د بښنې نړیوال سازمان د پاکستان له حکومت څخه غوښتي چې د پښتون ژغورنې غورځنګ د فعال فریدالله اپریدي د تښتول کېدو په اړه سملاسي خپلواکې او رڼې پلټنې وکړي. فریدالله اپریدی د روانې مې میاشتې پر ۱۸مه (د غويي ۲۸مه) ماښام مهال د خیبر پښتونخوا له پېښور ښار څخه لادرکه شوی دی.
د افغانستان د ملي جنبش ګوند مشر عبدالرشید دوستم د لوی اختر په مناسبت په خپل پیغام کې د هېواد پر روان وضعیت سخته اندېښنه ښودلې او خبرداری یې ورکړی، که طالبان خپل سیاستونه بدل نهکړي، نو هېواد به یو ځل بیا د کورنۍ جګړې په اور کې وسوځي.
د امریکا ولسمشر ډونالډ ټرمپ ویلي چې ایران له امریکا سره د یوې هوکړې د ترلاسه کولو لپاره جدي هڅه کوي، خو واشنګټن تر اوسه له وړاندیز شوې طرحې راضي نه دي او کېدای شي وروسته راضي شي او که نه پاتې کار به بشپړ کړي.
د طالبانو دفاع وزیر ملا یعقوب د ایران د امنیت شورا له پلاوي سره په ناسته کې ویلي، چې د افغانستان خاوره، پولې او هوا هېڅکله د ایران پر ضد د ګواښ سرچینه نه ده پاتې شوې. یعقوب ټینګار کړی، چې کابل دا موضوع په وروستۍ جګړه کې ثابته کړې ده.
د روسیې د امنیت شورا منشي سرګي شویګو ویلي چې لویدیز هېوادونه باید د افغانستان کنګل شوې شتمنۍ بېرته ازادې کړي او دلته د شلو کلونو پوځي حضور بشپړ مسوولیت پر غاړه واخلي. شویګو دا څرګندونې د طالبانو د دفاع له وزیر محمد یعقوب سره په لیدنه کې کړې دي.
طالبانو مسکو ته د مولوي یعقوب مجاهد د سفر په ترڅ کې له روسیې سره د پوځي او تخنیکي همکاریو تړون لاسلیک کړی. دا تړون د مسکو په څنډه کې د نړیوال امنیتي فورم په څنډه کې لاسلیک شوی، چې د مسکو او کابل ترمنځ د رسمي پوځي همکارۍ نوی پړاو ګڼل کېږي.
د حزب اسلامي مشر په خپل اختریز پیغام کې ویلي، چې امر بالمعروف باید تر سركاري ادارو او مامورينو محدود نه شي او نه هم د نورو د غلي کولو او د منبر مهارولو وسيله شي. حکمتیار ویلي، چې امیر باید د امر او فرمان پرځای چارې سمبال کړي او د قدوري ملا د انجنیري پوهنځي رییس ونه ټاکي.
د خیبر پښتونخوا په باجوړ او شمالي وزیرستان کې د تحریک طالبان پاکستان (ټي ټي پي) د مشر نور ولي مسید د اختر پیغام او تبلیغاتي پاڼې پر دېوالونو نښلول شوې او وېشل شوې دي. په دغه درې مخیز پیغام کې پر خلکو غږ شوی چې د حکومت پر ضد ودرېږي.
د ایران دولتي تلویزیون وایي چې د تهران او واشنګټن ترمنځ د لومړني او غیر رسمي تفاهم مسودې ته یې لاسرسی موندلی، چې هدف یې د خلیج د شخړې کمول او د هرمز تنګي له لارې د سمندري تګ راتګ بېرته عادي کول دي، خو دا سند لا وروستی شوی نه دی.
طالبانو د چارشنبې په ورځ د کندهار په عیدګاه جومات کې د خپل مشر مولوي هبت الله اخوندزاده د وینا پرمهال زي پي یو۴ د هوايي دفاع سیستم ځای پرځای کړی و. دغه وسله ډېری د ټیټ الوتو اهدافو او ډرون الوتکو پروړاندې کاریږي.
د امریکا پخواني ولسمشر جو بایډن ددغه هېواد د عدلیې وزارت پر وړاندي دعوه کړې او غوښتي دي چې د ډونالډ ټرمپ ادارې له لوري دې د هغه د شخصي مرکو غږیز ریکارډونه او لیکلي متنونه نه خپرېږي.
