سره له دې چې د امریکا او ایران ترمنځ دسیمهییزو کړکېچونو له کمېدو وروسته په نړیوال بازار کې د نفتو بیې راټیټې شوې خو په افغانستان کې د تیلو بیې لوړې شوې دي. سرچینې وایي، د روسیې د اکمالاتو کمی، د ایران د وارداتو محدودېدل او د نویو وارداتو ځنډ د بیو د لوړېدو اصلي لاملونه دي.
دوو پاکستاني سرچینو رویټرز ته ویلي، چې اسلام اباد د لیبیا د ختیځ او لوېدیځ سیالو لوریو ترمنځ د منځګړیتوب هڅې پیل کړې دي. د سرچینو په وینا، امریکا له دې بهیر څخه خبره ده او سعودي عربستان یې ملاتړ کوي او دواړو لیبیايي لوریو د پاکستان د منځګړیتوب غوښتنه کړې ده.
د طالبانو د کانونو او پټرولېم وزارت په یوه اعلامیه کې ویلي، چې د افغانستان په خاوره کې د ټاپي پروژې د پلي کېدو چارې په چټکۍ او منظم ډول روانې دي. د دغه وزارت د معلوماتو له مخې، تر اوسه پورې ۱۰۱ کیلومټره نللیکه غځول شوې او ۱۲۶ کیلومټره مسیر د کار لپاره چمتو شوی دی.
د طالبانو تر واک لاندې برېښنا شرکت وایي، روسي پانګوال په افغانستان کې د برېښنا د تولید فابریکو پر جوړولو او بیارغونه پانګونه کوي. یاد شرکت ویلي، چې د روسیې د څلورو شرکتونو مسوولانو ورسره د برېښنا د تولید، د شته فابریکو د عصري کولو او د تخنیکي ارزونو د پیل په اړه خبرې کړې دي.
په بدخشان کې ځايي سرچینو د دوشنبې په ورځ، د چنګاښ پر ۱۵مه، افغانستان انټرنشنل ته وویل، چې په نسي ولسوالۍ کې د جمعه خان فاتح د مرکز دپاسه د طالبانو چورلکې هوايي ګزمې کوي.
د طالبانو تر واک لاندې د ازموینې ادارې اعلان وکړ، چې د غور ولایت عبدالمجید په ۳۲۷ نومرو د پکتیکا دارالعلوم ته اول نومره بریالی شوی او د بدخشان خالد په ۳۲۰ نومرو دویم نومره د کابل شرعیاتو پوهنځي ته او د لغمان حامد په ۳۱۹ نومرو درېیم نومره بریالی شوی.
د پاکستان د طالبانو له غورځنګ نه بېلې شوې ډلې « جماعت الاحرار» په یوه اعلامیه کې ویلي، چې ددوی منشور، تګلار او مبارزه د ورځې د رڼا په څېر څرګند دي او د دوی یوازینی او وروستی هدف په پاکستان کې د «بشپړ، ریښتیني او څرګند اسلامي نظام» نافذول دي.
د هلمند ولایت په مرکز لښکرګاه کې د افغانستان بانک په مشرۍ ګډې کمېټې۱۹ صرافۍ د کاري جواز نه لرلو له امله تړلې دي. د کمېټې په وینا، له صرافانو غوښتل شوي چې خپل جوازونه نوي کړي او د ټاکل شويو مقرراتو له مخې خپلې چارې پر مخ یوسي.
د ازموینو ادارې د ۱۴۰۵ کال د کانکور دویم نومره او درېیم نومره هم اعلان کړل. د کونړ انعام الله په ۳۵۸ نومرو دویم او د پکتیا عبدالهادي په ۳۵۶ نومرو درېیم نومره اعلان شوي. د پروان راشد په ۳۶۰ نومرو اول نومره اعلان شوی او درې واړه د کابل طپ پوهنځي ته بریالي شوي.
د کابل د درېیم مکروریان مارکېټ اوسېدونکو د طالبانو له اړوندو ادارو غوښتي چې په سیمه کې د لاسپلورونکو او هټۍوالو له لوري د رامنځته شوې غږیزې ککړتیا مخه ونیسي. دوی وایي، د سهار له اوو بجو د شپې تر لسو بجو پورې دوامداره شور او ځوږ یې استراحت، زدهکړې او ورځنی ژوند اغېزمن کړی دی.
