مشال راډیو پر خپله وېپاڼه لیکلي، چې د سختو مالي شرایطو او وضعیت له امله د ۲۰۲۶ز کال د مارچ له ۳۱مې څخه خپلې راډیويي خپرونې، ویبپاڼه، د ټولنیزو شبکو پاڼې او وټساپ تړي. دې راډيو ۱۶ کاله مخکې فعالیت پیل کړی و او د ډیورنډ کرښې په دواړو خواو کې یې خپرونې اورېدل کېدې.
د طالبانو د اوبو او انرژۍ وزارت د اوبو معین مجیب الرحمن عمر اخوندزاده په کابل کې د قزاقستان له سفیر ګازیز اکباسوف سره په لیدنه کې د اوبو او انرژۍ په برخه کې د ګډو پروژو او همکاریو په تړاو خبرې کړې دي.
د طالبانو او پاکستان ترمنځ د شخړو د پای ته رسولو لپاره په پېښور کې د امن په نامه جرګې د یوې اعلامیې په خپرولو سره له دواړو خواوو د درې میاشتني اوربند او د خبرو اترو د پیل کولو غوښتنه کړې ده. په اعلامیه کې د کډوالو او سوداګرۍ پرمخ د لارو خلاصون غوښتنه هم شوې ده.
د طالبانو د نورستان والي زین العابدین عابد وايي، چې ددغه ولایت د دوو ولسوالیو کامدېش او برګمټال د اصلي لارو پرځای پر بدیلو لارو کار روان دی. له دې وړاندې افغانستان انټرنشنل راپور ورکړی و، چې د کامدېش او برګمټال لارې پر موټرو د پاکستاني ځواکونو د ډزو له امله تړل شوې دي.
د طالبانو د عامې روغتیا وزیر مولوي نور جلال جلالي په کابل کې د چین له سفیر سره په لیدنه کې غوښتنه کړې، چې بیجنګ د افغانستان د روغتیايي سیسټم د پیاوړتیا او روغتیايي کارکوونکو په ظرفیت جوړونه او د روغتونو په تجهیزولو کې مرسته وکړي.
پر ایران د امریکا او اسراییل د هوايي او توغندیزو بریدونو له پیل څخه نږدې یوه میاشت تېره شوې ده او جګړه ورځ تر بلې سیمه ییز او نړیوال ابعاد خپلوي. سعودي عربستان چې د ایران تر بریدونو لاندې دی، له پاکستان سره دفاعي تړون لري، خو تر اوسه پاکستان د سعودي دفاع ته زړه نه دی ښه کړی.
د هلمند د مرکز لښکرګاه ځینو اوسېدونکو افغانستان انټرنشنل ته وویل، چې د طالبانو د امربالمعروف او نهی عن المنکر محتسبان په ښار کې ښځې او ځوان د حجاب او ږیرې د څرنګتیا له امله دروي او ناسم چلند ورسره کوي. په یوه ویډیو کې ښکاري چې د طالبانو محتسبانو په ښار کې مېرمنې او ځوانان درولي.
د ښوونیزو چارو فعال او د ننګرهار د پوهنې پخوانی رییس حسیب شینواری د نوي ښوونیز کال د پیل په اړه وايي چې افغانان د پاکستان د جګړې په اړه جدي غبرګون ښيي خو د نجونو د ښوونځیو په اړه د حیرانتیا په کچه بې تفاوته دي.
د امریکا ولسمشر ډونالډ ټرمپ د سې شنبې په ورځ په خپلو تازه څرګندونو کې هغو هېوادونو ته سخت خبرداری ورکړ چې د ایران پر وړاندې له امریکا سره ولاړ نه دي او اوس د تېلو له کمي سره مخ دي.
د طالبانو د کډوالو او راستنېدونکو چارو وزارت وایي، چې ددغه وزارت وزیر عبدالکبیر د بشري مرستو د همغږۍ په برخه کې د یوناما له مرستیال اندریکا راتویته سره د هغه د ماموریت د پای په تړاو کتلي او نوموړي ویلي، چې د پاکستان په بریدونو کې د کډوالو نړیوال سازمان تاسیسات هم زیانمن شوي.
