د خيبرپښتونخوا اعلی وزیر سهيل اپريدي، د ایالت په قبايلي ولسواليو کې د امنيت، حکومتولۍ او پرمختيا په اړه غونډه کې ويلي، قبايلي ولسوالیو کې پرمختيايي کارونو ته لومړيتوب ورکول کيږي.
هسپانیې د ۲۰۲۶کال فوټبال نړیوال جام د ۱۶ غوره پړاو په سیالۍ کې پرتګال ته په یوه ګول ماتې ورکړه او کوارټر فاینل ته یې لار پیدا کړه. د پرتګال له ماتې سره د دغه هېواد د ۴۱ کلن ستوري کریستیانو رونالډو د نړیوال جام وروستۍ هڅه هم پای ته ورسېده.
د جمهوري نظام پر مهال د ولسمشر ویاند صدیق صدیقي، د ملګرو ملتونو د پراختیايي پروګرام د مشر او د دغه سازمان د سرمنشي مرستیال الکساندر ډي کرو، د وروستیو څرګندونو په غبرګون کې د طالبانو پر حکومت نیوکې کړي او د افغانستان د اوسني اقتصادي بحران اصلي لامل یې د طالبانو واکمني بللې ده.
د طالبانو د کورنیو چارو وزارت وایي، د نشهيي توکو پر وړاندې د مبارزې پولیسو په هرات، ننګرهار، پکتیا او جوزجان ولایتونو کې د عملیاتو پر مهال د نشه یي توکو د قاچاق او خرڅلاو په تور ۳۰ کسان نیولي او د نشهيي توکو د پروسس یوه کارخونه یې کشف او له منځه وړې ده.
د افغانستان لپاره د ایران پخواني ځانګړي استازي حسن کاظمي قمي ویلي، چې د علي خامنهیي د جنازې په مراسمو کې د ګډون لپاره تهران ته د طالبانو او د دې ډلې د مخالفانو هممهاله بلنې سیاسي بڼه نه لرله، بلکې فرهنګي، تمدني او عقیدوي اړخ یې درلود.
د طالبانو تر چتر لاندې د کډوالو ستونزو ته د رسېدنې عالي کمېسیون وایي، په تېره یوه ورځ کې له بېلابېلو لارو هېواد ته ۲۹۴ کورنۍ چې ۱۶۹۸ تنه کېږي، جبري راستنې او ثبت شوې دي. دغه کمېسیون زیاتوي چې تر اوسه ۵۷ زره او ۱۱۵ راستنېدونکو کورنیو ته د هستوګنې نمرې هم وېشل شوې دي.
په ننګرهار کې ځایي سرچینو افغانستان انټرنشنل – پښتو ته ویلي، چې د دغه ولایت د دوربابا ولسوالۍ اړوند د ډیورنډ کرښې په اوږدو کې د زرې سر او تبۍ کنډو په سیمه کې نن شپه شاوخوا ۸:۳۰ بجې یو ځل بیا د طالبانو او د پاکستان امنیتي ځواکونو ترمنځ نښته رامنځته شوې ده.
د پاکستان د پنجاب ایالت پولیسو ۱۱ هغه افغان ډاکټران او د طب زدهکوونکي نیولي، چې د دغه ایالت په بېلابېلو طبي پوهنتونونو او ښوونیزو روغتونونو کې یې تخصصي او طبي زده کړې کولې.
د افغانستان د ولسي جرګې پخوانۍ غړې فوزیه کوفي وایي، په بریتانیا کې د هغو جرمونو په اړه د رسنیزو راپورونو زیاتوالی چې له افغانستان څخه د راغلو کسانو له خوا ترسره شوي، د اندېښنې وړ دي.
افغان ایواک بنسټ وایي، چې د کار د جوازونو په اړه د ناسم پوهاوي او معلوماتي تشې له امله زرګونه افغان پناهغوښتونکي د قانوني کار له فرصتونو محروم پاتې دي، حال دا چې هغوی په رسمي ډول د کار بشپړ حق لري. دوی ټینګار کوي چې دا موضوع د کډوالو د اقتصادي ادغام پر وړاندې یو جدي خنډ جوړ شوی.
د امریکا ولسمشر ډونالډ ټرمپ ویلي، د ایران په اړه وضعیت د واشنګټن له نظره «ښه روان دی» او ټینګار یې کړی چې تهران باید هېڅکله اټومي وسلې ترلاسه نه کړي. هغه ویلي، امریکا به په هر صورت کې بریالۍ کېږي، «یا په ښه لاره او یا په داسې لاره چې ښه نه وي.»
