د پاکستان د اطلاعاتو او رسنیو وزیر عطاءالله تارړ د چهارشنبې په ورځ په یوې مرکه کې وویل، چې د طالبانو رژیم د استانبول د څلور ورځنیو خبرو اترو د ناکامۍ مسوول دی. نوموړي ټینګار وکړ، که له افغانستان څخه د پاکستان پر ضد بریدونه وشي، نو اسلاماباد د ځان د دفاع حق لري.
طالبانو ته نږدې رسنۍ «المرصاد» د یوې ویډیو په خپرولو سره ادعا کړې، چې د طالبانو له خوا په افغانستان کې د داعش ډلې د نیول شویو پاکستاني غړو اعترافونو ته یې لاسرسی موندلی، چې دا په دې ډله کې د پاکستاني وګړو او په دغه هېواد کې د یادې ډلې د جذب او روزنې د مرکزونو شتون څرګندوي.
د طالبانو د المپيک، بدنې روزنې او سپورټ اداره وايي، چې د افغانستان والیبال ملي لوبډلې د مرکزي اسیا په سیالیو کې دویم مقام خپل کړی او نن هېواد ته راستنه شوه. ملي لوبډلې په دې سيالیو کې ۶ لوبې ترسره کړې، چې په درېیو بریاوو سره پایلوبې ته ولاړه
د سپینبولدک ـ چمن لار نږدې درې اوونۍ کېږي، چې لا هم د مساپرو پر مخ تړلې ده. د سپین بولدک ـ چمن لار چې د دواړو هېوادونو ترمنځ د خلکو د تګ راتګ، سوداګرۍ او بېړنیو حالتونو لپاره خورا مهمه لاره ده، له درېیو اوونیو راهیسې تړلې پاتې ده.
طالبانو په غور او بلخ ولایتونو کې د «اخلاقي فساد او الکولي مشروباتو» د لېږد په تور د دوو ښځو په ګډون ۵ کسان په عام محضر کې په دُرو ووهل.
د جمهوري نظام پرمهال د ننګرهار پخوانی والي ضیاالحق امرخېل وايي، چې له لومړۍ ورځې روښانه وه چې «د پاکستان پوځي رژيم» د خبرو اترو په اړه ریښتنی نیت نه درلود.
له خبریالانو څخه دملاتړ سازمان په یوه لیک کې د ملګرو ملتونو د سازمان له سرمنشي انتونیو ګوترېش او نړیوالو بنسټونو غوښتنه کړې چې په پاکستان کې د مېشت افغان خبریالانو سخت او اندېښمن حالت ته بېړنۍ پاملرنه وکړي.
د پښتون ژغورنې غورځنګ مشر منظور پشتین وايي، چې د پاکستان پوځ په مکارۍ او تدریج د ناامنۍ فضا رامنځته کوي او بیا د دفاع او ترهګرۍ په نوم جګړې جوړوي. پشتین وايي، «پخپله ترهګري کوي، عام عام پښتانه وژني او د هغوی پر معدني وسایلو قبضه او لوټمار کوي».
د ډله ییز امنیت تړون سازمان (CSTO) مرستیال سرمنشي تالاتبیک مسادیکوف خبرداری ورکړی چې د افغانستان دوامدار ترینګلی وضعیت لا هم د سیمې د امنیت لپاره جدي ګواښ دی او د پراخو شخړو خطر د سازمان تر پولو رسېدلی دی.
د کندهار صنعت کارانو افغانستان انټرنشنل ته وویل، چې په تېرو څلورو کلونو کې د یاد ولایت په صنعتي پارک کې له ۳۵۵ فعالو تولیدي فابریکو نه اوس یوازې ۱۳۰ فعالې دي او پاتې نورې بندې شوې دي. صنعت کاران د فابریکو بندیدو لامل د برېښنا نشتوالی او ددوی ستونزو ته د طالبانو نه رسیده ګي بولي.
