په لوګر کې د طالبانو د کرنې، اوبو لګولو او مالدارۍ ریاست خبر ورکړی، چې سږکال په دغه ولایت کې د هندواڼو حاصلات د تېرکال پرتله زیات شوي دي. د یاد ریاست د کرنیزو چارو امر نصیرالدین بهیج وایي، چې سږکال په ۲۵۰۰ هکټاره ځمکه هندواڼې کرل شوې دي.
په بادغیس کې د طالبانو د کرنې، اوبو لګولو او مالدارۍ ریاست خبر ورکړی، چې سږکال په دغه ولایت کې د اقلیمي بدلون او د حشراتو د بریدونو له امله د پستې حاصلات ۵۰ سلنه کم شوي دي.
د خیبر پښتونخوا د پېښور د بورډ بازار په ټاون سیمه کې پولیسو د یو لړ عملیاتو پرمهال ۱۱ افغان کډوال نیولي دي. د ځایي پولیسو د معلوماتو له مخې؛ نیول شوي کسان به د قانوني بهیر تر بشپړېدو وروسته د تورخم له لارې افغانستان ته ستانه کړل شي.
د خیبر پښتونخوا سوداګرو او موټر چلوونکو له تېرو لسو میاشتو راهیسې د تورخم لارې تړل پاتې کېدو له امله یو وار بیا اعتراض کړی. دوی خبرداری ورکړی، که سوداګریزې لارې ژر تر ژره خلاصې نهشي؛ نو دوی به تر اسلاماباد پورې لاریونونه وکړي او د پېښور–تورخم لویه لاره به وتړي.
د طالبانو ویاند مرستیال حمدالله فطرت وایي، تر دې دمه پر راستنو شویو کډوالو ټولې ۵۷زره او ۷۳۰ نمرې ځمکې وېشل شوې او دغه لړۍ لاهم دوام لري. د هغه په وینا؛ یوازې په تېرو پنځو ورځو کې په بېلابېلو ولایتونو کې پر ۲زره او ۳۶ کډوالو استوګنیزې نمرې وېشل شوې.
د طالبانو د کرنې، اوبو لګولو او مالدارۍ وزیر عطاالله عمري هند ته د خپل سفر په ترڅ کې د دغه هېواد د کرنې او کلیوالي پراختیا ملي بانک (NABARD) له رییس ډاکټر شاجي کرېشنن وي سره لیدلي او د کرنې، کلیوالي پراختیا، تخنیکي ظرفیت لوړونې او د ګډو همکاریو د پراختیا په اړه یې خبرې کړې دي.
«له پولیو پاک افغانستان» بنسټ ویلي، د شنبې په ورځ (د چنګاښ ۲۰مه) به د کونړ ولایت په ټولو ولسوالیو او د نورستان ولایت په یوشمېر ولسوالیو کې د ګوزڼ ضد واکسینو کمپاین پیل شي.
د افغانستان انټرنشنل پښتو لهخوا د راټولو شویو شمېرو له مخې؛ تېره یوه اوونۍ د چنګاښ له ۱۲مې تر ۱۸مې نېټې له ایران او پاکستان نه ۲زره او ۹۹۸ کورنۍ چې د غړو شمېر یې ۱۵زره او ۹۵۵ کسان کېږي، افغانستان ته ستانه شوي.
د خیبر پښتونخوا حکومت د بېاسناده افغان کډوالو د اېستلو تازه لړۍ نن پیل کړه او په پام کې لري، چې شاوخوا ۲۰زره افغانان په دغه پړاو کې له پېښور نه بېرته افغانستان ته ستانه کړي.
د ۲۰۲۱کال په اګست میاشت کې واک ته د طالبانو له رسېدو وروسته زرګونه افغان کورنۍ پاکستان ته کډه شوې؛ خو اوس د دغه کورنیو ډېری غړي د دویم ځل لپاره د بېځایه کېدو له ګواښ سره مخ دي.
د افغانستان لپاره د ملګرو ملتونو د سرمنشي نوې ځانګړې استازې په توګه د بنګلهدېشۍ ډیپلوماتې رباب فاطمې ټاکنه د افغانستان د ډیپلوماتانو له تود هرکلي سره مخ شوې. په جنیوا کې د افغانستان استازي نصیراحمد اندېشه د رباب فاطمې ټاکنه یو مثبت ګام او «طالبانو ته یو جدي او څرګند پیغام» بللی.
