د خوست د طالبانو د والي ویاند مستغفر ګربز وايي چې سرې میاشتې ډیورنډ کرښې ته څېرمه د درېیو ولسوالیو پر شاوخوا ۳زره داخلي بې ځایه شویو کورنیو ۴۵ مېلیونه افغانۍ نغدي مرسته وېشلې. نوموړي ویلي چې دغه مرسته د ځاځي میدان، علیشیرو- ترویز او ګربز ولسوالیو پر خلکو وېشل شوې ده.
طالب چارواکي وایي چې د تورخم دروازې له پرانستلو سره یې، د ننګرهار په عمري کمپ کې د افغان کډوالو د هر اړخیز خدمت لپاره چمتووالی نیولی دی.
د طالبانو ټولګټو چارو وزارت وایي، تېره اونۍ د اوسپنې پټلۍ له لارې ۱۵۱زره ۷۵۰ مټریک ټنه انتقالات شوي دي. د دغه وزارت په وینا، یاد انتقالات د حیرتان، اقينې، تورغونډۍ او خواف-هرات بندرنونو له لارې شوي دي.
د ملګرو ملتونو د ماشومانو صندوق (یونیسف) ویلي چې د شدیدې غذایي کمزورۍ له امله په ۲۰۲۵ کال کې ۶۱۰ زره ماشومان درملنه شوي، او د ۲۰۲۶ کال هدف دا دی چې ۱.۳ میلیون ماشومانو ته عاجلې غذایي مرستې ورسول شي.
د اسوشیټډ پرېس د راپور له مخې، د امریکا، اسراییل او عرب هېوادونو چارواکو ویلي د خلیج فارس د عربو هېوادونو په ځانګړې توګه سعودي عربستان او امارات پر ډونالډ ټرمپ فشار راوړی چې «تر هغه وخته جګړه جاري وساتي څو تهران بشپړ کمزوری شي.» قطر او عمان بیا د ډیپلوماټیک حل ملاتړ کوي.
د پېښور پوهنتون په تالار کې د اسپایر ادارې لهخوا د پاکستان او افغانستان د امن جرګې پرانیسته وشوه، چې په کې شاوخوا ۶۰ استازي، له سیاسي ګوندونو، مدني فعالانو او علماوو ګډون کړی دی. د جرګې هدف د دواړو هېوادونو ترمنځ د روانې شخړې حل او د سولهییزو خبرو پیل کول دي.
د طالبانو مرستیال ویاند حمدالله فطرت خبر ورکړی چې د ټاپي د ګازو نللیکې پروژې رغنیز کارونه په هرات ولایت کې په چټکۍ سره پر مخ روان دي، او تر دې دمه شاوخوا ۲۵ کیلومتره نللیکه غځول شوې ده.
یو شمېر هغه افغانان چې د امریکایي ځواکونو سره یې کار کړی او دا مهال امریکا ته د تګ په تمه په قطر کې دي وايي چې ممکن ټرمپ دوی د طالبانو تر واک لاندې افغانستان ته ولېږدوي. دوی زیاتوي چې په افغانستان کې به یې کورنۍ او ځانونه له ځورونې او ګواښ سره مخ شي.
د پاکستان ټاکنیز کمېسیون د بلوچستان په خضدار ولسوالۍ کې د د پارلماني څوکۍ لپاره ضمني ټاکنې د ناامنۍ له امله ځنډولي. دغه ټاکنې د روان کال د اپریل په پنځه مه نېټه پلان شوې وې، خو امنیتي او سیاسي ستونزې یې ترسره کېدل ناممکن کړل.
د طالبانو ټولګټو چارو وزارت خبر ورکوي چې د پنجشېر، تخار او سمنګان ولایتونو هغه لارې، چې د پرلهپسې بارانونو او سېلابونو له امله تړل شوې وې، بېرته د تګ راتګ لپاره پرانیستل شوې دي.
په تورخم کې پاکستاني چارواکو ویلي چې د تورخم له لارې د بې اسنادو افغانانو بیرته ستنېدل به نن سې شنبه بیا پیل شي. یادو چارواکو ویلي چې طالبانو د «بې دلیله ډزو» د نه کولو ژمنه کړې.
