په کندهار کې ځایي طالب چارواکو په شفاهي ډول خبریالانو، رسنیو او د خواله رسنیو فعالانو ته ویلي، چې تر لسو کلونو د لوړ عمر لرونکو لادرکه شویو کسانو په اړه دې نور اعلانونه نه خپروي.
د ترکیې کمونېست ګوند ویلي، د هېواد امنیتي ځواکونو د یکشنبې په ورځ تر ۱۰۰ ډېر د دغه ګوند غړي نیولي چې د ناټو پرضد په یوه لاریون کې یې ګډون کړی و. دغه نیونې د ناټو د سرمشریزې څخه مخکې شوې، چې ټاکل شوې ده په انقره کې جوړه شي.
په لوګر کې د طالبانو د پېښو پر وړاندې د چمتووالي ریاست خبر ورکړی، چې د دغه ولایت د ازرې ولسوالۍ په بېلابېلو سیمو کې د وروستیو سېلابونو له امله څلور کسان ټپیان شوي او خلکو ته درانه مالي زیانونه هم اوښتي دي.
په زابل کې د طالبانو امنیې قوماندانۍ خبر ورکړی، د دغه ولایت د شاجوی ولسوالۍ اړوند په بازرګان سیمه کې نن سهار شاوخوا څلور بجې د مساپرو یو بس اوښتی چې په پایله کې یې یو کس مړ او ۲۸ نور ټپیان شوي دي.
د انګلستان د فوټبال ملي لوبډلې د ۲۰۲۶کال نړۍوال جام د یو اتم پړاو په سیالۍ کې مکسیکو ته د ۳-۲ په توپیر ماتې ورکړه او بل پړاو ته یې لار ومونده. په دغه لوبه کې د انګلستان مخکښ لوبغاړی جوډ بلینګهم و، چې دوه ګولونه یې ووهل او د خپلې لوبډلې په بریا کې یې مهم رول ولوباوه.
د ملګرو ملتونو پراختیايي پروګرام (UNDP) مشر الکساندر ډي کرو افغانستان ته د سفر په لړ کې د ننګرهار ولایت دره نور ولسوالۍ له زلزلهځپلو سیمو لیدنه کړې. نوموړي د یادې لیدنې پرمهال ویلي، چې ملګري ملتونه هڅه کوي د خلکو په ملاتړ د ټولنو د پرمختګ او ټیکاو زمینه برابره کړي.
د افغان ستورمزلي عبدالاحد مومند مړی د دوشنبې په ورځ (د چنګاښ ۱۵مه) کابل ته ورسېده. ټاکل شوې، چې نن د جنازې تر مراسمو وروسته به د کابل په مرنجان غونډۍ کې خاورو ته وسپارل شي.
د طالبانو د دفاع وزیر محمد یعقوب مجاهد او ورسره مل پلاوي یې بدخشان ته د خپل سفر په لړ کې د دغه ولایت اشکاشکم ولسوالۍ کې د ۱۵مې سرحدي لوا له لومړۍ سرحدي ګنډک لیدنه کړې ده.
په کابل کې د طالبانو د جنایي جرمونو په وړاندې د مبارزې ریاست مرستیال نوراحمد شاهد وایي، د یوې مېرمنې په ګډون یې هغه درې کسان نیولي چې غوښتل یې جعلي تذکره او پاسپورټونه جوړ کړي او بیا بهر ته ولاړ شي. نوموړي زیاته کړې، چې د یادې شبکې د نورو غړو د نیولو هڅې هم روانې دي.
د طالبانو د امر بالمعروف، نهې عن المنکر او شکایتونو اورېدو وزارت خبر ورکړی، چې د روان ۱۴۰۵کال په لومړیو درېیو میاشتو کې یې د هېواد له بېلابېلو ولایتونو ۱۵۷ کوډګر نیولي دي. د یاد وزارت په وینا؛ نیول شوي کسان عدلي او قضايي ارګانونو ته سپارل شوي دي.
په هرات کې د طالبانو د صنایعو او کانونو خونې مشر محمدناصر امین وایي، د ډبرو صنعت یې د ځان بساینې پړاو ته رسېدلی. د هغه په خبره؛ په دغه ولایت کې د ۴۵ فابریکو د ډبرو تولیدات ترکمنستان، ایران، یوشمېر عربي هېوادونو او د سیمې بازارونو ته صادرېږي.
