آرشیف

د پاکستان د فدرالي پلټنو ادارې (ایف ای اې) د پېښور د درغلیو ضد څانګې په یولړ عملیاتو کې پنځه افغان وګړي د پاکستاني سفري اسنادو د جوړولو په تور نیولي دي.

د ملګرو ملتونو د ماشومانو ملاتړ صندوق (یونېسف) د خپل راتلونکي شپږ میاشتني پروګرام د پليتابه او تر ۲۰۰زره ډېرو زلزله ځپلو ماشومانو سره د مرستې لپاره له نړیوالو مرستندویانو د ۲۲ میلیونه ډالرو غوښتنه کړې ده.

په داسې حال کې چې د ختیزو ولایتونو خلک لا د تېرې مرګونې زلزلې له زیانونو، نه دي راوتلي، د ننګرهار ولایت د دره نور ولسوالۍ په سوتن او جان شيګل کليو کې د نننۍ زلزلې له امله یو ځوان او یو ماشوم ټپیان شوي.

د طالبانو د امر بالمعروف وزیر محمد خالد حنفي د ټولو وزارتونو او مستقلو ادارو د دعوت او ارشاد له رییسانو سره په تازه ناسته کې ویلي چې هغوی د ټولنې د اصلاح لپاره ټاکل شوي او باید خلک نېکیو ته وبولي او له بدیو یې منع کړي. هغه وايي، د چا د موقف پروا نه کوي.

د ننګرهار ولایت د رودات ولسوالۍ په غلجيانو کلي کې د ځمکې د ملکيت پر سر د خپلمنځي شخړې له امله د یوې کورنۍ دوه غړي وژل شوي دي.

سرچینو افغانستان انټرنشنل ته ویلي، چې د امر بالمعروف محتسبانو تېره ورځ د کندهار ښار په بېلابېلو برخو کې یو شمېر هغه خیاطان نیولي چې د ښځو جامې یې ګنډلې. طالبانو نارینه خیاطانو ته امر کړی، چې نور دې د ښځو جامې نه ګنډي.

د پاکستان دفاع وزیر تور پورې کړی چې له افغان خاورې ترهګر او حتا افغان وګړي پاکستان ته ځي او د پاکستانيانو وینې بهوي. نوموړی وايي، «موږ د افغانانو لپاره دوه اوږدې جګړې وکړې، خپل امن او اقتصاد مو قربان کړ او نن هم شاوخوا شپږ تر اووه میلیونه افغانان زموږ په خاوره کې ژوند کوي».

د روغتیا نړیوال سازمان تازه راپور څرګندوي چې په افغانستان کې د زلزله ځپلو سیمو ښځې د جنسیتي نابرابرۍ له امله له روغتیایي خدمتونو په ځانګړي ډول د درملنې او پاملرنې له جدي ستونزو سره مخ دي.

د روسیې د بهرنیو چارو وزارت ویاندې د روسیې او طالبانو تر منځ د «دوستانه اړیکو» خبر ورکړی. ماریا زاخارووا د طالبانو له زندان نه د یوه روسي څیړونکي د خوشې کېدو په تړاو د یوې پوښتنې ځواب کې وویل، چې «د روسیې فدراسیون او د افغانستان اسلامي امارت تر منځ دوستانه اړیکې شته».

د بغلان ولایت سیمه ییزو طالب چارواکو ویلي، چې د چارشنبې په ورځ د دغه ولایت د جلګې او خوست ولسوالیو ترمنځ د کوتل پلفي په سیمه کې د یوه موټر د چپه کېدو په پېښه کې د دوو ښځو په ګډون ۹ کسان مړه شوي او ۷ تنه نور ټپیان دي.

پر پولنډ د بې‌پیلوټه الوتکو تر برید وروسته د روسیې شارژدافیر د دغه هېواد د بهرنیو چارو وزارت له‌خوا احضار شوی دی. د روسیې شارژدافیر اندري اورداش وایي، د پولنډ تورونه بې‌بنسټه دي.