د طالبانو مشر ملا هبتالله اخوندزاده د لوی اختر د لمانځه پر مهال په خپله وینا کې د اسلامي ټولنې د وحدت، د امیر د اطاعت او د داخلي اختلافاتو د کمولو پر اړتیا ټینګار وکړ. هغه۸۱ ځله پر وحدت، ۳۵ ځله پر اختلاف او ۱۲ ځله پر اطاعت خبرې وکړې.
په بلوچستان کې پر مال وړونکو موټرو د پرله پسې وسله والو بریدونو او سوځولو په غبرګون کې د ټرانسپورټي شرکتونو مسوولانو لنډمهالی کاربندیز اعلان کړی دی. د بلوچستان د باروړونکو موټرو د څښتنانو ټولنه وايي، په تېرو دریو اونیو کې په بېلابېلو سیمو کې له ۵۰ تر ۶۰ پورې لارۍ سوځول شوې دي.
د طالبانو مشر مولوي هبت الله اخوندزاده د لوی اختر په لمانځه کې د وینا پرمهال پر خپلو مخالفانو غږ کړی، چې افغانستان ته لاړ شي، ورسره موافق شي او د طالبانو له ادارې سره یوځای شي. هغه ویلي، چې دا مهال د پخواني نظام معلولانو او د سرتېرو یتیمانو ته هم پیسې ور کوي او پردي یې نه بولي.
په تخار او بدخشان ولایتونو کې د سرو زرو د کانونو پر سر شخړه پراخه شوې او محلي سرچینې وايي چې طالبانو د دغو دوو ولایتونو د سرو زرو د اېستلو د نږدې ټولو سیمه ییزو شرکتونو چارې درولې او یوازې له طالب چارواکو سره تړلي شرکتونه فعال دي.
د خیبر پښتونخوا د تیرا خلکو، چې له درې نیمو میاشتو راهیسې بېځایه شوي، د اختر لومړۍ ورځ په احتجاجي پرلت کې تېره کړه. د دوی استازي وایي چې د چارواکو د بې غورۍ له امله د دوی د بېرته ستنېدو ژمنې نه دي پوره شوې او لا هم په سختو شرایطو کې ژوند کوي.
د ډیجیټل امنیت یوې سایبر څېړنیزې ډلې د طالبانو «ملي کیبورډ» اپلیکیشن د محرمیت او امنیت له جدي خطرونو سره مل بللی، ځکه په وینا یې، د کاروونکو ټایپ شوي معلومات پروسس کوي، بهرنیو سیسټمونو ته یې لېږي او د معلوماتو د ساتنې کمزورې لارې لري.
د طالبانو د دفاع وزیر یعقوب مجاهد د اخترلمونځ په مسکو کې کړی او په دغه هېواد کې یې له میشتو یو شمېر افغانانو سره لیدلي دي. ملا یعقوب د طالبانو په سفارت کې له دغو افغانانو سره په لیدنه کې ویلي، چې «افغانستان د ټولو افغانانو ګډ کور دی».
د پاکستان مرستیال صدراعظم او د بهرنیو چارو وزیر اسحاق ډار په نیویارک کې د ملګرو ملتونو له سرمنشي انتونیو ګوتریش سره په خبرو کې ویلي، چې سوله ییز افغانستان د ټولې سیمې په ګټه دی، خو دده په وینا، لاهم «افغان خاوره د پاکستان خلاف کاریږي».
د خیبر پښتونخوا ایالت په سوات کې یو کس پر خپلې مېرمنې او ورېندار ډزې کړې، چې له امله یې مېرمن وژل شوې او ورېنداره یې ټپي ده. ځایي پولیس وایي، نوموړي د خپلې مېرمنې تر وژلو وروسته ځان وژنه کړې ده.
د طالبانو د بهرنیو چارو وزارت د بروکسل په ناسته کې له اروپايي هېوادونو غواړي، چې لږترلږه هر هېواد د طالبانو یو ډیپلوماټ ومني او په بدل کې به یې دوی د افغان پناه غوښتونکو د اخراج په بهیر کې له اروپايي هېوادونو سره مرسته کوي. د بروکسل ناسته په راتلونکې میاشت کې کیږي.