کندهار چې د طالبانو د مشر هبتالله اخوندزاده د اوسېدو او کار اصلي ځای ګڼل کېږي، هغه ښار دی چې طالبان پکې د سختو امنیتي تدابیرو د نیولو ادعاوې کوي. د دغه ولایت اوسېدونکي وایي، نږدې هره ورځ شاوخوا درې سترې وسلهوالې غلاوې کېږي، خلک لوټېږي او عام ولس د طالبانو له وېرې چوپ پاتې دی.
د پښتون ژرغونې غورځنګ مشر منظور پښتین د عوامي نشنل ګوند له خوا د پښتون قومي جرګې په غبرګون ویلي، که دا جرګه د مفتي شاکر او مولانا خانزېب په تړاو عملي ګام پورته کړي، نو یاد غورځنګ به یې بشپړ ملاتړ وکړي.
ټېلګراف ورځپاڼې په خپل یوه راپور کې لیکلي، چې د طالبانو یو شمېر پخواني جنګیالي، جنسي مجرمان او فاسد چارواکي د معلوماتو تر افشا کېدو وروسته د برېتانیا د بېړنیو هوايي الوتنو له لارې دغه هېواد ته لېږدول شوي، چې دا چاره د برېتانیا د کډوالو د ارزونې پر بهیر پوښتنې راولاړوي.
د پاکستان، امریکا، قزاقستان، قرغزستان، ازبکستان او تاجکستان لوړپوړو پوځي قوماندانانو په اسلام اباد کې په یوې غونډه کې د امنیتي همکاریو د پياوړتيا، د ترهګرۍ او ګډو ګواښونو پروړاندې پر مبارزې خبرې وکړې. د پاکستان ولسمشر د سنټکام قوماندان ته هم یو لوړ پوځي مډال ډالۍ کړ.
د طالبانو د امربالمعروف او شکایتونو اورېدو وزارت خبر ورکړی، چې په کابل کې یې د نوید اصغري او مشتاق احمد په نومونو له بهرنیو رسنیو سره د همکارۍ په تور دوه کسان نیولي دي.
د طالبانو پخوانۍ بندي نادیه سادات وایي، له هغه وروسته چې یې د طالبانو لهخوا د جنسي ځورونو او بشري سرغړونو په اړه رسنیزې څرګندونې وکړې، اوس له ډېر سخت وضعیت سره مخ ده. نوموړې وايي، که څه هم له هېواده وتلې، خو ژوند یې خوندي نه دی او د مرستې غږونه یې تر اوسه نااورېدلي پاتې دي.
د طالبانو د بهرنیو چارو وزیر امیرخان متفي د افغانستان لپاره د ملګرو ملتونو د خوړو نړیوال پروګرام له مشر سره په لېدنه کې د بېړنیو بشري مرستو تر څنګ د پراختیايي مرستو په برخه کې هم د پاملرنې غوښتنه وکړه.
په پېښور کې د عوامي نشنل ګوند لهخوا په جوړې شوې د پښتنو قومي جرګه کې پرېکړه شوې، چې د خېبرپښتونخوا سره یوځای شويو قبایلي سیمو واک دې ملکي ادارو او پولیسو ته وسپارل شي. دغه جرګه همداراز ټينګار کوي، چې په قبایلي سیمو کې دې نیابتي جګړې پای ته ورسول شي.
له افغان شخصیتونو سره د طالبانو د تماس کمېسیون وایي، هېواد ته تازه راستانه شوو ۳۲ کسانو ته د خوندیتوب کارتونه ورکړل شوي دي. د یاد کمېسیون مشر شهاب الدین وویل هغه افغانان چې د منفي تبليغاتو له امله وتلي باید وطن ته راشي ځکه دلته اوس سوله ده او په هره برخه کې پرمختګ روان دی.
د بریتانیا لومړي وزیر کېر سټارمر د غزې په تړاو، چې خلک هلته د لوږې له امله مري، پر اېکسپاڼه لیکلي، په غزه کې وضعیت بحراني دی او اسراییل باید د لوږې د پای ته رسېدو لپاره بشري مرستو ته د ځمکې له لارې اجازه ورکړي.
په ترکمنستان کې د طالبانو سفارت د شنبې په ورځ وویل، چې د طالبانو د سفارت چارسمبالي فضل محمد صابر د دغه هېواد لپاره د بیلاروس له سفیر استاني سلاوچپورنوي سره د لېدنې پر مهال د سیاسي او اقتصادي اړیکو په پراختیا خبرې کړې دي.
