د طالبانو د لوګر ولایت د فرعي سیندیزې حوزې مسوولان وایي چې د وروستیو ورښتونو له امله په سرخاب بند کې شاوخوا ۹ میلیونه مکعب متره اوبه زیرمه شوې دي چې دا کچه په تېرو لسو کلونو کې بېسارې بلل کېږي.
د ملګرو ملتونو د ښځو ادارې ویلي، چې له ایران او پاکستان څخه راستنې شوې ښځې له جدي بېوزلۍ او د کاري فرصتونو له نشتوالي سره لاس او ګریوان دي. دغې ادارې ویلي، چې یوازې ۱۷ سلنه راستنې شوې ښځې عاید لري.
د پاکستان ګلګټ بلتستان اسمبلۍ ۲۴ څوکیو ټاکنو لپاره د ټاکنو کمېسیون لهخوا مهالوېش اعلان شو، چې د روان کال (د جون په ۷مه) نېټه به ترسره شي. د مهالوېش له مخې؛ د روانې اپرېل میاشتې له ۱۶مې تر ۲۰مې نېټې پورې په ټاکنو کې برخه اخیستونکي کولاي شي چې د نوماندۍ لپاره اسناد دوی ته وسپاري.
د اټومي انرژۍ نړیوالې ادارې مشر رافایل ګروسي ویلي، چې شمالي کوریا د اتومي وسلو جوړولو وړتیا په جدي ډول لوړه کړې ده. د سویلي کوریا څارګرې ادارې ویلي، چې شمالي کوریا د یورانیمو د بډایڼې څو تاسیسات لري، چې دا د جنګي اټومي خولیو جوړولو لپاره اړین ګام دی.
ناپېژاندو وسلهوالو د بلوچستان ایالت د ډېره مراد جمالي ولسوالۍ اړوند ټياېنټي کالونۍ سیمه کې د ګوزڼ ضد واکسینو کمپاین ټیمونو د ساتنې لپاره په دنده بوخت د فرمان بشیر بهراني په نوم یو پاکستانی پولیس سرتېری په ډزو وژلی.
د طالبانو د بهرنیو چارو وزارت خبر ورکړی، د مصر د رفح بندر له لارې یې غزې ته ۵۳۰ ټنه مرسته رسېدلې چې پر ۲۲زره کورنیو به ووېشل شي. د دغه وزارت په وینا؛ یاده مرسته د ۵۰۰زره امریکايي ډالرو په ارزښت چمتو شوې، چې ۵۳۰ ټنه خوراکي او غیر خوراکيتوکي پهکې شامل دي.
په کاپیسا کې د طالبانو تر واک لاندي د ټرافیکو اداره وايي، چې تېرکال په دغه ولایت کې ۱۱۰ ټرافیکي پېښې ثبت شوې دي. د یاد ولایت د ټرافیکي پېښو د څېړنې مدیر شکرالله افغانیار وايي، د دغه ټرافیکي پېښو پرمهال ۲۶ کسان مړه او ۱۶۶ نور ټپیان شوي دي.
د سېشنبې په ورځ په پېښور محکمه کې مدافع وکیلې ثنا ګلزار د هغو پاکستاني وګړو لپاره قضیه ثبت کړه، چې د افغان کډوالو له مرستو برخمنېدو لپاره یې د «پي او ار» او «اېسيسي» کارتونه جوړ کړي وو او اوس له پاکستان نه د اېستلو له ګواښ سره مخ دي.
د بلوچستان د کویټې ځایي چارواکو او پولیسو په دغه ښار کې د مېشتو افغان کډوالو پر وړاندې د نيولو عملیاتو پرمهال له شلو زیات د هغه کورونو مالکان نیولي، چې افغان کډوالو ته یې کورونه او هټۍ په کرایه ورکړې وې.
په هرات کې د طالبانو رسنیر دفتر خبر ورکړی، چې د ترکیې سفير ساډين ای یلدیز د یادې ډلې له والي اسلامجار سره په لیدنه کې د دواړو هېوادونو ترمنځ د اقتصادي، سوداګریزو او بنسټیزو همکاریو په اړه خبرې کړې. طالبانو ویلي، ترکیه هڅه کوي په دغه ولایت کې اقتصادي پروژې پراخې کړي.
