د جولای میاشتې پر ۱۱مه د پښتونخوا د باجوړ ولسوالۍ مرکز خار کې د عوامي نېشنل ګوند یو مخکښ غړی او د نوموړي ګوند د دیني علماوو څانګې مسوول مولانا خانزیب هغه وخت ناپېژاندو کسانو د ټوپک په ډزو شهید کړ، چې هغه باجوړ کې د ولسي امن پاڅون لپاره د خلکو د خبرولو او رابللو کمپاین ته روان و.
د پاکستان د لومړي وزیر مرستیال او د بهرنیو چارو وزیر ویلي، چې د افغانستان دوامداره سوله او ثبات د شانګهای د همکاریو سازمان د غړو هېوادونو د ګډو هیلو بنسټ جوړوي. اسحاق ډار دا څرګندونې د شانګهای همکارۍ سازمان د بهرنیو چارو وزیرانو شورا غونډه کې کړې.
د طالبانو نیمروز والي وايي چې د بندر له لارې واردېدونکو تېلو لپاره لازمې اسانتیاوې برابرې شوې او له دې وروسته د بندر له لارې هېچا ته اجازه نشته، چې تېل په بوشکو کې نیمروز ته وارد کړي. محمد قاسم خالد وايي، د ناقانونه تېلو واردولو مخنیوي په موخه يوه کمېټه ګومارل شوې.
په افغانستان کې د بریټانیايي ځواکونو د افغان همکارانو د شخصي معلوماتو له افشا کېدو وروسته د ۸۵۰میلیونه پونډو په لګښت سره د یوه پټ پلان پر بنسټ ۹ زره افغانان دغه هېواد ته لیږدول شوي او تر دې وروسته به نږدې ۷ زره نور کسان هم دغه هېواد ته ولېږدول شي.
د افغانستان مخکینی ولسمشر حامد کرزی وايي چې د افغانستان دننه سختو شرایطو داسې وضعیت رامینځته کړی چې د کډوالو د راستنیدو لپاره اړین شرایط برابر نه دي. هغه ټینکار کړی، چې په اوسني وضعیت کې د افغان کډوالو جبري راستنیدل کولی شي د ډیرو خطرونو او جدي ګواښونو رامینځته کیدو لامل شي.
د طالبانو د بهرنیو چارو وزیر له بهر څخه د نشهيي توکو قاچاق د افغانستان لپاره یو جدي ګواښ وباله او له نړيوالې ټولنې یې وغوښتل چې د یادې ستونزې د حل لپاره عملي ګامونه واخلي. متقي له نشه يي توکو سره د مبارزې پر نه سیاسي کېدو ټینګار کړی.
د طالبانو د ټرانسپورت او هوايي چلند وزارت د هیواد په هوايي ډګرونو کې ۳۰ پرمختللي د هوا پېژندنې وسایل نصب او فعال کړي دي. یاد وزارت وايي، دغه وسایل تر دې دمه په خوست، ګردیز، بامیان او ښرنه کې نصب شوي دي.
فایننشل ټایمز ورځپاڼې د سې شنبې په ورځ راپور ورکړی، چې د امریکا ولسمشر ډونالډ ټرمپ په پټه اوکراین هڅولی چې د روسیې په سیمو کې بریدونه زیات کړي. نوموړي له ولسمشر ولادیمیر زېلینسکي پوښتنه کړې چې که امریکا اوږدواټنه وسلې ورکړي، ایا اوکراین مسکو ویشتلای شي؟.
د طالبانو د اطلاعاتو او کلتور وزارت د ځوانانو چارو معین د کابل د کتاب نندارتون د پایغونډې په مراسمو کې له نړیوالې ټولنې وغوښتل، چې د هېواد په مرکز او ولایتونو کې د ځوانانو لپاره د کتابتونونو په جوړولو او تجهیز کې همکاري وکړي.
د ایران د بهرنیو چارو وزیر سیدعباس عراقچي د شانګهای د همکاریو سازمان له غړو وغوښتل چې د نړیوالو پېچلو حالاتو، په ځانګړي ډول د اسراییل او امریکا له خوا پر ایران د بریدونو پر وړاندې مسوولانه دریځ ونیسي.