پولنډ اعلان وکړ، چې د چارشنبې په ورځ یې هغه ۱۹ روسۍ بې پیلوټه الوتکې په نښه کړې، چې ددغه هېواد فضایي حریم ته ننوتلې وې. دا لومړی ځل دی، چې د ناټو یو غړی هېواد د اوکراین جګړې کې مستقیم وار کوي.

اروپايي ټولنې په افغانستان کې د اقلیمي بدلون اړوند د ۱.۵ مېلیونه یورو تړون لاسلیک کړ. په کابل کې د اروپايي ټولنې دفتر وايي، چې په مرسته شویو پیسو به د اقلیمي بدلون پر وړاندې د ټولنیز مقاومت د ودې او پیاوړتیا په برخه کې پروګرامونه پلي شي.

د طالبانو عدلیې وزارت وايي، چې په کابل ښار کې یې د کورونو د کرایو د کنټرول لپاره اقدامات کړي دي. د دغه وزارت له لوري په خپرې شوې خبرپاڼه کې راغلي، چې د کورونو د کرایو د کنټرول ګډې کمېټې د کابل ښار په ټولو ناحیو کې د ساحوي څار ډلې جوړې کړې دي.

په جلاوطنۍ کې د کابل ټربیون په نامه یوې رسنۍ فعالیت پیل کړ، دغه رسنۍ په انلاین بڼه په پښتو، دري او انګلیسي ژبو فعالیت کوي. د یادې رسنۍ مسوولین وايي، هڅه کوي چې په رسنیز ډګر کې خپل رول ولوبوي.

د افغان کډوالو د اېستلو لړۍ سره هم‌مهاله د خیبر پښتونخوا مرستیال کمېشنر بلال شاهد پاکستاني رسنیو سره په خبرو کې ویلي، چې په وروستیو کې هره ورځ شاوخوا ۷زره کورنۍ افغانستان ته ستنېږي.

د طالبانو دفاع وزارت ویلي، چې ۹ روسي زغروال ټانکونه یې ترمیم کړي او اوس ګټې اخیستنې ته چمتو شوي دي. د دغه وزارت په خبرپاڼه کې راغلي:« دغه ټانکونه په پولو کې له دښمن سره د مقابلې په برخه کې ګټور تمامېدای شي.»

طالبان وایي، چې یوازې پرون (سې‌شنبه د وږي ۱۸مه) د ایران او پاکستان له بېلابېلو لارو ۲۲۹۳ کورنۍ افغانستان ته ستنې شوې دي. دغه کورنۍ د تورخم، سپين بولدک، ورېښمو پله، انګورو اډې، بهرامچې او اسلام‌کلا له لارې افغانستان ته ستنې شوې دي.

د امریکا د استازو جرګې غړي جو وېلسون ویلي، چې روسیې د ایران له‌خوا جوړ شوي «شهید» ډرون په کارونې سره د ناټو پر غړي هېواد (پولنډ) برید وکړ.

د طالبانو تر واک لاندې رسنیو خبر ورکړی، چې د کونړ زلزله ځپلو ته د متحده عربي اماراتو په مرستو بار ۷۵ لارۍ دغه ولایت ته رسېدلې دي. د کونړ لپاره د طالبانو ځايي چارواکو ویلي، چې په دغه مرستو کې لومړني اړین خوراکي او روغتیایي توکي شامل دي.

د امریکا ډیموکراټ سناتور ډیک ډوربېن ویلي، چې د ناټو فضا ته د روسیې بې‌پیلوټه الوتکو دننه کېدل، یو جدي خبرداری دی. هغه وويل: «ولادیمیر پوتین هڅه کوي، چې د پولنډ او بالتیک ایالتونو د خوندیتوب لپاره زموږ اراده و ازمايي.»