په فراه کې د طالبانو تر واک لاندې له پېښو سره د مبارزې او چمتووالي ریاست خبر ورکړی، چې د سختو بارانونو او سېلابونو له امله د یاد ولایت په یوشمېر ولسوالیو کې ۱۱۳ کورونه په بشپړه توګه او ۲۹۲ کورونه برسېرن ویجاړ شوي دي.
په ننګرهار کې د طالبانو رسنیز دفتر خبر ورکړی، چې وروستیو ورښتونو د دغه ولایت په بېلابیلو سېمو کې ۳ کسان مړه او ۶ نور ټپیان کړي دي. د دوی په خبره؛ سېلابونو ۵۳۴ کرنیزه ځمکه لهمنځه وړې او ۴۰۰ جریبه نوره ځمکه له ګواښ سره مخ ده.
په غزني کې د طالبانو امنیې قوماندانۍ خبر ورکړی، چې نن جمعه (د وري ۱۴مه) د کابل – کندهار پر لویه لار د قرهباغ ولسوالۍ اړوند د ۵۸۰ ډوله مساپر وړونکي بس چپه کېدو پېښه کې دوه کسان مړه او ۱۳ نور ټپیان شوي دي.
په جلاوطنۍ کې د افغانانو عالي شورا په یوه اعلامیه کې پر نړۍوالو مرستندویه ادارو، د بشري حقونو پر بنسټونو او د کډوالو چارو پر سازمانونو نیوکه کړې، چې له افغان کډوالو سره د پاکستان د ظلم په اړه چوپ دي. یادې شورا ویلي، په پاکستان کې افغان کډوال له سپکاوي او ناوړه چلند سره مخ دي.
په قطر کې د طالبانو سفیر سهیل شاهین وايي، د طالبانو اداره غواړي چې روسیه په کابل کې پر یوه «روغتیايي مرکز» د پاکستان د برید په اړه څېړنه وکړي. هغه ویلي: «روسیه کولای شي د یادې پېښې د څېړنې او قربانیانو سره د مرستې لپاره یوه ډله واستوي».
په ننګرهار کې د طالبانو د کرنې، اوبو لګولو او مالدارۍ رياست وايي، د دغه ولايت د بېلابېلو سيمو بزګرانو ته يې د کوکنارو بديل برخه کې ۶۳۲ جريبه د ستروسو او ګیلاسو بڼونه جوړ کړي دي. د یاد ریاست په وینا؛ په دغه ولایت کې له هغو ۱۳۵ کورنیو سره نورې مرستې هم شوې، چې وړاندې یې کوکنار کرل.
د طالبانو د ټولګټو چارو وزارت ویاند محمداشرف حق شناس وايي، چې د جمعې ورځې د سهار په شاوخوا اتو بجو د سختو بارانونو، سېلابونو او ځمکې ښویېدو له امله د کابل- جلالاباد لاره د تګراتګ لپاره تړل شوې. هغه زیاتوي، چې عملیاتي ډلې د لارې پرانیستلو هڅه کوي.
د جمعیت علمای اسلام پاکستان «شېراني» ډلې مشر او پخواني سناتور مولانا محمدخان شېراني یوې غونډې ته د وینا پرمهال ویلي، د اسلاماباد او طالبانو ترمنځ روانې کشالې کې که د پاکستان موخه دا وي چې پر افغانستان اوسنی واکمن حکومت تر خپل واک لاندې راولي؛ نو دا یوه نامناسبه کړنه ده.
کندهار کې د طالبانو د کرنې، اوبو لګولو او مالدارۍ ریاست ویاند محمدحنیف حقمل ویلي، چې په دغه ولایت کې وروستیو ورښتونو د نورو زیانونو ترڅنګ کروندګرو، باغ لرونکو او مالدارانو ته هم زیان اړولی. هغه وایي، ورښتونو د دغه ولایت په بېلابیلو ولسوالیو کې ۳۳جریبه کرنیزه ځمکه ویجاړه کړې ده.
د فرانسې ولسمشر امانوېل مکرون د ډونالډ ټرمپ هغه څرګندونو ته غبرګون وښود چې ویلي یې و، د مکرون مېرمن له هغه سره «ناوړه چلند» کوي. ټرمپ وړاندې ویلي و، چې د مکرون «په مخ څپېړه» لا نهده روغه شوې. ښاغلي مکرون د پنجشنبې په ورځ وویل، چې د ټرمپ څرګندونې «مودبانه نه وې».