د روسیې ولسمشرۍ یا کرملېن ماڼۍ وايي، د امریکا د ولسمشر ډونالډ ټرمپ وروستۍ څرګندونې چې د روسي صادراتو پر پېرېدونکو د بندیز ګواښ هم پکې شامل دی، جدي دي او باید په پوره دقت وڅېړل شي.
د عوامي نشنل ګوند مرکزي مشر اېمل ولي خان وايي، د پاکستان له امنیتي ادارو په باجوړ کې د یاد ګوند د وژل شوي غړي مولانا خانزېب قاتلین غواړي، خو هغه ټینکار کوي، چې نوموړی وسله والو ډلو نه دی وژلی. اېمل ولي خان وویل:« پاکستانی ریاست دې د مولانا خانزېب اووه تنه قاتلین وسپاري.»
اووه افغان پناه غوښتونکي، چې درې ښځې او څلور نارینه پکې شامل دي، د فرانسې د جلاوطنو پارلمان ته نوماندان شوي دي. شکیبا داوود، سیاره رحماني او فاطمه حیدري له ښځو او روحالله صدیقالله، انعامالله سمون، واصل اسحاقزی او مهدی موعودي له نارینهوو کاندیدان دي.
په چین کې د شانګهای همکارۍ سازمان د غړو هېوادونو د بهرنیو چارو وزیرانو غونډه د ایران-اسراییل وروستۍ جګړې او منځني ختیځ د وضعیت تر څنګ د افغانستان په تړاو د یوې همغږۍ پالیسۍ پر جوړولو هم خبرې کوي. د طالبانو بهرنیو چارو وزارت ویلي چې ناظرو هېوادونو ته بلنه نه ده ورکړل شوې.
ډونالډ ټرمپ یوځل بیا په یوه غونډه کې وویل، چې د بایډن ادارې طالبانو ته امریکايۍ وسلې او تجهیزات پرېښودل او طالبان پرې هرکال «پر یوه بدشکله سړک» خپل رسمت ګذشت کوي، خو دی دا نور نه شي زغملای. ترمپ وايي، دوی دا تجهیزات او الوتکې پاکستان ته هم لېږدولای شوای.
د طالبانو د عامې روغتیا وزارت د پولیو واکسیناسیون مسوولین وايي، په تېرو دولسو میاشتو کې په کابل ولایت کې د پولیو دوه مثبتې پېښې ثبت شوې او همداراز یې هیله څرګنده کړې چې دغه شمېر صفر ته راښکته شي.
په سوډان کې د بشري حقونو وکیلان وایي، چې د دغه هېواد د چټک ځواکونو ډلې نږدې ۳۰۰ کسان وژلي دي. د دغه وکیلانو په وینا؛ دغه ولسي وګړي د سوډان د شمالي کردفان ایالت په څو کليو کې وژل شوي، چې پهکې مېندوارې مېرمنې او ماشومان هم شامل دي.
په کابل کې ځینې سرچینې وايي، چې د طالبانو د بهرنیو چارو وزیر امیرخان متقي به تر راتلونکو دوو اونیو پورې پاکستان ته سفر وکړي. د دغه سفر بلنه د پاکستان د بهرنیو چارو وزیر اسحاق ډار کابل ته د خپل وروستي سفر پرمهال متقي ته ورکړې وه.
په افغانستان کې د ملګرو ملتونو سیاسي استازولۍ (یوناما) مشرې روزا اوتنبایوا د هرات ولایت اسلام کلا پولې ته د سفر پر مهال د راستنېدونکو کډوالو وضعیت د اندېښنې وړ بللی او له نړۍوالې ټولنې یې په دې برخه کې د بېړنیو مرستو غوښتنه کړې ده.
د طالبانو د ټولګټو وزارت ویاند محمد اشرف حق شناس نن سې شنبه (د چنګاښ ۲۴مه) د یوې خبرپاڼې په خپرولو سره ویلي، چې په تېره اوونۍ کې یې له بېلابېلو هېوادونو سره ۷۷۰۲۹ مټریک ټنه راکړه ورکړه کړې ده.
د ملګرو ملتونو د خوړو او کرنې نړۍوال سامان (FAO) وایي، چې وچکالۍ د افغانستان ۱۹ ولایتونه سخت ځپلي دي. دغه سازمان پر اېکس پاڼه کاږلي، چې وچکالۍ د افغانستان د خلکو ستونزې لا ډېرې کړې دي او شمالي ولایتونه یې تر ټولو ډېر ځپلي دي.