د هند د پوهنې وزیر د ځوانانو او محصلانو له څو ورځنیو پراخو لاریونونو وروسته د شنبې په ورځ له خپلې دندې استعفا وکړه. لاریون کوونکو له وزیر څخه غوښتنه کوله چې د طبي پوهنتونونو د داخلې د ازموینې د پوښتنو د افشا کېدو له امله استعفا وکړي.
په هلمند ولایت کې د طالبانو د اطلاعاتو او کلتور ریاست سیمه ییزو چارواکو پر رسنیو غږ وکړ چې خپل نشرات د اسلامي اصولو او ملي ګټو په چوکاټ کې برابر کړي. دوی د رسنیو ځینې مطالب «خرافات او بېبنسټه » بللي او دا کار یې د ټولنې لپاره زیانناک ګڼلی.
د طالبانو د کرنې، اوبو لګولو او مالدارۍ وزیر عطاءالله عمري په کابل کې د ترکیې له شارژدافیر ساډین اییلډیز سره کتلي او د افغان سوداګرو او ناروغانو لپاره ویزو د صادرولو بهیر اسانه کولو غوښتنه یې ترې کړې ده.
افغانستان د روان کال د پسرلي په موسم کې د اسلام کلا-دوغارون پولې له لارې ۱،۷میلیونه ټنه توکي وارد کړي دي. افغانستان ته د ایران ډېری صادرات ودانیز توکي، اوسپنه، خوراکي توکي، مېوې، سبزيجات او نفتي محصولات دي.
د افغانستان لپاره د ملګرو ملتونو ځانګړي راپور ورکوونکي ریچارډ بېنیټ په ایران کې د افغان کډوالو د اعدامولو د لړۍ پر دوام اندېښنه ښودلې او دا یې غندلې ده. هغه په ایران کې میشت افغان کډوال اغیزمنه ډله ګڼلې او وايي، ډېر وخت له سترګو پټ پاتې کیږي.
د ملګرو ملتونو سرمنشي انتونیو ګوتریش د شنبې په ورځ، د زمري په درېیمه، په یوه رسمي سفر د سوریې پلازمېنې دمشق ته ورسېد. د سوریې دولتي خبري اژانس راپور ورکړی چې د سوریې سرپرست ولسمشر احمد شرع په ولسمشرۍ ماڼۍ کې د انتونیو ګوتریش هرکلی کړی دی.
د طالبانو کورنیو چارو وزارت خبر ورکړی چې امنیتي ځواکونو یې په کابل او تخار ولایتونو کې د نشهیي توکو د قاچاق او لېږد په تور درې تنه نیولي دي. بلخوا، د کابل امنیه قوماندانۍ د غلا په تور د پنځو نورو کسانو د نیولو خبر هم ورکړی.
د هرات ولایت طالب والي مولانا اسلامجار، کابل ته په دې موخه سفر کړی چې د ازبکستان د لومړي وزیر له مرستیال، جمشید خواجهیف، او د طالبانو له یو شمېر چارواکو سره د هرات د بنسټیزو پروژو او اقتصادي همکاریو په اړه خبرې وکړي.
د بښنې نړیوال سازمان د سویلي اسیا څانګې ویلي، د پاکستان تر ولکې لاندې کشمیر کې خلکو د تېرو ۵۰ ورځو پر مهال د انټرنېټ له بندیزونو، پراخو نیونو او د تګ راتګ په محدودیتونو کې ژوند کړی دی.
د خیبر پښتونخوا د سویلي وزیرستان په واڼه سیمه کې د پاکستاني ځواکونو پر یوې امنیتي پوستې په موټربم برید کې ځانمرګی بریدګر وژل شوی، یو ځايي اوسېدونکی ټپي شوی او د سیمې ځینو کورونو ته هم زیان اوښتی دی.