د طالبانو کورنیو چارو وزارت وایي، د کابل ښار د پنځمې حوزې امنیتي ځواکونو په جلا عملیاتو کې د غلو یو شپږ کسیز بانډ او هم مهاله یې یو مسلح غل نیولی چې له یو کور څخه یې غلا کوله. وزارت وایي، په دغه عملیاتو کې یو عراده موټر هم تر لاسه شوی دی.
اروپايي هوايي امنیت ادارې (EASA) خبرداری ورکړی چې د منځني ختیځ پراخېدونکې جګړې او په هوا کې د ډرونونو زیاتېدونکي استعمال د نړیوالو الوتنو په خوندیتوب جدي اغېزې کړي دي.
ملګرو ملتونو په یوه راپور کې د افغانستان په اړه یادونه کړې چې په دغه هېواد کې لا هم د بشري حقونو کړکېچ دوام لري. دوی د طالبانو له خوا د نجونو او ښځو پر وړاندې پراخو بندیزونو ته اشاره کړې.
د امریکا د تابعیت او کډوالۍ خدماتو ادارې د دوشنبې په ورځ وویل چې د ټرمپ اداره به د ځینو پناه غوښتونکو د قضیو پروسس بیا پیل کړي. په امریکا کې د یو کډوال له خوا د ملي ګارډ پر دوو غړو د برید وروسته دغه غوښتنې درولې وې.
د بلوچستان په مستونګ او جهل مګسي ولسوالیو کې د وسلهوالو په جلا جلا بریدونو کې لږ تر لږه درې امنیتي سرتېري وژل شوي او اووه نور ټپیان دي، چې ورسره د سیمې امنیتي وضعیت لا ترینګلی شوی دی.
طالبانو په کابل پوهنتون کې د ژمنپاڼو په وېشلو سره له محصلانو غوښتي، چې د دغې ډلې لارښوونو ته ژمن پاتې شي. په دې ژمنپاڼو کې له محصلانو غوښتل شوي، چې د ږیرې پرېښودلو، د خولۍ پر سر کولو، په لمانځه کې د ګډون، د موسیقۍ نه اورېدلو او د طالبانو له اصولو سره د سم چلند ژمنه وکړي.
د اسلامي مرستو سازمان خبرداری ورکړ، چې د طالبانو او پاکستان ترمنځ د نښتو له امله د افغانستان په ختیځ کې زرګونه کورنۍ د خپلو کورونو پرېښودو ته اړ شوې او خوړو او سرپناه ته بېړنۍ اړتیا لري. دغه خیریه بنسټ د کړکېچ د کمولو او د دواړو لوریو ترمنځ د اوربند د غځولو غوښتنه کړې ده.
اسوشېټېډ پرېس د امریکایي، اسراییلي او د فارس خلیج د هېوادونو د چارواکو له قوله راپور ورکړی چې د سعودي عربستان او متحده عربي اماراتو په مشرۍ د واشنګټن متحدانو له ټرمپ څخه غوښتي، چې له ایران سره جګړه تر بشپړې ماتې پورې روانه وساتي.
پاکستاني چارواکو اعلان کړی، چې د دغه هېواد په سوېل کې د طبیعي ګازو یوه مهمه نللیکه دوشنبه (د وري ۱۰مه) وچاودېده، چې له امله یې په څو سیمو کې د ګازو لېږد پرې شوی دی. د ګازو د دولتي شرکت ویاند ویلي، چې دغه چاودنه د کوټې ښار په څنډو کې شوې ده.
په اسلاماباد کې د مصر، سعودي عربستان او ترکیې د بهرنیو چارو وزیرانو له سفر وروسته یوه لوړپوړي پاکستاني چارواکي الجزیرې ټلوېزیون ته ویلي، چې پاکستان د امریکا او ایران له جګپوړو چارواکو سره په مشورو بوخت دی او د دواړو خواوو ترمنځ د مذاکراتو پیلېدو ته هیلهمندي شته.