آرشیف

د سویډن پارلمان د پرېکړې له مخې؛ له نږدې خپلوانو سره واده چې د تره لوڼو او زامنو ترمنځ نکاح هم په‌کې شامله ده، د چهارشنبې له ورځې (د چنګاښ له ۱۰مې) نېټې څخه په دغه هېواد کې منع اعلان شو.

د اېرلنډ سترې محکمې د یوه افغان کډوال د نړۍوالې پناه غوښتنې د رد پرېکړه لغوه کړې او امر یې کړی، چې د هغه دوسیه دې له سره وڅېړل شي.

د روسیې د بهرنیو چارو وزارت په یوه خبرپاڼه کې ویلي، چې په کابل کې یې له طالبانو سره د وزارتونو ترمنځ مشورتي ناستې ترسره کړې دي. په خبرپاڼه کې راغلي، په دغه ناستو کې د روسیې او طالبانو ډیپلوماټانو په سیاسي،‌ اقتصادي، کلتوري او بشري برخو کې پر دوه اړخېزو همکاریو نظرونه تبادله کړل.

د خیبر پښتونخوا د باجوړ ولسوالۍ په شینکوټ سیمه کې تېره شپه یو استوګنیز کور په ډرون برید کې په نښه شوی، چې له امله یې درې کسان وژل شوي او اته نور ټپیان دي. ځایي اوسېدونکي وایي، چې په وژل شویو کسانو کې یوه ماشومه هم شامله ده.

سرچینو افغانستان انټرنشنل - پښتو ته ویلي، چې د طالبانو د ریاست الوزرا د اقتصادي مرستیال ملا عبدالغني برادر په مشرۍ یو پلاوی د پنجشنبې په ورځ د ایران د مشر ایت‌الله علي خامنه‌يي‌ په جنازه کې د ګډون په موخه ایران ته ولاړ.

په غور کې د طالبانو د کانونو او پټرولیم ریاست ویلي، چې د دغه ولایت په پسابند ولسوالۍ کې د عقیقو د درېیو کانونو د کېندنې چارې پیل شوې دي. د یاد ریاست په وینا؛ دغه کانونه د پسابند ولسوالۍ په خونیه سیمه کې موقعیت لري او د کېندنې قراردادونه یې له خصوصي شرکتونو سره لاسلیک شوي دي.

د سوریې ټلوېزیون اعلان کړی، چې مشهوره او پېژندل شوې اداکاره روزینا لاذقاني د ولسمشر احمد شرع په حکم د نوي پارلمان د غړې په توګه ټاکل شوې ده. د سوریې د ټاکنو کمېسیون چارواکو په وینا؛ په پارلمان کې دغه نوې ټاکنه د جنسیتي او قومي برابرۍ رامنځته کولو په موخه شوې ده.

د افغانستان اماني صندوق اعلان کړی، چې سویډن له افغانستان سره ۵.۲۶ مېلیون ډالره مرسته ځانګړې کړې ده. دغه بنسټ د چهارشنبې په ورځ (د چنګاښ ۱۰مه) له سویډن نه مننه کړې او ویلي یې دي، چې له دغه مرستې سره به په افغانستان کې ډېرې ټولنې اړین ملاتړ ترلاسه کړي.

د خیبر پښتونخوا د سوات ولسوالۍ د کالام سیمې په سیف‌الله جهیل کې د یوې کښتۍ د ډوبېدو له امله د یوې کورنۍ لږترلږه پنځه غړي مړه شوي او د نورو درېيو لادرکه شویو کسانو د موندلو لپاره د ژغورنې عملیات روان دي.

د طالبانو د کډوالو او بېرته راستنېدونکو چارو وزارت خبر ورکړی، چې ۱۴۷ افغان کډوال د پاکستان له بندخونو تر خوشې کېدو وروسته بېرته خپل هېواد ته ستانه کړای شوي دي. د دغه وزارت په وینا؛ یاد کسان په پاکستان کې د اوسېدو قانوني اسنادو نه‌لرلو له امله بندیان شوي وو.

د اسلام‌اباد سترې محکمې د هغه درېیو افغان ښځو پر ضد د حکومتي ادارو د هر ډول قانوني اقدام د درولو لنډمهاله حکم صادر کړی، چې د دوی د «پي او ار» کارت لرلو موده یې د قانوني استوګنې د مودې په توګه نه‌ده منلې.

