د حالوش د راپور لهمخې، د ایران د کرمان په فهرج سیمه کې د نظاميانو یوه چکپاینټ ته نږدې د وسلهوالو او دولتي ځواکونو تر منځ نښته رامنځته شوې، چې له امله یې د ایران د اطلاعاتو وزارت دوه مامورین او دوه انتظامي کسان وژل شوي دی. د راپور لهمخې، یو شمېر نور یې ټپیان شوي هم دي.
د کاناډا د بهرنیو چارو وزیرې انیتا انند ویلي، د بشري حقونو د سرغړونو له امله د ایران پر څلورو لوړپوړو چارواکو بندیزونه لګول شوي دي.
د ملي امنیت پخواني رييس رحمتالله نبیل د دوو نجونو ماشومانو د یوې ویډیو چې په ژړغوني غږ د ښوونځیو د خلاصون غوښتنه لري، په خپرولو سره ویلي چې د نجونو ښوونځيو تړل «یو تاریخي پیغور دی چې له حافظې به ونهوځي.» طالبانو په خپله واکمنۍ کې له ۶ ټولګي پورته نجونې له زدهکړو منع کړي.
سپینې ماڼۍ ویلي، چې ډونالډ ټرمپ د یوه فرمان په لاسلیک کولو سره ناقانونه فینټانیل او د هغه اصلي کیمیاوي مخکښ مواد د ډلهییزو وژونکو وسلو (ډبلېواېمډي) په توګه ونومول. د سپینې ماڼۍ په وینا، دغه مواد د ۱۸ تر ۴۵ کلونو عمر لرونکو امریکایانو د مړینې تر ټولو لوی لامل بلل کېږي.
د جرمونو نړۍوالې محکمې (ICC) د استیناف قاضیانو د دوشنبې په ورځ د هغو حقوقي ننګونو یوه برخه رد کړه، چې اسراییل د غزې د جګړې د څېړنو پر ضد مطرح کړې وې. اسراییل له دې محکمې غوښتي و، چې د غزې جګړې د پېښو څېړنه دې وځنډول شي.
د طالبانو د کورنیو چارو وزارت ستر امنیتي مرستیال ابراهیم صدر په پنجشېر کې طالب چارواکو ته په خطاب کې وویل، د صف تصفیې ته په جدي توګه پام وکړئ او هغه «منفورې څېرې او اشخاص» چې نظام ته ګټه نهرسوي باید له لیکو واېستل شي، ځکه د فتنې او فساد سبب ګرځي.
د افغانستان د خبریالانو مرکز وايي، چې دوه افغان خبریالان له ۹ میاشتو بند وروسته د بګرام له زندان څخه خوشې شوي، خو د رسا په نوم ټلویزیون چې دوی پکې کار کاوه، لا هم تړلی دی او د بیا فعالیت اجازه نه ده ورکړل شوې.
په بامیان او کندهار کې د ۱۹ زره او ۷۱ ټُنه سُرب او جست د داوطلبیو مراسم د دوشنبې په ورځ (د لیندۍ ۲۴مه) ترسره شول. په دې داوطلبیو کې د بامیان سُرب او جست یو ټُن یې په ۳۱۳ ډالره او د کندهار د سُرب او جست یو ټُن په ۱۲ زره او ۷۵۰ افغانۍ وپلورل شول.
د روسیې د بهرنیو چارو وزارت د دوشنبې په ورځ په اسټرالیا کې د حانوکا د مراسمو پر مهال وسلهوال برید وغانده او ویې ویل، چې د دې پېښې د قربانیانو په منځ کې د روسیې وګړي هم شامل دي.
د طالبانو د اطلاعاتو او کلتور وزارت مرستیال له یوې ورځپاڼې سره په مرکه کې ادعا کړې، چې دا مهال په افغانستان کې هېڅ خبریال په بند کې نهدی، خو د خبریالانو ملاتړي بنسټونه وايي چې اوسمهال لږ تر لږه ۷ خبریالان بنديان دي او افغانستان د سانسور او ځپنې له پلوه د نړۍ تر ټولو بد هېواد دی.
په پاکستان په ځانګړې توګه په اسلاماباد او راولپنډۍ کې په دې وروستیو میاشتو کې د ځايي پولیسو له لوري د افغانانو د نیونې بهیر زور اخیستی دی. یو شمېر افغانان وايي، اوس په شخصي جامو او موټرو کې د پولیس په نوم افغانان له ځورول کېدو سربېره لوټل کېږي او دغه وضعیت سخت اندېښمن کړي دي.
