د طالبانو لوی درستیز فصیحالدین فطرت ویلي، چې د افغانستان پر خاوره د پاکستان هېڅ برید بېځوابه نهدی پاتې شوی او هر ځل ورته پرېکنده ځواب ورکړل شوی دی. فطرت د (ټيټيپی) موضوع د پاکستان د بریدونو لپاره یوه پلمه بللې او ویلي یې دي، چې دغه ستونزه د طالبانو له واکمنېدو مخکې هم وه.
د طالبانو د صنعت او سوداګرۍ وزارت وایي، تېرکال له افغانستان نه شاوخوا ۲۹۰زره ټنه تازه مېوه بهر ته صادره شوې ده. د یاد وزارت ویاند احسانالله احسان ویلي، چې دغه مېوې هند، قطر، متحده عربي اماراتو، د منځنۍ اسیا هېوادونو، روسیې او یوشمېر اروپایي هېوادونو ته صادرې شوې دي.
د خیبر پښتونخوا په چارسده کې پولیسو د بېاسناده افغان کډوالو پرضد عملیات ترسره کړي او ۲۹ افغان کډوال یې نیولي دي. د ځایي چارواکو په وینا؛ د قانوني پړاوونو تر بشپړېدو وروسته دغه کسان په جبري توګه افغانستان ته ستانه کړای شوي.
د طالبانو د کډوالو د دایمي مېشتېدنې او د ځمکو وېش کمېټې خبر ورکړی، پرون یې په څلورو ولایتونو ننګرهار، فراه، فاریاب او نیمروز کې پر تازه ستنو شویو ۱۲۰۰ کډوالو کورنیو استوګنیزې نمرې وېشلې چې له دې سره د وېشل شویو استوګنیزو نمرو شمېر ۵۹زره او ۵۴۸ ته لوړ شو.
د مزار شریف یو اوسېدونکي افغانستان انټرنشنل ته ویلي، چې په ۴۳ درجې ګرمۍ کې د برېښنا پرلهپسې پرې کېدو له ګڼو ستونزو سره مخ کړي دي. د هغه په خبره؛ دغه وضعیت د ښځو، ماشومانو، سپین ږېرو او نورو لپاره د نه زغملو وړ دی.
د خیبر پښتونخوا په صوابۍ ولسوالۍ کې پولیسو د یو لړ عملیاتو پرمهال ۳۸ افغان کډوال نیولي دي. ځایي چارواکي وایي، د قانوني بهیر تر بشپړېدو وروسته ټول دغه نیول شوي کډوال بېرته افغانستان ته ستانه کړای شوي دي.
د کابل یو اوسېدونکي افغانستان انټرنشنل ته ویلي، چې د طالبانو د دولتي بستونو لپاره د ګومارنې په بهیر کې پراخ فساد روان دی. د هغه په خبره؛ طالبان د پوهنې وزارت په دولتي بستونو کې خپل خپلوان او ملګري ګوماري.
د هرات یو اوسېدونکي افغانستان انټرنشنل ته په یوه لېږلي غږیز پیغام کې ویلي، چې له قانوني اسنادو سره، سره طالبان د هرات په استوګنیزو ښارګوټو کې د دوی پر خپلو ځمکو د ودانیزو چارو اجازه نهورکوي.
په پاکستان کې د بېاسناده افغان کډوالو د بېرته ستنولو روان بهیر له امله اوس هغه کورنۍ هم بېرته افغانستان ته د ستنېدو په حال کې دي، چې ماشومانو یې له کلونو راهیسې په دغه هېواد کې زدهکړې کولې.
په هرات کې د طالبانو د سوداګرۍ او پانګونې ریاست خبر ورکړی، چې د روان کال په لومړیو درېیو میاشتو کې له دغه ولایت څخه ۵۳زره ټنه خوراکي او غیرخوراکي توکي امریکا، اروپا، اسیا او د سیمې یوشمېر هېوادونو ته صادر شوي دي.