د طالبانو د کرنې، اوبولګولو او مالدارۍ وزارت وایي چې په ننګرهار ولایت کې د ځڼغوزیو حاصلات پام وړ ډېر شوي دي. د دغه وزارت د معلوماتو له مخې، سږ کال به د ننګرهار د ځڼغوزیو له طبیعي ځنګلونو څخه د اټکل له مخې ۱۴۰ مټریک ټنه خالص ځڼغوزي ترلاسه شي.
د جون میاشتې پر ۲۹مه د پاکستان جنګي الوتکو په پکتیا، خوست او کونړ کې پر یو شمېر ودانیو بمونه وغورځول. د پاکستان د اطلاعاتو وزیر ادعا کړې ده چې دغه هوايي بریدونه د استخباراتي معلوماتو پر اساس د ترهګرو پر پټنځایونو شوي، چې په پاکستان کې وژونکي بریدونه کوي.
د طالبانو د ریاست الوزرا اداري مرستیال عبدالسلام حنفي د کانکور د پایلو په تړاو جوړې شوې ناستې ته وویل، چې سږ کال په کانکور ازموینه کې ۱۱۷ زره او ۱۵۰ کسانو ګډون کړی و.
د ازموینې ملي ادارې د ۱۴۰۵ کال د کانکور ازموینې بریالي کسان اعلان کړل. بسم الله جان له میدان وردګو په ۳۵۶ نومرو پنځم، محمد ایمن په ۳۵۶ نومرو څلورم، عبدالهادي له پکتیا په ۳۵۶ درېیم، د کونړ انعام الله په ۳۵۸ نومرو دویم او د پروان راشد په ۳۶۰ نومرو اول نومره اعلان شول.
په نورستان کې ځايي سرچینو افغانستان انټرنشنل ته وویل، چې د طالبانو د نورستان د واما ولسوالۍ د استخباراتو پخوانی مدیر محمد شعیب اسلامیار دیوې ۱۳ کلنې انجلۍ د تښتونې په تور نیول شوی دی. د سرچینو په وینا، نوموړی تېره ورځ د کونړ په چپه دره ولسوالۍ کې نیول شوی دی.
ټآکل شوې د ناټو د ۳۲ هیوادونو غړو مشران د سې شنبې او چارشنبې په ورځ د ترکیې په پلازمېنه انقره کې سره کښېني. د اروپا د دفاعي لګښتونو زیاتوالی، د اوکراین لپاره د ۷۰ میلیارد یورو پوځي مرستو ژمنه، د دفاعي صنعت پراختیا او د ایران اړوند موضوعات به د ناستې د بحث محورونه وي.
د طالبانو د المپیک، بدني روزنې او ورزش ریاست خبر ورکړی، چې د اتلتیک ملي فدراسیون دوه کسیزه لوبډله د اسیا له ۲۳ کلنو کم عمره د ځغاستې اتلولیو کې د ګډون په موخه چین ته روانه شوه.
پنجشېر کې د طالبانو د کانونو او پټرولیم رییس محمد قاسم امیري ویلي، چې د دغه ولایت په عنابې ولسوالۍ کې د ګارنټ منرال او د حصه اول په ولسوالۍ کې د تورمالین ډبرو د استخراج چارې پيل شوې. نوموړي زیاته کړې، په دغه ولایت د بیروج، زرغون ګارنټ او تورمال ډبرو د استخراج چارې هم روانې دي.
د پرتګال د فوټبال ملي لوبډلې لوبډلمشر کریسټیانو رونالډو منلې، چې د ۲۰۲۶کال نړۍوال جام به د هغه وروستی وي. نوموړي د پرتګال او هسپانیا ترمنځ د ۱۱م پړاو (۱۶ غوره لوبډلو) له مهمې سیالۍ مخکې وویل: «هیلهمن یم، چې د نن شپې لوبه مې وروستۍ لوبه نهوي».
پاکستاني پولیسو د یوټیوب، ټېکټاک او خواله رسنیو لپاره د خپرونو جوړوونکي بصير بخشي او کرشمه تر څلور ورځني بند وروسته خوشې کړل. دوی زياتوي، چې په پاکستان کې د اوسېدو قانوني اسنادو په لرلو سره د څلورو ورځو لپاره بندیان شوي او د زندان پرمهال ذهني شکنجه شوي هم دي.
د ملګرو ملتونو د بشري مرستو د همغږۍ دفتر (اوچا) وايي، که څه هم د افغانستان ناورین نور د نړۍ د خبرونو په سرلیکونو کې ځای نهلري؛ خو مېلیونونه افغانې کورنۍ یې لاهم هره ورځ اغېزې احساسوي.