د امریکا ډیموکراټ سناتور ډیک ډوربېن ویلي، چې د ناټو فضا ته د روسیې بېپیلوټه الوتکو دننه کېدل، یو جدي خبرداری دی. هغه وويل: «ولادیمیر پوتین هڅه کوي، چې د پولنډ او بالتیک ایالتونو د خوندیتوب لپاره زموږ اراده و ازمايي.»
د پولنډ لومړي وزیر ډونالډ ټسک ویلي، چې د دغه هېواد د هوايي حریم د پرلهپسې سرغړونو په ځواب کې پوځي عملیات دوام لري. هغه پر اېکسپاڼه لیکلي، چې د پولنډ پوځ له شکمنو اهدافو سره د مبارزې لپاره وسلې کارولې دي.
نن (د سپټمبر ۱۰مه) د ځان وژنې د مخنیوي نړۍوالې ورځې سره سمون لري؛ خو افغانستان دغه ورځ داسې مهال نمانځي، چې د بېلابېلو لاملونو له کبله د ځان وژنې کچه پهکې زیاته ده.
د پاکستان په کراچې ښار کې د طالبانو کونسلګرۍ ویلي، چې په دغه ښار کې د دوی کونسل عبدالجبار تخاري د سند ایالت د پولیسو له مشر سره کتلي او د افغان کډوالو اندېښنې یې ورسره شریکې کړې دي.
د پولنډ پوځي چارواکو اعلان کړی، چې د چهارشنبې په ورځ څو روسۍ بېپیلوټه الوتکې د اوکراین نه د دغه هېواد هوايي حریم ته دننه شوې دي. د پولنډ دفاعي ځواکونه وایي، چې دغه الوتکې یې په نښه کړې دي.
د ایران په شېراز کې د افغان کډوالو فرهنګي نندارتون جوړ شو. په دغه نندارتون کې د افغانستان په استازیتوب اته غرفې اېښودل شوې وې، چې پهکې بېلابېل فرهنګي او کتلوري توکي نندارې ته اېښودل شوي وو.
په کندهار کې د طالبانو د امر بالمعروف ریاست په تازه پرېکړه کې د ممثلینو له خوا په ټولنیزو رسنیو کې د تمثیلي ویډیوګانو جوړول او خپرول منع اعلان شوي دي. دغه پرېکړه د کندهار پر هغو ګڼو ځوانانو مستقیم اغېز لري چې د ژوند اساسي عاید یې له همدې لارې ترلاسه کېده.
د کابل ښار د لومړۍ ناحیې اړوند د پُلخشتي او سپاهی ګمنام څلور لارې ترمنځ تر ځمکې لاندې لوی سوداګریز مارکېټ د جوړولو چارې بشپړې او د سې شنبه په ورځ (د وږي ۱۸مه) په یو لړ مراسمو سره ګټې اخیستنې ته وسپارل شو.
د افغانستان په ختیځو ولایتونو کې وروستیو زلزلو شاوخوا ۳۷ زره تر پنځو کلونو کم عمره ماشومان او ۱۰ زره امېندوارې او شیدې ورکونکې مېرمنې د سختې خوارځواکۍ له ګواښ سره مخ کړې دي.
د بښنې نړۍوال سازمان په یوه خپره کړې اعلامیه کې د ملګرو ملتونو د بشري حقونو له شورا غوښتي، چې د افغانستان د بشري حقونو د نقض څېړنې لپاره یو خپلواک او نړۍوال میکانیزم رامنځته کړي.
د پاکستان بندي پخوانی لومړی وزیر وایي، افغانستان نه یوازې یو اوږد مهاله ملګری هېواد دی، بلکې یو ورور او اسلامي هېواد هم دی. نوموړی په هېواد کې وروستیو زلزلو ته په اشارې سره زیاتوي، په دې سخت وخت کې باید له افغانستان سره پیوستون اعلان شي.
