د طالبانو د صنعت او سوداګرۍ وزیر نورالدین عزیزي وايي، چې د افغان سوداګرو ۱۲زره کانټینره توکي په پاکستان کې بند پاتې دي او طالبان یې افغانستان ته د انتقالولو هڅه کوي.
د پاکستان د پارلمان پخوانی رییس او د تحریک انصاف ګوند جګپوړی غړی اسد قیصر وايي، د خیبر پښتونخوا اقتصادي اړیکې له افغانستان سره تړلې او د پاکستان حکومت او افغانستان باید ستونزې له ډیپلوماتیکو لارې اوارې کړي.
د خیبر پښتونخوا اعلی وزیر د پېښور امن جرګه کې وویل، چې دوی تل د سولې خبره کوي، خو پر ځینو خلکو بده لګیږي. نوموړي وویل، چې له افغانستان سره په خبرو کې باید د پښتونخوا خلکو ته ونډه ورکړل شي ځکه د خیبر پښتونخوا، دین ژبه ، کلتور، ارزښتونه هرڅه له افغانستان سره ګډ دي.
د طالبانو د بهرنيو چارو وزارت اعلان کړی چې د ايران په زندانونو کې د افغان بندیانو د ستونزو د حل په موخه، د هغوی د شمېر او کره معلوماتو د راټولولو بهير پيلوي.
د ایران د پوځ لوی قوماندان امیر حاتمي د دغه هېواد شمال ختیزو سرحدي سیمو ته په سفر کې وویل، چې له افغانستان سره پر پوله د دیوال جوړولو هدف د سرحدي ستونزو مخنیوی دی.
د طالبانو د صنعت او سوداګرۍ وزیر نورالدین عزیزي په کابل کې د سوداګرو یوې غونډې ته وویل، چې د لارو له پرانېستلو او بشپړ ضمانت پرته افغانستان له پاکستان سره سوداګري نه کوي. هغه وویل افغانستان ګڼې نورې بدیلې لارې لري.
ترکیې اعلان کړی چې د جورجیا په پولو کې د پرېوتې الوتکې په پېښه کې یې شل سرتېري وژل شوي دي. دغه سي ۱۳۰ بار وړونکې الوتکه له اذربایجان نه ترکیې ته روانه وه چې د کاخېتي ولایت په سیغناګو سیمه کې راولوېده. د پېښې لامل لا نه دی څرګند، خو د ترکیې او جورجیا چارواکو څیړنې پیل کړې دي.
د غزې روغتیا وزارت د سېشنبې په ورځ اعلان وکړ، چې اسراییلي ځواکونو په غزه کې لږترلږه درې فلسطینیان وژلي دي. د راپورونو له مخې؛ د اوربند له ټینګېدو راهیسې د اسراییلي ځواکونو په بریدونو کې لږترلږه ۲۴۵ فلسطینیان وژل شوي دي.
د طالبانو د ریاست الوزرا اقتصادي مرستیال ملاعبدالغني برادر افغان سوداګرو او صنعتکارانو ته ویلي، هغه کسان چې د پاکستان سره قراردادونه لري؛ درې میاشتې وخت لري، چې خپل حسابونه تصفیه کړي. هغه ویلي، د پاکستان د وارداتو د ټیټ کیفیت له امله باید صادرات او واردات له بدیلو لارو ترسره شي.
د طالبانو د کورنیو چارو وزارت مرستیال رحمتالله نجيب وايي، چې د ترکیې په ناسته کې پاکستان غوښتل چې طالبان په دغه هېواد کې روانه جګړه «ناروا» اعلان کړي؛ خو دوی څرګنده کړه، چې د فتوا صادرول یوازې د دارالفتوا مسوولیت دی. نوموړي زیاته کړه، له همدې امله خبرې بېپایلې پای ته ورسېدې.
