په ننګرهار کې د طالبانو د اطلاعاتو او فرهنګ ریاست د اطلاعاتو امر صديقالله قريشي ویلي، چې د دغه ولایت په جلالاباد ښار کې د یوه کور چت پرېوتو له امله د یوې کورنۍ پنځه غړي مړه او یو بل کس ټپي شوی دی.
د ایران د پوځ د عامه اړیکو دفتر د جمعې په ورځ (د زمري ۲مه) اعلان وکړ، چې څو ساعته وړاندې یې په کویټ کې د امریکا د پوځ پر اډو ډرون بریدونه کړي دي. تراوسه د امریکا او کویټ چارواکو د ایران د پوځ د دغه ادعا په اړه رسمي څرګندونې نهدي کړې.
له څه باندې ۴ میاشتو راهیسې د طالبانو لهخوا په عام محضر کې د میداني سزاوو د عملي کېدو کومه پېښه نهده ثبت شوې. خو سرچینې وایي، په همدې موده کې طالبانو د خپلې نوې پالیسۍ له مخې خلکو ته په پټه سزاوې ورکړې دي.
په خېبر پښتونخوا کې (د جولای له ۱۹مې) نېټې راهیسې د سختو ورښتونو او ناڅاپي سېلابونو له امله په بېلابېلو پېښو کې ۲۸ کسان مړه او ۲۹ نور ټپیان شوي دي. د خېبر پښتونخوا د طبیعي پېښو پر وړاندې د مبارزې ادارې په وینا؛ په مړو شویو کسانو کې ۱۰ نارینه، ۱۵ ماشومان او ۳ ښځې شاملې دي.
په بدخشان کې سیمهییزو سرچینو افغانستان انټرنشنل ته ویلي، چې په بدخشان کې د طالبانو د یوې پوستې قوماندان فریدالله وحدت له مخالفینو سره په نښته کې وژل شوی دی. د سرچینو په وینا؛ نښته د پنجشنبې په ماښام په زیباک ولسوالۍ کې پیل شوه، چې لاهم روانه ده.
سيبياېس نيوز د امریکا د پوځي او استخباراتي سرچینو په حواله راپور ورکړی، چې د تهران او واشنګټن ترمنځ د کړکېچ له زیاتېدو سره په منځني ختیځ کې د امریکا د پرمختللو هوايي دفاع سیټمونو او د هدایتشویو مهماتو چټک مصرف امریکایي چارواکي اندېښمن کړي دي.
د طالبانو د ټولګټو چارو وزارت خبر ورکړی، هغه لارې چې په پنجشېر، پروان او پکتیا ولایتونو کې د وروستیو ورښتونو او سېلابونو له امله د تګراتګ لپاره تړل شوې وې؛ بېرته پرانیستل شوې دي.
په پنجاب ايالت کې د مېشتو افغان کډوالو پرضد د عملياتو لړۍ روانه ده او د پوليسو لهخوا د پلټنو او اقداماتو بهير لا چټک شوی دی. د پنجاب د پوليسو وياند وايي، تراوسه د لاهور په ګډون د دغه ايالت له بېلابېلو سيمو ۳۶زره او ۵۴۵ افغان کډوال افغانستان ته ستانه کړل شوي دي.
د ایران د قم ولایت د ترافیکو پولیسو مشر د ۱۴۰۴ لمریز کال د لومړیو درېیو میاشتو د ترافیکي پېښو شمېرو ته په اشارې په ترافیکي پېښو کې د افغان کډوالو د مرګژوبلې زیاتېدو خبرداری ورکړی. هغه ویلي، د قم ولایت د ترافیکي پېښو څلورمه برخه قربانیان افغانان دي.
د ایران د بهرنیو چارو وزیر عباس عراقچي د قرغزستان پلازمېنه کې د شانګهای همکاریو سازمان د بهرنیو چارو وزیرانو په غونډه کې ویلي، تهران په افغانستان کې د «ټولګډونه حکومت» جوړېدو لپاره د هر نوښت ملاتړ کوي او د افغانستان ثبات یې د سیمې لپاره مهم وباله.
