په نیمروز ولایت کې ځايي سرچینو افغانستان انټرنشنل ته وویل، چې له نږدې یوې اونۍ راهیسې ددغه ولایت په چهاربرجک سرحدي ولسوالۍ کې په څلورو موټرو کې سپاره ۶۵ افغان مسافر لادرکه دي. د سرچینو په وینا، په دې لاره افغان ځوانان ایران او پاکستان ته په قاچاقي ډول سفر کوي.
د پاکستان د پنجاب ایالت په ساهيوال کې درې ملایان له یوې ماشومې سره د جنسي تېري په تړاو نیول شوي دي. پولیس وايي، د پېښې په اړه له یوې ویډیو وروسته پلټنې پیل شوي او د قضیې د ټولو اړخونو په اړه بېطرفه څېړنه روانه ده.
طالبان ټینګار کوي چې په افغانستان کې د ښځو ټول حقونه د اسلامي شریعت په چوکاټ کې خوندي دي، خو نړیواله ټولنه، د بشري حقونو بنسټونه او د اسلامي نړۍ ځینې هېوادونه د ښځو پر زدهکړو، کار او ټولنیز حضور لګېدلي محدودیتونه له اسلامي اصولو او د ښځو له حقونو سره په ټکر کې بولي.
د سره صلیب نړیوالې کمېټې (ای سي ار سي) په مزارشریف کې له افغان سرې میاشتې ټولنې سره په ګډه له ۴۰۰ زیانمنو امیندواره او شیدې ورکوونکو ښځو سره نغدي مرسته کړې، څو خپلې بېړنۍ اړتیاوې پوره او د ځان او ماشومانو تغذیه ښه کړي.
اروپايي ټولنې په بامیانو کې د قوم نوک کلي د ځوانانو د غوښتنې له مخې د والیبال یو لوبغالی جوړ کړی او وايي، ورزش د ځوانانو د روغتیا، رواني هوساینې او راتلونکي لپاره پانګونه ده.
د ۲۰۲۶ کال فوټبال نړیوال جام پایلوبه نن د امریکا د نیوجرسي ایالت په «میټ لایف» لوبغالي کې د هسپانیې او ارجنټاین ترمنځ ترسره کېږي.
افغانستان کې د ملګرو ملتونو د کډوالو عالي کمېشنرۍ (UNHCR) له اسلامیک ریلیف موسسې څخه د ډیورنډ کرښې ته څېرمه سیمو کې د افغان راستنېدونکو د ملاتړ او مرستو له امله مننه کړې او د هغوی مرستې یې په اوسني شرایطو کې ژوند ژغوزونکي بللي دي.
د طالبانو د بهرنیو چارو وزارت د کوکنارو د کښت د منعې په اړه د طالبانو د مشر هبتالله اخوندزاده د ۳۱مې ګڼې فرمان د تشریح په غونډه کې پر همغږۍ او د فرمان د احکامو پر بشپړ عملي کېدو ټینګار کړی دی.
په خیبر پښتونخوا کې د افغان کډوالو پر ضد عملیات پراخ شوي او د استوګنځایونو له تخلیې او نړولو وروسته سلګونه افغان کورنۍ د لنډي کوتل حمزه بابا کمپ ته انتقال شوې دي. کډوال وايي، د کلونو ژوند، کورونه او کاروبارونه پرېږدي، خو په افغانستان کې د نوي ژوند د پیل لپاره کافي امکانات نه لري.
د طالبانو تر واک د المپیک بدني روزنې او سپورت عمومي ریاست ویلي چې افغان لوبغاړي مصطفی وکیلي د جوجیتسو نړۍوالو سیالیو کې د ۶۹ کیلوګرام وزن او فول کانټکټ سبک په برخه کې د برونزو مډال ترلاسه کړی.