د طالبانو لوړو زدهکړو وزیر ندا محمد ندیم، ویلي چې د جمهوري نظام او د طالبانو د اوسني نظام ترمنځ اساسي توپیر دا دی چې د ده په وینا، د جمهوریت ځینې قوانین او پالیسۍ د اسلامي شریعت خلاف وې، خو اوسنی نظام پر قران او حدیث ولاړ دی او ټول اوامرو څخه یې باید اطاعت وشي.
ملګرو ملتونو ویلي، د افغانستان په نورستان ولایت کې وروستیو سختو ناڅاپي سېلابونو د ځاني زیانونو تر څنګ پراخ مالي او بشري زیانونه اړولي دي.
واسکونسن مسلم ژورنال د ګارډین ورځپاڼې له قوله یوه راپور کې لیکلي، چې د طالبانو له واکمنېدو نږدې پنځه کاله وروسته د افغانستان د لوړو زده کړو نظام له جدي ستونزو سره مخ شوی او محصلان باور لري چې پوهنتونونه د خپل اصلي علمي رسالت څخه لرې شوي دي.
د خیبر پښتونخوا په سویلي وزیرستان کې د پاکستاني ځواکونو پر یوې امنیتي پوستې موټربم برید شوی، چې له چاودنې وروسته د ډزو د تبادلې غږونه هم اورېدل شوي دي.
پاکستانۍ ورځپاڼې ډان په یوه تحلیلي راپور کې ویلي چې د طالبانو حکومت، چې ځان یو موټی او پیاوړی نظام معرفي کوي، اوس له ژورو کورنیو اختلافونو، اقتصادي ستونزو او زیاتېدونکو سیمهییزو فشارونو سره مخ دی او د اوږدمهاله ثبات وړتیا یې تر پوښتنې لاندې راغلې ده.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی چې د روان کال د چنګاښ میاشتې په ترڅ کې ۱۴ زره او ۵۳۹ افغان کورنۍ، چې د غړو شمېر یې ۹۷ زره او ۲۷۷ تنو ته رسېږي، له ایران او پاکستان څخه افغانستان ته جبري ستنې شوې دي.
ننګرهار کې د طالبانو رسنیز دفتر خبر ورکړی چې د دغه ولایت د عامې روغتیا د څارنې ټیم جلالاباد ښار او یو شمېر ولسوالیو کې ۱۳ کلینیکونه تړلي دي.
امریکایي ورځپاڼې نیویارک ټایمز پخوانی خبریال او د امریکا پخواني سمندري ځواک سرتېري توماس ګیبنز نیف په یوه شخصي لیکنه کې ویلي، له هغه طالب قوماندان سره یې لیدلي چې د افغانستان د جګړې پر مهال یې ورسره مخامخ جګړه کړې وه.
د طالبانو عدلیې وزارت خبر ورکړی، چې د یادې ډلې د مرکزي زون غصب شویو ځمکو ته د رسېدنې ځانګړې محکمې په کابل ښار کې ۲۵ جریبه او ۶۵۳ بسوې ځمکه دولتي ملکیت پېژندلې او اعلان کړې ده.
هرات ولایت کې د طالبانو سوداګرۍ خونې ویلي، د هرات–خواف اوسپنې پټلۍ له لارې د افغانستان او ایران ترمنځ سوداګریزه راکړه ورکړه د پام وړ زیاته شوې ده. د دوی په وینا، د روان کال په لومړیو درېیو میاشتو کې له دې اوسپنیزې کرښې افغانستان ته تر ۳۰۰ زره ټنو ډېر سوداګریز توکي لېږدول شوي دي.
د طالبانو د امر بالمعروف وزارت وايي، د ۱۴۰۵ لمریز کال په چنګاښ میاشت کې یې د ښځو د حقونو په تړاو ۳۸۸ قضیې حل کړې دي؛ خو د دې وزارت د فعالیتونو په خپاره شوي راپور کې د ښځو پر وړاندې د پراخو محدودیتونو، د هغوی د اساسي حقونو د نقض په اړه وضاحت نه دی ورکړل شوی.