د امریکا د بهرنیو چارو وزیر مارکو روبیو متحده عرب اماراتو، کویت او بحران ته ځي، چې د ایران له هوکړې وروسته له خپلو خلیجي متحدینو سره خبرې وکړي. نوموړی به په په دغه سفر کې له خپلو متحدانو سره د ایران د هوکړه لیک، د هرمز تنګي امنیت او د سیمې د ثبات موضوع وڅیړي.
د اوکراین پوځ ویلي چې د دوشنبې په ورځ یې د روسیې په ورونژ سیمه کې هغه فابریکه په نښه کړې چې د توغندیو لپاره برېښنايي پرزې تولیدوي. د اوکراین د عمومي قوماندانۍ په وینا، په دغه برید کې کروز توغندي کارول شوي دي.
د امریکا مرستیال ولسمشر جي ډي وېنس ویلي، له ایراني چارواکو سره په سویس کې شویو خبرو د یوې دایمي هوکړې لپاره ښه بنسټ اېښی او دواړو لورو موافقه کړې چې په راتلونکو ۶۰ ورځو کې د وروستۍ هوکړې لپاره پر یوې نقشې کار وکړي.
د رویټرز د راپور له مخې د هرمز تنګي له لارې د سوداګریزو کښتیو تګ راتګ له ورو کېدو وروسته بېرته مخ په زیاتېدو دی. ویل کیږي د قطر څلور د طبیعي ګازو کښتۍ د دوشنبې په ورځ له تنګي تېرې شوې او د نفتو څو نورې کښتۍ هم خلیج ته داخلې شوې دي.
د بښنې نړیوال سازمان پر اروپايي ټولنې او د هغې پر غړو هېوادونو غږ کړی چې افغانستان ته د افغان کډوالو د ایستلو پلانونه پرېږدي او له طالبانو سره د بېرته ستنولو په برخه کې هر ډول همکاري پای ته ورسوي.
د طالبانو مشر هبتالله اخوندزاده په یوه مکتوب کې، چې افغانستان انټرنشنل ترلاسه کړی، په ملکي ادارو کې د پخوانیو مامورانو پرځای د بېبرخلیکه طالبانو د ګومارلو وړاندیز منظور کړی دی. په مکتوب کې ویل شوي، چې «دا کسان مجاهدین نه دي او پرځای یې باید مجاهدین او ډلګي مشران وګومارل شي».
د ننګرهار ولایت یو شمېر اوسېدونکي ادعا کوي چې د جلالاباد ښاروال قاري بسم الله بلال که څه هم څو ځله له خپلې دندې بدل شوی، خو د دوی په وینا، «د طالبانو دننګرهار د والي او د کورنیو چارو وزارت معیین د ملاتړ له امله په خپل مقام پاتې دی او خپل په فساد ککړ څلور ملګري یې هم ګومارلي دي».
د هند د اترپردېش ایالت د لکنهو ښار په یوه ښوونیز مرکز کې د اورلګېدنې له امله لږ تر لږه اته کسان مړه شوي، خو ځینو رسنیو د قربانیانو شمېر ۱۴ تنه ښودلی دی.
افغانستان انټرنشنل - پښتو ته د طالبانو د دفاع وزارت د دوو سرچینو منلې چې د «هبتي قطعې» په نوم د ۸۰۰۰ کسیز ځانګړي ځواک د جوړېدو بهیر روان دی، چې تمویل، روزنه او پوځي تجهیزات به یې د روسیې لهخوا برابر شي. سرچینې وايي چې دا قطعه به د داعـ..ش پر ضد عملیات کوي.
د سرپل ولایت یو شمېر اوسېدونکي وایي چې د څښاک اوبو له سخت کمښت سره مخ دي او د اوبو د ترلاسه کولو په بدل کې طالبان ترې د هر کور پر سر ۲۰۰۰ افغانۍ اخلي. دوی ادعا کوي چې د اوبو نللیکه بنده شوې او خلک له جدي ستونزو سره مخ دي.
باخبره سرچینو افغانستان انټرنشنل ته وویل چې د طالبانو د بهرنیو چارو وزارت د ویاند عبدالقاهر بلخي په مشرۍ پنځه کسېز پلاوی سبا له ترکیې نه بروکسل ته رسېږي. د سرچینو په وینا، اروپايي اتحادیې د طالبانو پلاوي ته یوازې درې ساعته وخت ور کړی او ناسته یې هم د شپې کیږي.
