د بدخشان د شهر بزرګ ولسوالۍ په داونګ سرحدي سیمه کې د طالبانو او تاجکستاني سرحدي ځواکونو ترمنځ له نښتې وروسته، د دواړو لوریو چارواکو سره ولیدل. طالبانو په دې ناسته کې پر تاجکستان تور لګولی، چې ددوی ۳۵۰ وسله وال مخالفان روزي.
د طالبانو د عامې روغتیا وزیر نور جلال جلالي وایي، د یوې نوې روغتیایي ستراتیژۍ د جوړولو بهیر روان دی، چې د عامې روغتیا د پیاوړتیا لپاره حیاتي ارزښت لري. جلالي ویلي، چې د لومړنیو روغتیايي خدمتونو (BPHS) او د روغتونونو بنسټیزو خدمتونو (EPHS) د بیاکتنې لړۍ هم پیل شوې ده.
د افغانستان کرېکټ بورډ اعلان وکړ، چې د ایرلنډ کرېکټ ملي لوبډلې پخوانی الراونډر جان موني یې د افغان ملي لوبډلې د ډګر ساتنې د نوي روزونکي او استرالیايی نیرملان تنابالزینګم یې د ملي لوبډلې د نوي فزیوتراپېسټ په توګه ګومارلي دي.
د طالبانو په زندان کې د بندي روسي اتنوګراف سویاتوسلاو کاورین مور تاتیانا کاورینا د تاتارستان له مشر رستم منیخانوف څخه د خپل زوی د خوشې کولو په برخه کې د همکارۍ غوښتنه کړې ده. د غیر رسمي معلوماتو له مخې، نوموړی اوس په کابل کې له نورو بهرنیانو سره په یوه توقیف خونه کې ساتل کېږي.
سیاسي فعاله او د پخواني ولسمشر ډاکټر نجیبالله لور، هیله نجیبالله وايي چې طالبان د خپلې لومړنۍ واکمنۍ په څېر د افغان ولس لپاره «مشروعیت» نهلري.
د طالبانو د کانونو او پټرولیم وزیر د تاتارستان د تېلو، ګاز او کیمیاوي صنعت فورم کې د افغانستان د ګاز او تېلو په زېرمو او کانونو کې د پانګونې غوښتنه کړې ده. شنونکي وايي، روسیې د طالبانو له رسمیت پېژندنې سره سره، خپله همکاري د تاتارستان او طالبانو ترمنځ اړیکو پورې محدوده کړې.
د طالبانو د سرحدونو، قومونو او قبایلو چارو وزیر ملا نورالله نوري د ایران له سفیر عليرضا بېکدلي سره په لیدنه کې له نوموړي غوښتي، چې په ایران کې له مېشتو افغان کډوالو سره دې د «اسلامي ارزښتونو او نړۍوالو نورمونو» لهمخې چلند وشي.
د اسټرالیا د بهرنیو چارو وزیر پیني وانګ له خپلو وګړو غوښتي، چې ایران ته له سفر کولو ډډه وکړي. نوموړې تازه له اېبيسي راډیو سره په خبرو کې د ایران هغه ادعاوې رد کړې، چې ګواکې دوی د یهودو پرضد بریدونو کې لاس نهلري.
هندي چارواکي وايي، که څه هم هند له روسیې څخه په کمه بیه د تېلو په پېرولو کې ډېره ګټه کړې؛ خو د امریکا تازه تعرفو دغه ګټه له ګواښ سره مخ کړې ده. د دغه چارواکو په وینا؛ د امریکا د ۵۰سلنې تعرفې له کبله ښایي روان کال د ۳۷ میلیارده ډالرو په ارزښت د هندي توکو په صادراتو کې کموالی راشي.
د طالبانو د ملي موزیم مشر صبغتالله عابد د جاپان سفیر تاکایوشي کورومایا سره د «مخهښې» په لیدنه کې دغه هېواد د افغانستان کلتوري میراثونو د خونديتوب، مرمت او څېړنو په برخو کې یو مهم شریک بللی دی.
