آرشیف

«له پولیو پاک افغانستان» بنسټ اعلان کړی، چې د شنبې په ورځ (د زمري ۱۰مه) به د پولیو واکسین ترڅنګ د څو ناروغیو ضد واکسینونو ګډ لس ورځنی کمپاین (MAAC) پیل شي.

په کابل کې د مخابراتو او معلوماتي ټېکنالوژۍ په پنځه ورځني نندارتون کې چې شاوخوا ۲۰۰ غرفې یې لرلې، د ښځو له ګډون پرته پای ته ورسېد. د طالبانو مخابراتو او معلوماتي ټېکنالوژۍ وزارت ویاند عنایت‌الله الکوزی وایي، په پنځو ورځو کې تر ۱۵۰زره ډېرو کسانو له دغه نندارتون لیدنه کړې ده.

د ملګرو ملتونو د افغانستان برخې په خپل تازه پیغام کې د افغان نجونو د زده‌کړو پر حق ټینګار کړی او ویلي یې دي، چې هره نجلۍ د زده‌کړې، کار او لوړو زده‌کړو د دوام حق لري.

د افغانستان د فوټبال فدراسیون اعلان کړی، چې شاکرالله ابراهیمي د یاد فدراسیون د لوبڅارانو د کمېټې د مسوول په توګه ټاکل شوی دی. ابراهیمي د بدني روزنې په برخه کې لوړې زده‌کړې لري او له ۲۰۱۲کال راهیسې د افغانستان د فوټبال د لوبڅارۍ په برخه کې فعالیت کوي.

د امریکا ولسمشر ډونالډ ټرمپ اعلان کړی، چې «د سولې پلاوی» په غزه کې د حماس او نورو وسله‌والو ډلو د بشپړې بې‌وسلې کولو لپاره یوې «تاریخي» هوکړې ته رسېدلی دی. هغه زیاتوي، د غزې اداره به د فلسطین نوي حکومت ته وسپارل شي چې د سولې له پلاوي سره به په همغږۍ کار کوي.

د سویلي وزیرستان د سراروغه سیمې په کوټکي بازار کې د ناپېژاندو موټرسایکل سپرو په ډزو کې دوه کسان وژل شوي دي. د پولیسو د معلوماتو له مخې؛ بریدګر د پېښې له ځایه په تېښته بریالي شوي او پولیسو یې پرضد پلټنې هم پیل کړې دي.

د خیبرپښتونخوا په چارسدې ولسوالۍ کې د بې‌اسناده افغان کډوالو پرضد د پولیسو او ولسوالۍ ادارې ګډ عملیات لاهم په چټکۍ سره دوام لري، چې په ترڅ کې یې تازه ۱۵ نور افغان کډوال نیول شوي دي.

سرچینو افغانستان انټرنشنل ته ویلي، د کندوز په هوايي ډګر کې د طالب ځواکونو پر یوې راټولېدنې راکټي برید شوی. د سرچینو په وینا؛ دغه برید بېګاه د شپې ناوخته شوی دی. ټاکل شوې وه، چې دغه ځواکونه د چورلکې پرمټ له کندوز هوايي ډګر څخه بدخشان ته ولېږدول شي.

یو افغان افغانستان انټرنشنل ته په لېږلي پیغام کې ویلي، چې د ۲۰۲۱کال د اګست تر ۱۵مې وروسته کلیز یوازې د ورځو پاڼې نه اړوي؛ بلکې هره پاڼه یې د تر وړل شویو هیلو، د خاموشه ښوونځیو، ویجاړو کورونو، جبري جلاوطنۍ او هغو اوښکو کیسه کوي چې لاهم وچې شوې نه‌دي.

د بلوچستان ایالت د کوټې ښار اړوند د سورنج په سیمه کې د سکرو په یوه کان کې د چاودنې له امله لږترلږه ۳۴ کان‌کېندونکي وژل شوي دي. د بلوچستان د ژغورنې ادارې د معلوماتو له مخې؛ د کان دننه تر چاودنې وروسته ګڼ شمېر کارګر بند پاتې شوي او د ژغورنې ډلې لاهم د پاتې کسانو د ژغورلو هڅه کوي.

د روغتیا نړۍوال سازمان په خپل کلني راپور کې ویلي، چې په افغانستان کې ۱۶.۶ مېلیونه ماشومانو د واکسیناسیون د ملي کمپاینونو له لارې د شري واکسین ترلاسه کړی دی. دغه سازمان په سرحدي سیمو کې لسګونه زره راستنېدونکو افغان کډوالو ته د خدماتو چمتو کولو راپور هم ورکړی دی.

