آرشیف

د طالبانو تر واک لاندې د ټرانسپورټ او هوايي چلند وزارت د هواپوهنې ریاست اعلان کړی، چې د هېواد په ۲۳ولایتونو کې د باران او د سېلابونو د راوتلو احتمال شته.

په نږدې يوه مياشت کې ۱۸ تنه معترضان او سياسي بنديان په ايران کې اعدام شوي دي. دا شمېر د تېر کال د ټولو ثبت شويو سياسي اعدامونو له درېيمې برخې زيات دی او د سياسي اعدامونو مياشتنۍ کچه يې د تېر کال د منځني کچې تر څلور برابرو زياته کړې ده.

په ناروې کې د طالبانو د سفارت سرپرست نجیب الله شاهین د یاد هېواد د سره صلیب د بهرنيو اړیکو له مشر هوکن یاکوب روتینګ سره کتلي او د مرستو پر دوام یې خبرې اترې کړي دي.

د کینیا سترې محکمې پرېکړه کړې، چې د نشه‌يي توکو د قاچاق او ناقانونه کاروبار په تور د افغانستان د ولسي جرګې پخوانی مرستیال ظاهر قدیر امریکا ته وسپاري. قاضي وویل، چې کینیا د نشه‌يي توکو او وسلو د سوداګرۍ پر ضد نړیوالو تړونونو ته ژمنه ده او د امریکا غوښتنه یې پر همدې بنسټ منلې ده.

د افغانستان لپاره د برېتانیا ځانګړي استازي، ریچارډ لېنډسي، ویلي چې هېواد به یې د داسې راتلونکې لپاره خپلو هڅو ته دوام ورکړي چې پکې ټول افغانان، په ځانګړي ډول ښځې، په مساوي ډول د زده کړې، ګډون او ونډې اخیستلو فرصتونه ولري.

د افغانستان لپاره د اروپايي ټولنې ځانګړي استازي، ژيل برټرانډ کابل ته د خپل سفر په پای کې په دغه هېواد کې د ترهګرو ډلو د شتون او فعاليتونو په اړه اندېښنه څرګنده کړه او ويې ويل چې دا ډلې د سيمې او نړۍ لپاره ګواښ بلل کېږي.

د طالبانو د چاپېریال ساتنې ادارې رييس مطیع‌الحق خالص په قزاقستان کې د «استانه سیمه ییزې ایکولوژیکي» غونډې په څنډه کې د ترکیې د چاپېریال ساتنې له مرستیال وزیر سره په کتنه کې له هغه وغوښتل چې په کاپ۳۱ غونډه کې د دوی د ګډون په تړاو همکاري وکړي.

بریټانیا د هغو افغان کورنیو د لیږد بهیر ځنډولی چې له بریټانیايي ځواکونو سره د همکارۍ له امله د بیا میشتونې او لېږد لپاره وړ بلل شوي وو.

د جمهوري نظام پرمهال د ولسمشر ویاند او سلاکار وحید عمر وايي، هغه کسان چې د لنډمهاله سیاسي ګټو لپاره د ډیورند د رسمیت پېژندنې بحثونه راپورته کوي، که سبا د منتخب ولسمشر په توګه وټاکل شي، بېرته به له خپلې خبرې پر شا شي.

د خیبر پښتونخوا د افغان کډوالو کمشنر شکیل صافي ویلي چې د افغان کډوالو د ستنېدو له امله لس پنډغالي خالي شوي او له۲۰۲۳ کال څخه تر ۲۰۲۵ کال پورې شاوخوا دوه میلیونه«غیرقانوني» میشت افغان کډوال بېرته خپل هېواد ته ستانه شوي دي.

په کاپیسا کې سرچینو افغانستان انټرنشنل ته ویلي، چې د طالبانو استخباراتو د کاپیسا پر والي احسان الله بریال له چاودنې وروسته د تګاب د پاینده خېلو د خیرالناس مدرسې دوه طالبان زیارمل او محمد عاصم او د حزب الله په نامه یو استاد نیولي او له ځان سره یې وړي دي.

