د طالبانو د کندهار والي ویلي، چې د یادې ډلې د مشر ملا هبت الله اخوندزاده د حکم له مخې د امنیتي او تصفیوي کمېسیون مشري والیانو ته سپارل شوې ده. مخکې د یاد کمېسیون مشري د والیانو د مرستیالانو پر غاړه وه.
د طالبانو د کرنې، اوبو لګولو او مالدارۍ وزارت د کابل د بادامباغ په څېړنيز فارم کې د بزګر مېله او د افغانستان د کرنیزو او مالدارۍ محصولاتو څلوردېرشم نندارتون پرانېستی. په غونډه کې د طالبانو د کرنې وزیر وویل، چې ۱۴۰۵ کال د ابادۍ او ځان بسیاینې کال دی.
د بدخشان ولایت د کوفاب او راغستان ولسوالیو ترمنځ په «اقوبه شاله» سیمه کې د واورې ښویېدنې له امله څلور کسان مړه شوي دي.
په کندهار کې د طالبانو چارواکي وايي، چې د اسټرالیا هېواد ۳۹ کلن تبعه سنجي بنیامین د خرقې په ریاست کې د کلمې په ویلو سره د اسلام دین منلی. طالبان وايي، چې پر نوموړي د احمد نوم اېښودل شوی.
د طالبانو د کورنیو چارو وزیر سراج الدین حقاني د هلمند له سفر وروسته په زابل کې د یادې ډلې د بنسټګر او پخواني مشر ملا عمر مجاهد د قبر له رغنیزو چارو لیدنه کړې ده. د ملا عمر د قبر د رغونې چارې په ۲۰۲۲ کال کې پیل شوې دي.
چین د خپل فضايي پروګرام لپاره دوه پاکستاني ستورمزلي د نوماندانو په توګه غوره کړي دي. د راپور له مخې، دواړه کسان به د روزنې لپاره چین ته ولېږل شي او له هغوی څخه به یو کس د فضايي ماموریت په ترڅ کې د وسایلو «پېلوډ متخصص» په توګه برخه واخلي.
د بښنې نړیوال سازمان د پي ټي ایم د جګپوړي مشر او پاکستان د ملي اسمبلۍ پخواني غړي علي وزیر پر خپلسرې او دوامداره بندي کېدا اندېښنه ښودلې او د پاکستان له حکومت څخه یې غوښتنه کړې چې نوموړی سملاسي خوشې شي.
د طالبانو د سرحدونو، قومونو او قبایلو چارو وزیر ملا نورالله نوري په تخار ولایت کې په یوه غونډه کې یوځل بیا ویلي، چې پاکستان غواړي ډیورنډ کرښه په سرحد بدله شي، خو نوموړی وايي، داسې به ونه شي. نوري وايي، دوی له چا سره د جګړې اراده نه لري، خو د هېواد دفاع د سر په بیه کوي.
د افغانستان لپاره د ملګرو ملتونو ځانګړي راپور ورکوونکي ریچارډ بېنېټ ویلي چې د افغان پناه غوښتونکو د ستنولو په تړاو د طالبانو له استازو سره د اروپایي ټولنې د خبرو اترو پر رپوټونو اندېښمن دی. بېنېټ وايي، هر ډول جبري ستنول د « بېرته نه ستنونې» اصل ګواښي.
طالبانو د هلمند ولایت په بهرامچې ولسوالۍ کې د ډیورنډ کرښې په اوږدو کې په رباط، بي بي جانې، چټو، صالحان او ډک سیمو او دغه راز په خانشین، دیشو ولسوالیو او د کندهار په ځینو سرحدي سیمو کې د نویو پوستو د جوړولو کار پیل کړی دی.
د طالبانو د بهرنیو چارو وزارت وايي، چې امیرخان متقي د ایران د بهرنیو چارو له وزیر سره په ټیلیفوني اړیکه کې د ایران او امریکا د خبرو اترو د روان بهیر په تړاو غږېدلی او د خبرو اترو له لارې د ستونزو اواری یې رغنده ګام بللی دی.