د خراسان رضوي د بهرنیو وګړو او کډوالو چارو عمومي منشي جعفر سیدابادي وایي، چې په مشهد کې له خامنهیي سره د مخې ښې او د هغه د جنازې په مراسمو کې د ګډون لپاره د افغان مېلمنو لپاره ۲۵۰۰ ویزې صادرې شوې او تر دې دمه د افغان مېلمنو لومړۍ ډله د دوغارون پولې له لارې هېواد ته رسېدلې ده.
که څه هم له ۲۰۲۳کال راهیسې د پاکستان په بېلابېلو ښارونو کې د افغان کډوالو د اېستلو لړۍ روانه ده؛ خو د پاکستان د کورنیو چارو وزارت له دغه هېواده د وتلو لپاره افغان کډوالو ته یو وار بیا ضرب الاجل ټاکلی.
د طالبانو تر واک لاندې د ازموینې ادارې خبر ورکړی، چې نن دوشنبه (د چنګاښ ۱۵مه) به د ۱۴۰۵کال عمومي کانکور، دیني مدرسو، شپنیو لېسو، د ۱۴مو ټولګیو فارغانو، له سرحد دباندې، قومونو او قبایلو فارغانو د ازموینو پایلې اعلان شي.
اوکرایني چارواکو ویلي، د دوشنبې په سهار (د چنګاښ ۱۵مه) پر پلازمېنې کیف د روسیې د پراخو توغندیزو او بېپیلوټه الوتکو د بریدونو له امله شاوخوا درې کسان وژل شوي او اووه نور ټپیان دي. د ژغورنې ډلې لاهم په زیانمنو شویو ودانیو کې د خلکو د لټون عملیات کوي.
د پاکستان په بهاولپور کې د قاعد اعظم طبي پوهنتون افغان محصلان وایي، د پنجاب حکومت له دغه هېواده د وتلو خبرداری ورکړی او که یې ستونزې حل نهشي نو د کلونو خوارۍ یې په اوبو لاهو کېږي. دوی زیاتوي، چې د یادې ستونزې د حل لپاره یې ټولې دروازې ټکولې او هیڅوک یې غږ نه اوري.
د بشري حقونو سازمان هانا په یوه راپور کې ویلي، چې په ایران کې ډېری افغانان په ځانګړې توګه ښځې او ماشومان له سختو حقوقي محرومیتونو، د مدني مسایلو د ثبت په برخه کې له پراخو خنډونو او عدالت ته د لاسرسي په برخه کې له قضايي ستونزو سره مخ دي.
په بغلان کې د طالبانو د کرنې، اوبو لګولو او مالدارۍ ریاست خبر ورکړی، چې دا مهال په دغه ولایت کې د شاتو د تولید نږدې ۳۸۰ فارمونه فعال دي او هرکال له ۲۵ تر ۳۵ مټریک ټنه شات تولیدوي.
رویټرز خبري اژانس د ونزویلا د اطلاعاتو وزارت په حواله راپور ورکړی، چې په دغه هېواد کې د وروستیو زلزلو له امله د مړو شویو کسانو شمېر ۳زره او ۳۴۲ کسانو ته لوړ شوی دی. وړاندې د امریکا د ځمکپوهنې ادارې اټکل کړی و، چې د زلزلې د قربانیانو شمېر ښايي له ۱۰زرو هم واوړي.
په اروپا کې مېشت د افغانستان د تکواندو ملي لوبډلې پخوانی غړی فرزاد منصوري په فرانسه کې د Solidarity Center Open 2026 ترنامه لاندې د G1 په نړۍوالو سیالیو کې ښه وځلېده او د دغه سیالیو د سپینو زرو مډال یې وګاټه.
د امریکا او افغانستان د ۲۵۰ کلن سیاسي بهیر پرتله. په دغه شننه کې استدلال شوی چې د امریکا پرمختګ د قانون، پیاوړو بنسټونو، د واک وېش او تدریجي اصلاحاتو پایله ده، خو افغانستان د اشخاص محورۍ، کمزورو بنسټونو او ناسمې رهبرۍ له امله له پرلهپسې بحرانونو سره مخ شوی دی.