د ګوزڼ د له منځه وړلو نړیوال نوښت ویلي، افغانستان کې په تېره یوه اوونۍ کې د وحشي پولیو ویروس څلور نوې مثبتې پېښې ثبت شوي چې دوه یې په ننګرهار، یوه په هلمند او یوه هم په هرات ولایت کې دي. له دې سره په ۲۰۲۶ کال کې د ګوزڼ ټولې ثبت شوي پېښې ۱۱ ته ورسېدې.
د طالبانو د عدلیې وزارت په یوه اعلام ویلي چې د ځمکو د غصب مخنیوي او بېرته راګرځولو کمېسیون د سمنګان مرکز ایبک او اتو ولسوالیو کې ټولټال ۳ میلیونه او ۷۰۸ زره او ۶۶۵ جریبه عامه څړځایونه تثبیت کړي او د ځمکو په بانک کې یې ثبت کړي دي.
پښتون سیاستوال افراسیاب خټک وايي، پاکستان په افغانستان کې د تېرو پنځو لسیزو پوځي سیاستونو له امله له رامنځته شویو ستونزو سره سره اوس په منځني ختیځ کې هم په سیاسي او پوځي فعالیتونو کې ښکېل شوی، چې د هغه په باور دا کار ښايي پاکستان له یوه «وجودي ګواښ» سره مخ کړي.
د طالبانو تر واک لاندې د افغانستان بانک وایي، سږ کال یې د هېواد په کچه د ۲ میلیاردو او ۵۴۱ میلیونو او ۶۴۵ زرو افغانیو په ارزښت زاړه بانکنوټونه راټول او سوځولي دي. دغه بانک ویلي، په همدې موده کې د پیسو د ټولیز ګردښت ارزښت ۴۰۹ میلیاردو افغانیو ته رسېدلی دی.
د پاکستان په لاهور کې د یوې امریکايي مېرمنې او د هغې د درېیو ماشومانو د مړینې قضیه د پولیسو په مدعیت کې ثبت شوې او د پېښې د څرنګوالي په اړه پلټنې روانې دي.
اروپايي ټولنې په خپل تازه راپور کې ویلي، پاکستان د عمومي ترجیحي سوداګریز امتیاز (جي اېس پي پلس) د دوام لپاره د بشري حقونو او ښې حکومتولۍ په برخه کې خپلو ژمنو په بشپړه توګه عمل نه دی کړی او په ځینو برخو کې وضعیت لا پسې خراب شوی دی.
د طالبانو د کرنې، اوبو لګولو او مالدارۍ وزارت وايي، له ترکیې سره یې د افغانستان د کرنې او مالدارۍ د سکټور د پیاوړتیا، د کرنیزو پروژو د پراختیا او د همکاریو د زیاتولو په اړه خبرې کړې دي.
د خیبر پښتونخوا په بنو، ښکته جنوبي وزیرستان او ډېره اسماعیل خان کې د امنیتي ځواکونو او د ترهګرۍ ضد ادارو په بېلابېلو استخباراتي عملیاتو کې پنځه وسلهوال وژل شوي او ۲۸ شکمن کسان نیول شوي دي.
یورېشیا ریویو په یوه تحلیلي مطلب کې لیکلي چې د بدخشان د یفتل پایین ولسوالۍ د مرکز لنډمهاله نیول او د طالبانو د ځواکونو بېوسلې کېدل ښيي چې د طالبانو پر واکمنۍ د وسلهوالو مخالفتونو، داخلي اختلافونو او پراخو سیاسي او ټولنیزو نارضایتونو فشار مخ په زیاتېدو دی.
پاکستان د چین بازار ته د خرو د غوښې لومړۍ تجارتي محموله صادره کړې ده. د راپورونو له مخې، له ګوادر د ازادې سوداګریزې سیمې څخه درې اوونۍ مخکې استول شوې ۲۷ ټنه کنګل شوې غوښه لرونکی کانټینر چین ته رسېدلی او بازار ته وړاندې شوی دی.
د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، چې تېره ورځ (د چنګاښ ۲۷مه) ۸۲۹ کډوالې کورنۍ چې ټول ۴۴۱۵ کسان کېږي، له ایران او پاکستان نه افغانستان ته ستانه شوې دي.