنۍ زیاتېدو په اړه اندېښنې زیاتې شوې دي.
د اېبولا ناروغۍ د چټک خپرېدا له امله د امریکا حکومت اعلان کړی، چې امریکايي وګړي نهشي کولی له کانګو ډیموکراتیک جمهوریت څخه په مستقیمو سوداګریزو الوتنو کې امریکا ته سفر وکړي.
د خیبر پښتونخوا د ګمرکونو چارو مسوولین وايي، په بشري مرستو بار د ملګرو ملتونو ۲۱ کانټینره چې پرون تورخم ته رسېدلي وو؛ د ګمرک او اړوندو ادارو له لوري د قانوني بهیر تر بشپړېدو وروسته دغه مرستې طالب چارواکو ته وسپارل شوې.
که څه هم طالبانو په دې وروستیو کې په ځینو مالیاتي قوانینو کې د سوداګرو د ملاتړ په موخه تخفیفونه او کمښتونه اعلان کړي؛ خو یوشمېر پانګهوال او کاروباریان وايي، چې دغه بدلونونه د دوی ستونزې نهشي هوارولی او لاهم د سوداګرو پر اوږو د څو ډوله درنو مالیاتو بار پروت دی.
د طالبانو لوی درستیز فصیحالدین فطرت ویلي، چې د افغانستان پر خاوره د پاکستان هېڅ برید بېځوابه نهدی پاتې شوی او هر ځل ورته پرېکنده ځواب ورکړل شوی دی. فطرت د (ټيټيپی) موضوع د پاکستان د بریدونو لپاره یوه پلمه بللې او ویلي یې دي، چې دغه ستونزه د طالبانو له واکمنېدو مخکې هم وه.
د طالبانو د صنعت او سوداګرۍ وزارت وایي، تېرکال له افغانستان نه شاوخوا ۲۹۰زره ټنه تازه مېوه بهر ته صادره شوې ده. د یاد وزارت ویاند احسانالله احسان ویلي، چې دغه مېوې هند، قطر، متحده عربي اماراتو، د منځنۍ اسیا هېوادونو، روسیې او یوشمېر اروپایي هېوادونو ته صادرې شوې دي.