بریټانیا د طالبانو او پاکستان تر منځ وروستیو پوځي نښتو ته په اشارې، خپلو اتباعو ته ویلي چې افغانستان ته سفر ونه کړي. د بریتانیا بهرنیو چارو وزارت خپلو خلکو ته خبرداری ورکړی چې که په افغانستان کې ونیول شي، د حمایې توان یې محدود او په افغانستان کې اړینې مرستې ورکول هم ممکن نه دي.
په برلین کې د سولې خبرو اترو په بهیر کې ښکیل یوه امریکايي چارواکي ویلي چې واشنګټن اوکراین ته ویلي، د جګړې د پای ته رسولو لپاره باید خپل ځواکونه له دونیڅک سیمې وباسي. یوې بلې سرچینې ویلي، چې کیېف د نورو خبرو غوښتنه کړې، خو لا هم د ځمکې په اړه لویې ستونزې شته چې باید حل شي.
د بریتانیا د استخباراتو (اېم ۱۶) مشرې بلايز مېټروېلي د دوشنبې په ورځ وویل، چې د روسیې ولسمشر ولادیمیر پوتین د اوکراین پر سر خبرې اوږدوي او په ورته وخت کې هڅه کوي مخالفان په مختلفو لارو لکه سایبري بریدونو او ډرون فعالیتونو وويروي.
د امریکا د پلټنو فدرالي ادارې ویلي، چې په لاس انجلس او اورېنج کاونټي کې یې د بمونو یو پلان شوی برید شنډ کړ دی. د امریکا لویې څارنوالې پام بوندي د دوشنبې په ورځ وویل، چې په پلان کې د کډوالۍ د ادارې مامورین او وسایط هم په نښه کېدل.
د غزې چارواکو د دوشنبې په ورځ خبرداری ورکړی، چې د سختو بارانونو له امله ښايي هغه ودانۍ نورې هم ونړېږي چې د جګړې پر مهال زیانمنې شوې دي. هغوی ویلي، ناوړه هوا د هغو ۹ زره مړو د راایستلو چارې هم سختې کړې دي چې لا هم د نړېدلو ودانیو تر کنډوالو لاندې بند پاتې دي.
د طالبانو د رییس الوزرا ملا حسن په مشرۍ د کابینې یوولسمه غونډه کې د هرات اسلام کلا او نورو بندرونو کې د اړتیا وړ تاسیساتو او لابراتوارونو د ارزونې او نوي کابل د ابادۍ په اړه بحث شوی. په غونډه کې پرېکړه شوې، چې د بندرونو د لابراتوارونو ارزونې پایلې به ریاست الوزرا ته وړاندې شي.
د جرمني حکومت اعلان کړی، چې د اوکراین د دفاع په برخه کې به خپله ژمنتیا لا پیاوړې کړي. همداراز به د دواړو هېوادونو د دفاع وزارتونه منظمې لوړکچې مشورتي غونډې کوي او په برلین کې به د اوکراین د دفاعي صنعت لپاره د اړیکو یو دفتر، چې «اوکراین فریډم هاوس» نومېږي، پرانیستل شي.
د روسیې د اپوزېسیون «یابلوکو» ګوند بنسټګر ګریګوري یاولینسکي ویلي، چې ګوند به یې د دوو جګپوړو غړو له نیول کېدو سره سره خپل سیاسي فعالیت جاري ساتي. نوموړي دا نیونې د راتلونکي کال له پارلماني ټاکنو وړاندې د ګوند مخنیوی بللی.
اروپايي ټولنې د افغانستان د خصوصي سکتور د ملاتړ پروګرام د پلي کولو لپاره له نړیوال مالي شرکت «ای اېف سي» سره د ۵ میلیونه یورو په ارزښت یو نوی تړون لاسلیک کړ، چې د نړیوال بانک ګروپ غړی دی او په ټوله نړۍ کې د خصوصي سکتور پراختیا هڅوي.
د هانګ کانګ د ګمرک چارواکو ویلي، یو افغان مسافر په لویدیز کاولون تمځای کې هغه مهال ودرول شو، چې غوښتل یې له میلاد مخکې دویمې پېړۍ پورې اړوند لرغوني تاریخي اثار په ناقانونه ډول له هېواده وباسي.