د پاکستان د کورنیو چارو وزارت لهخوا افغانانو ته ورکړل شوی ضربالاجل نن پای ته ورسېد او ورسره هممهاله په دغه هېواد کې د مېشتو افغان کډوالو پرضد عملیات پیل شول. د پاکستان حکومت ټولو امنیتي ادارو ته سپارښتنه کړې، هر افغان وګړی چې د اوسېدو قانوني اسناد نهلري؛ باید سملاسي ونیول شي.
د طالبانو د کار او ټولنیزو چارو وزارت وايي، چې د پلچرخي په زندان کې یې ۹۰ زندانيانو ته د حرفهيي او تخنیکي زدهکړو زمینه برابره کړې. د دغه وزارت په وینا، دغه روزنیزه دوره ۶ میاشتنۍ ده او زندانیانو ته به په بېلابېلو تخنیکي او مسلکي برخو کې زدهکړې ورکړل شي.
د روسیې د بهرنیو چارو وزارت وايي، د اوکراین د تېرې اوونۍ په بریدونو کې د یوه ماشوم په ګډون ۳۸ روسي ملکي وګړي وژل شوي او ۲۷۰ نور، د اتو ماشومانو په ګډون ټپیان شوي دي.
د روغتیا نړیوال سازمان د ختیځې مدیترانې د سیمې مشرې ډاکترې حنان بلخي افغانستان ته د یوه لوړپوړي پلاوي په مشرۍ خپل سفر پای ته رسولی او په دغه هېواد کې یې د ګوزڼ یا پولیو ناروغۍ پر بشپړ له منځه وړلو او د لومړنیو روغتیایي خدماتو پر پیاوړتیا ټینګار کړی دی.
د شمالي کوریا دولتي رسنیو راپور ورکړی چې د دغه هېواد مشرتابه د اټومي ځواکونو د شمېر زیاتولو او د هغوی د پوځي وړتیاوو د لوړولو لپاره نوي اقدامات تصویب کړي دي. د راپور له مخې، کیم جونګ اون د پوځ د عصري کولو او د هر ډول ګواښ پر وړاندې د دفاعي توان د پیاوړتیا غوښتنه کړې ده.
امریکایي رسنیو راپور ورکړی، افغان وګړی رحمانالله لکڼوال چې د امریکا د ملي ګارډ پر دوو غړو د ډزو په تور تورن دی، په زندان کې د نه خوړلو اعتصاب کړی او د روغتیايي وضعیت د خرابېدو له امله روغتون ته لېږدول شوی دی.
د سوداګرو په وینا، تر ۹ میاشتو مخکې د افغانستان له نورو صادراتي توکو سربېره تازه میوې پاکستان او د پاکستان له لارې بیا نورو هېوادونو ته صادرېدل،خو د دواړو هېوادونو تر منځ د سوداګریزو اړیکو د پرې کېدو له امله اوس د افغانستان تازه میوې عربي هېوادونو، منځنۍ اسیا او اروپا ته صادرېږي.
د افغانستان د عدلیې پخواني وزیر فضل احمد معنوي د ملګرو ملتونو د سرمنشي د نوې ځانګړې استازې او د یوناما د مشرې په توګه د رباب فاطمه د ګومارلو هرکلی وکړ او دا پرېکړه یې د طالبانو د ښځو ضد سیاستونو په وړاندې یو عملي او روښانه ځواب وباله.
د افغانستان کرېکټ بورډ اعلان کړی چې افغان ایلېون لوبډله به سبا د ازبکستان د کرېکټ ملي لوبډلې پر وړاندې د یوولسم پړاو «ای انډ شپږیزه کرکټ لیګ سوپرکولا» په لړ کې یوازینۍ شل اوریزه دوستانه سیالي ترسره کړي.
د طالبانو مخالفه ډله، مقاومت جبهه وایي چې د بدخشان په راغ ولسوالۍ کې یې د طالبانو پر یوې پوځي لوا تهاجمي برید کړی چې په پایله کې یې د دې ډلې لږ تر لږه دوه غړي وژل شوي او درې نور ټپیان دي. خبرپاڼه زیاتوي، دغه برید د چنګاښ په۱۷مه په نیمه شپه د یادې ولسوالۍ سیاب سیمه کې ترسره شوی.