سره له دې چې افغانستان په ۲۰۲۵ کال کې نږدې ۱۳ زره ټنه کبان په کور دننه تولید کړي، خو لا هم د ۲۵ میلیونه ډالرو په ارزښت کبان واردوي. د کبانو فارم لرونکي وایي، چې له پاکستان سره د لارو له بندېدو وروسته اوس دوی له تاجکستان نه د کبانو بچي واردوي.
د هرات په تورغونډۍ بندر کې پر ۲۰ جریبه ځمکه جوړ شوی نوی باروړونکی ټرمینل چې د پنځه میلیونه افغانیو په ارزښت جوړ شوی، ګټې اخیستنې ته سپارل شوی. د طالبانو د هرات د تورغونډۍ بندر مسوولانو ویلي، چې له ترکمنستان څخه افغانستان ته داخلېدونکي موټر به په دغه ټرمینل کې تم کېږي.
قزاقستاني شرکت «کونسنګ ټېکنالوجي» د طالبانوله عامې روغتیا وزارت سره د ۴۵ میلیونه ډالرو په ارزښت قرارداد لاسلیک کړی، چې له مخې به یې افغانستان ته ۴۵۰۰ ځانګړي طبي «سویټ کیسونه» ورکړل شي څو په لرې پرتو سیمو کې د ټېلې مېډیسن له لارې د تشخیص او درملنې خدمات پیاوړي شي.
د پاکستان په ملي شورا کې د تحریک انصاف ګوند غړي اسد قیصر ویلي، له افغانستان سره د لارو تړل پاتې کېدو او د سوداګریزو فعالیتونو پر وړاندې د شته ستونزو د حل په موخه په جولای میاشت کې لویه جرګه جوړېږي.
سرچینو د دوشنبې په ورځ افغانستان انټرنشنل ته وویل چې طالبانو تېره شپه په کابل کې د محرم بیرغونو د پورته کولو په تور ۹ تنه له جوماتونو او تکیهخانو نیولي دي. د سرچینو په وینا، دا کسان د طالبانو د عدلیې وزیر عبدالحکیم شرعي په لارښوونه نیول شوي دي.
د بلوچستان د ترهګرۍ ضد یوې محکمې د بلوڅانو د یووالي غورځنګ مشرې ماهرنګ بلوڅ ته د «اېفسي» یوه سرتېري د وژنې اړوند قضیه کې د عمري بند سزا واوروله. د محکمې د پرېکړې له مخې؛ د ګوادر غونډې پرمهال د ډبرو وېشتلو پېښه کې یاد سرتېری لومړی ټپي او وروسته یې د سختو ټپونو له امله ساه ورکړه.
د ایران د سپاه پاسداران اړوند تسنیم خبري اژانس راپور ورکړی، چې د محمدباقر قالیباف په مشرۍ ایرانی پلاوی د دوشنبې په ورځ (د چنګاښ لومړۍ نېټه) له شاوخوا ۱۸ ساعتونو پرلهپسې خبرو او سلامشورو وروسته له سویس نه تهران ته ستون شوی دی.
د طالبانو د دفاع وزارت ویاند د جون د میاشتې په نولسمه نېټه ادعا کړې ده چې د هغوی بې پیلوټه الوتکو په بلوچستان او پښتونخوا کې د داعـ.ش په پټ ځایونو بریدونه کړي دي.د بریدونو هدف د بلوچستان د قلعه عبدالله ګلستان، د چاغي ګردی ځنګل او د پښتونخوا د اورکزۍ ولسوالۍ قمبرخېل سیمه ګڼل شوي.
د طالبانو د ریاستالوزرا اقتصادي مرستیال ملا عبدالغني برادر په کابل کې د قطر له سفیر مردف القاشوطي سره د اقتصادي همکاریو، پانګونې او یوشمېر سیمهییزو مسایلو په اړه خبرې کړې دي.
په کابل کې د طالبانو امنیې قوماندانۍ خبر ورکړی، چې د غلو یوه اووه کسیزه ډله یې نیولې ده. د یادې قوماندانۍ په خبرپاڼه کې چې د دوشنبې په ورځ (د چنګاښ لومړۍ نېټه) خپره شوې راغلي، چې یادې ډلې له کورونو او صرافانو څخه غلاوې کولې.