په غربي اسیا کې روانه جګړه د نړۍ د امنیت او اقتصادي ثبات لپاره خورا ستر اهمیت لري، ځکه د خواوشا یوې نیمې میاشتې راهیسې د نړۍ او د سیمې د میډیا ټول پام د دغې جګړې پر څرنګوالي او د هغې د مخنیوي په موخه پر روانو دیپلوماتیکو فعالیتونو متمرکز دی.
یو شمېر افغان ښوونکو افغانستان انټرنشنل-پښتو ته ویلي چې درې میاشتې کیږي طالبانو معاشونه نه دي ورکړي. دوی وایي، د معاشونو ځنډېدو یې ژوند له سختو اقتصادي ستونزو سره مخ کړی او د خپلو کورنیو د لومړنیو اړتیاوو د برابرولو توان یې له لاسه ورکړی.
د طالبانو د پکتیا رسنیز دفتر وايي، چې د پکتیا، خوست ، پکتيکا، لوګر او غزني ولايتونو واليانو او د امنيې قوماندانانو، د ۲۰۳ منصوري قول اردو ریيس ارکان، نظامي محکمې او د استخباراتو رییسانو د سوېل ختیزو ولایتونو د امنیتي وضعیت د خوندیتوب په موخه ناسته کړې ده.
د بيبيسي د یوه څېړنیز راپور له مخې، په یونان کې د ترکیې له پولې سره نږدې سیمو کې یو شمېر افغان کډوال له تاوتریخوالي سره مخ شوي. په راپور کې راغلي چې یوناني امنیتي ځواکونه له ځینو ناقانونه ډلو سره، چې پخپله کډوال دي، همکاري کوي څو نور کډوال په زور بېرته ترکیې ته واړوي.
د طالبانو د غزني ولایت د اطلاعاتو او فرهنګ ریاست وایي چې د وروستیو سختو ورښتونو له امله د دغه ولایت د بالاحصار شاوخوا ۳۰ متره ساتونکی دېوال ویجاړ شوی دی.
د طالبانو د بهرنیو چارو وزارت د ستراتیژیکو مطالعاتو مرکز وايي، چې په تاشکند کې د مرکزي اسیا لپاره نړیوال انسټیټویټ د مرکزي اسیا او افغانستان ترمنځ ناسته د دوه اړخیزو او څو اړخیزو همکاریو په اړه جوړه شوې او د یاد انسټیټویټ رییس عبدالحي قانت پکې ګډون کړی و.
په پاکستان کې مېشتو افغان ښځینه فعالانو په دغه هېواد کې د نیول شویو افغان خبریالانو د ژر تر ژره خوشې کېدو غوښتنه کړې او ټینګار یې کړی چې ژورنالېزم جرم نه دی.
د طالبانو د کرنې، اوبو لګولو او مالدارۍ وزارت د کرنې او مالدارۍ مرستیال مولوي صدرعظم عثماني په مشرۍ یوه پلاوي د روسیې له ویسوټسک سوداګریز بندر څخه لیدنه کړې ده.
د طالبانو د هرات والي رسنیز دفتر اعلان وکړ، چې د افغانستان او ازبکستان سوداګرو د ۵۱۰ میلیون ډالرو په ارزښت ۱۴ سوداګریزو هوکړه لیکونه لاسلیک کړل. د یاد دفتر په وینا، دواړو خواوو د دغو هوکړه لیکونو لاسلیکول د افغانستان او ازبکستان ترمنځ د اقتصادي همکاریو د نوي فصل پیل وباله.
د طالبانو د معیار او کیفیت ادارې خبر ورکړی، چې د فراه ولایت د شیخ ابو نصر فراهي بندر له لارې پنځه جوپې بېکیفیته کاشۍ بېرته صادروونکي هېواد ته ګرځول شوې دي.
