د طالبانو د امر بالمعروف وزارت وايي، د ۱۴۰۵ لمریز کال په چنګاښ میاشت کې یې د ښځو د حقونو په تړاو ۳۸۸ قضیې حل کړې دي؛ خو د دې وزارت د فعالیتونو په خپاره شوي راپور کې د ښځو پر وړاندې د پراخو محدودیتونو، د هغوی د اساسي حقونو د نقض په اړه وضاحت نه دی ورکړل شوی.
طالبانو په فراه ولایت کې د یوې ناستې په ترڅ کې له لیکوالانو غوښتي چې د دې ډلې د دریځونو ملاتړ وکړي او د دوی په وینا، د مخالفینو د «تبلیغاتو» مخه ونیسي او پر وړاندې یې فکري مبارزه وکړي.
د پاکستان د پنجاب ایالت د لاهور د عملیاتو پولیسو مشر فیصل کامران د ناقانونه افغان کډوالو پر ضد د پراخو عملیاتو امر کړی او ویلي یې دي چې د ښار امنیت او د خلکو ساتنه یې لومړیتوب دی.
سره له دې چې طالبان په ټول هېواد کې د پراخ امنیت د ټینګښت ادعا کوي، خو په دې وروستیو کې په کابل او یو شمېر ولایتونو کې د وسله والو غلاوو د زیاتېدو راپورونه خپاره شوي دي. یو شمېر خلک وایي چې فقر، بې روزګاري او خراب اقتصادي وضعیت د دې لامل شوی چې ځینې کسان په غلاوو لاس پوري کړي.
د امریکا یوې فدرالي استیناف محکمې د ولسمشر ډونالډ ټرمپ د ادارې غوښتنه رد کړې چې د لوړمهارت لرونکو بهرنیو کارکوونکو لپاره د «اېچ-۱بي» ویزو پر نوي ۱۰۰ زره ډالري فیس د لګېدو مخه ونیسي. له دې سره د دغه فیس پر وړاندې د ټرمپ ادارې حقوقي ننګونه له بلې ماتې سره مخ شوې ده.
خیبر پښتونخوا کې دولتي ادارو د افغان کډوالو د ایستلو په لړ کې د کورونو مالکانو ته د خپلو ملکیتونو د خالي کولو او افغان وګړو ته د بیا کرایه ورکولو د مخنیوي لارښوونه کړې، چې له امله یې زرګونه افغان کورنۍ او د ملکیتونو مالکانو هم له اقتصادي او قانوني ستونزو سره مخ شوي دي.
فوکس ان افریقا په نوم ویبپاڼې خپل راپور کې لیکلي چې د اقلیم بدلون، پراخه ځنګلوهل او د سېلابونو د مخنیوي د بنسټیزو پروژو نشتوالي د افغانستان په ختیځ کې وروستي سېلابونه لا مرګوني کړي دي.
د سعودي عربستان په مشرۍ ګډ ځواکونه وايي، د یمن په لوېدیځ کې یې د حدیده ولایت د حوثیانو پر هغو پوځي مرکزونو بریدونه کړي چې د سوداګریزو بېړیو د ګواښلو لپاره ترې کار اخیستل کېده.
د افغانستان د جمهوري نظام پر مهال د کورنیو چارو وزیر علي احمد جلالي د افغانستان د پخواني پاچا محمد ظاهر شاه د مړینې د نولسم تلین په مناسبت د هغه شخصیت ستاینه کړې او ویلي یې دي چې نوموړی د «شخصي استقامت، وقار، متانت، عاطفې او انساني کرامت» غوره بېلګه وه.
د جرمني سترې اساسي محکمې پرېکړه کړې چې حکومت نه شي کولی د افغانانو لپاره د مېشتېدو ټولې ژمنې په ډلهییز ډول لغوه کړي، بلکې د هرې قضیې باید جلا ارزونه وکړي.
د روغتیا نړیوال سازمان وايي، هر کال په نړۍ کې له ۳۰۰ زرو ډېر کسان په اوبو کې د ډوبېدو له امله مري، چې نږدې څلورمه برخه یې ماشومان دي. په افغانستان کې هم په اوبو کې د ډوبېدو پېښې د اندېښنې وړ دي، هر کال لسګونه کسان د ډوبیدو له امله مري، چې شاوخوا ۹۰ سلنه یې ماشومان او ځوانان دي.
