دوبۍ کې یوه شخصي کمپنۍ ادعا لري، چې له ۲۰۱۸ تر ۲۰۲۰ کال پورې د افغانستان د ۴ هوايي ډګرونو امنیتي چارې پر غاړه لرلې، خو دغو ۲ کلونو پیسې یې چې ۱۵ میلیونه ډالره کېږي تر اوسه نهدي ورکړل شوي. دغه کمپنۍ هڅې کوي چې په یوه سویسي بانک کې د افغانستان له شتمنیو خپله ونډه پیسې ترلاسه کړي.
د لبنان ولسمشر جوزف عون د اروپایي ټولنې هغه پلاوي ته چې لبنان ته یې سفر کړی و، ویلي چې اروپايي هېوادونه باید پر اسراییل فشار راوړي څو اوربند ته درناوی وکړي.
د ایران د یزد ولایت پولیسو ویلي، چې په تېره یوه اوونۍ کې یې ۴۹۹ افغان کډوال نیولي دي. د یزد د امنیې قوماندان احمد نګهبان ویلي، دغه کسان د «ټولنیز امنیت د پیاوړتیا» د طرحې په چوکاټ کې نیول شوي دي.
د هلمند ولایت لپاره د طالبانو د کرنې، اوبو لګونې او مالدارۍ ریاست وايي، سږکال به د شفتالو له بڼونو څه باندې ۱۵۵۵ ټُنه حاصلات راټول شي چې دغه شمېر د تېر کال پر تله د ۱۰ سلنې زیاتوالي ښکارندويي کوي. بڼوالان بیا په دغه ولایت کې د سړوخونو د جوړېدو غوښتونکي دي.
د نېشن نیوز شبکې راپور ورکړی، چې د طالبانو سره پخوانی امریکایي زنداني ډینس کویل ویلي، ۱۴میاشتې یې د طالبانو په بند کې پرته له کوم رسمي تور او جرم تېرې کړې دي.
ایراني رسنیو راپور ورکړی، چې د دغه هېواد د بهرنیو چارو وزیر سید عباس عراقچي له خپل ترکي سیال هاکان فیدان سره په ټلیفوني خبرو کې ویلي، دامریکا له لوري په فارس خلیج کې «تاوتریخوالی رامنځته کول» او د اوربند نقض د ډیپلوماسۍ بهیر ته زیان رسولی دی.
افغان الاصله مېرمن رابعه نسیمي د بریتانیا د کارګر ګوند له لوري د لوېدیځ لندن د محلي شورا په ټاکنو کې له ۱۲۰۰څخه د زیاتو رایو په ترلاسه کولو بریالۍ اعلان شوې ده.
د پاکستان د بشري حقونو شورا په دغه هيواد کې د تيلو بيو لوړېدل په کلکه وغندل او ژوره اندېښنه یې څرګنده کړه. دوی وایي، چې د تېلو د بیو لوړول پر بېوزلو خلکو برید دی.
د خیبرپښتونخوا سويلي ولسوالۍ بنو کې په يو ډرون بريد کې د څلورو ښځو او ماشومانو په ګډون اته تنه ټپيان شوي دي. پېښه د جمعې په شپه رامنځته شوې ده.
د امریکا د بهرنیو چارو وزارت ویاند وايي، امریکا به د راتلونکې پنجشنبې او جمعې په ورځو د اسراییل او لبنان تر منځ د دوه ورځنیو خبرو لپاره اسانتیاوې برابرې کړي. د امریکا ولسمشر د اسراییل او لبنان تر منځ د تېرې دورې خبرو مشري پر غاړه درلوده.
د ملګرو ملتونو د خوړو او کرنې سازمان (ایف ای او) ویلي، د روان میلادي کال په اپرېل میاشت کې د نړۍ د خوراکي توکو بیې د درېیمې پرلهپسې میاشتې لپاره لوړې شوې دي.