د بلوچستان ایالت په مرکزي ښار کې په بېلابېلو پېښو کې څلور کسان وژل شوي او درې نور ټپيان دي. د ځایي پولیسو په وینا؛ په لومړۍ پېښه کې د کوېټې سول لاینز د پولیسو حوزې په سیمه کې یو مړی موندل شوی، چې ورسره پر یوې پرتې پاڼې تحریک طالبان پاکستان لیکل شوي.
د پاکستان د سند ایالت په کراچۍ ښار او د بلوچستان ایالت په کویټې ښار کې د سختو ورښتونو له امله ۱۳ کسان مړه او اووه نور ټپیان شوي دي. د پاکستان د ناورینونو مدیریت ادارې ویلي، چې د یادو ورښتونو له امله په بلوچستان کې بیا ۱۲۰ کورونه په بشپړه توګه ویجاړ شوي دي.
د ملګرو ملتونو د بشري حقونو دفتر او د یاد سازمان د ښځو څانګې په افغانستان کې واک ته د طالبانو له رسېدو راهیسې د ښځو او نجونو پر وړاندې د یادې ډلې تګلاره ارزولې ده. د ارزونې پایلې ښيي، چې دغه اقدامات د ښځو پر وړاندې د هر ډول تبعیض د لهمنځه وړلو کنوانسیون سره په ټکر کې دي.
په هلمند کې د طالبانو د اطلاعاتو او کلتور رییس عبدالباري راشد خبر ورکړی، چې د دغه ولایت په یوشمېر ولسوالیو کې د وروستیو ورښتونو او سېلابونو له امله خلکو ته درانه مالي او ځاني زیانونه اوښتي دي. د هغه په وینا؛ د دغه سېلابونو له امله یو ماشوم مړ او یو بل کس ټپي شوی دی.
په سویډن کې مېشت د «اېماېماې» افغان لوبغاړی سخي قنبري د برازیلي لوبغاړي ګبریل پاسکالوټي سره د لوبې لپاره چمتو دی. دغه لوبه به نن جمعه (د وري ۱۴مه) د فرانسې په ارکیا ارینا لوبغالي کې د «ار اېس سي» سازمان سیالیو د ۳۹م پړاو د یوې برخې په توګه ترسره شي.
د پاکستان د بشري حقونو شورا د پاکستان د حکومت له لوري د پټرول او ډیزل په بیو کې د وروستي زیاتوالي په اړه شدیده اندېښنه او «اصولي اعتراض» څرګند کړی دی. دغې شورا د پاکستان له حکومت څخه غوښتي چې پر خپلې کړې پرېکړې بیا کتنه وکړي، ګنې اقتصادي بېثباتي به رامنځته شي.
د امریکا د جګړې وزارت ویلي، جنرال رېنډياې جورج به ډېر ژر د پوځ له لوی درستیزۍ ګوښه او ورسره سم به تقاعدۍ ته سوق شي. له دغه اعلان څخه څو ساعته مخکې د امریکا ولسمشر د دغه هېواد لویه څارنواله پامبانډي هم له دندې ګوښه کړه.
د افغانستان د بشر حقوقو مرکز تازه راپور ښيي چې طالبانو د خلکو په بنسټیزو حقوقو او ازاديو پراخ او سیسټماټیک بریدونه کړي، په ځانګړي ډول د ښځو او ماشومانو حقونه. راپور زیاتوي چې د شکنجې، سزاوو، ناامنیو، اقتصادي بحران او ښوونې او روزنې کمښت په ګډون وضعیت په ټول هېواد کې بحراني شوی.
د خیبر پښتونخوا د بنو ولسوالۍ اړوند د پولیسو یوه مرکز ته نږدې په يوې چاودنه کې لږ تر لږه پنځه کسان وژل شوي او د څلورو پولیسو په ګډون ۱۳ نور ټپیان دي. د سرچینو په وینا، په وژل شویو کسانو کې یوه ۴ کسیزه کورنۍ هم شامله ده.
د ایټالیا د بهرنیو چارو وزارت ویلي، چې د شیلي کیټلسن د تښتولو قضیه د عراقي چارواکو په همکارۍ او په بغداد کې د خپل سفارت له لارې تعقیبوي. دغه خبریاله دوه ورځې مخکې د عراق له پلازمېنې بغداد ښار څخه د ناپېژندو کسانو له لوري تښتول شوې ده.
د طالبانو د کورنیو چارو وزارت په دوو جلا خبرپاڼو کې ویلي، چې د دوی ځواکونو په هرات کې او غور ولایتونو کې د نشهيي توکو د کاروبار په تړاو ۱۲ کسان نیولي دي. خبرپاڼه کې راغلي، غور کې د نشهيي توکو د تولید دوه کارخونې هم کشف او وسایل یې ورته سوځولي دي.