د ملګرو ملتونو پراختیایي پروګرام وایي، په روان ۲۰۲۵کال کې افغانستان ته تر ۲.۳ مېلیونه ډېر کډوال ستانه شوي دي. دغې ادارې خبرداری ورکړی، چې افغانستان ته د کډوالو بېرته ستنېدو په دغه هېواد کې بشري ناورین لا پراخ کړی.
د طالبانو تر کنټرول لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ له ایران او پاکستان نه ۱۴۹۲ کورنۍ چې ټولټال ۹۳۹۱ کسان کېږي؛ له ایران او پاکستان نه افغانستان ته ستنې شوې دي.
په بغلان ولایت کې د طالبانو تر کنټرول لاندې د بدني روزنې او سپورټ مسوول محمد امیر امیري خبر ورکړی، چې د دغه ولایت په نهرین ولسوالۍ کې د ۹۰ چاپندازانو ترمنځ د وزلوبې سیالۍ ترسره شوې.
د طالبانو د اوبو او انرژۍ وزارت یو پلاوي په تهران کې د «برېښنا صنعت» تر سرلیک لاندې یو نړۍوال نندارتون کې ګډون کړی. دغه پلاوي د برېښنا له نوې ټېکنالوژۍ څخه د لیدنې ترڅنګ د ایران د انرژۍ وزارت له چارواکو سره د دغه صنعت د پراختیا او د همکارۍ د نویو لارو چارو په اړه خبرې کړې دي.
د پاکستان په کراچۍ ښار کې پولیسو په یو لړ عملیاتو کې لس هغه افغانان نیولي، چې د اوسېدو قانوني اسناد یې نهلاره. د کراچۍ پولیس وایي، چې نیول شوي افغانان د څېړنو لپاره د پولیسو حوزې ته استول شوي.
د طالبانو د امر بالمعروف، نهې عن المنکر او د شکایتونو اورېدو وزارت خبر ورکړی، چې په بامیان او دایکنډي ولایتونو کې یې ۲۳۵ رواني ناروغان ټول کړي او د درملنې لپاره یې د افغاني سرې میاشتې ټولنې ته سپارلي دي.
په بلخ ولایت کې د طالبانو د اطلاعاتو او کلتور ریاست خبر ورکړی، چې په مزارشریف ښار کې د روضې ودانۍ يو شمېر برخې چې د وروستۍ زلزلې له امله ویجاړې شوې وې؛ د بیارغونې چارې يې پيل شوې دي.
د پاکستان په پلازمینه اسلاماباد کې د سېشنبې په ورځ تر ځانمرګي برید وروسته پولیسو د افغان کډوالو د نیولو او چاپو کمپاین چټک کړی، چې ګڼې کورنۍ یې له وېرې د خپلو کورونو پرېښودو ته اړې شوې دي.
د ملي مقاومت جبهې په نوم د طالبانو وسلهوالې مخالفې ډلې ادعا کړې، چې د کندوز ولایت د خاناباد بندر په «زنجیر چرخاب» سیمه کې یې دوه طالبان وژلي او یو بل ټپي دی. د یادې جبهې لهخوا په خپرې شوې خبرپاڼه کې راغلي، چې په دغه عملیاتو کې ملکي خلکو او د دوی ځواکونو ته زیان نهدی رسېدلی.
د کولمبیا ولسمشر ګوستاو پیټرو امر کړی، تر هغې چې امریکا په کارابین سمندر کې پر کښتیو خپلو بریدونو ته دوام ورکوي؛ د امریکا له استخباراتي ادارو سره دې د همکارۍ او معلوماتو تبادله وځنډول شي.
پاکستاني رسنیو خبر ورکړی، چې د سویلي وزیرستان په مرکز واڼه کې د پوځي کالج د برید ټول بریدګر وژل شوي او هیڅ زدهکوونکي یا ښوونکي ته پهکې زیان نهدی رسېدلی. ورته مهال په بنو کې هم د ترهګرۍ ضد څانګې (CTD) د دوو وسلهوالو له وژلو خبر ورکړی.