په داسې حال کې چې کډوالي په یوه نړیوال بحران بدله شوې د اتریش او ازبکستان حکومتونو د افغان کډوالو د ایستلو لپاره یو تړون لاسلیک کړی دی. شنونکي د افغان کډوالو د ستنولو لپاره د یادو هېوادونو دا تړون د بریتانیا او روانډا له ناکامې طرحې سره ورته بولي.
د تېر جمهوري نظام پر مهال د دفاع وزارت مرستیال تمیم عاصي ویلي، د طالبانو مخالفت د افغانستان له جغرافیې او ملي هویت سره د دښمنۍ په معنا نه شي ګڼل کېدای او په وینا یې دا ډله نن شته او سبا به نه وي، خو هېواد به تلپاتې وي.
په نړیواله کچه د انرژۍ د بحران سره یو ځای په پاکستان کې د تیلو بيې لا نورې لوړې کړای شوې دي. د دغه هېواد د پټرولیم وزارت د ډیزلو په یوه لیتر کې ۱۵ پاکستانۍ کلدارې او د پټرولو په هر لیتر کې ۱۴،۹۲ پاکستانۍ کلدارې لوړوالی اعلان کړې دی.
په ملګرو ملتونو کې د افغانستان پخواني دایمي استازي محمود صیقل ویلي، د افغانستان کورنۍ سیاسي ګډوډي او د بهرني سیاست ننګونې له یو بل سره ژور تړاو لري او د منظم کورني سیاست پرته د دغو ستونزو حل ناشونی دی.
د سرچینو په وینا، د طالبانو استخباراتو په کابل کې د «پیگرد خبري اژانس» مسوول احمد جاوېد نیازی نیولی دی. باوري سرچینو ته د نیازي خپلوانو تایید کړې، چې نوموړی د پنجشنبې په ماښام ناوخته په کابل کې په خپل کاري دفتر کې د طالبانو د استخباراتو له لوري نیول شوی دی.
د بشري حقونو د څار نړیوال بنسټ ویلي، په برازیل کې هغه مهمه قضایي پرېکړه چې له مخې یې باید د پولیسو لهخوا د ترسره شویو وژنو خپلواکې څېړنې عملي شوې وای، د حکومت له لوري د یو کال لپاره وځنډول شوه.
د سياېاې پخوانۍ مامورې سارا اډمز ویلي، د داعـ. ـش خراسان څانګه د خپل مشرتابه، پوځي، قضایي، تبلیغاتي او مالي جوړښتونو په کچه لا هم په بشپړ ډول فعاله او باثباته ده. د هغې په وینا، پر دغه ډلې کې د طالبانو د عملیاتو له امله د پام وړ ګډوډۍ نه دي رامنځته شوي.
د امریکا ولسمشر اعلان وکړ، چې د روسیې او اوکراین ترمنځ جګړه کې به د مې له ۹مې تر ۱۱مې پورې درې ورځنی اوربند نافذ شي. ټرمپ په خپله «ټروث سوشیل» پاڼې لیکلي، چې په دې وقفه کې به ټول پوځي بریدونه او جګړهییز فعالیتونه ودرول شي او دواړه هېوادونه به زر ـ زر بندیان هم تبادله کړي.
د جمعيت علمای اسلام «ف» ګوند سناتور عطاالرحمان د پاکستان سنا کې وویل، په خيبر پښتونخوا کې «موږ ځانونه خوندي نه ګڼو». هغه د تحريک انصاف ګوند پر ایالتي حکومت نيوکې وکړې، چې «نااهله» دی او د «واکمنۍ حق» یې له لاسه ورکړی دی.
د طالبانو تر واک لاندې د المپیک، بدني روزنې او سپورټ ادارې رییس احمدالله وثیق وایي، د فوټبال نړیوال فډراسیون (فیفا) په تازه درجهبندۍ کې د افغانستان د فوټسال ملي لوبډلې د اوو پوړونو په پرمختګ سره د نړۍ ۲۱م مقام خپل کړی دی.