آرشیف

د سعودي عربستان دولتي خبري اژانس راپور ورکړی، چې د دې هېواد وليعهد محمد بن سلمان د امریکا متحده ایالاتو پر لور روان شوی دی.

د ننګرهار په سره رود او دره‌نور ولسوالیو او همداراز د تورخم- جلال‌اباد پر لویه لاره په درېیو ټرافیکو پېښو کې د دوو ښځو او یوه ماشوم په ګډون ۴ کسان مړه او د شپږو ښځو په ګډون ۸ نور ټپيان شوي دي. د دغو پېښو ښځینه مړه شوي او ټپيان شوي روغتیايي کارکوونکې دي.

د پاکستان-افغانستان ګډ سوداګریز اتاق رییس جنید مکدا د پاکستان سوداګرۍ وزارت او د فدرالي عوایدو بورډ نه د افغانستان او پاکستان د لارو تړل کېدو په برخه کې د حکومت د سملاسي مداخلې غوښتنه کړې. نوموړي ویلي، چې کلنۍ ۵ میلیارد ډالره سوداګري اوس یو میلیارد ډالرو ته ټیټه شوې.

د هند د بهرنیو چارو وزیر جی شنکر د روسیې د بهرنیو چارو له وزیر سرګي لاوروف سره په خبرو کې وویل، چې دوی به په راتلونکو ناستو کې د افغانستان او سیمې پر وضعیت هم وغږیږي. هغه وویل، چې په دې بحثونو کې افغانستان، اوکراین او منځنی ختیځ شامل دي.

د اسټرالیا په ویکټوریا ایالت کې یوې محکمې هغه سړی محکوم کړ، چې د افغانې-اسټرالیایۍ سناتورې فاطمې پیمان د وژلو ګواښ یې کړی و. ۵۱ کلن شان ډیویډ شرمن په خپلو بریښنالیکونو کې نوموړې ته د مرګ ګواښ کړی و.

د روسیې او ایران د بهرنیو چارو وزیرانو سرګي لاوروف او عباس عراقچي د دوشنبې په ورځ په ټیلیفون خبرې وکړې. دا په یوه اونۍ کې د طالبانو او پاکستان ترمنځ د تاوتریخوالي په اړه د دوی دویمه ټیلیفوني اړیکه ده. نن د طالبانو او ایران د بهرنیو چارو وزیرانو هم اړیکه نیولې وه.

د طالبانو یوه وسله واله مخالفه ډله د ازادۍ جبهه وايي، چې جنګیالیو یې د لړم میاشتې پر ۲۵مه د بدخشان ولایت د بهارک ولسوالۍ پر محبس راکټي بریدونه کړي او یو طالب یې وژلی او درې نور یې ټپیان کړي دي.

د ایران او طالبانو د بهرنیو چارو وزیرانو د دوشنبې په ورځ په یوه ټیلیفوني اړیکه کې د دواړو هېوادونو ترمنځ د متقابلې همکارۍ او په پاکستان او افغانستان کې د وروستیو پرمختګونو په اړه خبرې وکړې. عباس عراقچي د سیمې د هېوادونو ترمنځ د سولې او ثبات د ټینګښت پر اړتیا ټینګار کړی.

د طالبانو د کانونو او پټرولیم وزارت وايي، چې د امو سیند نفتي حوزې قشقري سیمې د ۱۸۰۰۰ ټنه خامو نفتو داوطلبي کې د حیرتان ترمینل سرویس شرکت ګټونکی اعلان شوی. د یاد وزارت په وینا، په دې داوطلبۍ کې د نفتو د تصفیې د ۱۱ شرکتونو استازو ګډون کړی و.

د ترکیې د ولسمشرۍ ماڼۍ د ناسمو اطلاعاتو ضد مرکز د دوشنبې په ورځ هغه راپورونه رد کړل چې ګواکې «افغان، عراقي او سوري مجرمان د اروپا له لوري په الوتکو کې ترکیې ته استول کېږي». دغه مرکز وایي چې ترکیې ته د «مجرمو او ناقانونه» کډوالو سپارل هیڅ امکان نه لري.