له افغانستان څخه د امریکايي ځواکونو د وتلو د ځانګړې ارزونې پلاوي مشر شان پارنېل ویلي، د پلاوي د سپارښتنې او د امریکا د جګړې وزیر پېټ هېګسېت په لارښوونه، د هغو سمندري سرتېرو د مېړانې مډالونه لوړ شوي چې د ۲۰۲۱ کال د اګست پر ۲۶مه د کابل هوايي ډګر د «ابي دروازه» کې ولاړ وو.

د طالبانو د مخابراتو او معلوماتي ټکنالوژۍ وزیر ویلي، چې نړۍ د ټکنالوژۍ په برخه کې د پرمختګ په حال کې ده او افغانستان هم باید په دې برخه کې خپلې هڅې ګړندۍ وساتي. نوموړي ویلي، چې که د ټکنالوژۍ په پرمختګ کې اخلاقي ارزښتونه په نظر کې ونه نیول شي، ښايي د پناه کېدو لامل شي.

په کابل کې سرچینو افغانستان انټرنشنل ته ویلي چې طالبانو پاکستان ته د ایران او امریکا د خبرو اترو پرمهال د افغانستان له خاورې نه د ډرون الوتکو د نه ور تګ ډاډ ورکړی. د سرچینو په وینا، دغه پیغام د چین له لارې اسلام‌اباد ته رسول شوی.

د ایران نیمه رسمي اژانس تسنیم ویلې چې ددغه هیواد امنیتي ځواکونو په راسک سرحدي سیمه کې د جیـ.ـش الـ.ـعدل یو فعال بریدګر ټیم، چې له پاکستان نه یې د ایران خاورې ته د ننوتلو هڅه کوله، له منځه وړی او په دغو عملیاتو کې یې څو وسله‌وال وژلي دي.

پخواني جهادي مشر عبدالرب رسول سیاف د ډیورنډ کرښې په تړاو د یو شمېر سیاسیونو وروستیو څرګندونو ته په غبرګون کې ویلي، چې په اوسنیو حساسو شرایطو کې دې د ملي یووالي ساتلو په موخه له اختلاف پاروونکو بحثونو او یو بل ته له بد رد ویلو په کلکه ډډه وشي.

طالبان پلان لري چې د روان کال په مې میاشت کې له روسیې سره د «روسیه-اسلامي نړۍ: کازان فورم ۲۰۲۶» په ترڅ کې درې اقتصادي تړونونه لاسلیک کړي. په تړونونو کې د افغانستان په بنسټیزو پروژو کې د یوې روسۍ کمپنۍ پانګونه او د روسي محصولاتو او تېلو پېرل شامل دي.

په داسې حال کې د پوهنتونونو او لېسو زده کوونکي شکایت کوي، چې طالبان یې لونګۍ او خولۍ پرسر کولو ته اړ باسي، د طالبانو د ریاست الوزرا اداري مرستیال وايي، نور د پوهنتون د محصل او د مدرسې د طالب ترمنځ هېڅ توپیر نشته او د مدرسې او پوهنتون ترمنځ واټن کم شوی دی.

د بغلان ولایت سیمه ییزو سرچینو افغانستان انټرنشنل ته ویلي چې د جمعې په شپه د وري پر ۲۸مه نېټه پنځه وسله وال کسان د غلام حضرت په نوم د یوه قومي مشر کور ته ننوتلي او شاوخوا «درې میلیونه افغانۍ او نږدې نیم کیلو سره زر» یې ترې غلا کړي دي.

د طالبانو د عامې روغتیا وزیر مولوي نور جلال جلالي د افغانستان لپاره د روغتیا نړیوال سازمان له مشر ډاکټر اډوین سنیزا سلواډرسره لیدنه کړې ده. سلواډر ویلي چې د طالبانو تر واک لاندې عامې روغتیا وزارت سره د ظرفیت لوړونې او د خدماتو د ښه والي په برخو کې خپلو همکاریو ته دوام ورکوي.

په اسلام اباد کې د طالبانو سفیر سردار محمد شکیب د خیبرپښتونخوا ایالت له اعلی وزیر سهیل اپریدي سره په دغه ایالت کې د افغان کډوالو او ستنېدونکو افغانانو د وضعیت په تړاو ټیلفوني خبرې کړې دي. د طالبانو سفیر د ستنېدونکو لپاره د اسانتیاوو ډېرولو غوښتنه کړې ده.