د طالبانو دکډوالو کمېسیون وايي، پاکستان او ایران یوازې د یکشنبې په ورځ (د چنګاښ۱۴) له بېلابېلو لارو ۲۵۳ کډوالې کورنۍ چې شمېر یې ۱۲۷۹ کېږي، په جبري ډول افغانستان ته ستانه کړي. د دغه کمېسیون په وینا، په همدې ورځ ۷۴۰ کورنۍ خپلو سیمو ته لېږدول شوي او له ۲۲۰ کورنیو سره مرستې هم شوې.
په داسې حال کې چې د پاکستان کورنیو چارو وزارت د روانې جولای میاشتې تر ۱۰مې په دغه هېواد کې مېشتو افغانانو ته وخت ورکړی، چې ووځي، ګنې بیا یې په زوره باسي. په جلا وطنۍ کې د افغانانو عالي شورا له نړۍوالو سازمانونو غوښتي چې له پاکستان څخه د افغانانو د جبري اېستنې مخنیوی وکړي.
د ناروې د فوټبال ملي لوبډلې د ۲۰۲۶ کال نړیوال جام د یو اتم پړاو په سیالۍ کې برازیل ته د ۲-۱ په ماتې ورکولو سره د لومړي ځل لپاره د دې سیالیو څلورم پړاو (کوارټر فاینل) ته لار ومونده او د اتلولۍ یو له مهمو مدعیانو یې له سیالیو بهر کړ.
د ملګرو ملتونو د ماشومانو وجهي صندوق (یونیسف) وایي، د اروپايي ټولنې د بشري مرستو د دفتر په ملاتړ یې د نورستان ولایت نږدې ۱۰ زره اوسېدونکو ته د څښاک پاکو اوبو د لاسرسي زمینه برابره کړې ده.
د اسراییل لومړي وزیر بنیامین نتنیاهو ویلي، امریکا له اسراییل لوی متحد نه لري او اسراییل هم له امریکا ستر متحد نه لري. هغه ټینګار کړی چې د دواړو هېوادونو اړیکې ځانګړې دي او د ایران د اټومي پروګرام په اړه ګډې موخې لري.
د ترکیې چارواکو د ناټو پر ضد د اعتراضیه لاریون پر مهال له سلو ډېر کسان نیولي دي. دغه لاریون د ترکیې د کمونېست ګوند له خوا په پلازمېنه انقره کې ترسره شوی و.
ازبکستاني رسینو د دغه هېواد د دولتي امنیت ادارې له قوله راپور ورکړی، چې امنیتي ځواکونو یې د افغانستان له خاورې څخه د ډرون څرخکې په وسیله ازبکستان ته د نشهيي توکو (تریاک) د قاچاق هڅه شنډه کړې ده.
د طالبانو د امربالمعروف، نهی عنالمنکر او شکایتونو اورېدلو وزیر محمد خالد حنفي ادعا کوي، چې د طالبانو له بیا واکمنېدو مخکې په افغانستان کې عیسویت ته د بلنې سلګونه مرکزونه وو. د هغه په وینا، د دوی په بیا راتګ سره یاد مرکزونه «ختم» شوي دي.
په پاکستان کې ایدهي خیریه بنسټ وایي چې روان کال د کراچۍ ښار په بېلابېلو سیمو کې د ۱۳ښځو په ګډون د ۲۰۰ لاوارثه کسانو مړي موندل شوي دي.
د ښځو غږ غورځنګ وایي، زده کړه د هر انسان اساسي حق او له زده کړو څخه د ښځو او نجونو محرومول د بشري حقونو ښکاره نقض او د هېواد د راتلونکي د کمزوري کولو هڅه ده. دوی له نړیوالو بنسټونو غوښتې چې د نجونو پر مخ د ښوونځیو او پوهنتونونو د بېرته پرانیستلو لپاره عملي ګامونه پورته کړي.
د طالبانو د رييسالوزرا اداري مرستیال عبدالسلام حنفي د ختیځې مدیترانې لپاره د روغتیا نړیوال سازمان د مشرې ډاکترې حنان حسن بلخي په مشرۍ مل پلاوي سره په کتنه له هغې غوښتي، چې د روغتیایي مسایلو په تړاو په جوړېدونکو نړیوالو غونډو کې دې طالبانو ته هم د ګډون بلنه ورکړي.