د پښتونخوا ملي عوامي پارټۍ مشر محمودخان اڅکزی وايي، چې که نړیوال ټي ټي پي او بلوڅانو ته ټانک او هلیکوپټر ضد وسلې ورکړي، څوک به له کورونو ونه وتلای شي. اڅکزی وايي، بلوڅ دي، که پښتون او ټي ټي پي، دا ټول پاکستان جوړ کړي وو او باید خبرې ورسره وشي.

افغانستان د ګڼو قومونو، ژبو، باورونو او ټولنیزو طبقو ګډ کور دی، خو د دې ټولنیزې تنوع تر شا یو داسې ولسي جوړښت ولاړ دی چې د تاریخ په اوږدو کې یې د ملي یووالي بنسټ نه یوازې دا چې ساتلی، بلکې پیاوړی کړی دی.

د اوکراین ولسمشر ولادیمیر زېلېنسکي وایي، له فرانسې سره یې د ۱۰۰ رافال جنګي الوتکو د ترلاسه کولو هوکړه لیک لاسلیک کړی چې د روسیې د یرغل پر وړاندې د خپل هېواد اوږدمهاله پوځي وړتیا پیاوړې کړي.

د طالبانو د ننګرهار والي رسنیز دفتر وايي، چې ددې ډلې د مشر د حکم له مخې د ننګرهار سره رود ولسوالۍ ککړک سيمه کې محمديه ديني مدرسې ته ديرش جريبه ځمکه ورکړل شوه. دغه ځمکه د طالبانو له کرنې رياست څخه پوهنې رياست ته د يادې مدرسې لپاره انتقال شوه.

د طالبانو د وزارتونو او خپلواکو ادارو د ویندویانو او د پلان او پالیسۍ د رییسانو په غونډه کې ټینګار شوی، چې اړوند ویندویان باید له رسنیو سره د خپلو ادارو د لاسته راوړنو په اړه معلومات شریک کړي.

د طالبانو د سرحدونو، قومونو او قبایلو چارو وزیر او د سرحدونو د تثبیت کمېسیون مشر ملا نورالله نوري په مشري یو پلاوي د تاجکستان له لوړرتبه امنیتي پلاوي سره کتلي. د تاجک پلاوي مشري د دغه هېواد د دولتي امنیتي کمېټې د سرحدي ځواکونو لومړي مرستیال میرزا زاده عبدالواحد کوله.

د طالبانو کابل ښاروالۍ ویلي، چې له بدخشان ولایت څخه یې یوه واورینه پړانګه کابل ژوبڼ ته لېږدولې ده. یاده اداره وايي، چې یاده پړانګه له اسیايي نسل څخه ده.

د بنګله دېش د پلازمېنې یوې محکمې د دوشنبې په ورځ د دغه هېواد پخوانۍ صدراعظمې شیخ حسیننه واجد ته د اعدام سزا واوروله. محکمې ویلي، چې حسینه تېر کال د زده‌کوونکو د پاڅون په ځپلو کې د مرګونو د امر ورکولو مسووله وه.

د طالبانو د سرحدي پولیسو لوی ریاست وایي، چې د تورخم ځمکني بندر منسوبانو له پاکستان نه افغانستان ته قاچاق کېدونکي درمل او تازه میوې نیولې دي. افغانستان انټرنشنل تېره ورځ رپوټ ورکړی و چې د کډوالو په موټرو کې درمل او مېوې افغانستان ته راوړل کیږي.

د طالبانو د کابل امنیه قوماندانۍ ویاند وايي، چې په کابل کې د فرخندې په نامه یوه مېرمن د مغزي سکتې له امله مړه شوې ده. خالد ځدراڼ وايي، پولیسو د پېښې ابتدایي پلټنې ترسره کړې او تر دې دمه هیڅ مشکوک اړخ نه دی موندل شوی.

دوو تنو عیني شاهدانو نن دوشنبې ورځ افغانستان انټرنشنل ته وویل، چې طالبانو د زابل ولایت مرکز کلات په شیخ متي لوبغالي کې ۹ تنه د زنا او غلا په جرم په درو ووهل. د شاهدانو په وینا، طالبانو تېره ورځ اعلان کړی و، چې د کلات اوسېدونکي دې ددې صحنې د نندارې لپاره لوبغالي ته ورشي.