د طالبانو د صنعت او سوداګرۍ وزارت وایي، په ۲۰۲۵ کال کې د افغانستان او روسیې ترمنځ د سوداګرۍ کچه ۵۳۸ میلیونه ډالرو ته رسېدلې ده.
پاکستاني چارواکو ویلي، چې طالبانو د کورمې او پکتیا ترمنځ پر ډیورنډ کرښه ۱۷ متره اغزن تار پرې کړی دی. پاکستاني چارواکو ویلي، چې دغه تار په یوه ځنګلي سیمه کې له منځه وړل شوی، خو وايي، دوی کټاره بېرته رغولې ده. طالبانو د اغزن تار د غوڅولو یو لړ ویډیوګانې خپرې کړې دي.
د طالبانو د هرات والي ویاند وايي، چې په لومړي ځل د هرات پاشدان بند اوبه د کرنیزو ځمکو خړوبولو په موخه خوشې شوې دي. د پاشدان بند د ۵۴میلیونه متر مکعب اوبو ذخیره کولو ترڅنګ د ۲میګاواټه برېښنا تولید او ۱۳زره هکټاره کرنیزې ځمکې د خړوبولو ظرفیت لري.
د طالبانو د پېښو پر وړاندې د مبارزې ادارې ویلي چې په تېرو ۲۴ ساعتونو کې د هېواد په بېلابېلو سیمو کې د سختو بارانونو، سیلابونو، د غرونو ښوېېدنې او تالندې برېښنا له امله ۱۴ تنه مړه شوي او ۱۷ نور ټپیان دي.
پاکستاني چارواکو ویلي چې د تورخم لارې د بیا خلاصېدو سره هم مهاله یې په لومړي پړاو کې ۱۱ بندیان د قانوني پروسې وروسته طالبانو ته سپارلي. د چارواکو په خبره چې ۱۵۷ نور زندانیان یې لنډي کوتل مرکز ته د قانوني بهیر د بشپړېدو لپاره انتقال کړي دي.
د طالبانو د امر بالمعروف وزارت وایي، منسوبینو یې په تخار، غور، زابل او غزني ولایتونو کې د کورنیو تاوتریخوالي له بېلابېلو پېښو څخه لس ښځې ژغورلي او د هغوی شرعي حقوق یې تامین کړي دي.
جرمني، فرانسه، ایټالیا او انګلستان د اسراییل پارلمان د اعدام د قانون د پلي کېدو په اړه ژوره اندیښنه څرګنده کړې او په ګډه یې خبرداری ورکړی چې دا قانون به د انساني حقونو او د اسراییل د جمهوري اصولو لپاره جدي خطرونه رامنځته کړي.
د طالبانو کورنیو چارو وزارت وایي، امنیتي ځواکونو یې په پنځو ولایتونو کې د نشهیي توکو د قاچاق او پلور پر ضد جلا جلا عملیات ترسره کړي چې په پایله کې یې ۱۸ کسان نیول شوي دي.
د فبروري له۲۷مې نه د مارچ تر ۱۵مې طالبانو په خیبر پښتونخوا او د پاکستان په مختلفو سیمو کې د ډرون الوتکو د ۱۵ بریدونو خبر ورکړی، چې تر ټولو غبرګون پاروونکی هغه یې په فیض اباد کې پر «حمزه کمپ» برید یادیږي.
د طالبانو د کورنیو چارو وزارت وایي، چې امنیتي ځواکونو یې په هرات، کندوز، فراه، بلخ او سمنګان ولایتونو کې د جلا جلا عملیاتو پر مهال ۲۰ تنه د وسایطو، موبایلونو او مالونو د غلا په تړاو نیولي دي.
د خوست د طالبانو د والي ویاند مستغفر ګربز وايي چې سرې میاشتې ډیورنډ کرښې ته څېرمه د درېیو ولسوالیو پر شاوخوا ۳زره داخلي بې ځایه شویو کورنیو ۴۵ مېلیونه افغانۍ نغدي مرسته وېشلې. نوموړي ویلي چې دغه مرسته د ځاځي میدان، علیشیرو- ترویز او ګربز ولسوالیو پر خلکو وېشل شوې ده.