د کډوالۍ نړۍوال سازمان وایي، چې په ټول افغانستان کې یې تر ۲۳۰۰ ډېرو سېلاب ځپلو کورنیو سره بېړنۍ مرسته کړې ده. د یاد سازمان په وینا؛ یوازې د افغانستان په سوېل کې یې له ۶۵۰ کورنیو سره مرسته کړې ده.
د سویلي وزیرستان واڼه_اعظم ورسک لویه لار چې د پاکستان امنیتي ځواکونو لهخوا له اوږدې مودې راهیسې تړل شوې، ځایي خلکو او سوداګرو یې په غبرګون کې لاریون کړی. لاریون کوونکي وایي، د یادې لویې لارې د تړل کېدو له امله د سوداګرو او ځايي خلکو ورځنی ژوند او اقتصادي فعالیتونه اغېزمن شوي.
د طالبانو تر کنټرول لاندې د کډوالو ستونزو ته د رسېدنې عالي کمېسیون خبر ورکړی، په تېرو شپږو ورځو کې له پاکستان او ایران نه ۴زره او ۸۳۵کډوالې کورنۍ چې ټولټال ۲۶زره او ۹۶۲ کسان کېږي؛ افغانستان ته ستانه شوي دي.
پاکستاني چارواکي وايي، چې له پېښور او نورو سیمو څخه د افغان کډوالو د بېرته ستنېدو بهير چټک شوی. د دوی په وینا؛ په پېښور کې د افغان کډوالو پر وړاندې عملیات پیل شوي او په تېرو ۷ ورځو کې له ۱۵زره زیات افغانان د تورخم له لارې افغانستان ته ستانه شوي دي.
پولیسو یو وار بیا د تحریک انصاف ګوند بنسټګر او د پاکستان پخواني لومړي وزیر عمران خان خویندو ته په اډیاله زندان کې له هغه سره د لیدو اجازه ورنهکړه. سره له دې چې د سېشنبې په ورځ د عمران خان خویندې وتوانیدې د زندان تر دراوزې ځانونه ورسوي؛ خو پولیسو د هغه د لیدو اجازه ورنهکړه.
د پاکستان لومړی وزیر شهباز شریف نن د چهارشنبې په ورځ په یو ورځني سفر سعودي عربستان ته ځي. د راپورونو له مخې؛ شهباز شریف به د دغه سفر په لړ کې په منځني ختیځ کې د روان کړکېچ په اړه د سعودي عربستان له وليعهد محمد بن سلمان سره خبرې وکړي.
د افغانستان د کرېکټ ملي لوبډلې سوکه توپ اچونکی نور احمد لکڼوال د ۲۰۲۶کال د هند غوره لیګ سیالیو کې د چینای سوپر کېنګز او کلکته نایټ رایډرز ترمنځ په لوبه کې خورا ښه وځلېده. هغه په څلورو اورونو کې یوازې ۲۱ منډې ورکړې او درې لوبغاړي یې وسوځول.
د مدني او بشري حقونو یوشمېر افغان فعالانو د امریکا له لومړۍ مېرمنې مېلانیا ټرمپ څخه په یوه پرانیستي لیک کې په افغانستان کې د ښځو او ماشومانو وضعیت ته د پاملرنې غوښتنه کړې ده.
د بلخ د سوداګرۍ او پانګونې خونې مرستیال هارون رشید ویلي، په تېر ۱۴۰۴کال کې په دغه ولایت کې د ٨٠٠ مېلیون ډالرو په ارزښت پانګونه شوې ده. د هغه په وینا؛ دغه پانګونې تر ډېره په صنعتي، ودانیزو، خدماتي او سوداګریزو برخو کې شوې، چې ورسره زرګونه کسانو ته د کار زمینه هم برابره شوې ده.
په فاریاب کې د طالبانو د کرنې، اوبو لګولو او مالدارۍ رییس جان مرداد وقار خبر ورکړی، چې په دغه ولایت کې د نږدې ۴۰ مېلیونه افغانیو په لګښت د مېوو او سبزیجاتو د ساتنې لپاره د ۱۰۰ ټنو په ظرفیت د یوې سړې خونې پروژه بشپړه او ګټې اخیستنې ته وسپارل شوه.
د خیبر پښتونخوا ایالتي حکومت د واده لپاره نوي مقررات ټاکلي دي، چې له مخې به یې دولتي کارکوونکي له دې وروسته له بهرنیو وګړو سره د واده کولو لپاره له حکومت څخه رسمي اجازه ترلاسه کوي.