د افغان اېواک په نوم د افغانانو د بیامېشتېدنې د همغږۍ سازمان د امریکا بهرنیو چارو وزیر ته په یوه لیک کې په پاکستان کې امریکا ته د تلونکو زرګونه افغانانو د معلوماتو د افشا کېدو په اړه جدي اندېښنه ښودلې او د پایلو په اړه یې خبرداری ورکړی دی.
سرچینې افغانستان انټرنشنل-پښتو ته وايي، چې د ننګرهار په انتاني روغتون کې د تېرو ۶ میاشتو په ترڅ کې د انتاني ناروغیو لرونکي ۱۸ کسان مړه شوي دي. د معلوماتو لهمخې؛ په دې موده کې د ډینګي، اسهال او کرونا په ګډون انتاني ناروغیو لرونکو شاوخوا ۲۴زره ناروغانو یاد روغتون ته مراجعه کړې ده.
د طالبانو د دفاع وزیر مولوي محمد یعقوب مجاهد وایي، دا مهال د کابل او اسلاماباد اړیکې ترینګلې دي او دی ترې ناخوښه دی. د نوموړي په خبره؛ د افغانستان او پاکستان ترمنځ د اړیکو خرابوالی د دواړو هېوادونو په زیان دی او په کار ده، چې په خپلو کې ښې اړیکې وپالي.
د طالبانو د کورنیو چارو وزارت وایي، د سېشنبې په شپه د کابل–کندهار پر لویه لار د کابل ولایت اړوند ارغندۍ سیمه کې یو مساپر وړونکی بس له سړکه اوښتی او یوې درې ته لوېدلی چې له کبله یې ۲۵ کسان مړه او ۲۷ نور ټپیان شوي دي.
د طالبانو تر واک لاندې د المپیک، بدني روزنې او سپورټ عمومي ریاست خبر ورکړی، چې د ننګرهار ولایت په تورخم ښارګوټي کې د ۲۴ لوبډلو ترمنځ د ټېپ بال کرېکټ سيالۍ پیل شوې دي.
د امریکا د ولسمشر ډونالډ ټرمپ د تازه پرېکړې له مخې؛ پر هند د امریکایي تعرفو کچه تر ۵۰ سلنې پورې لوړه شوې ده. د راپورونو له مخې؛ دغه پرېکړه سر له ننه د پلي کېدو وړ ده.
درېیو افغان مېرمنو چې له پاکستانيانو سره یې ودونه کړي، د اسلاماباد له سترې محکمې غوښتنه کړې چې له دغه هېواده د هغوی د اېستلو مخه ونیسي او د دایمي استوګنې اجازه ورکړي.
په ترکیه کې د امریکا سفیر او د سوریې لپاره د دغه هېواد ځانګړي استازي ټام بارک په لبنان کې خبریالانو ته له یوې غونډې وروسته ویلي، چې « متمدنه چلند ولرئ او له وحشیانه چار چلند څخه ډډه وکړئ.»
د ملګرو ملتونو د بشري چارو د همغږۍ دفتر «اوچا» وايي، چې د جولای په میاشت کې د طالبانو مداخلې په افغانستان کې د ۴۴ بشرپاله پروګرامونو د لنډمهاله ځنډېدو او د یوه روغتیايي مرکز د تړل کېدو لامل شوې دي.
د اسټرالیا د کورنیو چارو وزیر ټوني برک ویلي، چې له دغه هېواده د ایران سفیر د اېستلو په پرېکړه کې اسراییل هېڅ ډول ونډه نهلرله. نوموړي په یوه بیان کې په دې تړاو د اسراییل د حکومت څرګندونې او انګېرنې بېبنسټه بللې دي.
د مرکزي اسیا د اتلولۍ په کافا جام سیالیو کې چې تر راتلونکو دوو ورځو (د اګسټ په ۲۹مه) د تاجکستان په کوربهتوب پیلېږي؛ لومړۍ لوبه یې د افغانستان او ایران د فوټبال ملي لوبډلو ترمنځ ده.