د طالبانو تر واک لاندې د پېښو پر وړاندې د چمتووالي او مبارزې ملي اداره وایي، د تېرو ۲۴ ساعتونو پر مهال د سختو ورښتونو او راوتلو سیلابونو له امله په نهو ولایتونو کې ۹ تنه مړه شوي او یو بل ټپي شوی دی. د دغې ادارې په وینا، دغو سیلابونو خلکو ته پراخ مالي زیانونه هم اړولي دي.
د پاکستان د بهرنیو چارو وزیر اسحاق ډار د شانګهای همکاریو سازمان د بهرنیو چارو وزیرانو په غونډه کې ویلي، د افغانستان د طالبانو حکومت باید د ترهګرۍ پر ضد خپلې نړیوالې ژمنې عملي کړي او د افغانستان له خاورې دې د وسلهوالو ډلو د فعالیت مخه ونیسي.
قطر د خیبر پښتونخوا په ټانک ولسوالۍ کې پر یوې ګډې پولیسې او امنیتي پوستې شوی برید په کلکو ټکو غندلی، چې د پاکستاني چارواکو په وینا، په کې ۱۵ امنیتي کسان او یو دولتي چارواکی وژل شوي او ۱۲ بریدګر هم له منځه وړل شوي دي.
د ایران دولتي خبري اژانس (اېرنا) راپور ورکړی، چې د ایران د بهرنیو چارو وزیر عباس عراقچي له خپل روسي سیال سرګي لاوروف سره په لیدنه کې د هغه څه له امله مننه کړې، چې ده «پر ایران د امریکا او اسراییل د پوځي یرغل په غندلو کې د روسیې اصولي دریځ» وباله.
بریتانوۍ ټېلګراف ورځپاڼې راپور ورکړی، چې د ایران اسلامي جمهوریت بریتانیا ته د خپلو استخباراتي ادارو اړوندو کسانو د لېږدولو لپاره د انسانانو د قاچاق له شبکو څخه ګټه پورته کوي. ایران لا تر اوسه د ټېلګراف د دغه راپور په غبرګون کې څه نهدي ویلي.
د امریکا ولسمشر ډونالډ ټرمپ د خپل حکومت له لوړپوړو سلاکارانو او وزیرانو سره کتلي، څو پر ایران د بریدونو د زیاتولو په اړه پرېکړه وکړي.
په امریکا کې د ډونالډ ټرمپ د ادارې له خوا د شاوخوا ۸۰۰ افغان کډوالو د مرکو طرحې د هغوی د شړلو په اړه جدي اندېښنې راپارولې دي. د واشنګټن پوسټ ورځپاڼې د راپور له مخې، په دې پوښتنلیکونو کې د افغانانو د هویت او په امریکا کې د هغوی د کورنیو د قانوني وضعیت په اړه پوښتنې کېږي.
په تخار کې ځايي سرچينو د جمعې په ورځ افغانستان انټرنشنل ته ويلي، طالبانو له خپل تاجکتوکمه قوماندان غلام حسين سره ژمنه کړې، چې ضبط شوې وسلې او پوځي تجهيزات به يې بېرته ور وسپاري. دا اقدام داسې مهال کېږي، چې د تخار د چاهاب ولسوالۍ د سرو زرو کانونو پر استخراج کړکېچونه زيات شوي.
د پښتون ژغورنې غورځنګ مشر منظور پښتین د پاکستان له زندانونو څخه د زبیر شاه اغا، عثمان شېراني او محمد شعیب خان په ګډون د یاد غورځنګ د یو شمېر مخکښو غړو له ازادېدو خبر ورکړی او همداراز یې د هغوی له ازادېدو هر کلی کړی دی.
د طالبانو ویاند ذبیحالله مجاهد د پاکستان د بهرنیو چارو وزیر اسحاق ډار د هغو څرګندونو په غبرګون کې چې ګواکې په افغانستان کې د «ترهګرو» ډلو د موجودیت په اړه اندېښنې لري ویلي، اسلاماباد باید خپلې کورنۍ ستونزې پر طالبانو ور ونهتپي.