ملګرو ملتونو د ترکیې په استانبول ښار کې د پاکستان او طالبانو ترمنځ د خبرو پر ناکامېدو اندېښنه څرګنده کړې ده. د یاد سازمان ویاند ستېفن دوجارېک یوې خبري ناستې ته وویل، هیله لري چې د دواړو ګاونډیو هېوادونو ترمنځ جګړه بېرته پیل نه شي، حتا که خبرې موقتي ځنډېدلې وي.
د افغانستان کرېکټ ملي لوبډلې د زمبابوې پر وړاندې په لومړۍ شل اوریزه نړیواله لوبه کې د ۵۳ منډو په توپیر بریا خپله کړه.
د ایران د بهرنیو چارو وزارت مرستیال کاظم غریب ابادي کابل ته د خپل سفر پر مهال ویلي، چې د طالبانو د بهرنیو چارو وزارت سره یې په افغانستان کې د بندي ایرانیانو د انتقال په اړه هوکړه کړې ده. ایراني چارواکو د طالبانو په زندانونو کې د ایراني وګړو د شمېر په اړه څه نه دې ویلي.
د افغانستان د پخواني ولسمشر حامد کرزي د دفتر رییس کریم خُرم وايي، د استانبول له بې پایلو خبرو وروسته د پاکستاني چارواکو رجز ویل او ګواښونه بیخي ډېر شوي. نوموړی زیاتوي چې جګړه نه د پاکستان او نه هم د افغانستان په ګټه ده.
د اوبو چارو پاکستاني کارپوهانو او چارواکو اندېښنه ښودلي او وايي، چې که پر کابل او کونړ سیندونو د بندونو جوړولو پلانونه عملي شي، نو په پاکستان کې به د فصلونو لپاره ګڼې ستونزې جوړې کړي. د طالبانو مشر په دې وروستیو کې پر کونړ سیند د بند جوړولو امر کړی.
د بښنې نړیوال سازمان د جنوبي اسیا سیمهییز دفتر ویلي، چې د پاکستان ستر ښار کراچۍ له یوه روغتون نه د محصل او مدني فعال غني امان چانډیو تښتول د بشري حقونو ښکاره سرغړونه ده. عیني شاهدان وايي، چانډیو په ملکي جامه کې امنیتي کسانو تښتولی دی.
قزاقستان پلان لري چې افغانستان ته د غلو دانو صادرات ډېر کړي او د جوارو صادرات هم پيل کړي. دا پرېکړه د قزاق – افغان سوداګریز فورم پر مهال په شېمکېنت ښار کې د طالبانو د سوداګرۍ او صنعت وزیر او د قزاقستان د مرستیال صدراعظم سېرېک ژومانګرین ترمنځ په دوه اړخیزه غونډه کې شوې.
د روسیې د ولسمشر ولادیمیر پوتین ځانګړي استازي کیریل دیمیترییف د سعودي عربستان د پانګونې کنفرانس کې ویلي، چې د اوکراین جګړه به د راتلونکي کال تر پایه ختمه شي.
د امریکا ولسمشر خواشیني ښودلې، چې د اساسي قانون له مخې د درېيم ځل لپاره ولسمشرۍ ته د نوماندۍ اجازه نه لري. هغه د چارشنبې په ورځ له خبریالانو سره په خبرو کې وویل: «که تاسې دا ولولئ، ډېره څرګنده ده. زه اجازه نه لرم چې بيا نوماند شم. دا ډېره بده ده.»
د طالبانو د مالیې وزارت وايي، په تله میاشت کې یې د افغانستان له بېلابېلو ګمرکونو څخه د تېلو ۶۳ ټانکره، چې بې کیفیته تېل یې وارد کړي وو، بېرته ایران، ازبکستان او تاجکستان ته ګرځولي دي.
د روسيې د پوځي بلاګرانو د راپورونو له مخې، روسي ځواکونه د اوکراین ختیځ ښار پوکروفیسک ته نږدې دي او د دوو اړخونو له محاصرې وروسته یې دا ښار نږدې ټول کلابند کړی دی. ویل کېږي د روسیې کوچنۍ، خو ډېرې چټکې قطعې ښار ته ننوتلې دي.