په ننګرهار کې د طالبانو د امنیه قومندانۍ د نشهيي توکو پر وړاندې د مبارزې مديريت په جلالاباد ښار کې د نجونو ماشومانو په ګډون د۹۱ سوالګرو له راټولولو خبر ورکړ. دوی وايي، دغه ماشومان یې تر بایومتریک وروسته مرستندویه ادارو ته معرفي کړي دي.
د سپینې ماڼۍ ویاندې کارولین لیویټ د پنجشنبې په ورځ ویلي، چې دوی د اسراییل لپار د امریکا د سفیر مایک هېکا بي او جاناتن پولارډ ترمنځ د لیدنې په اړه خبر نهو. جاناتن پولارډ د سمندري ځواکونو پخوانی تحلیلګر دی چې نږدې درې لسیزې یې اسراییل ته د جاسوسۍ په تور په زندان کې تېر کړي.
د ایران ولسمشر مسعود پزشکیان وايي، د حجاب او عفت موضوع باید د شخړې او لانجې وسیله ونه ګرځي، بلکې باید د احترام او کرامت پر بنسټ او همداراز د خبرو له لارې هواره شي. د نوموړي په وینا، هېڅ ډول زور یا تحمیل د انسان د باطني درک او باور ځای نهشي نیولی.
د ملګرو ملتونو سرمنشي انتونیو ګوترېش د دغه سازمان د اقلیمي بدلون دېرشمې غونډې ته په خبرو کې، د اقلیمي ناورین په تړاو خبر داری ورکړ. هغه پر ټولو هیوادونو غږ وکړ، چې د ګلخانهيي ګاز د کمولو لپاره لاس په کار شي او په دې غونډه کې د متوازن او زړور تړون لپاره کار وکړي.
د طالبانو د سترې محکمې رييس عبدالحکیم حقاني د کابل مرافعه او ښاري ابتداییه محکمو له مسوولینو سره په لیدنه کې د عدالت پر عملي کېدو ټينګار وکړ. هغه زیاته کړې: «د نظام بقا او قیام په عدالت سره راځي، ظلم او بې عدالتي لوی نظامونه سقوط او ړنګ کړي دي.»
د طالبانو د عامې روغتیا وزارت د روغتیایي خدمتونو د وړاندې کولو مرستیال عبدالولي حقاني وايي، ټولې همکارې او تطبیق کوونکې موسسې باید خپل فعالیتونه د روغتیا ملي پالیسۍ مطابق ترسره کړي، څو د خدماتو کیفیت لوړ، خوندي او اغېزناک شي.
د طالبانو د سوداګرۍ وزیر هند ته د خپل سفر په ترڅ کې د کوربه هېواد د سوداګرۍ په چارو کې د دولت له وزیر سره لیدلي دي.طالبانو ویلي، دواړو لورو د اقتصادي او سوداګریزو همکاریو د پراختیا، د پانګونې د جلبولو او د سوداګرۍ د ودې لپاره د نویو فرصتونو د رامنځته کولو پر اړتیا خبرې کړې دي.
د طالبانو د لوړو زده کړو وزیر ندا محمد ندیم فاریاب پوهنتون کې په یوې غونډه کې له زدهکړیالانو غوښتي، چې وخت دې بېځایه نه ضایع کوي او ځانونه دې په سانیس او ټکنالوژۍ سمبال کړي. دا په داسې حال کې ده، چې محمد خالد حنفي بیا عصري زدهکړې مباح ګڼي.
د پاکستان د پنجاب ایالت د راولپنډۍ پولیسو ټولو مېشتو ویزه لرونکو او بې ویزې افغانانو ته ۱۰ ورځې وخت ورکړی، چې له دغه ایالت څخه ووځي. افغانستان انټرنشنل- پښتو ته د راولپنډۍ پولیسو په رارسېدلو غږونو کې د کورونو له مالکانو هم غوښتل شوي، چې افغانان له خپلو کورونو وباسي.