د ایټالیا حکومت پرېکړه کړې چې له اسراییل سره د دفاعي همکارۍ د تړون تمدید کېدل وځنډوي. لومړۍ وزیرې جورجیا میلوني ویلي دي، چې دا پرېکړه یې د منځني ختیځ د روانو جګړو له امله کړې ده.
د افغانستان پخواني ولسمشر حامد کرزي د هېواد د کرېکټ ملي لوبډلې وتلي ستوري راشد خان ته د کرکټ د نړیوالې ټولنې(ډبلېو سياې) په مشورتي بورډ کې د غړیتوب مبارکي ورکړې ده.
په هرات کې په سلګونو خلکو د شیعه ګانو پر برید لاریون وکړ، د مذهبي او تعلیمي مرکزونو د امنیت، د مذهبونو د پیروانو ازادي او د افراطي او تکفیري افکارو پر وړاندې د مبارزې غوښتنه وکړه. لاریون کوونکو له طالبانو وغوښتل چې د هرات برید د څېړلو او د عاملینو د پېژندلو لپاره پلاوی ولېږي.
د کونړ ولایت په مرکز اسعداباد کې طالبانو د ۹۸ میلیونه افغانیو په ارزښت ۱۶۰۰ کیلوګرامه قیمتي او نیمه قیمتي ډبرې د سوداګرو په حضور کې پلورلې دي.
د نورستان او د کونړ ناړۍ ځینو قومي مشرانو افغانستان انټرنشنل ته وویل چې د چترال له قومي مشرانو سره په هوکړه کې طالبانو رول نه درلود او دا هوکړه هم په چترال کې شوې. یاد مشران وايي، پاکستاني پوځیانو د نورستان قومي مشرانو ته ویلي چې په خپلو سیمو کې به ټي ټي پي نه پرېږدي.
تاجکستان له افغانستان سره پر پوله د ختلان ولایت په همداني سیمه کې د زاړه اغزن تار پرځای د نویو خنډونو جوړولو چارې پیل کړې دي. دغه خنډونه په درواز او نورو سیمو کې هم پیل شوی.
هند د افغانستان د ماشومانو د معافیت پروګرام د پیاوړتیا په موخه ۱۳ ټنه د نري رنځ (توبرکلوز) ضد BCG واکسینونه او اړوند وچ توکي د طالبانو د عامې روغتیا وزارت ته سپارلي دي.
۱۸۰ افغانې کورنۍ د جرمني د فدرالي حکومت له خوا د ورکړل شویو ژمنلیکونو د لغوه کېدو پر ضد حقوقي مبارزه کوي. د «کابل هوايي پل» سازمان په وینا، ۱۸ نورې قضیې د اساسي قانون محکمې ته د شکایتونو په توګه چمتو کېږي. دغه راز لا هم ۸۷۵ افغانان په پاکستان کې جرمني ته د تګ په تمه دي.
د طالبانو ویاند ذبیح الله مجاهد د ملګرو ملتونو د امنیت شورا له خوا د دې ډلې پر چارواکو د بندیزونو تازه کول «غیر معقول او بې اغیزې» وبلل او ویې ویل چې بندیزونه «ښکاره ظلم» او د افغانانو د حقونو ضایع کول دي.
د کډوالۍ نړیوال (ریفیوجيز انټرنشنل) بنسټ ویلي چې پاکستان د ۲۰۲۶ کال له پیل راهیسې تر دې دمه له ۱۴۶ زرو ډېر افغانان په جبري توګه ایستلي دي. دغه بنسټ پر اسلام اباد غږ کړی، چې دغه بهیر سملاسي ودروي.
په پولنډ کې شاوخوا ۱۲۰ تنه افغان پناه غوښتونکي د توقیف په مرکزونو کې ساتل کیږي او اټکل دی، چې افغانستان ته اخراج شي. پولنډي چارواکو تېره جمعه د ازبکستان له لارې ۹ تنه افغان پناه غوښتونکي کابل ته استولي دي.