په پښتونخوا کې د ښځو حقونو فعاله جمایمه اپریدۍ وایي، چې چادري (بورقه) د پښتنو او افغان ښځو د تاریخي او فرهنګي هویت استازیتوب نه کوي، بلکې د هغې په وینا د ترهګرۍ، افراطیت او بهرنیو تحمیل شویو سیاستونو پایله ده.
د ایران د قضاییه قوې مشر غلام حسین محسني اژهيي وايي: «د افساد في الارض، محاربې، جنګي جنایتکارانو او د هغو کسانو حکم روښانه دی چې په غیرقانوني ډول جګړه پیلوي». هغه د دغه حکم په تړاو نور جزییات ورنهکړل.
د طالبانو په ولکه کې د سوداګرۍ او پانګونې خونې په هېواد کې د نفتي توکو د احتمالي کمښت د مخنیوي لپاره له سوداګرو وغوښتل چې د نفتي موادو واردات زیات کړي. له دې سره سم یو شمېر هېوادوال وايي، په دې وروستیو ورځو کې د هر لیټر تېلو په بیه کې تر ۱۰ افغانۍ ډېروالی راغلی دی.
د اسټراليا ښځينه کرکټ لوبډلې د ښځو د شل اوریز نړیوال جام په پايلوبه کې د انګلستان لوبډلې ته ماتې ورکړه او د اووم ځل لپاره یې اتلولي په خپل نوم کړه.
د ملګرو ملتونو د پراختیايي پروګرام (یو این ډي پي) مشر الکساندر ډي کرو، افغانستان ته د خپل سفر پر مهال ویلي، په دې هېواد کې کړکېچونه په ندرت سره جلا جلا رامنځته کېږي او د افغانستان درې پر څلورمه برخه خلک د ژوند د لومړنیو اړتیاوو د پوره کولو توان نه لري.
سرچینو افغانستان انټرنشنل- پښتو ته ویلي، چې د خیبرپښتونخوا د خیبر ولسوالۍ او د ننګرهار د دوربابا ولسوالۍ تر منځ په پرته ډیورنډ کرښه نن مازدیګر نښته رامنځته شوې ده. د سرچینو په وینا، په دې وقفهيي نښته کې۳پاکستاني سرتېري هم ټپيان شوي، خو طالبانو په یاده نښته کې لاس لرل رد کړي.
په بلوچستان کې ځایي سرچینو افغانستان انټرنشنل - پښتو ته ویلي، چې د کوټې ښار اوړوند د هنه وړک په ببري سیمه کې د ځايي خلکو او وسلهوالو ترمنځ په نښته کې دوه تنه وژل شوي او ۱۵نور ټپیان شوی دي.
د طالبانو دفاع وزیر یعقوب مجاهد بدخشان ته د خپل سفر په لړ کې په وردوج ولسوالۍ کې له یوه دارالعلوم څخه لیدنه کړې او ویلي یې دي چې د ټولنې په فکري او اخلاقي روزنه کې د علماوو او مدرسو رول مهم دی. هغه زیاته کړې، د دیني مدرسو د پرمختګ او ملاتړ لپاره به خپلو همکاریو ته دوام ورکړي.
له پاکستان څخه ایستل کېدونکي افغان کډوال وايي، د کور او کاروبار ترڅنګ د خپلو ماشومانو راتلونکی هم شاته پرېږدي. محمدالله افغان، چې له ۳۷ کلونو وروسته افغانستان ته ستنېږي، وایي د کاروبار تر تاوان ورته د ماشومانو، په ځانګړي ډول د لوڼو، د زده کړو برخلیک تر ټولو لویه اندېښنه ده.
د طالبانو په واک کې دافغانستان د اوبو کمېټې (AWAP) د پیاوړتیا لپاره د ۵۵ ملي او نړیوالو بنسټونو، د ملګرو ملتونو د ادارو او نورو شریکانو په ګډون د همغږۍ ناسته شوې، چې د څښاک پاکو اوبو او د اوبو رسولو د خدمتونو پراختیا او د نړیوالو همکاریو پر پیاوړتیا پکې خبرې شوې دي.