د افغانستان برېښنا شرکت اعلان کړی، چې د ازبکستان وارداتي ۲۲۰ کېلوولټ برېښنا لېږد مزي د اساسي رغونې له امله به سبا (جمعه د لړم ۳۰مه) د سهار له ۶ بجو د ماښام تر شاوخوا ۵ بجو د هېواد په ګڼو ولایتونو کې وارداتي برېښنا پرچاو وي.
د بشري حقونو څار بنسټ په یوه مطلب کې ویلي چې په هرات کې د طالبانو له لوري پر ښځو د چادري جبري کول د ښځو پر خپلواکۍ ښکاره تېری دی او د هغوی د کار، روغتیايي خدمتونو او بنسټیزو حقونو مخه نیسي.
ډنمارک د ملګرو ملتونو د امنیت شورا په غونډه کې په افغانستان او سیمه کې د داعـ.ـش خراسان، نورو وسله والو ډلو او د پاکستاني طالبانو تحریک (ټي ټي پي) د حضور په اړه اندېښنه څرګنده کړې ده.
د فاریاب ولایت د پښتونکوټ ولسوالۍ ۱۹ کلن ځوان ظفربېګ د ایران په کرمان ښار کې د قاچاق وړونکي د موټر په ډګۍ کې د ساه بندېدو له امله مړ شوی. د ظفربېګ کورنۍ افغانستان انټرنشنل ته ویلي چې هغه د بېکارۍ او اقتصادي ستونزو له امله ایران ته تللی و.
د بریتانیا صدراعظم کیر سټارمر د ٢٠٢٦ کال د جنورۍ په پای کې چین ته سفر کوي. د سکای نیوز د راپور له مخې، دا به په تیرو اوو کلونو کې بیجنګ ته د یوه بریټانیايي مشر لومړی سفر وي.
د تېر جمهوري نظام پر مهال د ولسمشر لومړي مرستیال امرالله صالح د طالبانو د پرځولو لپاره پر مبارزه ټینګار کړی او وايي، دغه مبارزه باید انحصاري نه شي. نوموړي ویلي، چې تر هڅه مخکې باید د طالبانو له منځه وړلو ته لومړیتوب ورکړل شي.
طالبان چې په ۲۰۲۱ کال کې یو ځل بیا د ترهګرۍ او تبلیغاتو له لارې واک ته ورسېدل، له لومړۍ ورځې د مشروعیت نشتوالي او عامه کرکې سره مخ شول. خو له پاکستان سره کړکېچ دوی ته استثنایي فرصت په ګوتو ورکړ چې د عامه کرکې فشار کم او ځانونه ددې خاورې د ساتونکو په توګه وړاندې کړي.
د دمشق حکومت د سوریې جنوبي سیمو ته، چې اسراییلي پوځیان پکې میشت دي، د اسراییل د لومړي وزیر بینیامین نتنیاهو پر سفر سخت غبرګون ښودلی او دغه سفر یې د سوریې د حاکمیت نقض بللی دی.
په روسیه کې د طالبانو سفیر ګل حسن حسن تاتارستان ته د خپل سفر پرمهال د یاد جهوریت له ولسمشر سره کتلي او دواړو لوریو د سیاسي اقتصادي، سوداګریزو او امنیتي همکاریو د پراخېدو په اړه خبرې کړې دي.
د طالبانو د صنعت او سوداګرۍ وزارت ویلي، چې نورالدین عزیزي د هند د بهرنیو چارو وزیر جی شنکر سره په لېدنه کې د چابهار بندر د فعالیت پر زیاتوالي، د سوداګریزو اتشو معرفي کولو او د ویزو په برخه کې د اسانتیاوو په اړه خبرې کړې دي.
د امریکا د بهرنیو چارو وزارت پر هند د ټانک ضد جیولین توغندیو سیسټم او اېکس کالېبر هدفي توپچي مرمۍ د پلورلو نوې هوکړه تایید کړې چې ټول ارزښت یې ۹۳میلیونه ډالره اټکل شوی دی.
په کندهار کې یوه خصوصي شرکت د ۵۰ میلیونه افغانیو په ارزښت د انارو د پروسیس کارخونه پرانېسته. د یادې کارخونې مسوولان وايي، چې په دې کارخونه کې به د انارو له دانې څخه جوس او مربا جوړیږي.