سرچینو افغانستان انټرنشنل ته ویلي، چې طالبانو په کندهار کې د یوه خصوصي ښوونیز مرکز مسوول او لیکوال جانان مومن د یادې ډلې د پوهنې ریاست د اصولو نه مراعتولو په تور نیولی او بندي کړی دی.
د بلوچستان د کوټې په بولان روغتون کې روانه اونۍ له لیلیې نه د خدیجې په نوم یوه بلوڅه روغتیاپاله د ناپېژندانو کسانو لهخوا وتښتول شوه؛ خو تازه د بلوچستان حکومت ویلي، نوموړې د «ترهګرۍ» په تور نیول شوې ده. د یادې پېښې پرضد د بلوڅانو یووالي کمیټې د بولان روغتون مخته ته احتجاج وکړ.
د طالبانو سترې محکې د یوې خبرپاڼې په خپرولو سره ویلي، چې د بدخشان په خاش ولسوالۍ کې یې د «زنا» په تور د یوې ښځې په ګډون دوه کسان په عام محضر کې ۳۹-۳۹ دُرې وهلي دي. یادې محکمې ویلي، چې دغه کسانو ته د یو کلن بند سزا هم ورکړل شوې ده.
د کار نړۍوال سازمان په خپل تازه خپور شوي راپور کې ويلي، چې په پاکستان کې د تېر ۲۰۲۵کال سېلابونو له امله نږدې ۳.۳ مېلیونه دندې یا لهمنځه تللې او یا هم سختې زیانمنې شوې دي.
د طالبانو د صنعت او سوداګرۍ وزارت خبر ورکړی، چې نورالدین عزیزي ازبکستان ته د خپل سفر پرمهال د دغه هېواد د لومړي وزیر مرستیال جمشېد خجایف سره په لیدنه کې په بلخ کې د افغان تولیداتو لپاره د صادراتي مرکز د جوړولو په اړه خبرې کړې.
په روانه میاشت کې د بلوچستان د سکرو په بېلابېلو کانونو کې د پېښو له امله څلور افغان کان کېندونکي مړه شوي دي. د پاکستان د کارګرو فدراسیون د بلوچستان څانګې سرمنشي پیرمحمد کاکړ په دې اړه وایي، چې د یادو پېښو لوی لامل په کانونو کې د خوندیتوب مناسبو اسانتیاوو نشتوالی دی.
د ستنېدوکو افغان کډوالو لپاره د لنډي کوتل په حمزه بابا پنډغالي، تورخم او نورو سیمو کې افغانستان ته د ستنېدو په موخه سلګونه لارۍ د کډوالو په کډو بار ولاړې دي؛خو له څو ورځو راهیسې د ثبت او د موټرو د ګمرکي پړاوونو بشپړولو په تمه دغه کډوال د خوړو، اوبو او اسانتیاوو له کمښت سره مخ دي.
په غزني کې د طالبانو امنیې قوماندانۍ ویاند خالد سرحدي خبر ورکړی، چې په دغه ولایت کې د دوو جلا ټرافیکي پېښو له امله څلور کسان مړه او ۷ نور ټپیان شوي دي. د هغه په وینا؛ لومړۍ پېښه په واغظ ولسوالۍ کې د یوه مساپر وړونکي موټر د چپه کېدو له امله شوې، چې له کبله یې ۴ کسان مړه شوي دي.
د طالبانو د بهرنیو چارو وزارت په خبرپاڼه کې راغلي، د یاد وزارت اداري مرستیال محمدنعیم او د اروپايي ټولنې ځانګړي استازي جېلز برټرنډ ترمنځ په ناسته کې اروپايي بازارونو ته د افغاني توکو د لاسرسي لپاره پر هڅو خبرې شوې دي.
د بېځایه شویو نړۍوال سازمان له امریکا غوښتي، پر هغه پلان بیا له سره غور وکړي چې په قطر کې بندپاتې افغانان د بیا مېشتېدو له حق څخه بېبرخې کوي او پر ځای یې کانګو یا د طالبانو تر واک لاندې افغانستان ته د تګ لپاره اړ باسي.