د افغانستان د غېږ نیونې غوره لیګ لومړی پړاو د پنجشنبې په ورځ (د زمري ۸مه) د قوش تېپې لوبډلې په بریا سره په کابل کې پای ته ورسېده. د دغه سیالیو په پای‌لوبه کې قوش تېپې اخوت لوبډلې ته ماتې ورکړه او د غېږ نیونې غوره لیګ سیالیو اتلولي یې وګټله.

د هرات اسلام‌کلا لارې یو موټر چلوونکي افغانستان انټرنشنل ته په لېږلي پیغام کې پر همدې لاره د افغان ځوانانو د وضعیت په اړه د خپلو سترګو لیدلی حال بیان کړی. نوموړی وایي، چې هره ورځ د ايران پر لور د ځوانانو د ناقانونه تګ دردناکه شېبه ويني.

په پاکستان کې د افغان کډوالو د قانوني اسنادو او ویزو د ستونزې له دوام سره، په اسلام‌اباد کې مېشت افغان صابر خان وايي، له شاوخوا یو نیم کال راهیسې یې ویزه پای ته رسېدلې او د نیول کېدو او افغانستان ته د جبري ستنولو له وېرې په سختو شرایطو کې ژوند کوي.

په پېښور کې یوه کډواله کورنۍ چې افغانستان ته یې کډه بار کړې او غواړي هېواد ته ستانه شي، د ډیوې په نوم یوې ۱۲ کلنې نجلۍ له خپل پلاره پوښتلي چې «افغانستان کې خو ښوونځي تړلي دي، نو دا به څه کوي». پلار یې افغانستان انټرنشنل – پښتو ته استولي پېغام کې ویلي چې لور ته بې ځوابه دی.

د بشر حقونو فعاله او د ټولنیزو رسنیو کاروونکې یلدا بازوان وايي، افغان نجونې له ۱۷۷۶ ورځو راهیسې له ښوونځیو محرومې دي. نوموړې ټینګار کوي چې زده‌کړه امتیاز نه، بلکې د نجونو بنسټیز بشري حق دی او له زده‌کړو د هغوی د محرومیت هره ورځ د فرصتونو او راتلونکی د له لاسه ورکولو په معنا ده.

شاوخوا دېرش کاله وړاندې په امریکا کې د هغو بهرنیو وګړو د ایستلو لپاره جوړه شوې ځانګړې محکمه، چې د ترهګرۍ په تړاو تورن وي، د پنجشنبې په ورځ خپله لومړنۍ قضیه وڅېړله. دا دوسیه د یوې افغانې مېرمنې اړوند ده چې د داعـ. ـش د ملاتړ په تور تورنه شوې ده.

د اروپا د فوټبال اتحادیې «یوفا» او د هغې ۵۵ غړو د فیفا د هغه پلان په اعتراض کې چې غواړي د نړیوال جام او نورو سیالیو مالکیتي ونډې خصوصي پانګه‌والو باندې وپلوري، د فیفا له ټولو سیالیو د بایکاټ پرېکړه کړې ده.

فارن پالیسي مجلې په یوه شننه کې لیکلي، له عراق، اردن، کویټ، مصر او سعودي عربستان ته د نښتو له پراخېدو سره، د امریکا او ایران جګړې تر پخوا ډېر سیمه‌ییز ابعاد خپل کړي دي.

د سوریې ولسمشر احمد الشرع د سعودي عربستان له ولیعهد محمد بن سلمان سره په ټیلیفوني خبرو کې د ایران پلوو عراقي ملیشو له لوري د سعودي د تېلو پر تاسیساتو د برید د هڅې غندنه کړې او د دغه هېواد د امنیت او حاکمیت لپاره یې د دمشق پر «ثابت ملاتړ» ټینګار کړی دی.

د امریکا سنا جرګې د سیمه‌ییزو ترینګلتیاوو د زیاتېدو په منځ کې هغه طرحه رد کړه چې موخه یې د ایران په تړاو د ولسمشر ډونالډ ټرمپ د جګړه‌ییزو واکونو محدودول وو. دغه طرحه د پنجشنبې په ورځ، د زمري په اتمه، د ۵۰ مخالفو او ۴۹ موافقو رایو په پایله کې ناکامه شوه.