آرشیف

د طالبانو تر واک لاندې د ملي پراختیا شرکت د معلوماتو له مخې، د قوش تېپې کانال د دويم فاز چارې ۹۰ سلنه او د سربند چارې يې نږدې ۸۰ سلنه بشپړې شوې دي.

په غزه کې د روان کال (د مارچ میاشتې له ۱۸مې نېټې) راهیسې د اسراییل په بریدونو کې ۳۹۸۶ فلسطینیان وژل شوي او ۱۱۴۵۱ نور بیا ټپیان شوي دي.

د قزاقستان د ملي اټومي شرکت د مدیره پلاوي رییس میرژان یوسوپوف ویلي چې قزاقستان له افغانستان څخه د بریلیم د وارداتو احتمال ارزوي.

ځايي سرچینې وايي، د طالبانو او پاکستاني ځواکونو ترمنځ د هلمند په بهرامچه ولسوالۍ کې د پوستې جوړولو پر سر نښته شوې ده. د سرچینو د معلوماتو له مخې، اوس هم د دواړو لوریو ترمنځ خال خال ډزې روانې دي خو د مرګ ژوبلې په اړه یې جزئیات نه دي ورکړل شوي.

د روسیې د امنیت شورا منشي سرګي شویګو ویلي، د روسیې د سترې محکمې له‌خوا د طالبانو پر فعالیتونو د بندیز ځنډول به مسکو ته دا زمینه برابره کړي چې له کابل سره شراکت پراخ کړي.

سي‌اېن‌اېن د باخبره سرچینو له حوالې خبر ورکړی، چې ښایي په راتلونکې ناسته کې ایران او امریکا وروستۍ هوکړې ته سره ورسېږي. د دغې رسنۍ په خپور شوي راپور کې راغلي، چې دواړه خواوې یوې هوکړې ته سره نږدې شوې دي.

د طالبانو ستره محکمه وایي، چې په کونړ، تخار او کندوز ولایتونو کې یې د دوو ښځو په ګډون ۲۰ کسان په بېلابېلو تورونو په دورو وهلي دي.

افغانستان انټرنشنل ته د باور وړ ډېپلوماټیکو سرچینو معلومات ورکړي، چې پخواني ولسمشر حامد کرزي جرمني ته د خپل وروستي سفر په لړ کې د ایران د بهرنیو چارو له وزیر عباس عراقچي او د پنځو لوېدیځو هېوادونو ځانګړو استازو سره کتلي دي.

د طالبانو تر واک لاندې باختر اژانس خبر ورکړی، چې پرون له ایران او پاکستانه ۱۰۱۹ کورنۍ بېرته افغانستان ته ستنې شوې دي.

په امریکا کې د‌ پاکستان سفیر رضوان سعید شیخ د واشنګټن په یوه څېړنیز بنسټ کې د ناستې پر مهال ویلي، د افغانستان بې ثباتي لا هم د سیمې د امنیت لپاره تر ټولو لویه ننګوونه ده او پاکستان تر بل هر هېواد زیات له دې وضعیت څخه زیان ویني.

په بنګله دېش کې د دغه هېواد د اپوزیسیون ګوندونه یو وار بیا سړکونو ته راوتي او د ټاکنو غوښتنه کوي. د بنګله دېش نشنلېسټ ګوند غواړي، چې د محمد یونس لنډمهاله حکومت دې د روان کال په ډسمبر میاشت کې ټاکنې وکړي.

امریکایي رسنۍ پولیټیکو د چهارشنبې په ورځ د (غویي ۷مه) خبر ورکړی، چې د امریکا غږ (Voice of America) ټول پاتې کارکوونکي به د روانې اونۍ په ترڅ کې له دندو څخه د ګوښه کېدو لپاره لیکونه ترلاسه کړي.

د ډیلي ټاېمز په نوم یوې پاکستانۍ ورځپاڼې په یوې مقاله کې لیکلي، چې د «ټي‌ټي‌پي» په تړاو د طالبانو د ناڅاپي بدلون اوسنی دریځ تر ډېره د بهرنیو فشارونو پایله ده چې چین په کې تر ټولو مهم رول لري.

د پاکستان لومړي وزیر شهباز شریف یو وار بیا ټینګار وکړ، چې پاکستان تل په سیمه کې سوله غواړي او که هند له خپلې خوا همکاري او اخلاص وښيي؛ نو چمتو دی چې له هند سره د خبرو اترو لپاره کېني.

د طالبانو ارشاد، حج او اوقافو وزارت په یوې خبرپاڼه کې له خلکو غوښتي، چې د راتلونکې جمعې په ورځ د (غویي ۹مه) باید په ټول هېواد کې د «غزې جګړه ځپلو» او اسراییل له لوري د ترسره کېدونکې «نسل وژنې» خلاف غږ پورته کړي.

په ننګرهار ولایت کې د طالبانو والي ملا محمد نعیم اخند په مشرۍ د دغه ډلې د کونړ، نورستان او لغمان ولایتونو د واليانو په ګډون د امنیتي مسوولینو ترمنځ ناسته کې د اداري فساد مخنېوي لپاره د ځانګړو کمېټې جوړېدو پرېکړه شوې.

‏ طالبانو ‏د امنیتي او تصفیوي کمېسيون په نوبتي غونډه کې د رسمي پولو او فرضي کرښو په اړه خبرې کړې دي. دغه کمېسیون وایي، چې په غونډه کې د سرحدي او فرضي کرښو سيمو د لا ښه کنټرول، د سرغړوونکو پر ضد د پیاوړو اقداماتو او د سرحدي همغږۍ د پیاوړتیا لپاره پر لازمو اقداماتو ټینګار وشو.

د افغانستان د خبریالانو مرکز وایي، طالبانو په غزني ولایت کې د خوشحال راډیو مسوول مدیر سلیمان راحل ته د درې میاشتو بند سزا اورولې ده. د چهارشنبې په ورځ د (غبرګولي ۷مه) د خبریالانو ملاتړ یاد سازمان خبرپاڼه کې دا‌ پرېکړه ناعادلانه بلل شوې ده.

د پاکستان ډان ورځپاڼې راپور ورکړی، چې د چهارشنبې په ورځ په کشمیر کې د‌ پاکستاني پولیسو او وسله‌والو ترمنځ په نښته کې شپږ کسان وژل شوي او پنځه نور ټپیان دي. د راپور له مخې؛ په وژل شویو کسانو کې څلور وسله‌وال او دوه پاکستاني پولیس شامل دي.

په روسیه کې د طالبانو سفیر جمال ناصر غروال ویلي، د مسکو په ناسته کې د دغه ډلې ګډون ځکه مهم دی چې افغانستان د سیمې او نړۍوال امنیت سره تړلی هېواد دی.

د افغانستان ۱۷ کلنو د فوټبال ملي لوبډلې د کافا جام سیالیو په لړ کې تېره ورځ د تاجکستان پر وړاندې د ۳-۰ په توپیر ماتې وخوړه. دغه لوبه تېره ورځ د تاشکند په کوربه‌توب ترسره شوه.