د خیبر پښتونخوا د ټانک ولسوالۍ په مانجهخېلو سیمه کې د پاکستاني پولیسو او پوځ پر ګډې امنیتي پوستې موټربم برید شوی، چې له امله یې درې پولیس سرتېري وژل شوي او شپږ نور کسان ټپیان دي.
د طالبانو تر واک لاندې د پېښو پر وړاندې د مبارزې ادارې ویلي، په پنجشېر کې وروستیو سېلابونو د دغه ولایت په رُخه او دره ولسوالیو کې پراخ مالي زیانونه اړولي دي. په دغه سېلابونو کې د مرګژوبلې راپور نهدی ورکړل شوی؛ خو کرنیزو ځمکو، عامه تاسیساتو او د خلکو شتمنیو ته زیانونه اوښتي دي.
د طالبانو ویاند ذبیح الله مجاهد یو وار بیا غوښتنه کړې، چې په ملګرو ملتونو کې د افغانستان څوکۍ باید دوی ته وسپارل شي. اوسمهال دغه څوکۍ د افغانستان د پخواني حکومت د استازي نصیراحمد فایق په لاس کې ده او ملګري ملتونه د مشروعیت معیارونو د نشتوالي له امله د طالبانو غوښتنه نه مني.
د ملګرو ملتونو د حقیقت موندنې خپلواکې کمیټې له ایراني چارواکو غوښتي، د هغو ۱۰ کسانو د اعدام حکمونه سملاسي ودروي چې د اصفهان ښار د اعتراضونو په تړاو نیول شوي او پر اعدام محکوم شوي دي.
د کابل د خېرخانې سیمې یوه اوسېدونکي افغانستان انټرنشنل ته د یوې ويډيو په لېږلو سره ویلي، چې یاده سیمه د اوبو له سخت کمښت سره مخ ده. د نوموړي په خبره؛ هره ورځ د سیمې اوسېدونکي د اوبو ترلاسه کولو لپاره په اوږدو کتارونو کې ولاړ وي.
د پاکستان د فدرالي پلټنو ادارې (اېفایاې) د دغه هېواد د پنجاب ایالت د سرګودها د بهلوال په نادرا دفتر کې د افغان کډوالو لپاره د جعلي شناختي کارټونو جوړولو په تور د یاد دفتر درې کارکوونکي نیولي دي.
د طالبانو د کډوالو او بېرته راستنېدونکو چارو وزارت ویاند عبدالمطلب حقاني خبر ورکړی، چې په تېرو نږدې پنځو کلونو کې له ایران، پاکستان، ترکیې او نورو هېوادونو تر اته مېلیونه ډېر افغان کډوال افغانستان ته ستانه شوي دي.
د کابل یوه اوسېدونکي په دغه غږیز پیغام کې ویلي، چې په پلازمېنه کې د کورونو کرایې خورا لوړې شوې دي. د هغه په وینا؛ د طالبانو لهخوا د کورونو له لوړو کرایو هیڅ څارنه نهکېږي او دغه چارې پر کورنیو اقتصادي فشارونه لازیات کړي دي.
د ایران له اصفهان نه یو افغان کډوال افغانستان انټرنشنل ته په لېږلي غږیز پیغام کې ویلي، چې په ښوونځيو کې لوړو فیسونو یې ماشومان له زدهکړو د بېبرخې کېدو له ګواښ سره مخ کړي. هغه زیاته کړې، چې د کډوالۍ په نوم کار نهشي موندلی او ژوند یې ورځ تر بلې له کړاو سره مخ کېږي.
د خیبر پښتونخوا د کوهاټ ولسوالۍ ټنل ته څېرمه ناپېژاندو وسلهوالو د ګمرک پر یوې پوستې برید کړی او د ګمرک سرتېرو موټر یې هم په نښه کړی دی. په برید کې د ګمرک یو سرتېری وژل شوی او یو بل سخت ټپي دی.
د طالبانو تر واک لاندې د دولتي شرکتونو عمومي ریاست وایي، د روان کال په لومړیو څلورو میاشتو کې د افغان ټوور شرکت له لارې ۱۵۴۰ بهرني سېلانیان د افغانستان بېلابېلو ولایتونو ته د سیاحت لپاره تللي دي.