طالبانو ته نږدې حریت راډيو د خپلو سرچینو په حواله خبر ورکړی، چې د طالبانو د ریاست‌الوزرا د اقتصادي مرستیال ملا عبدالغني برادر په مشرۍ به یو پلاوی د ایران د مخکېني مشر ایت‌الله علي خامنه‌يي د جنازې په مراسمو کې ګډون وکړي.

د بلوچستان د پنجګور ولسوالۍ د ګوارګو له مورتان سیمې سره نږدې په یوه چاودنه کې دوه کسان وژل شوي دي. پولیسو ویلي، د پېښې له ځایه د دوو ناپېژانده کسانو جسدونه موندل شوي چې د پنجګور ښوونیز روغتون ته لېږدول شوي دي.

که څه هم طالبانو په افغانستان کې د ښځو پر هر ډول فعالیت بندیز لګولی؛ خو په کابل کې د ایران سفارت خبر ورکړی، چې د ایران او افغانستان د ګډې سوداګرۍ خونې د استازو یو پلاوی د اقتصادي او سوداګریزو همکاریو پراختیا په موخه کابل ته رسېدلی. په دغه پلاوي کې دوه مېرمنې هم شاملې دي.

په خیبر پښتونخوا او بلوچستان کې موسمي بارانونو، تالندې برېښنا، سېلابونو او د کورونو نړېدو په بېلابېلو پېښو کې لږترلږه اووه کسان مړه او ۴۶ نور ټپیان شوي دي. له دې ډلې د خیبر پښتونخوا په بېلابېلو سیمو کې د بارانونو اړوند پېښو کې څلور کسان مړه او ۳۶ نور ټپیان شوي دي.

د ملګرو ملتونو استوګنې ادارې (UN-Habitat) ویلي، د اټکل له مخې به په افغانستان کې تر ۲۰۶۰ کال پورې له هرو دوو کسانو یو په ښار کې ژوند کوي. یادې ادارې خبراری ورکړی، چې د هېواد ډېری ښارونه لاهم د دغه چټکې ښاري پراختیا لپاره چمتو نه‌دي.

د پاکستان د شخړو او امنیتي مطالعاتو انسټېټیوټ په خپل تازه راپور کې ویلي، چې د ۲۰۲۶کال د جون په میاشت کې په پاکستان کې د وسله‌والو او دولت ضد بریدونو شمېر د مئ میاشتې پرتله ۱۶ سلنه کم شوی؛ خو بیا هم د ناامنۍ له امله ۲۶۲ کسان وژل شوي دي.

د افغانستان د غېږنیونې غوره لیګ لومړي پړاو لپاره د غوراوي سیالۍ د پلازمېنې او د هېواد د بېلابېلو ولایتونو د ۲۰ لوبډلو په ګډون د کابل د بدني روزنې په ۲۵۰۰ کسیز ورزشي لوبغالي کې پیل شوې. د سیالیو په پای کې به اته غوره لوبډلې د افغانستان د غېږنیونې غوره لیګ لومړي پړاو ته لاره ومومي.

یوشمېر افغان کډوالو له بي‌بي‌سي سره په خبرو کې ادعا کړې، د ترکیې پوله ساتو ځواکونو هغوی وهلي، جامې یې ترې اېستلې او د سختې یخنۍ پرمهال یې د ایران پولې ته نږدې پرېښي چې له امله یې لږترلږه ۲۰ کسان مړه شوي او ۱۱ نورو خپل لاسونه او پښې له لاسه ورکړې دي.

په بغلان کې د طالبانو امنیې قوماندانۍ خبر ورکړی، چې د طالب چارواکو په حضور کې یې څه باندې ۹۳زره کیلو ګرامه بېلابېل نشه‌يي توکي د پلخمري ښار په کرکر سیمه کې سوځولي. یاده اداره زیاتوي، چې دغه نشه‌يي‌ توکي یې په تېرو پنځو کلونو کې د بېلابېلو عملیاتو پرمهال کشف او نیولي وو.

د پېښور سترې محکمې د افغانستان د پخوانیو امنیتي او دفاعي ځواکونو د غړو، خبریالانو، وکیلانو، استادانو او یوشمېر نورو افغان کډوالو د ۱۲۳ عریضو په اړه لنډمهالی حکم صادر کړی او اړوندو ادارو ته یې امر کړی، چې دغه کسان دې د ۶۰ ورځو لپاره نه نیول کېږي او نه دې له پاکستان نه اېستل کېږي.