د طالبانو تر کنټرول لاندې د احصایې او معلوماتو ادارې ویلي، چې په ۱۴۰۵ لمریز کال کې په افغانستان کې د اوبیزو او للمي کرنیزو ځمکو کچه د تېر ۱۴۰۴ کال په پرتله شاوخوا ۱۰،۲ سلنه لوړه شوې ده.
اسراییل هیوم ورځپاڼې راپور ورکړی چې د خلیج فارس یو شمېر هېوادونو په یوه ګډ پیغام کې واشنګټن ته د ایران پر ضد د پوځي بریدونو د بیا پیل بشپړ ملاتړ اعلان کړی دی.
د کرکټ نړیوالې شورا (ایسيسي) د افغان ښځینه کرکټ لوبغاړو لپاره د پرمختیايي پروګرام د دوام ملاتړ کړی او د دې موخې لپاره یې ځانګړی کاري ډله بیا فعاله کړی، څو تر ۲۰۳۰ کال پورې د دغې لوبډلې د رسمي سیالیو لپاره د ګډون یوه منظمه او دوامداره نقشه برابره کړي.
د امریکا د کډوالۍ او ګمرک ادارې ویلي، د مکسیکو د نشهیي توکو د قاچاق د «لاس چاپیتوس» ډلې دوه مشران، ایوان ارچیوالدو ګوزمان سالازار او خیسوس الفریدو ګوزمان سالازار، لا هم تښتېدلي دي او د هر یوه د نیولو او محکومیت ته د لار هوارولو په بدل کې ۱۰ میلیونه ډالره انعام ټاکل شوی دی.
د بشري حقونو څار بنسټغړې الیسا کلمن، د امریکا د کډوالۍ ادارې په توقیف کې د افغان پناهغوښتونکي محمد نذیر پکتیاوال د مړینې په تړاو د روڼتیا، حسابورکونې او د هغه د بشپړ عدلي طبې معاينې د راپور د خپرېدو غوښتنه کړې ده.
د طالبانو د اطلاعاتو او کلتور وزارت د افغانستان له هنرمندانو غوښتي چې د خپلو اثارو له لارې دې د دې ډلې د واک ته رسېدو «لاستهراوړنې او فداکارۍ» نندارې ته وړاندې کړي.
د امریکا مرکزي قوماندانۍ (سینټکام) ویلي، د ایران پر ضد یې د دریمې پرلهپسې شپې لپاره هوايي بریدونه پیل کړي دي. هممهاله، په متحده عربي اماراتو کې د امریکا سفارت د سیمهییز امنیتي وضعیت له امله د قونسلي ملاقاتونو د لغوه کېدو او د ویزې د عادي خدمتونو د ځنډېدو خبر ورکړی دی.
په کابل کې د چراغ پوهنتون د طب پوهنځي یو محصل نور نوري له تېرو ۴۱ ورځو راهیسې د طالبانو د کورنیو چارو وزارت د اختطاف ضد ریاست په نظارت کې ساتل کېږي. د هغه ټولګیوال وايي، نوري د پیسو ترلاسه کولو لپاره د یو ملګري خواته روان و، خو په لاره د طالبانو له خوا ونیول شو.
د پولنډ سرحدي ځواکونو اعلان کړی چې د لیتوانیا او بلاروس له پولو سره په درې ورځنیو عملیاتو کې یې ۷۱ کډوال، چې یو شمېر افغانان هم په کې شامل دي، نیولي دي.
د خیبر پښتونخوا حکومت ویلي چې په دغه ايالت کې د کوم نوي پوځي عملیاتو د پیل منظوري نه ده ورکړل شوې او په ټولنیزو رسنیو کې په دې اړه خپرېدونکې ادعاوې او اوازې بېبنسټه او د حقایقو پر ضد دي.
په تاجکستان کې د افغانستان سفارت د یو شمېر زدهکوونکو چې ډېری یې نجونې وې، د فراغت مراسمو د جوړېدو خبر ورکړی دی. دا په داسې حال کې ده چې په افغانستان کې له شپږم ټولګي پورته نجونې له نږدې څلورو کلونو راهیسې د طالبانو له لوري له زدهکړو محرومې دي.