په برلین کې یو شمېر مېشتو افغان کډوالو د شنبې په ورځ (د زمري ۴مه) د طالبانو د ډېپلوماټانو د منلو پر وړاندې د جرمني د بهرنیو چارو وزارت مخې ته اعتراضي لاریون وکړ. لاریون کوونکو د جرمني حکومت او طالبانو ترمنځ هر ډول تعامل او همکاري "خیانت" وباله.
د کرېکټ اسیايي شورا مشر محسن نقوي ویلي، چې د ۲۰۲۵ کال اسیا جام سیالۍ به د سپټمبر له ۹مې د همدې میاشت تر ۲۸ مې د متحده عربي اماراتو په کوربهتوب ترسره شي. د کرېکټ اسیا جام سیالیو کې د ۸ هېوادونو لوبډلې په دوو ګروپونو کې یو د بل په وړاندې لوبیږي.
د خېبر پښتونخوا پولیسو وایي، چې د سوات په بریکوټ سیمه کې د ترهګرو ضد څانګې ځواکونو سره په ګډو عملیاتو کې د پاکستاني طالبانو درې مهم غړي وژل شوي دي. په وژل شویو کې د رحیم الله رحماني په نوم د کونړ ولایت اوسېدونکی هم شامل دی.
د رویټرز د راپور له مخې، د ایران سیستان او بلوچستان ولایت په محکمې سني جیش العدل بلوچ ډلې برید کړی. برید کې ۹ کسان وژل شوي، چې درې یې بریدګر دي. په راپور کې ویل شوي، چې په دې برید کې ۲۲ نور کسان ټپیان شوي دي.
د طالبانو تر واک لاندې د سټنډرډ ملي ادارې د شنبې په ورځ د یوې خبرپاڼې په خپرولو سره ویلي، چې په افغانستان کې د اروپايي ټولنې شارژدافیرې سره یې اروپايي هېوادونو ته د افغاني محصولاتو د رسولو په اړه خبرې کړي او هغې هم د افغاني صادراتو د ودې په برخه کې د هر اړخیزې همکارۍ ژمنه کړې.
د ایران ولسمشر مسعود پزشکیان وايي چې هغه چمتو دی چې افغانستان ته سفر وکړي ترڅو په اړیکو کې یوه نوې پاڼه پرانیزي. د ایران د بهرنیو چارو وزارت له چارواکو سره په یوه غونډه کې پزشکیان ټینګار کړی چې له ګاونډیو سره د اړیکو پراخول د هغه د حکومت د بهرني سیاست لومړیتوب دی.
د طالبانو د ترانسپورت او هوايي چلند وزارت د هوايي چلند عملیاتي معین د شنبې په ورځ په کابل کې د طالبانو د ادارې په کلنۍ غونډه کې وویل: «تېر کال د افغانستان له هوايي ډګرونو څخه څه باندې ۱۴ زره الوتنې ترسره شوي چې له دې ډلې ۷۶۶۵ الوتنې په ځانګړي ډول له کابل نړیوال هوايي ډګر څخه وې.»
د ایران د خراسان رضوي ولایت د تایباد ولسوال حسین جمشیدي وايي، چې د روان لمریز کال له پیل څخه تر چنګاښ میاشتې پورې شاوخوا ۷۵۰ زره ناقانونه افغان کډوال د دوغارون له لارې بېرته افغانستان ته ستانه شوي دي. د هغه په وینا، له دې ډلې ۸۰ سلنه کډوال په خپله خوښه تللي دي.
د طالبانو له خوا د اعدام په سزا محکوم شوي ښوونکي عبدالعلیم خاموش خپلوانو افغانستان انټرنشنل ته ویلي چې نوموړي د پېغمبر او مقدساتو سپکاوی نه دی کړی، بلکې یوازې عصري علومو ته ارزښت ورکولو له امله پر اعدام محکوم دی. دوی ټینګار کوي چې پر هغه لګول شوي تورونه ناسم او بېاساسه دي.
د تېر جمهوري نظام پخوانی لوی څارنوال محمد فرید حمیدي وایي، په افغانستان کې د څارنوالۍ نشتوالی یوه لویه فاجعه او مصیبت دی او د تېر نظام په څېر یې بیا جوړول لسګونه کلونه وخت نیسي. هغه زیاتوي، په کوم هېواد کې چې څارنوالۍ نه وي هلته د عدالت تامین هم ناشونی دی.