ننګرهار کې طالب چارواکي وایي، د تېر یوه کال په ترڅ کې په دغه ولایت کې ۵۵ زره او ۳۳ جریبه ځمکه له غصب څخه را ګرځول شوې ده. د طالبانو د ولایت مقام د معلوماتو له مخې، په همدې موده کې د زرګونو جریبه نورو ځمکو د تثبیت او بررسۍ چارې هم ترسره شوې دي.
د طالبانو د پېښو پر وړاندې د چمتووالي او مبارزې اداره وایي، د دې ادارې له مشر او په افغانستان کې د سره صلیب نړیوالې کمېټې د رییس ترمنځ په کتنه کې د پېښو د مدیریت، بېړنیو حالاتو ته د رسېدنې او بشري خدمتونو د وړاندې کولو په برخو کې د دوهاړخیزو همکاریو د پراختیا په اړه خبرې شوې دي.
د طالبانو د سمنګان ولایت امنیه قوماندانۍ وایي، د بلخ–سمنګان پر لویه لار د یوه مسافر وړونکي ۵۸۰ ډوله بس او یوه بار وړونکي ټېلر د ټکر له امله د بس چلوونکی مړ شوی او نهه مسافر ټپیان شوي دي.
د طالبانو د ټرانسپورټ او هوايي چلند وزارت د هوا پوهنې ادارې ویلي چې د افغانستان په یو شمېر ولایتونو کې د سختو ورښتونو، تالندې او برېښنا، تېزو بادونو او ناڅاپي سېلابونو د راوتلو اټکل شوی دی.
د طالبانو عامې روغتیا وزارت وایي، د روغتیا نړیوال سازمان (ډبلیو ایچ او) د سرطان د کنټرول ملي پروګرام ته یو شمېر اړین طبي تجهیزات سپارلي دي. د وزارت په وینا، دغه تجهیزات د سرطان د تشخیص او درملنې د خدمتونو د پیاوړتیا په موخه د نړیوالو روغتیايي شریکانو په غونډه کې وسپارل شول.
د ایران د تایباد ولسوالۍ چارواکي وایي، په تېرو دریو ورځو کې ۱۵۳۰ افغانان د دوغارون له رسمي پولې د ایران د پخواني مذهبي مشر د جنازې په مراسمو کې د ګډون لپاره ایران ته داخل شوي او دا شمېر به ۲۵۰۰ ته ورسیږي. چارواکو ویلي چې دغو کسانو ته ځانګړې ویزې صادرې شوې دي.
ولسمشر ټرمپ ایران ته خبرداری ورکړی چې که د خبرو اترو له لارې هوکړه ونه شي، متحده ایالات چمتو دي د دغه هېواد زیربناوې «د غرمې په یوه لنډه برخه» کې په بشپړ ډول له منځه یوسي.
د پاکستان د پوځ د قول اردوګانو قوماندانانو په یوه غونډه کې یوځل بیا ویلي، چې د طالبانو تر واک لاندې افغان خاوره په پاکستان کې د بریدونو لپاره کارول کېږي. پاکستاني پوځ ویلي، چې د «ضرب للحق» په اډانه کې عملیاتو ته دوام ورکوي. کابل له دې وړاندې د پاکستان دغسې ادعاوې رد کړې دي.
ټرمپ پلان لري چې د اوکراین له ولسمشر ولادیمیر زیلېنسکي سره د چارشنبې په ورځ په ترکیه کې وویني. یو لوړپوړي امریکایي چارواکي ویلي، چې د دې لیدنې هدف د اوکراین جګړې د پای ته رسولو تازه هڅه ده.د هغه په وینا، ټرمپ به احتمالا له زیلېنسکي سره تر خبرو وروسته له پوتین سره هم تماس ونیسي.
سره له دې چې د امریکا او ایران ترمنځ دسیمهییزو کړکېچونو له کمېدو وروسته په نړیوال بازار کې د نفتو بیې راټیټې شوې خو په افغانستان کې د تیلو بیې لوړې شوې دي. سرچینې وایي، د روسیې د اکمالاتو کمی، د ایران د وارداتو محدودېدل او د نویو وارداتو ځنډ د بیو د لوړېدو اصلي لاملونه دي.