د احمدشاه مسعود د ۲۴م تلین په مناسبت یوه انلاین غونډه کې د افغانستان یو شمېر سیاسي مشرانو د طالبانو پر وړاندې د مبارزې د دوام تر څنګ د مخالفو جریانونو ترمنځ د اختلافاتو پر پای ته رسېدو ټینګار وکړ او یې ویل، د داخلي نفاق دوام د مقاومت پر کمزورتیا او د طالبانو پر پیاوړتیا تمامېږي.
د افغانستان د کرېکټ ملي لوبډلې په اسیا جام سیالیو کې په خپله لومړۍ لوبه کې د سې شنبې په ماښام (د وږي ۱۸مه) هانګ کانک ته د ۹۴ منډو په توپیر ستره ماتې ورکړه.
اوکرایني چارواکي وايي، د روسیې یوه هوايي برید د ختیځ اوکراین په یوه کلي کې ۲۴تنه عمرخوړلي کسان، چې د تقاعد پیسې ور وېشل کېدې، وژلي دي. ولادیمیر زیلینسکي د کیېف له متحدینو وغوښتل چې پر مسکو فشار زیات کړي څو خپله جګړه پای ته ورسوي.
د قطر د بهرنیو چارو وزارت ویاند ماجد محمد النصار د اسراییل د برید غندلو ترڅنګ تایبد کړه، چې اسراییل په دوحه کې د حماس د سیاسي دفتر د څو غړو د استوګنې ودانۍ په نښه کړې ده. په اعلامیه کې راغلي:« دابرید له ټولو نړیوالو قوانینو او نورمونو ښکاره سرغړونه ده»
د خیبر پښتونخوا چارواکي خبرداری ورکوي چې د تحريک طالبان پاکستان (ټي ټي پي) له ۸ زرو ډېر وسلهوال د افغانستان له لارې ددغه ایالت بېلابېلو سیمو ته داخل شوي او اوس د عامو خلکو له منځ نه پر امنیتي ځواکونو بریدونه کوي.
ملګرو ملتونو د سې شنبې په ورځ اعلان وکړ چې دافغانستان د ختېزو ولایتونو له زلزلهځپلو سره د ملاتړ لپاره ۱۳۹،۶ میلیونه ډالرو ته اړتیا لري. یاد سازمان له مرستندویو هېوادونو وغوښتل چې له طالبانو سره سیاسي اختلافات یوې خواته کېږدي او د خلکو د ژغورنې لپاره مرسته وکړي.
په تورخم کې د تازه مېوو یو شمېر سوداګرو افغانستان انټرنشنل ته وویل چې په تازه مېوو بار لسګونه موټر ولاړ دي او مېوه یې مخ پر خرابېدوه ده. سوداګر وايي، د موټرو ولاړېدو لامل د طالبانو د تورخم ټرانسپورټ ریاست کې د موټرو وړاندې کولو په پلمه مالي فساد او د پاکستاني چارواکو پڅ کار دی.
د مخکیني ولسمشر لومړي مرستیال امرالله صالح د احمدشاه مسعود د تلین په تړاو د حامد کرزي څرګندونې "شجاعانه او ملي" بللې دي. کرزي ویلي، چې مسعود د افغانستان د ازادۍ لپاره مبارزه وکړه او د خلکو په منځ کې پاتې شو.
د طالبانو د هرات ولایت د والي مطبوعاتي دفتر ویلي چې د ترکمنستان له پولې سره د صفري نقطې په سیمه کې د تورغونډۍ بندر د پراختیا ساحې د چمتو کولو چارې رسماً پیل شوې دي. د ترکمنستان اورګاډي اداره به په نږدې راتلونکي کې د اداري ودانیو، هنګرونو او پټلۍ د جوړولو چارې هم پیل کړي.
د طالبانو د اوبو او انرژۍ وزارت ویلي چې دوو ازبکستاني شرکتونو د یاد وزارت له وزیر مولوي عبداللطیف منصور سره په لیدنه کې د اوبو او انرژي په پروژو کې پانګونې ته لېوالتیا ښودلې ده.